Momil Noqyal'ae hoq hoqmae mael'ae do'li lye moqheilheil biq
7
Yeheqhuaq Noqyal'ae gee biq: "Yaeqmeel dyeqdeel e cholyaeqhael onglci'ae, ngaeq e yiqsiboq'ae gongyil e cholyaeq laoq nol qiq hhaeq wae. Tyulkaol, nol kaol notoq qiq haoq myel hoq hoqmae mael'ae do'li gil. 2 Shol e jyeqyaeqhael, nol hae qiqsheel eiq aeqpyul siq yaeq aeqmae siq yaeq sheeq hhei; maeqshol e jyeqyaeqhael, nol hae qiqsheel eiq aeqpyul qiq yaeq aeqmae qiq yaeq sheeq hhei. 3 Mqmae e haeqzilhael, hae qiqsheel eiq aeqpyul siq yaeq aeqmae siq yaeq sheeq hhei, milcaeq taq'ae bi dyeqdeel maoqhhae, tyulnye laol, ael'yuq maq myeyil kiq wae. 4 Siq nao aeqnaol laoq, ngael mqkiq mqnao myel milcaeq taq'ae vuq'yel yuqqyel nao yelgae hhei maoq, ngaeq lye haelzongldu hhei hael milgee taq ae'lye zonglmye maoq." 5 Noqyal Yeheqhuaq haelmillye moqheilheil biq laol haelmillye zongl vae.6 Haqmeq eeldeel deelmae mael milcaeq'ae deel lael fu, Noqyal koqhael (600) hoq zoq vae. 7 Noqyal, yoqhhaeq e yaqyohael, yoqhhaeq e haeqmiq kaol yoqhhaeq nyegael qiqgael baelzhol e keeqmaehael gilzuqmyel hoq hoqmae vae do'li, kaol haqmeq eeldeel deelmae mael'ae hoqhhaqzaq li gil. 8 Shol e jyeqyaeqhael, maeqshol e jyeqyaeqhael, haeqzilhael kaol gilzuqmyel milcaeq taq'ae congni e yodyeqhael, 9 Gilzuqmyel aeqpyul aeqmae qiqzul qiqzul lye Noqyal tyuqvae lael'ae, kaol hoq hoqmae mael'ae do'li vae. Xihael gilzuqmyel Momil Noqyal'ae moqheilheil biq laoqmyel hhae. 10 Tyu siq nao zhoq gol hhei'laol, haqmeq eeldeel deelmael mael milcaeq vae yo'lael vae. 11 Noqyal koqhael (600) hoq e tyu qiq hoq'ae, el'yu qyelsiq nao e tyu qiq nao, hhalnaqmyel e eelbi gilzuqmyel dilbyeq du'lal, mqmae e eelcuq zaqfaq mael gilzuqmyel pong'lael vae. 12 Vuq'yel yelmae milcaeq taq'ae mqkiq mqnao myel yuqqyel nao yelgae hhei vae.
13 Tyuqfu qiq nao, Noqyal, yoqhhaeq e yaqyo Sanq, Hanq, Yaqfuq, yoqhhaeq e haeqmiq kaol keeqmae suq nulhhaeq gilzuqmyel hoq hoqmae mael'ae do'li vae. 14 Yoqhhaetoq, maeq qiqsheel e byeldongl jyeqyaeqhael, maeq qiqsheel e laoqhaol jyeqyaeqhael, milcaeq taq'ae maeq qiqsheel e congni e yodyeqhael, maeq qiqsheel e haeqzilhael, kaol aeldongl cuq e yodyeqhael, 15 Kaol gilzuqmyel Noqyal tyuqvae keellael, kaol hoq hoqmae mael'ae do'li vae; aeqyil kaol saeq'ol za hael laoq gilzuqmyel qiqzul qiqzul lye do'li vae. 16 Yeheqhuaq Noqyal'ae moqheilheil biq laoqmyel, ruqtiq za hael aeqpyul qiq yaeq aeqmae qiq yaeq lye hoq hoqmae vae do'li hhei'laol, Yeheqhuaq lye hoq hoqmae e oheiq mael piqtyeq hhei vae.
Haqmeq eeldeel deelmae lye milcaeq mael naqvuq byel vae
17 Eellyeq lyeqmae milcaeq taq'ae yuqqyel nao lyeq vae; eelcuq mael maqqyemyel naq da'lal fu, eelcuq lye hoq hoqmae mael byuqqei da hhei vae, tyulkaol, hoq hoqmae mael milcaeq taq ae'lye qei'lael vae. 18 Eelcuq guaeq'ei heeq, kaol milcaeq taq'ae nae'naemyel naq da'lal, hoq hoqmae mael eelcuq taq'ae haeqvae lael'ee myel bul. 19 Eelcuq mael milcaeq taq'ae nyeq'ei ta nyeq'ei hhal naq lal, mqmae holhhaqboq e geeqzhoq zhoqmaehael gilzuqmyel naqvuq byel vae. 20 Eelcuq heeq li aeqkaol, gilzuqmyel geeqzhoqhael taq'ae qi miq hhael maol da'li aeqwae, kaol geeqzhoqhael gilzuqmyel naqvuq byel vae. 21 Ruqtiq za e milcaeq taq'ae gilzuqmyel congnihael, haeqzilhael, laoqhaol jyeqyaeqhael, byeldongl jyeqyaeqhael, milcaeq taq'ae dongni e mildi'lye yodyeqhael kaol haelzhol cholyaeqhael gilzuqmyel sil byel vae. 22 Milgee taq'ae haelzhol e naelbyu maellye saeq'ol du e yodyeqhael gilzuqmyel sil byel vae. 23 Yeheqhuaq lye milcaeq taq e gilzuqmyel dyeq hael, cholyaeqhael ae'lye mael laoqhaol jyeqyaeqhael, congni e yodyeqhael, mqmae e haeqzilhael keellye, gilzuqmyel zonglmye byel vae. Noqyal kaol yoqhhaeq nyegael hoq hoqmae taq'ae qiqgael baelzhol hael bi dyeqdeel dyul wae. 24 Eelcuq heeq li aeqkaol, milcaeq taq'ae qiqhael ngaeqqyel (150) nao za wae.