218
ए मोचो मीतमन, परभु जीसु चो नाव ने तुमी सपाय के जुहार! सरासरी ने इसराएल चो धरम गुरुमन जीसु के कुरुस ने चेगाला आउर इतलेई चे नाई, हुनमन हुनचो इजित बले धरला। मानतर हुता गोटोक मनुक रये जोन जानलो कि जीसु ची सते राजा आय आउर हुन, जीसु के गुहारलो कि हुनके आपलो राज ने ठान देओ। तेबे जीसु बेर नी करलो आउर तुरते हुनके आपलो संगे नीलो।समया सरलो किरता आमी आगे चो पाठ के पढ़ुक नी सकलु। एईकाजे आजी आमी दखवां, जसन जीसु बलु रलो कि हुन आपलो आत्मा आपलेई मन-इछा ले छांडेदे आउर हुन उसने ची करलो।
44 थका-थकी मुंडे बेरा ले धरुन अड़उ पाहार ले जमाय परघन ने अंधार होउन गेली, एईकाजे कि बेर उजर देउक नी सकली,
45 मंदिर चो पड़दा मंजिगता ले दुय गोंदा होउन गेली,
मंदिर चो पड़दा जीसु चो जीवन चो चिना रये। जीसु चो आत्मा, देहें के छांडते खन महापरभु लगे एतो लोगमन के अड़ंगा लगाते रये। मंदिर चो हुन मांद पड़दा चीरी होली। एदांय महापरभु लगे एतो बाट उगाड़ा होली।
46 जीसु बड़े राग ले चिचियाउन बललो:
“ए बुआ, मय, मोचो आत्मा के तुचो हाथे सोपुन देयंसे।” आउर असन बलुन आपलो जीव छांडलो।
सूरता करा, ए नंगत खबर के गोटोक बईद लिखेसे, जोन खुबे लोगमन के मोरतो के दखलोसे। हुन जानते रये कि लोग कसन मरुआत। मनुक चो जीव जातो बेरा हुनचो आत्मा निकरतो काजे कलपडाहा होयसे। जीसु लगे रलो दुनो खंगारमन बले असने ची मोरला, मानतर हुनमन चो आउर जीसु चो मोरतो ने फरक रये। जीसु आपलो आत्मा के छांडलो। एता हुन गोटमन के धियान दियास जोन हुन बललो, “ए बुआ, मय आपलो आत्मा के तुचो हाथे सोपेंसे।” लूका लिखेसे कि हुन बड़े राग ने चिचियाउन बललो। जूहन्ना लिखेसे, ए जीत चो राग रये। सोजे हिसाब ले दखलोने मोरतो बीता बड़े राग ने चिचियाउक नी सके।
47 रोमी पलटन चो नानी मुखिया जमाय के दखुन महापरभु के सहरालो आउर बललो, “सते ए मनुक धरमाती रये।”
जीसु के कुरुस ने चेगातो जुमे रोमी पलटन चो नानी मुखिया के सोपुन रओत। हुन अचरित गोटमन दखलो आउर समजलो कि जीसु गोटोक धरमी मनुक रलो। दुसर नंगत खबर लिखु बीतामन, लिखलासे कि हुन रोमी पलटन चो नानी मुखिया जीसु के महापरभु चो बेटा आय बलुन मानलो। मोचो अंताज ने हुनचो पतेयातोर हुनके मंडली चो लोग नी बनाये, मानतर आमी हुनचो पतेयातो हाल के दखुं। हुन जीसु चो मोरना आउर हुनचो जीव उठतो बारे ने काई चे नी जानते रये। हुन जहूदी बले नी रये आउर हुनके धरम चो गियान बले नी रये। हुन भींग अंधार ने रलो। एईकाजे हुनचो पतेयातोर एचो ले आगर काय होउक सके?
