213
मोचो मीतमन आगे चो पाठ ने जीसु मंदिर के सुद करलो चो बारे ने सीखलु। आजी आमी दखवां कि पुजारीमन आउर धरम-पंडितमन जीसु चो हक चो बिरुद होला, मानतर हुनमन जमाय अचरित बुतामन ने जीसु चो हक के दखुन रला। जीसु जानते रये कि हुनमन, जीसु के मोरते मारुक मन करसोत। तेबे जीसु हुनमन के दुसट खेतियार चो कटाव सांगलो कि कसन बरन ले हुनमन अंगुर-बाड़ी मालिक चो बेटा के मोरते मारला। हुन दुसटमन खुदे आपलो हाथ ले जीसु के मारतो मन नी करते रला, एई काजे हुनमन जीसु के कयसर राजा चो बयरी बनातो मन करला, मानतर असन नी होतो के आपनीमन लाज पड़ला।हुनमन चो मंजी गोटोक अलग बिसवास चो गोहड़ी रये। जोनमन के सदूकी बलते रला। हुनमन मोरलोमन चो जीव उठतोर आउर आत्मामन चो बारे ने नी पतयाते रला। हुनमन बले आमी काय काजे ओगाय रवां बलुन कपट मन ले जीसु के सुवाल पूछला। मानतर जीसु चो नंगत उत्तर सुनून आपनीमन लाज पड़ला।
एदांय आउर गोटोक धरम गोहड़ी रला, जोनमन के फरीसी बलते रला हुनमन धरम-करम चो ढोंग दखाते रला। जीसु हुनमन के पूछलो कि किरिस्त के दाउद चो बेटा काय काजे बलसोत? जिदलदांय भजन गीत 110 ने खुदे दाउद किरिस्त के मालिक आउर परभु बलेसे। असन बरन ले सबु चो पुरे जीसु हुनमन के लाज पड़ालो।
जीसु चो हक चो बिरुद करतोर
1 गोटोक दिने, जिदलदांय जीसु मंदिर ने लोगमन के सिखिया देते रये आउर नंगत खबर सांगते रये, तेबे *धरम-सियानमन संगे, *पुजारीमन चो मुखियामन आउर धरम-पंडितमन एउन उबा होला;
2 आउर हुनमन जीसु के बलुक मुरियाला, “आमके सांग कि तुय ए बुतामन काय हक ले करसीस आउर कोन आय तुके ए हक दिलोसे?”
3 जीसु हुनमन के बललो:
“मय बले तुमके गोटोक गोट पूछेंसे मोके सांगा;
जीसु रोजे दिने जरूसलेम चो मंदिर ने सिखिया देते रये। हुन बड़े गियानी सुकरात असन काईचे सुवाल चो बले उत्तर देतो काजे सुवाल पूछते रये।
जीसु हुनमन के गोटोक सुवाल पूछलो
4 जूहन्ना के बपतिस्मा देतो हक महापरभु ले मिरु रये कि मनुकमन ले?”
ए सुवाल चो उत्तर दिले धरम गुरुमन आपने के ची दोसी बनाता। एईकाजे हुनमन गोटोक दुसर के पुछुक मुरियाला।
5 तेबे हुनमन सोर होउन बलुक मुरियाला, “आमी बलवां, ‘महापरभु बाटले आय जाले, हुन आमके बलेदे, फेर काय काजे तुमी जूहन्ना के नी पतेयालास?’
