215
ए मोचो मीतमन, तुमी सपाय के जीसु चो पवितर नाव ने जुहार!किरिस्त चो एतो समया लगे आसे आउर तुमी आपलो जीवना के धियान देयसास होती आउर जीसु के भेट होतो काजे तियार आसास होती।
आजी आमी जीसु बाटले परभु-भोज चो मूर, जहूदा धोका देतोर, पतरस नी जाने बलतोर आउर जीसु चो तकलीस चो बारे ने पढ़वां, जोन आमचो हाल के दखायसे। जीसु नी रलोने ए दुख-तकलीस आमके उठाउक पड़ती।
जहूदा, जीसु के बिकतोर
1 पाग नोहलो रोटी चो तिहार, जेके फसह तिहार बले बलसोत लगे अमरुन रये,
फसह तियार चो छय मयना आगे जीसु, केसरिया फिलिपी ने रलो आउर हुदलीदांय ले हुन जरूसलेम बाटे जाउक मुरियालो, जोन थाने हुन कुरुस उठायदे। डोंगरी ने जीसु चो रुप बदलतोर उआट बले एई हिसाब ने रये। ए फसह तिहार चो समया आय आउर जीसु अमदेया काजे संवसार चो पाप के उठाउन नेतो काजे जतरा होतो मेंडा पिला आय।
2 आउर *पुजारीमन चो मुखियामन आउर धरम-पंडितमन ए गोट चो घत ने रओत कि कसन ने जीसु के मोरते मारवां, कसनबलले हुनमन लोगमन के डरते रओत।
धरम गुरुमन चो हिसाब ने होलोने इतलो दिन ले हुनके मारुन सारु रता, मानतर हुनमन के लोग-कुड़ा चो डर रये। फसह समया ने गुलाय मंजपुर चो जहूदीमन एता एते रओत आउर हुन सपाय जीसु चो पाटेया रओत। मानतर आमी दखवां कि हुनमन सोजे उपरचित काजे हुनचो पाटेया रओत।
3 तेबे बारा चेलामन ने जेचो नाव जहूदा इसकरियोती आय, हुनके सयतान समाली।
एता ए गोट के जानतोर आय कि “काय, कोनी किरिस्ती मनुक ने अडरा आत्मा ओलुक सके?”
पतेयातो लोग ने केबई अडरा आत्मा ओलुक नी सके।
मानतर सोजे नाव चो किरिस्ती थाने ओलुक सके। मय कोनी-कोनी असनी किरिस्ती लोग के दखलेसे, जोनमन के मोचो हिसाब ने अडरा आत्मा धरु रये। ए मोचो मीतमन, तुमी किरिस्त के खिंडिक असन पतेयायसाहास जाले तुमचो मन ने किरिस्त नीआय आउर सुकलो ठाने सयतान पक्का ओलेदे। लूका 11:24-26 पद ने, लूका एई तो बलेसे, “जिदलदांय सयतान छुक-छुका आउर सुकलो ठान दखेसे, तेबे आपलो संगवारीमन संगे हुताय बसापत करुक एयसे।” जहूदा संगे काय होउ रये? हुन किरिस्त के छांडलो आउर अडरा आत्मा हुनचो थाने ओलली।
4 हुन जाउन पुजारीमन चो मुखियामन आउर मंदिर चो पाहरा देउ लोगमन चो मुखियामन संगे गोट-बात करलो कि कसन ने जीसु के हुनमन चो हाथे धरावां।
5 हुनमन हरिक होला आउर हुनके चांदी चो सिक्का देतो बायदा करला।
धरम-गुरुमन, जीसु के कसन मोरते मारवां बलुन बिचारते ची रओत आउर दखा, जीसु चो आपलेई चेला धोका देतो काजे हुनमन लगे ईलो।
