219
ए मोचो मीतमन, तुमी सपाय के मोचो बाटले जुहार! आजी आमी लूका लिखलो नंगत खबर चो सरासरी भाग के पढ़वां। एता मोरलो थान ले जीव उठलो जीसु चो बारे ने लिखलोर आसे। ए खुबे खास गोट आय। कसनबलले एता आमके जीसु चो दिलो हुन बड़े हुकुम आउर हुन बायदा बले सूरता एयसे, जेचो नोहलोर आजी मंडली नी रती - हुन आय पवितर आत्मा चो एतोर।9 बायलेमन करपन ले बोहड़ुन ईला आउर हुन इगारा पठालो-लोगमन के आउर सपाय लोगमन के ए जमाय गोटमन के सांगला।
10 जोन बायलेमन ए गोट के *पठालो-लोगमन के सांगला, हुनमन चो नाव आय मरियम मगदलीनी, जोअन्ना आउर जाकूब चो आया मरियम आउर हुनमन चो संगे गेलो दुसर बायलेमन।
बायलेमन जीसु के मोठ ने नीआय बलुन चेलामन के सांगतो के तुमी असन बिचारसाहास कि हुनमन के कसन लागली होती?
तेबे इआ आमी दखवां हुनमन कसन होला।
11 मानतर पठालो-लोगमन के आउर दुसर लोगमन के, हुन बायलेमन चो गोट कहनी असन लागली आउर हुनमन नी पतेयाला।
तुमचो बिचार ने बायलेमन जीसु चो बारे ने गवई देते रओत, मानतर पतेयातो लोगमन ने पईल नी पतेयातो लोग, चेलामन रओत। जीसु आगे ची सांगु रये हुनचो संगे काय-काय होयदे - हुनके मारदे आउर हुन फेर जीव उठेदे।
12 तेबे पतरस पराते करपन ने गेलो आउर लोउन चदर के छांडुन काईके नी दखलो आउर जोन होउन रली, हुनचो ले अकचक्याउन आपलो घरे बोहड़लो।
जूहन्ना आपलो नंगत खबर ने लिखलोसे, हुन मोठ ने जाउन दखलो आउर तुरते पतेयालो।
मानतर पतरस भक्यालो आउर जीसु चो गोटमन के सूरता करते घर बाटे गेलो। हुन हुदलदांय नी पतेयालो।
एमाउस चो बाट ने जीसु दखा देतोर
एमाउस चो बाट खुबे खास आय, कसनबलले हुन आमचो जीव उठलो किरिस्त के भेटतो ठान आय।
13 हुनी दिने जीसु चो दुयझन चेलामन एमाउस नाव चो गांव ने जाते रओत, ए गांव जरूसलेम ले सात मील फयले रये।
एमाउस, जरूसलेम ले साड़े दसक किलो मीटर (कि.
मी.)
लापी रये।
14 हुनमन घटलो गोटमन चो बारे ने गोटेयाते जाते रओत,
15 जेबे हुनमन आपलाहान ने गोट-बात करते आउर पूछते-पचारते रओत, तेबे जीसु एउन हुनमन संगे हिंडुक मुरियालो।
16 मानतर हुनमन जीसु के चिताउक नी सकला।
ए दुनो चेलामन, जीसु चो मोड़ी हाजलो गोट गोटेयाते जाते रओत, तेबे जीसु हुनमन लगे ईलो। जीसु चो दखा देतो गोट गुलाय सहर ने गोटेयाते रओत, एके हुनमन नी पतेयाते रला। जीव उठलो जीसु हुनमन संगे रये आउर हुनमन हुनके नी चिताला।
17 आउर जीसु हुनमन के पूछलो:
“ए काय गोटमन आय जेके तुमी रेंगते-रेंगते गोटेयायसाहास आउर मुरमुरा होलासाहास?”
जीसु गोटोक सुवाल पूछलो।
18 एके सुनुन किलयुपास नाव चो गोटोक मनुक बललो:
“काय, तुय गोटकी परदेसी आस जोन आजी-काली जरूसलेम ने घटलो गोटमन के नी जानीस?”
