211
ए मोचो मीतमन, तुमके किरिस्त ने मोचो जुहार!मय आसा करेंसे कि तुमी जमाय हरिक ने आसास आउर आजी बले परभु चो बचन सीखतो काजे तियार आसास। मीतमन, जसन आमी आगे चो पाठ ने पढ़लु कि किरिस्तीमन गोटोक हार नाई, मानतर खुबे हार खेमा करतो काजे तियार रतोर आय। हुकुम मानतोर आउर सेवा करतोर हुनचो जुमे नोआय, मानतर नंगत किरिस्ती गुनमन बले होतोर आय।
आमी दखलु कि परभु जीसु दुय ठन कटावमन ले संवसार चो हाल के सांगलो। मनुक कितलेई डंड पावले बले आपलो अडरा बेबार के नी छांडे बललोने, नूह चो असन पतेयातो ने चमकट रउं आउर महापरभु चो मन-इछा असन बेबार करुं। महापरभु, किरिस्तीमन के ए मंजपुर ले गुचाले ची महा तकलीस ए संवसार ने मुरियायदे।
मोचो मीतमन, आजी चो पढ़ई मुरियातो ले आगे, मय मोचो परभु चो बारे ने खुद चो बिचार सांगुक मन करेंसे। ए मोचो बिसवास आय कि हुन देहें रूप धरुन महापरभु रलो आउर देहें रूप धरलो किरता हुनचो ने काई बरन ले बले महापरभु गुन चो उना नी रली। दुसर गोट ए आय कि हुन मनुक रूप ने बले सिद मनुक रलो। सत तो ए आय कि तुमी हुन समया ने रलोने हुनचो संगत ले खुबे हरिक होतास, हुनचो हांसतो के सुनुन खुबे हरिक होतास। मोके जीसु चो कोनी बले छापा नंगत नी लागे कसनबलले छापा बनातो बीता जीसु के हांसतो बेरा नी दखालोसे। मोचो अंताज ने हुन खुबे हार हांसतो होती। आमचो परभु समपुरन मनुक रलो आउर हुनचो संगत ने रले तुमके खुबे हरिक मिरती। कोनी-कोनी परचारकमन असन आसोत, जोनमन चो संगत ले मोचो बुद आउर मन चो सकत चो बाढ़ती होयसे, मानतर जिदलदांय हुनमन कटाव सुनायसोत, तेबे मय भक्यायंसे। मोचो बिचार ने आमचो परभु जीसु असनी ची रलो। आमी गोटोक असन गोट दखुंसे जोन थाने मोके पूरा बिसवास आसे कि सुनतो लोगमन खुबे हांसला होती।
1 जीसु आपलो चेलामन के अमदेया पारथना करतो आउर भोरसा केबई नी छांडतो काजे गोटोक कटाव सांगलो:
अध्या 17 चो सरासरी, एतो दिनमन चो गोटमन आउर किरिस्त चो फेर एतो चो बारे ने होली।
परभु जीसु हुन दिनमन के नूह चो समया ले कटारलो जोन बिसवास चो जुग नी होयदे।
एबे चो जुग ने बले उसने चे होयसे।
सपाय बाटे डर चेपालीसे।
ए पाठ ने पारथाना करते रतो काजे बलेसे।
एचो बारे ने जीसु गोटोक कटाव सुनालो।
खुबे चिपा ले जीवना जीवतो मनुक के परभु जीसु दुय ठन बाट सांगेसे। तुमके ची बाछतोर आय कि काय करतोर आय। तुमी बिसवास चो जीवना जीउआहास कि डर चो जीवना जीउआहास।
दुसर महा-जुद