6 जहूदा मानलो आउर मोहका डगराउक मुरियालो कि कसन ने गोहड़ा नी रलो बेरा जीसु के धोका ने हुनमन चो हाथे धराउन देउक होयदे।
हुनमन चो असन बिचार रये कि लोगमन फसह तियार बनाउन सारलो पाछे हुनके घत ले धरवां आउर मोरते मारवां।
असन बरन ले कोनी नी जानदे कि काय होली। जहूदा चो बिचार रये कि हुनमन बाट दखते रओत आउर मोहका मिरते खन हुन, हुनमन के सांगेदे, मानतर जसन जूहन्ना लिखेसे, जीसु हुनके रोटी देउन बललो, “समया अमरलीसे जोन बले करतोर आय झटके कर।” जहूदा हुदलीदांय हुता ले जाते गेलो।
जीसु आपलो चेलामन संगे फसह तिहार खातोर
जीसु आपलो चेलामन संगे फसह तियार चो भोज खायसे।
7 तेबे पाग नोहलो रोटी खातो तिहार ईली, आउर ए तिहार ने फसह चो मेंडा के जतरा करतोर जरुर रये।
8 एईकाजे जीसु, पतरस आउर जूहन्ना के असन बलुन पठालो, “जाउन आमचो खातो काजे फसह तिहार चो रांदा-बाड़ा तियार करा।”
9 तेबे हुनमन जीसु के पूछला: “कहां तियार करतो काजे तुय मन करसीस?”
10 जीसु हुनमन के बललो, “जसने तुमी सहर ने अमरासे उसने गोटोक मनुक पानी चो हांडी बोउन तुमके मिरेदे; जोन घर ने हुन जायदे हुनचो पाट-पाट जाहा,
11 आउर हुन घर चो मालिक के बला, ‘गुरुजी तुके बलेसे कि हुन अटार खोली कहां आसे जोन थाने मय मोचो चेलामन संगे फसह तिहार चो भोज खायंदे?’
12 हुन, तुमके गोटोक बड़े ढाबा के दखायदे, जोन उपरे आसे, हुताय तियार करा।”
13 एमन जाउन जसन हुन बलुन रये उसने पावला आउर फसह तिहार चो रांदा-बाड़ा करला।
जीसु एचो ले आगे जरूसलेम ईलो बेरा हुनचो ए मीत, हुनके फसह तियार काजे नेवता देउ रलो होती। बलतो अरथ ए आय कि जीसु आगतले गदई पिला काजे सांगु रये।
14 जिदलदांय बेरा अमरली जीसु *पठालो-लोगमन संगे खाउक बसलो।
मंजपुर ने जीसु चो ए सरासरी भोज रये आउर जहूदा बले हुता रये।
15 आउर हुन हुनमन के बललो, “मोके खुबे मन रये कि डंड पावतो ले आगे तुमचो संगे फसह तिहार चो भोज खायें।
16 मय तुमके बलेंसे, एदांय ले मय एके केबई नी खायें जिदलदांय ले महापरभु चो राज पुरा नी होयदे।”
17 तेबे हुन बटका के धरलो आउर महापरभु के धन-धन करुन हुनमन के बललो: “एके धरा आउर तुमीमन बाटुन खाहा।
18 कसनबलले मय तुमके सांगेसे, एदांय महापरभु चो राज एओतले मय केबई अंगुर रस नी पीयंदे।”
फसह ने अंगुर-रस चो बटका ले गोटोक-गोटोक करुन पीवते रला।
फसह तिहार चो नीती-नियम के जीसु पुरा करलो। ए बटका हरिक चो रये। इबरानी 12:2 ने लिखलोर आसे, “हुन आपलो पुरे रलो हरिक काजे कुरूस चो दुख उठातोके लाज नी होलो।”
