217
ए मोचो मीतमन, परभु जीसु चो नाव ने तुमी सपाय के जुहार!आगे चो पाठ ने 22 अध्या चो खिंडिक भाग बाचु रली। आमी हुनके पढ़ुन अध्या 23 के पढ़ुक मुरियावां।
जीसु चो इजित धरतोर आउर डंड देतोर
63 जोन मनुकमन जीसु के धरुन रला हुनमन जीसु के हांसी करुन पेटुक मुरियाला,
64 आउर हुनचो आंईक के ढाकुन हुनके पूछला, “आमके अगमगोट सांगुन-दख, तुके कोन मारलो!”
65 आउर हुनमन खुबे निंदरुन हुनचो उलटा गोटमन के बलला।
हुनमन जीसु के कयद तो करला मानतर हुनमन लगे जीसु के बदी देतो काजे काई गोट नी रये।
एईकाजे हुनमन, हुनके बदी देतो कागत बनातो काजे नीती चो उलटा बड़े पंच बसाला। जसन मय तुमके आगे सांगु रयें कि हुनमन एबतले हुनके धरतो उआट नी बनाउ रओत। मानतर जहूदा हुनमन के सांगलो कायले कि हुनके झटके धरा नोहले हुन सहर के छाड़ुन जाते जायदे। धरम गुरुमन हुनके मोसा चो नियम-कानुन नी मानतो बदी देउन धरला। मानतर हुनमन खुदे नियम-कानुन के नी मानते रओत। कसनबलले राती बेरा बड़े पंच बसातोर नियम नी रये आउर फासला करतोर, नीती-नियम चो उलटा रये। आउर गोटोक गोट आसे कि बड़े पुजारी आपलो फटई चीरलो, नियम-कानुन चो हिसाब ने असन करतोर नी बने।
हुनमन बदी देतो कागत बनाओतले जीसु के पाईकमन चो हाथे सोपुन दिला। मोरना चो डंड पावतो दोसी मनुक संगे पाईकमन गोटोक खेल खेलते रओत। हुनमन, हुन दोसी मनुक चो आंईक ने पटी बांधुन हुनचो थमना ने पारी-पारी ले थापड़ मारते रओत। पाछे हुनचो आंईक ले पटी के गुचाउन हुनके पूछते रओत कि कोन-कोन पाईकमन तुके मारला, हुनमन के चिताव। हुन दोसी मनुक चो थमना रन-बन होओतले हुनमन ए खेल खेलते रओत। जसाया 52:14 ने बलेसे, हुनचो थमना के चिताउक नी होते रये आउर हुन, मनुक असन नी दखा देते रये। परभु चो थमना डरतो असन होउ रये। एईकाजे हुनचो लगे कुरुस उठातो लाईक सकत नी बाचु रये असन लागेसे।
बड़े पंच पुरे जीसु
66 जिदलदांय बियान पावली, धरम-सियानमन संगे लोगमन चो मुखियामन आउर पुजारीमन चो मुखियामन आउर धरम-पंडितमन जुहा होला, आउर हुनमन चो धरम पंच ने जीसु के आनुन पूछला,
67 “अले, तुय किरिस्त आस जाले आमके सांगुन देस।” मानतर जीसु हुनमन के बललो: “मय तुमके बलले जाले तुमी नी पतेयाहासे।
68 आउर मय पूछलोने तुमी नी सांगासे।
69 मानतर एदांय ले मनुक चो बेटा, सबुले सकत महापरभु चो उजा हाथ बाटे बसुन रयदे।”
बड़े पंच ने जीसु के दुय ठन सुवाल पूछला, पईल सुवाल, “काय, तुय किरिस्त आस”?
जीसु “हव” बललोने हुनके रोम राज चो बिरुद करु बीता आय बलुन हुनके मोरते मारता। भजन 110:1 पद ने बुआ महापरभु आपलो बेटा ले बलेसे, “मय तुचो बयरीमन के तुचो पांय चो पीड़ा बनाओतले तुय मोचो उजा बाटे बस।” हुन राजामन चो राजा आउर परभुमन चो परभु आय।
70 एके सुनुन सपाय जोर ले बलला:
“असन आय जाले काय तुय महापरभु चो बेटा आस?”