दुसर महा-जुद बेरा इंगलेंड ने खुबे बममन घसराते रओत, मानतर हुता चो गोटोक मंडली घरे असन लिखु रये, “तुमचो मांडी थरथरेसे जाले पारथना ने मांडीखुटा दियास।” हुन परभु जीसु चो बललो गोट ची रये, “पारथना करा आउर ढाढ़ुस नी छांड़ा।”
दुसर हिसाब ने, 1 थिसलुनी 5:17 पद ने पउलुस बले थिसलुनी चो मंडली के एई गोट के लिखलोसे, “सरलगा पारथना करते राहा।” एचो अरथ ए नोआय कि रात-मंजन पारथना मीटींग ने बसुन राहा। पारथना करतोर गोटोक नंगत बेबार आय। ए टोंडमन चलालो ले आगर जीवना चो गोटोक भाग आय। सूरता करा पउलुस रोमीमन चो मंडली के रोमी 8: 26 पद ने लिखलो, “पवितर आत्मा खुदे सांगुक नी सकतो असन गोटमन ले सुयकुन-सुयकुन आमचो काजे गुहारेसे, जेके सांगुक पुरुक नी होये।” बललोने, सबदमन ले सांगुक नी होये। खुबे हार असन होउआय कि आमचो टोंड ने सबद नी रयसे, मानतर मन ने पारथना होयसे ची। सबद चो पाटे आमचो जीव आसे आउर पारथना चो असर आसे।
खुबे समया आगे गोटोक परचार करतो बीता रये । हुनचो सांगतो गोट अचरित चो रली। गोटोक हार हुन बललो, “जिदलदांय मनुक फसल काजे पारथना करेसे तेबे महापरभु हुनचो ले आसा करेसे कि हुन रापा धरुन आमीन बलो।”
तुमी मांडी खुटा टेकुन ची फसल काजे पारथना करते नी राहा। ए गोटोक पवितर मूरक बुता आय। मानतर फसल काजे पारथना करुन मसागत करुक मुरियाहा। आमचो परभु ढाढ़ुस संगातो काजे बलतो चो अरथ एई आय, “पारथना करतोर आउर ढाढ़ुस नी छांडतोर।”
ओधरमी नियाव करु बीता चो कटाव
सुनतो लोगमन समजते रला कि जीसु काय बलुक मन करेसे। हुन ए कटाव सांगलो।
2 “कोनी सहर ने गोटोक नियावकारी रये, हुन महापरभु के आउर कोनी मनुक के नी डरते रये।
3 हुनी सहर ने गोटोक रांडी बायले बले रते रये, हुन बायले घन-घन हुनचो लगे एउन-एउन बलते रये, ‘मोचो नियाव करुन देस, मोके नियाव लड़तो बीता ले बचाव’।
हुन नियाव करु बीता, महापरभु के नी डरते रये।
हुन लालची आउर आपलेई उपरे भोरसा करतो बीता रये।
हुन आपलेई मन-इछा हिसाब ने काम करते रये।
हुनचो जीवना-खावना ने महापरभु काजे काई ठान नी रये।
एईकाजे हुन, मनुक जात ले मया नी करते रये।
ए रांडी बायले काजे हुनके जीव नी दुखते रये।
ए रांडी बायले संगे ओनियाव आउर अडरा होते रली। हुनके घर खाली करतो काजे धमकाते रओत। हुन रांडी बायले कचरी ने गेलोने बले हुनचो गुहार कोनी नी सुनोत। ए रांडी बायले बाबुमन के सांगेसे कि हुन गरीब आय आउर हुनचो घर के ओनियाव करुन झिकसोत। हुनके नियाव करु बीता बाटले दया चो खुबे जरुरत आसे।