6 मानतर ‘आमी मनुकमन बाटले आय बललोने, जमाय लोगमन आमके पकना मारदे, कसनबलले हुनमन पक्का जानते रओत कि जूहन्ना अगमजानी आय’।”
7 एईकाजे हुनमन जीसु के बलला, आमी नी जानु, कोचो बाटले रये।
8 जीसु हुनमन के बललो, “असन आय जाले मय बले तुमके नी सांगे, मय ए बुता काय हक ले करेंसे।”
हुनमन कपट मन ले जीसु के सुवाल पुछुन रला आउर हुनमन ए बले जानते रला कि जीसु पूछलो दुसर सुवाल चो उत्तर हुनीचमन चो उपरे पड़ते रये।
दुसट खेतियारमन
ए कटाव मत्ती आउर मरकुस ने बले आसे
9 तेबे जीसु लोगमन के कटाव बलुक मुरियालो: “गोटोक मनुक, अंगुर डीरामन के रोपुन, बनबाड़ी के आदेया देउन, खुबे दिन काजे परदेस गेलो।
10 जेबे अंगुर पाक टुटातो बेरा होली तेबे आदेया कमाउ बीतामन लगे अंगुर चो पाक ले आपलो बाटा काजे गोटोक कमेया के पठालो, मानतर आदेया बीतामन हुन कमेया के पेटुन चुचाय हाथे पठाउन दिला।
अंगुर बाड़ी चो मालिक समया-समया ने आपलो कमेयामन के हाल-चाल जानतो काजे खेतियारमन लगे पठाते रये।
मानतर खेतियारमन हुन कमेयामन के मार-पेट करुन खेदते रला। असन अगमजानीमन संगे होउ रये, जोनमन के इसराएल चो लोगमन दुख-डंड दिला आउर कोके-कोके मोरते बले मारला। सरासरी ने हुन आपलो बेटा के पठालो।
आपलो बेटा बललोने जीसु किरिस्त आय। हुनमन जीसु संगे कसन बेबार करतो बिचार करलासोत बललोने हुनके कुरुस ने चेगातो बिचार चो बारे ने जीसु, हुनमन के सांगलो।
17 जीसु हुनमन बाटे दखुन बललो:
“फेर असन काय काजे लिखलोर आसे:
‘जोन पकना के राज-मिस्तरीमन बाकनुन पकाला, हुनी पकना कोना चो मुंडी-पकना होली’।
हुनमन चो बिचार ने तो हुनके मोरते मारले ची आमचो काजे होयदे बलते रला। मानतर सत ए आय कि हुनमन तो महापरभु चो उआट के पुरा करते रला। हुनमन पाया चो मुंडी पकना के नी पतेयाला मानतर पाछे हुनी पकना, पाया चो मुंडी-पकना होली। असनी बरन ले हुनमन जीसु के काई माहा नी पतेयाला मानतर हुनी, ए संवसार ने जिदलदांय एयदे तेबे सबुले माहान होयदे।
18 जोन कोनी हुन पकना चो उपरे घसरेदे हुन गोंदा-गोंदा होउन जायदे, आउर जेचो उपरे ए पकना घसरेदे हुनके पिसान उलटाउन देयदे।”
आजी मय आउर तुमी, हुन मुंडी-पकना उपरे घसरलोने आमचो कटुर मन आउर आत्मा टुटुन खिसियायदे, कसनबलले आमी पापी आंव। हुन पकना ने आमी घसरलो पलटा आमके मुक्ति मिरेदे आउर आमी कोचेई नी मंडालो पाया के पावां। ए पकना आमचो परभु जीसु आय। 1कुरिंथी 3:11 ने पउलुस बलेसे, “कसनबलले हुन पाया जीसु किरिस्त आय, आउर हुनके छांडुन कोनी दुसर पाया बनाउक चे नी सकोत।” दानियल 2 अध्या ने लिखलोर आसे कि नबुकदनेसर राजा सपना ने गोटोक खुबे बड़े मुरित के दखलो, जेके गोटोक पकना सत्यानास करली। एता जीसु चो बारे ने लिखलोर आसे। एके छाड़ुन कोनी दुसर गोट नी होउक सके।
जोन कयसर चो आय, हुनके कयसर के दियास
19 हुदलीदांय धरम-पंडितमन आउर पुजारीमन चो मुखियामन हुनके धरुक मन करते रला, मानतर लोगमन के दखुन डरला।
कसनबलले हुनमन समजला कि असन कहका जीसु हुनीमन के बलेसे।
धरम गुरुमन जीसु चो बलतो गोट चो अरथ के समजला, मानतर आजी चो खुबे बिसवासीमन ए गोट के नी मानुआत।
21 हुनमन जीसु के पूछला:
“ए गुरु, आमी जानुसे कि तुय नंगत सांगसीस आउर सिखायसीस, आउर कोचई बाटे बले नी होयीस मानतर महापरभु चो बाट के सते सांगसीस।
एता हुनमन सोजे ढोंग दखायसोत।
22 आमी कयसर राजा के पट्टी देतोर नंगत आय कि नाई?”