जीसु हुनमन के बललो: “तुमी आपने बलासाहास कि मय आंय।”
ए हुनमन चो दुसर सुवाल रये।
71 तेबे हुनमन बलला, “एबे आमके गवई नी लागे, आमी हुनचो टोंड ले खुदे सुनलुसे।”
हुनमन जीसु के ए बदी दिला, मानतर रोम चो कचरी ने नियाव-दाव बेरा हुनमन बदी के पलटला।
पिलातुस चो पुरे जीसु
1 तेबे धरम-मंडली चो जमाय लोगमन जुहुन जीसु के पिलातुस लगे नीला।
2 आउर हुनमन असन बलुन हुनचो उपरे दोस लगाउक मुरियाला, “आमी एके लोगमन के बिडराते आउर कयसर राजा के पट्टी नी दिया बलते, आउर आपने के जहूदीमन चो किरिस्त आउर राजा आय बलते सुनलुसे।”
पिलातुस, रोम राज बाटले बाछलो राजपाल रये। जहूदीमन चो बुता-भयना के धियान देतो काजे फसह तियार बेरा हुन, जरूसलेम ने रते रये। मोसा चो नियम-कानुन के नी मानतोर रोमीमन काजे नियाव चो गोट नी रये। एईकाजे हुनमन हुनके राज चो बिरुद करतो बदी दिला जोन एकदांय फंद रये।
3 पिलातुस हुनके पूछलो:
“काय, तुय जहूदीमन चो राजा आस?”
जीसु हुनके बललो:
“तुय आपने बलसीस।”
तुमी बिचारुन दखा गोटोक कारीगिर सादा फटई पिंदुन उबलोसे आउर पिलातुस हुनके पुछेसे, “काय, तुय जहूदीमन चो राजा आस?” जीसु उत्तर दिलो, “तुचो बलतो हिसाब ने आंय।” पिलातुस हुनचो ने काई दोख नी पावलो, एईकाजे हुन हुनके छाड़ुक मन करते रये।
4 तेबे पिलातुस, *पुजारीमन चो मुखियामन आउर लोगमन के बललो:
“मय, ए मनुक ने काई दोस नी पायेंसे।”
पिलातुस बललो, “जीसु चो उपरे काई दोख पक्का नी होयसे।”
5 मानतर हुनमन आउर बले जोर करुन बलुक धरला, “ए मनुक गलील ले धरुन एथा जमाय जहूदिया परघन ने, सिखिया देउन लोगमन के बिडरायसे।”
एईकाजे हुनमन, हुनके आपलो राज चो बिरुद करतो चो बदी दिला।
हेरोदेस चो पुरे जीसु
6 एके सुनुन पिलातुस पूछलो: काय, ए मनुक गलीलेया आय?