गोटोक बाबु हुन रांडी चो तकलीस चो बारे ने नियाव करु के संमजालो। नियाव करु बीता बललो, हुनके एउक देस। मय जानेंसे कि हुनके कसन निबड़ातोर आय। जिदलदांय रांडी बायले हुनचो पुरे ईली तेबे हुन बललो, “बईन, तुचो नियाव करतोर मोचो हाथे नीआय, मोके खेमा कर। परभु तुचो संगे रओ।”
दुसर दिने हुन नियाव गादी ने बसलो, तेबे हुन बायले हुता फेर ईली आउर हुन आपलो बाबु के बललो, “मुंडे बेरातले मोचो लगे समया नीआय।”
बाबु बललो, “कितलेई समया लागले बले हुन तुके भेटुक मन करेसे।”
नियाव करुबीता गुलाय दिने हुन बायले के धियान नी दिलो आउर बिचारलो कि हुन मुरमुरा होउन गेली होती, मानतर दुसर दिने हुन कचरी ने ईलोदांय हुन बायले आगे ले हुता एउ रली। हुन रोजे दिने कचरी ने एते रली तेबे नियाव करु बीता मने-मने बिचारुन बललो, “एचो काजे मोके काई बले करुक ची पड़ेदे।”
4 हुन खुबे दिन ले हुनचो गोट के नी मानलो, मानतर सरासरी ने बिचार करलो आउर बललो, ‘सत आय कि मय महापरभु के नी डरें, आउर मनुकमन के बले नी मानेंसे।
5 तेबले-बले ए रांडी बायले मोके असकट करुन दिलीसे, एचई किरता मय एचो नियाव करुन देयंदे, नोहले ए बायले मोचो लगे घन-घन एउन मोके थकाउन पकायदे’।”
“ओहो, ए बायले तो मोके असकट करलीसे ।” हुन आपलो बाबु के बललो, हुन रांडी बायले के भीतरे आन।” नियाव करु बीता हुन बायले के बललो, “ कानुन चो हिसाब ले ए तुचो हक आय। एबे जा।”
6 परभु बललो: “सुना, ए ओधरमी नियाव करतो बीता काय बलेसे?
7 काय,महापरभु आपलो बाछलो लोगमन चो नियाव नी करेदे, जोन दिन-रात हुनके गुहारते रयसोत?
काय, हुन एमन चो बारे ने बेर करेदे?
खुबे बाईबल सिखातोमन ले मय सुनले कि ए कटाव रात-मंजन पारथना करतो काजे सिखायसे।
मय आपन ले बडे़ लोगमन चो गोट के नी मानतो ढाढ़ुस नी करें, मानतर ए कटाव चो सिखिया ए नोआय।
आमचो परभु सत के समंजातो काजे कटाव सांगते रये।
‘कटाव’ जूनानी चो ‘पाराबालो’ सबद चो अनुवाद आय, जेचो अरथ संगे-संगे पकातोर आय।
अंगरेजी चो ‘बाल’ सबद बले एचो ले निकरलीसे।
काई सिखानी संगे कोनी कहनी के कटारुन हुनचो अरथ के समजतो ने सरसरा बनातोर आय।
एईकाजे परभु जीसु आत्मिक सत के समंजातो काजे रोजे दिना चो जीवन ले उदाहरन देते रलो।
हुन एके दुय बरन ले समंजालो, पईल, गोटोक कटाव बाटले आउर दूसर, उलटा बिचारमन ले कटारुन।
परभु चो बलतो अरथ ए आय, “तुमी महापरभु ले पारथना करसाहास, तेबे काय, हुन ओनियाव करु आय?” जिदलदांय तुमी हुनके पारथना करसाहास, तेबे काय, हुन गोटोक फंदी राजनीती बीता आय? काय, महापरभु राजनीती खेलु आय? नाई, मोचो मीतमन, महापरभु ओनियाव नी करुआय!