48 लोगमन जोन दखुकलाय जुहुन रओत, जमाय घटलो गोटमन के दखुन कपार-छाती पेटुन गागते बोहड़ला।
जीसु चो मोरतो बेरा लोगमन के खुबे डर चेपाउ रये। नंगत खबर लिखु बीतामन ले कोनी बले जीसु चो मोरना चो बारे ने पुरा-पुरा नी लिखलासे। असन लागेसे पवितर आत्मा हुन घटलो डर-भय के लुकाली, कसनबलले हुनके दखुन कटलाउक नी होती । एता हुन बले गतसमनी पदर चो असन हाल ने रये। आमी सोजे लापी ले ची दखुक सकुंसे। आमी सोजे इतलेई बिसवास करुं कि हुन आमचो काजे मोरलो।
49 मानतर जीसु चो जान-चीन लोगमन आउर जमाय बायलेमन जोन गलील परघन ले जीसु संगे एउन रओत फयले उबा होउन दखते रओत।
जीसु चो मोड़ी के अरमतिया चो जूसुफ आपलो बनालो मोठ ने संगालो।
1कुरिंथी 15:3-4 पदमन ने पउलुस मंडली के लिखेसे, “एईकाजे मय, तुमके सबुले धियान देतो गोट के सांगले जसन मय सुनुन रले, पवितर सास्तर चो हिसाब ने जीसु किरिस्त आमचो पापमन काजे मोरलो, पाछे हुनके करपन ने संगाला आउर पवितर सास्तर चो हिसाब ने तीसर दिने जीव उठलो।”
ए नंगत खबर चो सत गोट आय।
तुमचो बिचार ने एचो काय अरथ आय? काय तुमी पतेयायसाहास कि हुन तुमचो काजे मोरलो? काय तुमी पतेयायसाहास कि हुनचो संगे तुमचो पाप के बले अमदेया काजे गाड़ला? काय तुमी पतेयायसाहास कि हुन फेर जीव उठलो आउर हुनचो संगे तुमी बले जीव उठलास। एई बिसवास आमके किरिस्त ने आनेसे बललोने महापरभु आमके किरिस्त ने दखेसे, कसनबलले हुनचो धारनिक बाटले आमी धारनिक होलु। तुमचो आउर मोचो काजे हुनी सपाय बानी आय, जेचो उपरे आमी गुमान करुंसे।
50 धरम-मंडली चो गोटोक मनुक, जेचो नाव जूसुफ रये, हुन नंगत आउर सतधरमी रये।
अरमतिया चो जूसुफ गोटोक मान पावलो मनुक रये। हुन बड़े पंच चो लोग बले रये आउर लोगमन हुनचो गोट के मानते रला। हुन एकलाय ची जीसु चो पाटेया होलो।
51 हुन जहूदीमन चो सोर आउर करलो बुतामन ले हरिक नी रये।
हुन जहूदीमन चो सहर अरिमतिया चो रतो बीता रये आउर हुन महापरभु चो राज चो बाट टाकते रये।
हुन बड़े पंच चो लोग रये, जीसु चो बारे ने फासला करतो बेरा हुन, धरम गुरुमन चो पाटेया नी होलो, कसनबलले लिखलोर आसे बड़े पंच चो फासला सबु चो राजी ले नी रली। जूसुफ धरमी आउर भगत मनुक रये। जीसु संगे भेट-घाट होलो किरता हुन हुनचो पाटेया रये। हुदलदांय पतेयातो लोगमन पुरे एतो काजे डरते रओत, जसन जीसु चो चेलामन बले पराउ रला। कुरुस ने चेगातो बेरा चेलामन लुकुन रओत। आउर हुन मनुक जेचो नाव कोनी सुनुन बले नी रला, नी डरुन पुरे ईलो। जूसुफ आउर नीकुदेमुस ची दुय झन रओत जोनमन जीसु के पतेयालो गोट के लोगमन के दखाला। नीकुदेमुस आउर जूसुफ ची जीसु चो मोड़ी के मोठ ने संगाला।
52 हुन पिलातुस लगे गेलो आउर जीसु चो मोड़ी के मांगलो।
जूसुफ चो बिसवास एदांय सपाय चो पुरे दखा देयसे। हुनचो जान-चिन पिलातुस संगे बले रली। एईकाजे हुन जीसु चो मोड़ी के हुनचो ले मांगलो।
53 हुन जीसु चो मोड़ी के कुरूस ले उतरालो आउर महांग बिती चदर ने गुंडियाउन, हुनके असन मोठ ने संगालो, जोन डोंगरी पकना ने खनु रलो करपन रली।
हुन थाने केबई कोचई मोड़ी नी संगाउन रओत।