7 जीसु, हेरोद अंदिपास चो रियास चो आय जानुन, पिलातुस हुनके हेरोद अंदिपास लगे पठाउन दिलो, कसनबलले हुन दिनमन ने हेरोद अंदिपास, जरूसलेम ने रये।
गलील परघन हेरोदेस चो राज ने रये, एईकाजे पिलातुस के ए झंझट ले बाचतो उआट मिरली। कसनबलले हेरोदेस बले हुताय रये, एईकाजे पिलातुस, जीसु के हेरोदेस लगे पठाउन दिलो। दखा, महापरभु चो उआट कसन ओरी-ओरी ने चलते रये। मोचो हिसाब ने हेरोदेस हुता रतोर उधापड़े नोआय।
8 हेरोद जीसु के दखुन खुबे हरिक होलो, कसनबलले हुन जीसु के खुबे दिन ले दखतो काजे मन करते रये, हुन जीसु चो बारे ने खुबे सुनुन रये आउर हुनचो ले काई चीना के दखुक मन करते रये।
खिंडिक समया चो आगे जीसु, फरीसीमन के बलु रये, “जाउन हुन कोलेया (हेरोदेस) के सांगा…” (लूका 13:32) एईकाजे हेरोदेस, जीसु के भेटतो काजे हरिक रये।
9 हेरोद हुनके खुबे गोटमन के पूछलो, मानतर जीसु ओगाय रलो।
जीसु ओगाय रलो, कसनबलले हेरोदेस जुग-जुग काजे सत्यानास होतो बाट ने खुबे पुरे जाउ रये आउर हुनचो बोहड़तोर मसकिल रये। परभु हुनके काई उत्तर नी दिलो।
10 पुजारीमन चो मुखियामन आउर धरम-पंडितमन उबा होउन जीसु के बानी-बानी चो दोस लगाउक धरला।
11 तेबे हेरोद आपलो पाईकमन संगे हुनचो इजित धरलो आउर हांसी-खेली करलो आउर हुनके झकमक बिती फटई पींदाउन पिलातुस लगे बोहड़ाउन दिलो।
12 हुनी दिन ले पिलातुस आउर हेरोद मीत होउन गेला;
एचोले आगे हुनमन गोटोक, दुसर चो बयरी रला।
एता दखा, धरम गुरुमन जीसु के दोसी ठेबातो काजे खुबे मसागत करसोत, मानतर हेरोदेस के बले हुनचो ने काई दोख नी दखा देते रये। तेबे हुन, हुनचो सुवांग बनातो काजे आपलो राजा फटई के पींदालो आउर हुनके पिलातुस लगे पठाउन दिलो। पिलातुस आउर हेरोदेस दुनो मीत नी रओत, मानतर दुनो जीसु चो बिरुद रओत। एईकाजे हुनमन मिला-मिसा होला।
13 पिलातुस, पुजारीमन चो मुखियामन, जहूदी मुखियामन आउर लोगमन के हागदेउन बललो:
14 “तुमी ए मनुक के, बिडरातो बीता आय बलुन मोचो लगे आनलासाहास, मानतर दखा, मय एके तुमचो पुरे परखुन दखले, आउर हुनचोने काई दोस नी पावलेसे, जसन तुमी दोस लगायसाहास;
15 आउर दखा, हेरोद बले हुनके मोरते मारतो चो काई दोस नी पावलोसे आउर आमचो लगे बोहड़ाउन दिलोसे।
हेरोदेस आउर पिलातुस दुनो के जीसु ने काई दोख नी मिरली। जहूदीमन चो धरम-गुरुमन लगालो बदी सत नी रये। एईकाजे हुनमन बललो गोट चो बारे ने बिचारतोर हुनमन के नंगत नी लागली।
16 एईकाजे मय एके कोड़ा मारुन छांडुन देयंसे।”
जीसु के कोड़ा मारुन छाड़ुन देतोर मिला-मिसा होतो गोट रये। हुन दोसी रये जाले हुनके डंड दियास आउर दोख नोहलो आय जाले छाड़ुन दियास। कोनी बललोसे ‘मिला-मिसा’ सबद, भासा के अडरा बावरतोर आय।
17 (हुन तिहार बेरा, गोटोक कयदी के छांडतोर नीती रये।)
18 तेबे हुनमन सपाय मिसुन जोर ले चिचियाला: “हुनके मोरते मार, आमचो काजे बरअबा के छांडुन दियास!”
19 बरअबा के, जरूसलेम सहर ने कोनी झगड़ा-टंटा आउर कोकई मोरते मारलो किरता जयल-घरे ढाकुन रओत।
20 पिलातुस, जीसु के छांडतो बिचार ने लोगमन के फेर समजाउन दखलो,
21 मानतर हुनमन चिचियाउन बलला: “हुनके कुरूस ने चेगाव, कुरूस ने चेगाव!”