हुन लालची आउर ओनियाव करुबीता, रांडी बायले चो गुहार के सुनुक सकेसे जाले, आमचो महापरभु तो नंगत नियाव करतो महापरभु आय। आजी परभु चो लोग पारथना करतो ले काय काजे पाटे गुचेसोत? तुमके हुनचो पाट-पाट गुहारते नी रतोर आय। हुन तुमचो काजे काई करतो बायदा करेसे। तुमी ए गोट के समजलास जाले, आमचो पारथना चो जीवना ची पलटुन जायदे। एके जानुन पारथना करा कि हुनचो कान आमचो पारथना के सुनतो काजे तियार रयसे। आमी बिचारुंसे कि हुन आमचो उपरे धियान नी देयसे, एईकाजे आमी घन-घन पारथना करते रतोर आय। ओनियाव गोट के हुन नी सुनेसे।महापरभु ओनियाव करु नोआय।
फरीसी आउर पटी धरतो बीता चो कटाव
पारथना चो बारे ने जीसु, गोटोक आउर कटाव सांगलो।
9 जोन मनुकमन आपने के धरमाती आउर दुसर के हिनस्ता करते रओत, हुनमन काजे जीसु असन कटाव बललो:
10 “दुयझन मनुक मंदिर ने पारथना करतो काजे गेला, गोटोक मनुक *फरीसी आउर दुसर मनुक पट्टी उसील करतो बीता, जेके लोगमन हिनस्ता करते रला।
ए कटाव ने हांसतो गोटमन खुबे आसे, तेबले बले जीसु हुनमन चो मन के तकलीस देउक बिचार नी करलो।
हुन हुनमन चो साहरा करुक मन करलो। दुसर-दुसर बिचार बीतामन मंदिर ने पारथना करुक जायसोत। फरीसीमन के धरमकारी आउर पटी धरुमन के पापी मानते रओत।
फरीसी आपलो भेंट धरुन मंदिर ने गेलो आउर पुजारी के दिलो। पुजारी हुनचो भेंट के पवितर ठान ने चेगायसे आउर फरीसी पारथना करेसे।
11 फरीसी उबा होउन आपलो मन ने असन पारथना करुक मुरियालो:
ए महापरभु, मय तुके धन-धन करेंसे कि मय दुसर मनुकमन चो असन जटतो बीता, ओधरमी आउर केचड़ाहा नोआंय, आउर ए पट्टी उसील करतो बीता असन पापी बले नोआंय।
काय बरन चो पारथना!
आमी बले असन पारथना करुंसे।
आमी ए पारथना के सुंदर रीती ले करुक सीखलुसे, “परभु मय तुके धन-धन करेंसे कि मय तुचो काजे समया आउर सेवा देउक सकें।”
परभु उपरे आमी कसन भलई करुंसे।
ए मोचो मीतमन, ए पारथना नोआय। महापरभु के आमचो सेवा चो जरुरत नीआय।
हुन फरीसी बललो, “मय दूसर लोग असन झीका-उड़मा करतो, ओनियाव करतो आउर बेबिचार करतो बीता नोआंय आउर ए पटी धरतो बीता असन बले नोआंय।”
तेबे हुन, महापरभु के आपलो बुतामन के गनायसे।
12 मय हपता ने दुय हार उपास रयंसे, आउर मोचो जमाय कमई चो दस बाटा ले गोटोक बाटा, तुके दान देयंसे।
ए तो खुबे नंगत मनुक आय।
आमी एके आमचो मंडली ने मिसाउं।
हुन आपलो मने बिचारेसे कि हुन पारथना करेसे, मानतर हुनचो पारथना छानी चो उपरे नी गेली।
हुन मने-मने हरिक होउन बाहरे निकरलो। महापरभु तो हुनचो पारथना सुने बले नाई।
पटी धरतो बीता तो बड़े पापी रलो। हुन आपलो राज के बिकुन रलो। हुन तो एबे सत जहूदी नी रलो तेबे कसन ने धरमकारी होतो। हुन महापरभु के पाट करुन रलो। हुन काय काजे असन करलो? कसनबलले हुन पयसा कमाउक मन करलो। हुन खुबे पयसा कमाउ रलो मानतर हुनचो मन ने अस्तिर नी रली। लूका 19 अध्या ने जकई चो कटाव के पढ़ा। पटी धरतो बीता चो मन गरीब रली। हुन जानते रलो कि दया चो गादी पुरे हुनचो काजे मुरे ठान नी आय। एईकाजे हुन महापरभु के गुहारेसे।
13 मानतर पट्टी उसील करतो बीता फयले उबा होउन सरग बाटे आंईक के किंदराउक बले मन नी करलो, मानतर आपलो छाती पेटुन-पेटुन असन बललो:
‘ए महापरभु, मय पापी मनुक आंय, मोचो उपरे जीव दुख!’
