Haqmeq eeldeel deelmae mael suqyil vae
8
Momil laoq Noqyal kaol yoqhhaeq nyegael hoq hoqmae vae, qiqgael zhol gil e byeldongl jyeqyaeqhael, laoqhaol jyeqyaeqhael vae nyuq tulli biq. Kaol Momil lye zaeqxil mael milcaeq vae bi bo, kaol eelcuq mael aeqyae aeqyae'lye suqyil vae. 2 Hhalnaqmyel e eelcuq e eelbihael kaol mqmae e eelcuq zaqfaq mael gilzuqmyel piqtyeq vae, kaol mqmae ae'lye yelgae hhei e aeq'yel yelmae mael qye'li vae. 3 Eelcuq mael milcaeq taq ae'lye aeqyae aeqyae'lye suqyil vae, qiqhael ngaeqqyel (150) nao fu, eelcuq mael suqgayil vae. 4 Qiq'yu qyelsiq nao, hoq hoqmae mael Yalla'lal e geeqzhoqhael vae tinq deelhhei vae. 5 Shiq'yu keellye eelcuq mael maqqyemyel suqgayil wae siq, shiq'yu e laefuq fuqli e qiq nao, geeqzhoqhael e vuqduq mael mol du'lal vae.6 Yuqqyel nao aeqnaol, Noqyal laoq aeqyoq lye zongl hhei e hoq hoqmae e maekael gonglbyu mael diqpong hhei, 7 Ha'na qiq yaeq pyeqdu hhei. Milcaeq e eelcuq mael gee yil fu keellye, ha'na tyu qiq yaeq beelpu beelda myel beel'ae. 8 Yoqhhaeq eelcuq mael suqyil kaol milgee mol du'lal vae maeqlye loq maoqlyekaol haoqhaoq qiq yaeq yol pyeqdu hhei. 9 Haeqvae eiq eelcuq cuq sholmyel hhae, kaol haoqhaoq tyu qiq yaeq hhaeqnaeq naeqhhael maeq saelpopuq hhei ongl biq'ae, kaol Noqyal e hoq hoqmae za myel'ae beelhoq laeq. Tyulkaol, Noqyal aqlaq mael tyuqdu hheikaol haoqhaoq mael niq dohoq hhei vae. 10 Yoqhhaeq yol siq nao doq vae, haoqhaoq mael hoq hoqmae ae'lye yol pyeqdu hhei. 11 Kiqsulkiqxeiq fu, haoqhaoq mael yoqhhaeq'ae tyuqvae hoqlal, myeqtu mael'ae zhoq chega hhei e zhoqcae e alpaq baq hhei. Tyulkaol, Noqyal milcaeq e eelcuq mael suqyil vae lye loq vae. 12 Noqyal siq nao yol doq vae, haoqhaoq mael pyeqdu hhei, haoqhaoq yoqhhaeq'ae tyuqvae maq hoqlal yo vae.
13 Noqyal koqhael qiq (601) hoq fu, tyu qiq hoq e zen'yu cuyiq'ae, milcaeq e eelcuq gee byel yil vae; Noqyal hoq hoqmae e piqkaeq mael diqpong hheikaol fu, milcaeq vae gee byel yil vae lye mol hhei biq. 14 El'yu niqqyel siq nao keellael, milcaeq taq'ae geesa'lye wae.
Noqyal kaol yoqhhaeq nyegael qiqgael baelzhol hael hoq hoqmae ae'lye duyi vae
15 Momil Noqyal'ae saeziq geegaeq biq, gee: 16 "Nol noq e haeqmiq, noq e yaqyohael, kaol noq nyegael qiqgael baelzhol e keeqmaehael, gilzuqmyel sheeq hheikaol hoq hoqmae ae'lye duyi maoqhhae. 17 Noq nyegael qiqgael baelzhol e ruqtiq za e aeqyil za e yodyeqhael: Haeqzilhael, laoqhaol jyeqyaeqhael kaol gilzuqmyel milcaeq vae congni e yodyeqhael nol gilzuqmyel sheeq duyi, kaol yoqhhaeteel yaol milcaeq taq'ae bi dyeqdeel kaol aelyaeq bi bo, kaol milcaeq taq'ae bi zheeqlael." 18 Tyulkaol, Noqyal duyi vae, yoqhhaeq e yaqyohael, yoqhhaeq e haeqmiq kaol yoqhhaeq nyegael qiqgael baelzhol e keeqmaehael gilzuqmyel duyi vae. 19 Gilzuqmyel byeldongl jyeqyaeqhael, gilzuqmyel congnihael, gilzuqmyel haeqzilhael, kaol gilzuqmyel milcaeq'ae congni e yodyeqhael, yoqhhaeq hae qiqsheel laol hae qiqsheel hoq hoqmae ae'lye duyi vae.
Noqyal Momil'ae baqheel biq
20 Noqyal lye Yeheqhuaq'ae jiltanq qiq mal zongl hhei biq. Maeq qiqsheel e shol e jyeqyaeq kaol haeqzil, jiltanq vae baqheel da hheikaol Pebyel Zaelheel geiqzaq. 21 Yeheqhuaq'ae nulsael lael aeqmyel shi'nul yo hhei biq laol, neemae mael'ae nyuq: "Cholyaeq meelhee'lye fu ae'lye neemae mael'ae nyuq mael laoq xinqlalmyel hhae, ngeelfeiq, ngael cholyaeq gae'lye milcaeq mael'ae doqchiq maeq gee biq vae; ngael eiq laefuq zongl yo e laoqmyel, gilzuqmyel yodyeq mael maq xyeqsil vae.
22 Milcaeq mael zadeel siq laol,
ael'yuq xeiq e naohaeq za, yeqzaeq hoq e naohaeq eiq za;
aqgaga e naohaeq za, hongl e naohaeq eiq za;
aqga baehae e naohaeq za, yel'ongl baehae e naohaeq eiq za;
mqnao za kaol mqkiq za;
xihael gilzuqmyel qiq mal aeqnaol'ae qiq mal za."