22 हुन तीसर हार हुनमन के पूछलो:
“हुन काय फंद बुता करलोसे? मय एके मोरते मारतो चो काई दोस नी पायंसे। एईकाजे मय एके कोड़ा मारुन छांडुन देयंसे।”
23 मानतर हुनमन आउर रोस ले चिचियाउन-चिचियाउन बलुक धरला कि हुनके कुरूस ने चेगाव, आउर हुनमन चो चिचियातोर जीतली।
24 एईकाजे पिलातुस हुनमन चो गुहारलोर असन करुकलाय हुकुम दिलो।
25 पिलातुस हुन मनुक के, जोन मोरते मारतो आउर उड़गाड़ी बुता चो डंड पावतो काजे जयल ने रये, हुनके लोगमन मांगतो किरता छांडुन दिलो आउर जीसु के जसन हुनमन मन करला असने ची कुरूस ने चेगातो काजे सोपुन दिलो।
26 जिदलदांय पाईकमन, जीसु के *कुरूस ने चेगातो काजे नेते रओत, तेबे बाटे हुनमन समोन नाव चो गोटोक कुरेनेया के आपलो गांव ले एतोके भेटला, हुनचो उपरे जीसु चो कुरूस के लतुन दिला कि हुनके बोउन जीसु चो पाट-पाट रेंगो।
पिलातुस, जीसु चो बारे ने काई फासला करतो झंझट ले बाचुक मन करते रये।
आमी धियान दिले जानवां एता मसकिल समया रये।
जीसु बाचुक मन नी करते रये आउर पिलातुस बाचुक मन करते रये। पिलातुस धरम चो राजनीती करतो लोग ले बाचुक मन करते रये। हुन उआट करलो कि बरअब्बा आउर जीसु के चुनतोर रयत चो हाथे छाड़ुन देयंदे। हुन जानते रये कि धरम गुरुमन जीसु के निज बईर करुआत, मानतर हुन अंताजुक नी सकलो कि धरम घिनघिना होले कितलो खाले घसरुक सके। मत्ती लिखेसे, “बड़े पुजारीमन आउर बाट दखाउमन, लोग-कुड़ा के उकसाला कि बरअब्बा के छांडतो काजे बलोत। पिलातुस भक्यालो कि जीसु चो भंवरक उबा रतो लोग-कुड़ा बरअब्बा के छांडतो काजे बलसोत। नियाव करु बीता, रयत के पुछेसे कि हुनके काय करतोर आय, ए खुबे अचरित चो गोट आय। हुन जानते रये जीसु ने काई दोख नीआय, मानतर फेर बले हुन जीसु के कुरुस ने चेगातो हुनमन चो गोट के मानलो। ओहो रोम चो नियाव!
सपाय लोगमन असन पिलातुस के बले जीसु चो बारे ने फासला करतोर रली। तुमचो काय फासला आय?
जरूसलेम सत्यानास होतो अगमगोट
बयरीमन काजे जीसु चो पारथना।
27 कुड़ायक लोगमन जीसु चो पाट-पाट एते रला। हुन गोहड़ा ने खुबे बायलेमन जीसु काजे छाती पेटुन-पेटुन गागते रओत।
28 जीसु हुनमन चो बाटे उलटुन बललो: “ए जरूसलेम चो बेटीमन, मोचो काजे नी गागा, मानतर आपलो आउर आपलो पिलामन काजे गागा।
29 कसनबलले दखा, हुन दिन बले एयदे जेबे लोगमन बलदे, ‘भाइगमानी आय हुन बायले जोन बांझीन आय, भाइगमानी आय हुन पेट जोन पिलामन के नी जनमाली, भाइगमानी आत हुन छातीमन जोन गोरस नी पीयाली’।
30 हुन बेरा ने हुनमन डोंगरी के बलदे, ‘आमचो उपरे घसर’ आउर ढिपकामन के बलदे, ‘आमके ढाकी होआ’।
जीसु कुरुस उठाउन जाते रये आउर बायलेमन हुनचो काजे गागते रओत। जीसु हुनमन के ‘नी गागा’ बललो, हुन आमचो जीव दुखतोर के नाई, मानतर आमचो बिसवास के मन करेसे। हुन आमचो जीव दुखतो काजे नी मोरलो। जीसु हुनमन के बललो कि हुनमन आपलो काजे आउर आपलो पिला-झिलामन काजे गागोत, कसनबलले बड़े तकलीस चो दुख-डंड, कटलाउक नी सकतो असन होयदे।
जीसु के कुरुस ने चेगातोर
33 जिदलदांय हुनमन खोपड़ी नाव चो जगा ने अमरला, तेबे जीसु के आउर हुनचो संगे दुयझन मनुकमन के कुरूसमन ने चेगाला, गोटोक के उजा हाथ बाटे आउर दुसर के डेबरी हाथ बाटे।
जीसु संगे दुय झन खंगारमन के बले कुरुस ने चेगाउ रओत।
34 मानतर जीसु बललो:
“ए बुआ, एमन के खेमा कर, कसनबलले एमन नी जानोत कि काय करसोत।” हुनमन चिटी पकाउन जीसु चो फटईमन के बाटा करला।
जीसु हुनमन के खेमा करतो काजे पारथना करलो नोहले हुनमन खेमा नी होतो पाप चो दोसी रला- महापरभु चो बेटा के मोरते मारतोर!