एई फसह के जीसु सूरता करतो लाईक बनालो, जेके आजी आमी परभु भोज चो रुप ने बनाउंसे।
19 तेबे हुन रोटी के धरलो आउर जुहार करुन गोंदा करलो आउर असन बललो: “ए मोचो देहें आय जोन तुमचो काजे दिलोर आसे। मोके सूरता करतो काजे असने करा।”
20 असने खादलो पाछे हुन बटका के धरलो आउर असन बललो:
“ए बटका, महापरभु बाटले करलो बायदा आय, जोन तुमचो काजे बोहालोर मोचो लोउ आय।
जीसु डंडिक चे रतो तीज के बललोने रोटी आउर अंगुर रस के, आपलो देहें आउर लोउ चो चिना बाचलो। पीतल आउर संगमरमर चो पलटा एई चे दुनो तीजमन हुनचो चिना रये, कसनबलले हुनके आमचो काजे पापी बनाला, 2कुरिंथी 5:11 ने दखा, कुरुस ने चेगातो बेरा जीसु, मनुक असन नी दखा देते रये। एचो अगमगोट जसाया 52:14 ने सांगु रये, “हुनचो रुप इतलो नसु रये कि हुन मनुक असन बले नी दखा देते रये” 53:2 “हुन दखतो लाईक सुंदर बले नी रये आउर हुनचो रुप बले आमी मन करतो असन नी रये।
जुग-जुग ले फसह, परभु चो आउर हुनचो मोरना चो बाट दखते रये। एदांय कुरुस ने जीसु चो मोरना ले फसह समपुरन होयसे। आमी परभु चो बेदी लगे एउंसे आउर आपलो मन के तियार करुंसे। आमी हुनचो सूरता ने आउर हुनचो कुरुस चो मोरना चो सूरता ने परभु भोज धरुंसे आउर हुनचो फेर ले एतो बाट दखुंसे। 1 कुरिंथी 11:26 ने पउलुस लिखेसे, “जेबे बले तुमी ए रोटी ले खायसास, आउर ए बटका ले पीवसास, परभु एओतले तुमी हुनचो मोरना चो खबर सांगते राहा।”
21 मानतर दखा, मोके धराउन देतो बीता चो हाथ मोचो संगे टेबुल ने आसे।
जूहन्ना 13:26-30 पदमन ने लिखेसे, “जेके मय ए रोटी गोंदा चोबरुन देयंदे हुनी आय।” आउर हुन…जहूदा के दिलो। तेबे जीसु हुनके बललो, “जोन तुके करतोर आय, झटके कर।” जीसु चो असन बलते खन हुन जाते गेलो। लूका चो लिखलो बचनमन समया चो हिसाब ने ओरी ने नीआय।
22 कसनबलले मनुक चो बेटा काजे जसन तियार करलोर आसे उसनेची होयसे, मानतर हुन मनुक चो उपरे काय डंड होयदे, जोन हुनके धरायसे!”
23 तेबे हुनमन गोटोक-दुसर ले पूछुक-पचारुक मुरियाला कि आमचो मंजी ने असन कोन आसे जोन असन बुता करेदे।
चेलामन पतेयाते रओत कि हुन धोका देउक सके। मय आपलो बारे ने बलुक सकें हुन आपलो हाथ मोचो उपरे नी संगाले मय हुनके धोका देते। महापरभु चो धन-धन होओ कि हुन मोचो उपर ले आपलो हाथ नी गुचायदे। मय एचोले खुबे हरिक आंसे।
एतो राज ने चेलामन चो पन
24 चेलामन चो मंजी ने कोन बड़े आय बलते बला-बली होते रओत।
काय,तुमी पतेयायसाहास कि हुनमन असन काय काजे करदे?