आजी गोटोक गोट समजुक नी होयसे कि जीसु चो मोठ कांहा आसे ? दुय ठन ठान आसे जेके जीसु चो मोठ बलुआत। गोटोक हुन ठान आय जोन थाने केथोलिक आराधना घर बनलीसे। दुसर ठान सहर भाड़ा चो बाहरे आसे। मानतर मोचो बिचार ने ए दुनो थाने जीसु चो मोठ नीआय, कसनबलले हुदलदांय किरिस्त आउर पतेयातो लोग के खुबे बिरुद करते रओत। एईकाजे जीसु चो मोठ चो काई बले चिना के नी बचाला होती। एचो उपराहा रोमी राजा तीतुस चो पलटन बले जरूसलेम के पुरा सत्यानास करला। सोजे पदर चो मोठ चे बाचली, जोन एबे लोगमन चो दखतो ठान बनली। मानतर हुन थाने जीसु चो मोठ नीआय। एता काई दुक-पुछ नीआय कि जीसु चो मोठ बले हुनी थाने कोनी लगे रली। महापरभु असन काई तीज के रउक नी देये जेचो लोगमन पुजा करोत आउर हुनके जीसु ले आगर मानोत। आमी हुता बुलतो बेरा आमचो संग चो गोटोक बायले मांडी खुटा देउन हुता चो भुंय के चूमते रये आउर जोर-जोर ले गागते रये। हुन जीसु चो मोठ होले बले असन करले काई नफा नीआय। आमके तो जीवता जीसु किरिस्त चो आराधना करतोर आय जोन महापरभु चो उजा बाटे बसलोसे।
54 हुन बिसातो दिन काजे तियार होतो चो दिन रये, आउर बिसातो दिन अमरा-अमरी होते रये।
55 हुन बायलेमन जोन गलील ले जीसु संगे एउन रला, जूसुफ चो पाट-पाट गेला आउर एके बले दखला कि जीसु चो मोड़ी के कसन करपन ने संगायसोत।
जीसु आउर हुनचो चेलामन चो सेवा करतो भक्तिन बायलेमन चो गोहड़ी, हुनचो संगे सरासरी होओतले रला।
एदांय हुनचो मोरलो दिन चो बारे ने काय काजे बलाबली होतोर आय।
बाईबल ने सरसरा नी सांगलीसे। खास गोट ए आय, हुन आमचो पापमन काजे मोरलो। मानतर मोके ए समजुक होयसे, जसन बाईबल ने लिखलोर आसे, बिसातो दिन चो मुर होउ रये। एचो अरथ ए आय कि हुनचो मोरतो दिन सुकरवार रली।
जीसु चो मोड़ी के नी डसाला। नीकुदेमुस आउर जूसुफ हुनचो मोड़ी के मल-मल फटई ने गुंडेयाउन संगाला। जूहन्ना सांगेसे, हुनमन हुनचो देहें ने पचासेक किलो नंगत बास देतो तीजमन लगाला। (जूहन्ना 19:40)
56 हुनमन घरे बोहड़ला आउर नंगत बासबीती जाकमन आउर बासतेल के तियार करला आउर नियम-कानुन असन हुन बिसातो दिने सुस्ताला।
सबत चो दिन के बिसातो दिन मानते रओत।
एईकाजे हुनमन, जीसु चो मोठ थाने नी गेला।
नंगत बास देतो खुबे तीजमन के पीसुन हुनमन आगे ची तियार करु रओत।
सबत चो दिन सरतोके, जीसु चो मोड़ी के नीती हिसाब ने बास बीती तीज के घसतो काजे हुनचो मोठ थाने ईला, तेबे हुनचो मोड़ी हुता नी रये। तुमके सूरता आसे होती जीसु समोन फरीसी घरे भोज काजे ईलो बेरा गोटोक बायले हुनचो पांयमन के आंसु ले धोउन हुता माहांग बीती तेल रिकाली। ए हुनी मरियम रये जोन हुनचो मोठ थाने एउ रये।
जीसु मोठ ने कसन रतो? हुन तो जीव उठुन रये। एचो गोटोक नाई, खुबे गवईमन आसोत। हुन दुय झन चेलामन के एमाउस चो बाटे भेटु रये। हुन मरियम के पदर ने दखा दिलो। हुन दुय हार चेलामन रलो खोली ने दखा दिलो आउर सरासरी ने आपलो चेलामन के गोटोक माहान बुता सोपलो आउर पवितर आत्मा पठातो बायदा करुन बर देते सरग ने गेलो।
जीसु जीव उठतोर
हुन मोठ ने नीआय।
1 हपता चो पईल दिने, हुनमन तियार करलो महकतो तीजमन के धरुन बड़े-बियाने जीसु चो मोड़ी संगालोर करपन लगे गेला।
मय हुन बायलेमन के एई पुछुक मन करेंसे, हुनमन हुन बास देतो तीजमन के काय करला?