किलयुपास चो ए सुवाल के एकलाय लूका चे लिखलोसे। जीसु चो मोरतोर आउर मोरलो थान ले जीव उठतो गोट ले जरूसलेम आकु-बुकु होउ रये। ए चेलामन पतेयाते रओत कि जरूसलेम ने असन कोनी नीआत जोन ए खबर के नी सुनलासे। अगरिपा राजा चो पुरे पउलुस, जीसु चो मोरलो थान ले जीव उठलो बारे ने बलु रये। पठालो लोग चो बुता 26:26 “अगरिपा राजा बले, जेचो पुरे मय डर नोहलो बलेंसे, ए गोटमन के नंगत ले जानेसे आउर मय पतेयालेसे कि ए गोटमन हुनचो ले नी लुकलीसे। कसनबलले ए गोटमन मंजपुर चो कोनी नी जानतो कोंटी ने नी होलीसे।”
19 जीसु हुनमन के पूछलो:
काय गोटमन?
हुनमन हुनके सांगला: “जीसु नासरतेया चो बारे ने, जोन महापरभु आउर जमाय लोगमन पुरे गोटमन आउर बुतामन ने खुबे सकत बीता अगमजानी रये,
धियान दियास, हुनमन जीसु के अगमजानी बलला, मानतर हुनमन हुनचो मोरलो थान ले जीव उठलो गोट के नी पतेयाला।
20 हुनके *पुजारीमन चो मुखियामन आउर जहूदी मुखियामन धराउन दिला कि हुनके मोरते मारतो डंड चो हुकुम होओ;
आउर हुनके कुरूस ने चेगाला।
हुनमन हुनचो मोरना चो गवई रओत।
21 मानतर आमके खुबे आसा रली कि एई, इसराएल चो राज के रोमी राजामन चो हाथ ले छंडायदे।
मानतर हुनचो मोरलो आजी तीसर दिन होलीसे,
हुनमन चो बिचार ने परभु जीसु गोटोक अगमजानी रलो, जेचोले इसराएल चो मुक्ति होतो आसा रली। मानतर हुन मोरलो। हुनमन, हुनचो गोटमन के नी पतेयाते रओत।
22 आउर आमचो संगे चो आदो बायलेमन बले आमके अचरित करुन दिलासोत, जोनमन आजी बियाने हुनचो करपन ने जाउन रला,
23 आउर हुनचो मोड़ी के करपन ने नी पावला, तेबे हुनमन बोहड़ुन एउन बलला कि हुनमन सरगदूतमन चो दरसन पावला जोनमन हुनमन के जीसु जीव उठलोसे बलुन सांगला।
हुनमन हुन बायलेमन सांगलो गोट के नी पतेयाला। हुनमन चो गोट ले जानुक होयसे कि हुन समया ने जीसु मोरलो थान ले जीव उठलो गोट के कोनी नी पतेयाते रओत। फेर बले ए दुनो चो गोट ने आसा आउर उजर दखा देते रये।
24 तेबे आमचो संगवारीमन ले कोनी-कोनी जाउन बायलेमन चो सांगलो गोट असने ची दखला, मानतर जीसु चो मोड़ी के नी पावला।”
जीसु के जीवता नी दखलोके हुन बायलेमन चो नानी असन आसा टुटली, हुनमन चो बिचार ने जीसु चो मोड़ी के हुता ले गुचाउ रओत।
25 तेबे हुन बललो:
“ए बुद नोहलो लोगमन आउर अगमजानीमन चो जमाय गोटमन के सतपतेयातोने बेर करतो लोगमन!