जीसु चो पुरे कुरुस चो मोरना आसे आउर हुनमन आपलेई बारे ने बिचारसोत।आजी चो पवितर लोग बले चेलामन असन बिचार करसोत ।
25 एके दखुन, जीसु हुनमन के बललो: “बिजातीमन चो राजा हुनमन चो उपरे राज करसोत आउर हुनमन उपरे हक संगायसोत, हुनीमन के लोगमन भलई करतो बीतामन बलसोत।
26 मानतर तुमी असन नी होआ; तुमचो मंजी जोन सबुले बड़े आय, हुन आपने के नानी बनाओ आउर जोन मुखिया आय, हुन कमेया असन होओ।
27 कसनबलले बड़े कोन आय, हुन भात खाउक बसलो बीता कि हुन सेवा-बुता करतो बीता?
काय, हुन नोआय जोन खातो काजे बसलोसे?
मानतर मय तुमचो मंजी कमेया असन आंसे।
मोचो पलटा जीसु कुरुस के उठालो, तेबे हुन काय बनलो?
हुन सबले नानी बनलो!
हुन सेवक बनलो!
हुन संवसार ने रलो बेरा लोगमन हुनचो सेवा करतोर रली, मानतर हुनचो उलटा, हुन सेवा करलो। जीसु लोगमन चो सेवा करलो आउर जुग-जुग काजे मुक्ति चो बेदी बनालो आउर आमके भोज ने भागी होतो काजे हागदिलो।
28 तुमी हुनमन आहास, मोके परखतो बेरा मोचो संगे सरलगा रलास;
जीसु आपलो चेलामन के सहरायसे कि हुनचो तकलीस बेरा हुनचो संग देदे।
29 आउर जसन मोचो बुआ मोचो काजे गोटोक राज तियार करलोसे, उसनेची मय बले तुमचो काजे तियार करेंसे
30 कि तुमी मोचो राज ने मोचो टेबुल ने खाहा-पीया आउर तुमी राजगादीमन ने बसुन इसराएल चो बारा बंस चो नियाव करा।”
मोके पुरा बिसवास आसे कि परभु चो राज ने चेलामन के खास ठान मिरेदे।
हुनमन नवा नियम आउर जुना नियम के जोड़तो पुलिया असन आत।
हुनमन परभु चो टेबुल ने बसुन भोज खादे आउर राजगादीमन ने बसुन इसराएल चो 12 बंस चो नियाव बले करदे।
ए गोट आमचो काजे नोआय, कसनबलले आमी हुन समया ने नी रलु।
महापरभु चो मुक्ति पावलो बेटा-बेटीमन बले मान चो पन पावदे।
तुमी ए पन काजे तियार आसास कि नाई? एचो अरथ ए नोआय कि आमके मुक्ति पावतो काजे बुता करते रतोर आय। सरग ने ओलतोर तो महापरभु चो दया ले होयदे। मानतर तुमचो बुता तुमचो बिसवास के सिद करेदे आउर नियाव दिने तुमके पन देयदे। काय, तुमके भलई बुता करतोके हरिक लागुआय? तुमके भलई बुता करतोर आय।
मोचो बिचार ने ची नाई मानतर मोके बिसवास आसे कि महापरभु जोन बरदान आमके दिलोसे हुन पक्का हुनचो नियाव करेदे। काय तुमी जानास मुर चो मंडलीमन ने काय बरदान खास रली? दोरकास नाव चो गोटोक बायले सिलई बुता करते रये। ए हुनके मिरलो बरदान रये। हुन गरीब रांडी बायलेमन चो फटई के सिलते रये। तुमचो नियाव तुमचो बरदानमन के बांवरतो हिसाब ले होयदे। ए मोचो मीतमन, तुमचो किरिस्ती जीवना महापरभु चो नंजर ने खास आय।
31 “ए समोन, ए समोन!