जीसु के बदी देतोर
35 लोगमन उबा होउन जमाय के दखते रओत।
जहूदी मुखियामन बले, जीसु चो हांसी करुन बलते रला, “ए दुसर लोगमन के बचालो;
ए, महापरभु चो किरिस्त आउर हुनचो बाछलोर आय जाले, एदांय आपने के बचाओ।”
जीसु कुरुस ले उतरुक सकतो मानतर असन करलेने हुनचो किरिस्त होतो सत नी होती आउर जसाया अध्या 53 चो लिखलो अगमगोट पुरा नी होती, “मार-पेट करुन आउर दोख लगाउन हुनमन हुनके नीला।” हुन समया चो लोगमन ले कितलो लोग हुनके धियान दिला कि हुनके मोरलोमन चो मंजी ले जीव उठालो? मोचेई लोगमन किरता हुनके मार पड़ली। जीसु, कुरुस ने लटकु रलो किरता आमके पाप ले मुक्ति मिरलीसे।
36 पाईकमन बले जीसु चो कुरूस लगे एउन हुनचो हांसी करला, हुनमन जीसु के अमटालो अंगुर-रस दिला आउर बलला:
37 “तुय जहूदीमन चो राजा आस जाले, खुद के बचाव!”
38 जीसु चो कुरूस उपरे गोटोक फारा-गोंदा ने लिखुन लटकाउन दिला, “ए जहूदीमन चो राजा आय।”
जीसु चो कुरुस ने हुनमन, जूनानी, इबरानी आउर लतीनी भासा ने दोख तकत लटकाला।
जूनानी भासा, बुद, सिखिया आउर बिगियान चो भासा रये।
लातिनी भासा, नियम-कानुन, पाईकमन आउर सरकार चो भासा रये। इबरानी भासा, धरम बुतामन चो भासा रये। जिदलदांय जीसु राज करुक एयदे, तेबे हुन संवसार चो राजनीती, गियान आउर आत्मिक राज करु होयदे। हुनचो दोख तकत, एतो समया चो सत चो चिना रये।
ए दोख तकत के नंगत ले समजतो काजे आमके चारो नंगत-खबरमन के गोटोकी संगे पढ़ुक पड़ेदे।
गोटोक खंगार जीसु के बदी देतोर
दुसर खंगार जीसु के गुहारेसे
39 दुयझन फंद बुता करुमन के कुरूस ने चेगाउन रला, हुनमन ले गोटोक जीसु के निंदरुन बललो:
“काय, तुय किरिस्त नोआस? आस जाले, खुद के आउर आमके बले बचाव!”
40 मानतर दुसर, हुनके दागा देउन बललो: “काय, तुय डंड पावसीस बले महापरभु के नी डरीस?