ए मोचो मीतमन, ए खुबे खास पद आय, जीसु आपलो मोरलो थान ले जीव उठतो बारे ने गोटेयाते रये, हुन आपलो जीव उठतो बारे ने बाईबल ले सांगलो।
हुनचो मन होले आपलो हाथे ठेचलो लोहो खुटी चो चिना दखाउक सकतो।
हुन बललो कि हुनमन के अगमजानीमन चो बचन के पतेयातोर आय। बाईबल चो बारे ने जीसु चो बिचार के धियान दियास।
एबे चो जुग, नी पतेयातो जुग आय, सियान-सजनमन असन बलुआत कि बुद बीतामन जीसु के नी पतेयाओत। खुबे लोग के ए गोट चो डर आसे कि हुनमन बाईबल चो बिसवास चो बारे ने गोटेयालेने हुनमन के जुना बिचार चो लोग आउर भकवा बलदे। मोचो बिचार ने बाईबल चो सत आउर बिसवास के नी मानतोर सयतान चो फांदा आय। परभु जीसु बललोसे, बाईबल के नी पतेयातोर मनुक चो गलती आय।
गोटोक हार मय, गोटोक सेमिनारी चो गुरुजी के आपलो कार ने अमराउन दिले, कसनबलले हुनचो कार ने पेट्रोल सरु रये। बाटे मय हुनके पूछले, बाईबल चो सत चो बारे ने तुमचो सेमिनारी चो काय बिचार आसे। हुन बललो, “तुचो बलतो अरथ आय कि बाईबल सिद आय?” मय हुनके बलले, आमी एके सरसरा करतो काजे बिचारुंसे, मानतर मोचो सुवाल बाईबल चो सत चो बारे ने रली। हुन सरसरा हव बलुक मन नी करते रये। कसनबलले हुन आपलो गियान के दखाउक मन करते रये।असन खुबे लोग आसोत जोनमन के महापरभु चो बचन काजे ढाढ़ुस करतो सकत नीआय। ए गोट सरसरा आसे कि एता परभु बाटले बचन उपरे जोर दिलोर आसे।
26 काय, ए जरुर नोआय कि किरिस्त डंड पाउन आपलो मयमा उजर ने अमरतोर?”
27 तेबे जीसु हुनमन के, मोसा आउर जमाय अगमजानीमन ले मूर करुन, आपलो बारे ने लिखलोर जमाय गोटमन के पवितर सास्तर ले अरथ समजाउन दिलो।
परभु जीसु, मोसा ले धरुन सपाय अगमजानीमन लिखलो गोटमन हुनमन के समजालो कि हुनचो मोरतोर आउर मोरलो थान ले जीव उठतोर, अगमगोट सत होतोर आय।
काय रे धनी!
मय हुता रले हुनचो गोट के सुनते!
जीसु हुनमन के बललो, “महापरभु चो बचन के समजतो काजे दुय ठन खास गोटमन आसे - सरसरा आउर खास।
पईल गोट पद 25 ने आमके सांगेसे, बाईबल के पतेयातोर।
जीसु हुनमन के बललो, “ए बुद नोहलो लोगमन आउर अगमजानीमन चो जमाय गोटमन के सतपतेयातोने बेर करतो लोगमन!” पासकल खुबे सते बललोसे, “मनुक चो गियान के पतेयातो काजे हुनके समजतोर जरुर आय, मानतर परभु चो गियान समजतो काजे बिसवास करतोर जरुर आय।” मोचो हिसाब ने कोचेई होओ गलती डगराउ बीता आउर धरम के छांडलो बीता काजे बाईबल ढाकलोर आसे। हुन खिंडिक सत गोटमन के सीखुक सके, मानतर नंगत खबर के मानतो ने चुकुन जायसे। दुसर गोट, महापरभु के पतेयातो सोज मनुक के महापरभु चो आत्मा ले गियान मिरेसे। महापरभु, हुनचो गियान चो कपाट के उगाड़ुन देयसे। आगे-जुगे चो बड़े-बड़े लोगमन, अंधार आउर बिपती ले उजर पावतो काजे धरम सास्तर चो सरन ने एते रओत। बाईबल चो इजित धरतोर नंगत बुद नोआय। जीसु, नी पतेयातो लोग के भकवा बललो! भकवा होतो ले नंगत आय कि मय आपलो बुद आउर चलाक के छाड़ुन देयंदे।