ए गोट के हेरोद गोहड़ी चो लोग जीसु के पुछु रला, कसनबलले हुनमन कयसर के पटी नी देतो बिचार करते रला आउर हेरोदेस के राजा बनाउक मन करते रला।
एथा कोचो नाव आउर छापा आसे?”
हुनमन हुनके बलला:
“कयसर राजा चो।”
हुनमन जीसु के फसातो बिचार करते रला। कयसर के पटी नी देतोर आय बलुन जीसु बललोने रोमी पाईकमन हुनके राजा चो बयरी आय बलुन बांधुन नेता। आउर जीसु “हव” देतोर आय बललोने, मोसा चो बयरी होतो आउर लोगमन हुनके पकना ने मारता। जीसु, हुनमन के अचरित उत्तर दिलो, हुन गोटोक रोमी सिक्का मांगलो, काय, हुनचो लगे सिक्का नी रली? मानतर हुन हुनी लोगमन ले सिक्का निकराउक मन करते रये।
25 जीसु हुनमन के बललो:
“जोन कयसर चो आय, हुनके कयसर के दियास, आउर जोन महापरभु चो आय, हुनके महापरभु के दियास।”
रोमी सरकार, नियाव, बेपार आउर सरकार चो काम बुता काजे पटी उसील करते रये। ए हुनमन चो कमानी रये।
महापरभु बले आमचो काजे खुबे तीजमन दिलोसे। एईकाजे आमी बले हुनके देतोर आय। आमचो जीवना ने बले सरग आउर मंजपुर काजे देतो जुमे आसे। आमचो देहें आउर आत्मा चो अस्तिर काजे महापरभु आसे। आमके सरग ने धन जुआतोर आय।
सदूकी आउर मोरलोमन जीव उठतो चो बारे ने जीसु चो उत्तर
27 फेर सदूकिमन जोन बलसोत कि मोरलो लोगमन चो जीव उठतोर नी होए, हुनमन ले आदो एउन जीसु के पूछला,
28 “ए गुरुजी, मोसा आगे आमचो काजे असन लिखुन दिलोसे कि कोचई भाई बिया होउन पिला नोहलो मोरुन गेलोने, हुन मनुक चो भाई, हुन बायले के बिया होउन आपलो भाई काजे पिला जनमाओ।
ए बचन व्यवस्थाविवरण 25:5,6 ने बले लिखलोर आसे, ए गोटोक अलग बरन चो नीती आय, रुत चो किताप ने बले असने लिखलोर आसे।
29 असन ने सात भाई रला, पईल बिया होउन पिला नी जनमालोर मोरुन गेलो।
30 फेर दुसर भाई
31 आउर तीसर भाई बले हुनके बिया होलो, आउर असने होउन सातो भाईमन पिला नोहलो मोरुन गेला।
32 सरासरी ने हुन बायले बले मोरुन गेली।
33 फेर जीव उठलो बेरा हुन कोचो बायले होयदे, कसनबलले हुन तो सातो चो बायले होउन रली?”