जूहन्ना 12:5 ने खुबे माहांग बीती बास तेल के फोकाहा नोकसान करलो काजे मरियम के दागा दिला। मानतर हुनचो बास तेल फोकाहा नी जाउ रये। मोचो बिचार ने हुनमन अचरित आउर चेत गुपलो किरता बास बीती तीज के हुताय छाड़ुन गेला होती।
2 हुनमन मोड़ी संगालो करपन चो बाटे रलो, बड़े पकना के गुचालोर दखला,
मोठ चो पकना के काय काजे गुचाउक पड़ली?
बायलेमन, जीसु के बाहरे निकरातो काजे नाई, मानतर भीतरे ओलतो काजे पकना के गुचाला।
3 हुनमन करपन भीतरे गेला आउर जीसु परभु चो मोड़ी के नी पावला।
हुन तो आगे ची जीव उठुन रलो।
4 हुनमन असन होलो के दखुन भक्याउन गेला आउर दखा, दुयझन मनुकमन बरतो-फटई के पींदुन हुनमन चो पुरे एउन उबा होला।
5 हुनमन खुबे डरुन खाले मुंडी करुन रला, तेबे हुन दुयझन मनुकमन बलला: “तुमी जीवत के मोरलोमन चो मंजिगता काय काजे डगरायसाहास?
6 हुन एता नीआय मानतर जीव उठलोसे। सूरता करा कि हुन गलील ने रलो बेरा काय बलुन रये,
7 जरुर आय कि मनुक चो बेटा पापीमन चो हाथे सोपी होउन कुरूस ने चेगाय होतोर आउर तीसर दिने मोरलो थान ले जीव उठतोर।”
8 तेबे जीसु चो गोटमन हुनमन के सूरता ईली,
एता गोटोक खास सुवाल आसे, “तुमी जीवत के मोरलोमन चो मंजी काय काजे डगरायसाहास?”
ए बायलेमन मोठ थाने काय काजे एउ रओत?
पतरस आउर जूहन्ना काय काजे मोठ लगे पराते ईला?
हुनमन जीसु चो मोड़ी के दखुक एउ रओत।
हुनमन नी पतेयाते रओत कि जीसु जीव उठलोसे।
कोनी-कोनी लोगमन चो बिचार ने जीसु चो मोरलो थान ले जीव उठलो दिन चो बिहान चो बारे ने गोटकी कटार नी लिखलासे। नंगत खबरमन के खुबे नंगत ले पढ़ले समजुक होयसे कि असन नोआय। लूका, जीसु चो मोठ थाने बायलेमन एतो गोट चो बारे ने सांगेसे आउर हुताय ठेबेसे, कसनबलले सरगदूत, हुनमन के जीसु चो गोट सूरता कराउ रये। कोनी-कोनी समया ने असन बले होउआय कि तुमी सत के दखसाहास मानतर नी पतेयायसाहास। आजी महापरभु चो बचन चो बारे ने बले मनुक संगे असने ची होयसे। जीसु आपलो चेलामन के खुबे हार बललो कि जरूसलेम ने हुनके मोरते मारदे, मानतर हुन तीसर दिने फेर जीव उठेदे। हुनमन सुनला, मानतर ए गोट के सूरता नी संगाला।
ए मोचो मीतमन, आजी आमके एताय ठेबुक पड़ेदे, कसनबलले समया सरली। एदांय आमी फेर पढ़तो थाने भेट होवां। एबे मोचो बाटले खुबे जुहार, परभु चो अस्तिर तुमचो संगे रओ।