Momil e yaqyohael kaol cholyaeqhael e yaeqmiqhael
6
Cholyaeqhael milcaeq taq'ae nyeq'ei ta nyeq'ei hhael naeqlael, kaol yaeqmiq haelnaeqmyel bo gil fu, 2 Momil e yaqyohael cholyaeqhael e yaeqmiqhael zhee zhi she lye mol hhei biq, kaol haetaeq'ae mulgoq laol haetaeq yaol saelpodu hheikaol haeqmiq mul hhae. 3 Yeheqhuaq gee: "Cholyaeq e aeqhhaol laoq sil yilkiq hhae, tyulkaol, ngaeq e yohael mael cholyaeq e aeqhhaol onglci'ae haeqfu keellye maeq baelzhol gaeyil vae, ngeelfeiq, yoqhhaeq e aeqyil mael aeqgael qiqhael niqqyel (120) hoq hha dyeq keel'ae siq." 4 Tyuqfu naohaeq kaol tyuq ae'lye aeqnaol e naohaeq'ae, haeqhee heedeeq deeqmaemyel cholyaeqhael milcaeq vae zhol; Momil e yaqyohael kaol cholyaeqhael e yaeqmiqhael qiqgael ssuqza laol, yilkaeaeqnao e aeqsul eiq loq e yinxiongq bo du hhei vae.Milcaeq taq e cholyaeqhael neemae ba byel yil vae
5 Yeheqhuaq cholyaeqhael milcaeq taq'ae neemae ba byel yil vae lye mol hhei biq, naochomyel neemae onglci'ae hael nyuq hael gilzuqmyel xinqlalmyel silqinq'ae. 6 Tyulkaol, Yeheqhuaq yoqhhaeq cholyaeqhael yaol haeq zongldu maoq ngeelzhol'ae yae lye nyuqhoq li biq, kaol neemae aelnaelnael laoqmyel nael biq. 7 Yeheqhuaq gee: "Ngael ngaeq lye zonglbeibei du hhei e cholyaeqhael, laoqhaol jyeqyaeqhael, milcaeq vae congni e yodyeqhael, kaol mqmae e haeqzilhael gilzuqmyel milcaeq taq ae'lye zonglmye maoq. Ngael yoqhhaeteel yaol haeq zongldu maoq ngeelzhol'ae yae lye nyuqhoq lael laeq kaol'ae." 8 Ngeelfeiq, Yeheqhuaq e ma'ne yiqsi ae'lye endianq hhamul mael laoq Noqyal qiq hhaeq'ae.
9 Sa'oqboqhael laoq Noqyal e houldailhael'ae cuga deelhhei mael. Noqyal laoq gongyil e cholyaeq'ae, tyuqfu hoqlaq'ae qiqgiq geehhael maqza e gongyil e cholyaeq'ae. Noqyal Momil nyegael guanxil zhee meeq'ae. 10 Noqyal'ae yaqyo suq nulhhaeq du'lal biq vae, yoqhhaeteel laoq Sanq, Hanq kaol Yaqfuq'ae. 11 Tyuqfu, milcaeq taq e cholyaeqhael Momil e yiqsiboq'ae neemae ba byel yil aeqwae, kaol milcaeq taq'ae baeqlaeq'oqlye zongltyeltoq bongbyel'ae. 12 Momil milcaeq'ae chifu, milcaeq taq e cholyaeqhael neemae ba byel yil vae, ruqtiq za e cholyaeqhael milcaeq taq'ae haelzongl gil mael laoq xinqlalmyel hhae lye mol hhei biq.
Momil Noqyal'ae hoq hoqmae tongldu hhei lye moqheilheil biq
13 Momil Noqyal'ae gee biq: "Ngaeq e yiqsiboq'ae, ruqtiq za e cholyaeqhael e jyeqjuq mael keellael aeqwae, yoqhhaeteel gae'lye milcaeq taq'ae baeqlaeq'oqlye zongltyeltoq bongbyel'ae. Naelhaeq gil, ngael yoqhhaeteel yaol kaol milcaeq mael qiqgael zonglmye maoq. 14 Nol gefei aelbol maellye hoq hoqmae qiq mal tongldu hhei. Hoq mael onglci'ae yiq kongl yiq kongl lye zongldu hhei; nildu onglci myel beqyoq soda hhei. 15 Nol hoq hoqmae mael xilnye zongl maoqhhae: Hoq hoqmae mael maolduboq laoq yilbeq sanshiq san (133) miq, heeqduboq laoq elshiq el miq, gaoboq laoq shiqsan miq. 16 Hoq hoqmae piqkaeq e holhhaqboq vae suq tol kaeqlaeq zongl hhei, hoq hoqmae e oheiq mael dongqpyeq'ae zongl deelhhei; hoq hoqmae mael san cenq tongldu hhei maoqhhae. 17 Naelhaeq gil, ngael haqmeq eeldeel deelmae mael milcaeq vae bi yo'lael maoq, milcaeq taq'ae aeqyil za e saeq'ol e ruqtiq za hael zonglmye maoq; milcaeq vae halza haelzholhael aeqdilmyel hhae sil ngeelvae. 18 Ngael noq nyegael geemeeq deelhhei maoq. Nol hoq hoqmae mael'ae hha do'li'ae; nol kaol noq e yaqyohael, noq e haeqmiq kaol noq e keeqmaehael, noq nyegael hoq hoqmae mael'ae qiqgael hha do'li'ae. 19 Ruqtiq za e yodyeqhael, nol hae qiqsheel e yodyeq mael aeqpyul aeqmae qiqzul qiqzul lye hoq hoqmae'ae sheeq do'li, tyulnye laol, yoqhhaeteel noq nyegael qiqgael dyeq gayil ongl'ae. 20 Haeqzilhael hae qiqsheel laol hae qiqsheel, jyeqyaeqhael hae qiqsheel laol hae qiqsheel, milcaeq taq'ae hael congni e yodyeqhael hae qiqsheel laol hae qiqsheel, hae qiqsheel eiq qiqzul qiqzul lye, gilzuqmyel noq e tyuqvae lael maoqlye hhae, kaol yoqhhaeteel ael'yuq maq myeyil kiq'ae. 21 Nol laoq zaeqlael e maeq qiqsheel e zaeqzael mael heil'eeq deelhhei, kaol nol kaol yoqhhaeteel e zaeqzael geiq." 22 Noqyal Momil haelmillye moqheilheil biq laol haelmillye zongl vae.