सते ए मुरकमन चो सुवाल रये।
34 जीसु हुनमन के बललो: “ए जुग चो लोगमन बिया होयसोत,
35 मानतर जोन लोगमन हुन जुग चो लाईक होदे आउर मोरलो थान ले जीव उठदे, हुनमन बिया नी होदे आउर बिया-दान नी करदे।
36 हुनमन फेर केबई नी मोरदे, कसनबलले हुनमन सरगदूतमन असन अमर होदे आउर जीव उठलो किरता, हुनमन महापरभु चो पिला होदे।
मत्ती आउर मरकुस चो नंगत खबर ने जीसु हुनमन के बललो, कि तुमी धरमसास्तर के नी जानास। आउर महापरभु चो सकत के बले नी जानास।
37 मानतर मोसा बले मोरुन जीव उठतो चो बारे ने आपलो जरतो बुटा चो कहनी ने लिखलोसे, जसन हुन, परभु के, अबराहम चो महापरभु, इसहाक चो महापरभु आउर जाकूब चो महापरभु बलेसे।
38 महापरभु तो मोरलोमन चो नाई, मानतर जीवत लोगमन चो महापरभु आय;
कसनबलले हुनचो पुरे तो जमाय जीवत आसोत।”
हेरोद बाट चो लोग के आउर फरीसीमन के जीसु नंगत उत्तर दिलो, तेबे सदूकिमन बले जीसु के परखतो बिचार करला।
सदूकिमन संवसारिक जीवना चो छुट के मानते रला, मानतर फरीसीमन आगे-जुगे चो नीती-नियम के मानतो लोग रला।
हुनमन आत्मा चो बारे ने आउर मोरलोमन चो जीव उठतो चो बारे ने नी पतेयाते रला।
ए गोट चो नाता मोसा चो नियम-कानुन ले आसे।
हुनमन जोन सुवाल जीसु के पूछला, सते हुन अडरा सुवाल रये, कि बड़े भाई मोरलो के हुनचो छय झन नानी भाईमन हुनचो बायले के बिया होला।
असन होले काय होयदे?
एबे असन लोग बले आसोत जोन खुबे हार बिया होलासे, मानतर हुनमन चो नाता एबे चेई जीवना ले आय।
जुग-जुग चो जीवना ले नोआय।
सदूकि बिचार मानतो लोग चो बाड़ती 300 ई.
पू.
ने होउन रली, पुजारी आउर नेतामन एके मानतो लोग रला, हुनमन खुबे सवकार रला।
आजी बले मंडली ने नेतामन आउर सवकारमन, देहें बुता चो छुट के मन करुआत। हुनमन मनुक-गुन के नी छांडलासे, हुनमन महापरभु चो सकत के नी पतेयाते रओत। एईकाजे सदूकिमन चो बिचार आउर फरीसीमन चो बिचार भिने-भिने रये। हुनमन धरमसास्तर के संमपुरन आय बलुन नी पतेयाओत। पुरखा-पाटी चो नीती-नियम आउर जीवना चो छुट चो बारे ने डा. लुड्स बरकहाफ बललो, “ए दुनो ने खुबे बड़े फरक आसे आउर दुनो ले गोटोक के किरिस्त चो नाव के छाड़ुक पड़ेदे।” मोचो बिचार ने जीवना चो छुट लोगमन किरिस्ती नोआत। हुनमन सोजे नाव काजे किरिस्ती आत।
आगे असन बले समया रली जिदलदांय नवा जीवना नी जीवतो लोग के मंडली ले निकराउन देते रला, हुनमन धरमसास्तर के सिद आय बलुन आउर किरिस्त के परभु आय बलुन नी मानते रला। हुनमन के दुय बिचार आउर धरमसास्तर के छांडलो लोग बलते रला। मानतर आजी हुनीमन मंडली ने ओललासोत।
सदूकिमन जीसु किरिस्त चो पक्का बयरी रला, आउर मूर चो मंडलीमन के बले खुबे डाटा-टेवा करतोने हुनीमन पुरे रला। जीसु किरिस्त के कुरुस काट ने चेगातो काजे फरीसीमन संगे सदूकिमन बले रला। जीसु किरिस्त चो मोरलो पाछे फरीसीमन ओगाय होला। एदांय हुनमन किरिस्त आउर हुनके पतेयातो लोगमन के डंड देउक मन नी करते रला। कसनबलले खुबे फरीसीमन, जीसु किरिस्त के पतेयाला, मानतर सदूकिमन, किरिस्त के पतेयातो लोगमन के डाटा-टेवा करते ची रला। एचो बारे ने तुमी पठालो लोगमन चो बुता किताप अध्याय 3 आउर 4 ने पढ़ासे।