परभु बलेसे, बाईबल के समजतो काजे अचरित गियान लागुआय। मनुक चो बुद एचो भेद के समजतो लाईक नीआय। पद 45 ने लिखलोर आसे, “तेबे हुन पवितर सास्तर के समजतो काजे हुनमन चो आंईक उगाड़ुन दिलो।” 1 कुरिंथी 2:14 ने पउलुस बलेसे, “मानतर संवसारी मनुक, महापरभु चो आत्मा सांगलो गोट के नी धरे, कसनबलले हुनचो नंजर ने, ए फोकाहा गोट आय। आउर हुन मनुक हुनके समजुक बले नी सके, कसनबलले हुन गोट के परखतोर आत्मा बाटले होयसे।” कोनी-कोनी गोटमन के मनुक चो संवसारी बुद समजुक नी सके। एकलाय पवितर आत्मा ची आमके हुनके समजतो लाईक बनायसे। एईकाजे आमके असन पारथना करतोर आय, “परभु मोचो आंईक के उगाड़ुन देस कि मोके, तुचो बचन के समजुक होओ।” आमके महापरभु चो बचन सीखतो काजे नानी होतोर आय। तुमी बाईबल पढ़साहास जाले, एचो अरथ ए नोआय कि तुमी हुनके समजेसाहास बले। हुनके समजुन मन ने धरतो काजे पवितर आत्मा लागुआय।
28 इतरोने हुनमन, हुन गांव लगे अमरला जोन थाने हुनमन जाते रओत, आउर जीसु चो बेबार ले हुनमन के असन जान पड़ते रये कि हुन पुरे आउर कहांय जाउकलाय मन करते रये।
29 मानतर हुनमन असन बलुन हुनके ठेबाला, “आमचो संगे रा, कसनबलले सांज होयसे आउर बेर बसलीसे।” तेबे जीसु, हुनमन संगे रतो काजे भीतरे गेलो।
30 जिदलदांय हुन, हुनमन संगे खाउकलाय बसलो, तेबे जीसु, रोटी के धरुन धन-धन करलो आउर हुनके गोंदा करुन हुनमन के देउक मुरियालो।
31 तेबे हुनमन चो आंईक उगड़ुन गेली आउर हुनमन जीसु के चिताला, आउर जीसु हुनमन चो आंईक चो पुरे ले छंया-मया होउन गेलो।
फेर ले जीव उठलो, मयमा-मान किरिस्त आपलो लोग संगे संगत करुक मन करेसे। दुय झन चेलामन मन करते रओत कि जीसु हुनमन संगे रओ। हुन रोटी टुटातो बेरा हुनमन, हुनके चिताउ रला। भोज करतो बेरा किरिस्त चो बारे ने गोटेयातोर नंगत गोट आय। मंडलीमन ने भोज चो गोटोक नंगत समया रउआय। मानतर एबे चो मंडलीमन भोज चो समया के हांसी-खेली चो समया बनायसोत आउर किरिस्त जीसु काजे हुता काई ठान नी रयसे। परभु जीसु हुता रउन रोटी टुटातोर ची संगत आउर बर पावतो काजे नंगत आय।
32 हुनमन गोटोक दुसर ले गोटेयाउक मुरियाला आउर बलला: “जिदलदांय जीसु बाटे आमके पवितर सास्तर चो अरथ समजाते रये, तेबे काय आमचो मन ने नी भेदली?”
33 हुनमन तूरते उठुन जरूसलेम ने बोहड़ला आउर हुन इगारा पठालो-लोगमन आउर हुनमन चो संगवारीमन के गोटकी थाने जुहा होलोर भेटला।
हुनमन ए खबर सुनातो काजे तुरते जरूसलेम बोहड़ला।
34 हुनमन बलते रला, “सते परभु जीव होलोसे, आउर समोन के दखा दिलोसे।”
जीसु, पतरस के खुदे दखा दिलो, कसनबलले हुन जीसु के नी जाने बलु रये।
जीसु चेलामन के दखा देतोर
35 तेबे हुनमन बाट चो गोटमन के सांगुन दिला आउर एके बले कि रोटी के गोंदा करुन देतोदांय हुनमन कसन ने जीसु के चिताला।
36 हुनमन ए गोटमन गोटेयाते ची रओत, जीसु आपने हुनमन चो मंजिगता एउन उबा होलो, आउर हुनमन के बललो: “तुमके अस्तिर मिरो।”
37 मानतर हुनमन हरेयान होउन डरुन गेला, आउर असन बिचार करला कि कोनी भूत के दखुंसे।
आमी हुता रले आमी बले उसने ची करतु।
38 जीसु हुनमन के बललो:
“काय काजे हरेयान होयसास? आउर तुमी काय काजे दुय मन होयसास?