41 आमी तो नियाव चो हिसाब ले डंड के पाउंसे, कसनबलले आमी आमचो करलो ची असन भुगतुंसे, मानतर ए असन डंड पावतो चो काई बुता नी करलोसे।”
मत्ती आउर मरकुस चो हिसाब ने मुर ने दुनो खंगारमन जीसु चो इजित धरते रओत। मानतर सरासरी तीन घंटा ने एकलो दखलो कि अचरित गोटमन होयसे, बललोने काई बले अचरित गोट पक्का आसे। सबुले पईल गोट, एके बरअब्बा चो पलटा कुरुस ने चेगालासे आउर हुन दोख नोहलो आय। हुन तुरते जानलो कि जीसु हुनचो काजे मोरेसे। हुन समजलो कि ए मनुक आउर महापरभु चो मंजी चो अचरित गोट आय। सत गोट ए आय हुन महापरभु आय। हुन पतेयालो आउर हुनचो लगे ईलो।
42 तेबे हुन जीसु के बललो: “ए जीसु, जेबे तुय आपलो राज ने एसे, तेबे मोके सूरता कर।”
43 जीसु हुनके बललो:
“मय तुके सते बलेंसे कि आजी तुय मोचो संग सरग ने रसे।”
जोन खंगार के रोमी नियाव हिसाब ने जीव रतो हक नी रये, हुनी दिने हुन जीसु लगे गेलो।
हुन मनुक खंगार रये, मानतर महापरभु चो बेटा के पतेयालो किरता हुनचो मुक्ति होली।
हुन पतेयाउ रलो कि हुनचो मोरलो पाछे परभु जीसु चो राज एयदे।
जीसु हुनके बललो, “तुय एबे ले ची मोचो संगे सरग ने रसे।”
ए दुनो खंगारमन गोटकी कटार पाप चो डंड पावते रओत।
हुन दुनो ने काय फरक रये?
सोजे जीसु के पतेयातो चो। दुनो ले एकलो पतेयालो आउर दुसर नी पतेयालो। गोटोक हार मय आपलो मीत संगे रयें। मय हुनके पूछले, तुय कुरुस ने चेगालो हुन खंगार चो बारे ने काय बिचारसीस। मोचो ए मीत छुट बिचार बीता रये। मय हुनके पूछले, “काय, तुय हुनके दया पावतो काजे पठासे? काय, तुय हुनके भलई बुता करतो काजे बलसे?” हुन मोके अचरित ले दखुक मुरियालो। मय बलले, “तुय आपलो लोग के असने तो बलसीस।” हुन बललो, “हव, कसनबलले हुनमन असन करुक सकोत।” मय बलले, “मानतर ए बीता काय करेदे? एचो तो हाथ-पांय के बांधलासे। काय, तुमी हुनके कोनी मंडली ने बसतो उआट सांगासे कि हुनके काय-काय धारनिक बुता करुक पड़ेदे?”
ए मोचो मीतमन, धियान दियास जीसु हुनके बललो, “आजी ले ची तुय मोचो संगे सरग पुरे रसे।” हुन आपलो बिसवास किरता ची सरगपुर ने ओलुक सकलो। काय, आजी तुमचो बिसवास बले सरगपुरे ओलतो लाईक आसे कि नाई। ए मोचो मीतमन, आजी चो समया ने मुक्ति पावतो काजे लोग काय-काय नी करसोत! मानतर एता गोटोक मनुक आसे जोन आमचो काजे मुक्ति चो बाट तियार करेसे आउर जोन हुनके पतेयायदे हुन हुनके मुक्ति देयदे। जसन कि आमी कुरुस ने लटकलो खंगार के दखुंसे, जोन पतेयालो कि जीसु चे मुक्ति-देउ आय आउर हुनी सरग ने ठान देउक सके, जीसु हुनके बललो आजी ले ची तुय मोचो संगे सरगपुरे रसे। ए मोचो मीतमन, परभु जीसु ए संवसार ने आमी पापीमन के बचातो काजे एउ रलो। तुमी कितलेई बड़े पापी नोहले खंगार होले बले जीसु उपरे बिसवास करा आउर हुनचो लगे इआ आउर आपलो पापमन के माना, तेबे परभु बले तुमके आपलो मानेदे। कसनबलले हुन पापीमन के मया करुआय। तुमी सते मुक्ति पाउक मन करसाहास जाले आजी ची आपलो जीवना के जीसु के दियास। इआ आमी परभु लगे जो आउर आपने के परखुं। इआ, आमी पारथना संगे आजी चो पढ़ई के सारवां।