मोरलोमन चो जीव उठतोर सदुकिमन आउर एबे चो छुट बिचार लोगमन काजे जचई आय। धरमसास्तर ने गोटोक धियान देतो गोट आसे कि कोनी बले सदूकि मुक्ति पावतो काजे जीसु लगे नी ईला। नीकुदेउस नाव चो फरीसी परभु जीसु के पतेयालो। पठालो लोग चो बुता किताप ने अध्या 6:7 ने लिखलोर आसे, जहूदी पुजारीमन ले खुबे लोगमन जीसु किरिस्त चो नंगत खबर के सत पतेयाला, मानतर सदूकिमन चो मन बोहड़ातो बारे ने धरमसास्तर ने कहांय लिखलोर नीआय।
नंगत खबर सुनातो जुवान लोगमन झटके जानुआत कि कुरुस चो गोट सुनतो लोगमन के रीस उबजाउआय। हुनके आपलो गांव-पारा ने इजीत-मान नी मिरे। एईकाजे हुनमन जीसु चो नंगत खबर के छाड़ुन, लोगमन के नंगत लागतो खबर के सुनाउक मन करुआत। जहूदा इसकारियोती पयसा काजे जीसु के बिकलो। पतरस बले जीसु के नी जाने बललो, मानतर पाछे पछताउन बोहड़ुन ईलो। मानतर जोन मनुक आपलो नाव कमातो काजे जीसु के बिकुआय, हुन केबई बोहड़ुन नी एये। जरमिया 13:23 ने लिखलोर आसे, “काय, कोनी करेया आपलो चामड़ी के, नोहले चीता-बाग आपलो देहें चो बाना के बदलुक सके?” केबई बले तुमी असन सुनले कि देहें चो छुट के मन करुमन जीसु किरिस्त के मानला, तेबे तुमी हुनके नी पतेयाहा। कसनबलले आगे-जुगे होओ नोहले आजी बले सदूकिमन जीसु किरिस्त चो नंगत खबर चो पक्का बयरी आत।
धरम-पंडितमन ले सुवाल
जीसु चो ए सरासरी सुवाल आय
39 असन सुनुन आदो धरम-पंडितमन बलला: “ए गुरु, तुय नंगत बललीस।”
40 आउर फेर हुनमन जीसु के आउर काई पूछतो काजे खुबे डरला।
41 फेर जीसु हुनमन के पूछलो: “कसन ने किरिस्त के, पुरखा दाउद चो बेटा बलसोत?
42 दाउद भजन चो किताप ने आपने लिखलोसे:
‘परभु महापरभु मोचो परभु के बललो कि
43 मय तुचो बयरीमन के तुचो पांय खाले करतले
मोचो उजा हाथ बाटे बस’।
44 दाउद खुदे किरिस्त के परभु बलेसे, फेर हुनचो बेटा कसन ने होयदे?”
45 जिदलदांय जमाय लोगमन सुनते रओत, जीसु आपलो चेलामन के बललो:
46 “धरम-पंडितमन ले चेत करुन राहा, जोनमन के लाम-लाम कुड़ता पींदुन बुलते रतोर नंगत लागेसे, आउर जोनमन के हाटमन ने जुहार आउर मंडली-घर ने बड़े आउर सगा-घर ने मंजार चो ठान नंगत लागेसे।
47 हुनमन रांडी बायलेमन चो घरमन के नानागती करसोत आउर दखातो काजे खुबेदांय ले पारथना करते रयसोत;
हुनमन खुबे डंड पावदे।”
जीसु, कुवांरी लेकी ले जनमलो आपलो सत गोट के सांगेसे।
दाउद राजा काय काजे आपलो थर ने जनमलो, जीसु के ‘परभु’ बलेसे? ए मोचो मीतमन, किरिस्त के हुन, परभु तेबे बलेदे, जेबे हुन, हुनचो ‘परभु’ होयदे। हुन, परभु आय जाले बेटा ले बड़े ची होयदे। हुनके महापरभु चो बेटा होतो काजे कुआंरी लेकी ले ची जनमतोर रये। जीसु ए थाने गोटोक बड़े गोट के सांगते रये।
जीसु एता दाउद राजा चो लिखलो भजन गीत 110 के खुबे जोर देउन बलेसे कि दाउद राजा पवितर आत्मा ले भरपुर होउन ए भजन के लिखलो। परभु जीसु बललो, ए भजन किरिस्त चो बारे ने सांगेसे, जोन परभु जीसु चे आय।