39 मोचो हाथमन आउर पांयमन के दखा, मय हुनी आंय।
मोके छिंउन दखा, कसनबलले आत्मा के हाड़ा आउर मास नी रयसे, मानतर मोके हाड़ा आउर मास आसे, जसन तुमी मोके दखसाहास।”
मय बला-बली होउक मन नी करें, मानतर किरिस्त चो ए मयमा देहें, मास आउर हाड़ा चेई रली। कसनबलले हुनचो लोउ कुरुस ने बहु रये।
40 असन बलते जीसु हुनमन के आपलो हाथ आउर पांय दखालो।
41 कसनबलले हरिक किरता हुनमन के पतेयाउक नी होली, मानतर अचरित करते रला, तेबे हुनमन के पूछलो: “काय, तुमचो लगे खातो काजे काई आसे?”
42 हुनमन हुनके भूंजलो मछरी चो कुटका के दिला।
43 जीसु हुनके धरुन हुनमन चो पुरे खादलो।
ए सत के खास करुन लूका ची आमके सांगेसे, आमचो मुक्ति-देउ मनुक एबे बले आसे। भात खातोर ए गोट के पक्का करेसे।
44 फेर हुन हुनमन के बललो: “ए मोचो हुन गोटमन आय, जेके मय तुमचो संगे रतो बेरा तुमके बलुन रये कि जितरो गोटमन मोसा चो दिलो नियम-कानुनमन आउर अगमजानीमन आउर भजन गीत चो कितापमन ने मोचो बारे ने लिखलोर आसे, हुन जमाय गोटमन असने ची घटतोर जरुर आय।”
45 तेबे हुन पवितर सास्तर के समजतो काजे हुनमन चो अकल-बुद के उगाड़ुन दिलो,
हुनमन हुनचो गोट के नी पतेययाउक सकला, बचन के समजतो काजे तुमके पवितर आत्मा लागेदे कि तुमचो बुद आउर मन के उगाड़ो। सोजे आत्मा चो साहरा ले ची बाईबल चो अरथ के समजुक होयसे।
बड़े हुकुम
46 आउर हुनमन के बललो: “असन लिखलोर आसे कि किरिस्त डंड पायदे आउर तीसर दिने मोरलो थान ले जीव उठेदे,
47 आउर जरूसलेम ले धरुन सपाय जातमन ने पसतातो चो आउर पाप खेमा चो खबर हुनचेई नाव ने सुनादे।
ए पदमन चो बिचार के धियान दियास। नंगत-खबर मंजपुर चो कोना-कोना ने अमरतोर आय।
जीसु पवितर आत्मा चो बायदा करतोर
48 तुमी ए सपाय गोटमन चो गवई आहास।
49 आउर दखा, जेचो बायदा मोचो बुआ करलोसे, हुन पवितर आत्मा के मय, तुमचो उपरे उतरायंदे आउर सरग ले पवितर आत्मा चो सकत पावलो नोहलोर ए सहर ले कहांय नी जाहा।”
संवसार ने गवई देतोर हुनचो नीती रली, मानतर काय गोट चो?
हुनचो मोरना चो, फेर ले जीव उठतो चो आउर हुनके पतेयालोने मुक्ति पावतो चो ।
संवसार ने गवई काजे सकत देउ पवितर आत्मा सपाय के सकत देयसे।
जीसु सरग जातोर
जीसु चेलामन के बर देतोर
50 तेबे जीसु हुनमन संगे बेतनिया गांव अमरतले गेलो, आउर आपलो हाथमन उचाउन हुनमन के बर दिलो।
51 हुनमन के बर देते, जीसु हुनमन ले गुचते गेलो आउर सरग ने उचाय होलो।
चेलामन, जीसु के सरासरी हार बर देतो रुप ने दखला। एदांय हुन संवसार चो नियाव करुक एयदे, मानतर मंडली काजे बर आनेदे। आमी हरिक आउर आसा ले हुनचो बाट दखते रतोर आय।
52 तेबे हुनमन हुनके डंडासरन करुन खुबे हरिक ले जरूसलेम बोहड़ला,
53 आउर हुनमन सरलगा मंदिर ने जुहुन महापरभु चो जय-जय करते रला।
ए लूका चो गवई आय, मोके पक्का बिसवास आसे कि एचो किरता तुमके बर मिरली।
मोचो मन धन-धन होली, मोचो बुद आउर मोचो मन-इछा, किरिस्त चो गियान ले समपुरन होली। मय जितलो आगर एके पढ़ेंसे हुतलो आगर हुनके समजेंसे। मय आसा करेंसे कि तुमचो बले एई मन-इछा आय।
परभु चो अस्तिर तुमचो संगे रओ। आमीन!