दख सयतान तुमीमन के गउं चो असन फुनतो काजे मांगलोसे,
32 मानतर मय तुचो काजे पारथना करलेसे कि तुय बिसवास ने चमकट रा, आउर तुचो बोहड़लो पाछे, आपलो भाईमन के बिसवास ने बरसक कर।”
“जिदलदांय तुय बोहड़से”, एचोले तुमी असन नी बिचारा जीसु हुनके मन बोहड़ातो काजे बलेसे।
जीसु चो बलतो अरथ ए आय कि हुनचो बिसवास चमकट होयदे, तेबे हुन मन बोहड़ालो मनुक होयदे।
आउर हुनचो किरता बिसवासी भाईमन ढाढ़ुस आउर सकत पावदे।
परभु जानते रये कि पतरस हुनके नी जानें बलेदे, मानतर पतरस काजे पारथना करलो कि हुनचो बिसवास निमल नी होओ।
परभु आजी आमचो काजे पारथना करेसे।
हुन जाने कि तुमी केबे बिसवास ने निमल होआसे आउर केबे घसरासे। परभु चो बिसवासी घसरुक सकोत, मानतर हुनमन चो बिसवास नी टुटे, कसनबलले किरिस्त जीसु तुमचो काजे पारथना करते रयसे। हुन मया कितलो माहान आय!
जूहन्ना17:9 ने लिखलोर आसे, “मय हुनमन काजे पारथना करेंसे, संवसार काजे पारथना नी करेंसे, मानतर हुनमन काजे जेके तुय मोके दिलीस, कसनबलले हुनमन तुचो आत।”
जीसु गुलाय संवसार काजे आपलो जीव दिलो। एचोले आगर तुमी हुनचो ले आउर काय मांगुक सकास। हुन महापरभु चो लोग के गुहारते रयसे, कसनबलले आमी ए संवसार ने रउंसे। तुमी आपलो काजे पारथना नी करास होती, मानतर हुन करु चे आय। हुन तुमचो काजे अमदेया पारथना करते रउआय।
जोनमन के परखलासे, हुनीमन दुसर चो साहरा करुक सकोत। एतो समया ने पतरस मंडली के बाट दखाउ बीता होलो। मोचो बिचार ने कोनी मंद पीवतो बीता चो साहरा काजे आउर समजातो काजे मन बोहड़ालो मतवार के ची पठाले नंगत आसे।
मय जुवान रलो बेरा बचन सांगतो बीता रयें। हुदलदांय मय गोटोक मतवार के समजाउन दखले, मानतर हुनचो बिचार ने, मय हुनचो तकलीस के नी समजुक सकते रयें। एईकाजे मय गोटोक जुना मतवार के हुनचो साहरा करतो काजे हुनचो लगे पठाले, जोन एबे किरिस्त के मानतो बीता आय। हुन जाउन हुनचो ले गोटयाउक मुरियालो आउर बललो, “जयराम, आमी दुनो संगे-संगे पींवते रउं, मानतर जीसु मोके मुक्ति दिलो आउर हुन तुके बले मुक्ति देयदे।” केबई जचई ने पड़लो बीता ची कोचई होओ साहरा करुक सके।
33 समोन हुनके बललो:
“ए परभु, मय तुचो संगे जयल जातो आउर मोरतो काजे बले तियार आंसे।”
पतरस मन ले तो गियान बीता रये, मानतर हुन आपलो निमलमन के नी जानते रये। आमीमन ले खुबे लोग आमचो निमलमन के नी चिताउआंव।
34 जीसु हुनके बललो, “ए पतरस, आजी कुकड़ा बासतो ले आगे तुय तीन हार मोके ‘नी जाने’ बलसे।”
पतरस के बिसवास नी रये कि हुन परभु के नी जानें बलेदे, मानतर हुनी राती हुन परभु के तीन हार नी जाने बललो।
ए मोचो मीतमन, आजी चो आमचो पढ़तो समया एताय सरेसे, एईकाजे आगे चो पढ़तो थाने फेर भेट होवां, मोके बिसवास आसे कि हुदलदांय ले तुमी जीसु चो सिखियामन के पढ़ते राहासे।आउर परभु चो धन-धन करुंसे कि हुन आजी बले आमचो काजे पारथना करेसे।