“ए महापरभु मय पापी आंय, मोचो उपरे दया कर।”
मय गोट के सरसरा समजेंसे।
हुन आपलो छाती पेटुन-पेटुन बललो, “ए परभु, मय गोटोक पटी धरतो बीता आंय।
महा पवितर ठाने जोन थाने तुचो दया गादी आसे हुता मय एउक नी सकें।
तुय मोचो उपरे दया करुआस जाले मय हुता एउक मन करेंसे।”
परभु जीसु बललो, हुनचो पारथना के महापरभु सुनलो। काय, तुमी जानास काय काजे? कसनबलले किरिस्त जीसु हुनी समया ने कुरुस बाटे जाते रलो कि हुनके दया मिरो। 1 जूहन्ना 2:2 पद ने, जूहन्ना लिखलोसे, “हुनी आमचो पापमन चो खंडान काजे जतरा होलो, सोजे आमचेई पापमन काजे नाई, मानतर संवसार चो सपाय चो पापमन काजे बले आय।” पापमन चो खंडान चो अरथ दया-गादी आय। किरिस्त आमचो पापमन काजे दया-गादी आय। सोजे आमचेई पापमन काजे नाई, मानतर गुलाय संवसार चो पापमन काजे बले आय।
हुन पटी धरतो बीता चो पारथना के परभु सुनलो । एबे तुमके महापरभु ले दया चो मुठी नी मांगतोर आय। हुन दया करु आय। कोनी-कोनी लोगमन बलुआत कि आमके हुनचो ले दया चो मुठी मांगतोर आय।
ए मोचो मीतमन, तुमी हुनचो ले कसन दया पाउक मन करसाहास? हुन तुमचो काजे आपलो गोटकीच बेटा के देउन दिलो कि तुमचो पलटा मोरो। हुन पापी मनुक के बलेसे, “तुय एउक सकीस। तुचो काजे दया चो गादी आसे। मय तुचो पुरे मानेंसे कि मोके हुन दया-गादी पुरे एतोर रली। तुमी हुनचो बेटा-बेटीमन आहास जाले तुमके हुन दया-गादी पुरे एतोर आय। कसनबलले हुता हुन तुमचो आउर मोचो पाप काजे कुरुस ने आपलो जीव दिलोसे। आमचो डंड काजे मोल दिलोसे। पवितर महापरभु आपलो हाथ लमालोसे। तुमके हुनचो ले गुहारुक नी लागे। तुमके हुनचो ले किरिया खाउक नी लागे। कसनबलले हुन तुमचो निमल के जानेसे। तुमके काई बनुन दखाउक नी लागे। तुमी हुन पटी धरतो बीता असन होआ। तुमी हुनके पतेयाहा। हुन तुमके मुक्ति देयदे। महापरभु दया करु आय।
14 जीसु बललो:
मय तुमके बलेंसे, हुन फरीसी नाई, मानतर एई मनुक महापरभु चो पुरे धरमाती होउन आपलो घरे गेलो। कसनबलले जोन कोनी बले आपने के बड़े बनायसे, हुनके नानी करेदे, आउर जोन कोनी बले आपने के नानी करेसे, हुनके बड़े करेदे।”
जीसु पिलामन के बर देयसे। पिलामन, जीसु संगे रउक मन करते रओत।
15 फेर लोगमन आपलो नानी पिलामन के जीसु लगे आनुक मुरियाला कि जीसु हुनमन चो उपरे हाथ थापुन बर देओ, मानतर चेलामन एके दखुन हुनमन के चिड़चिड़ाय होला।
चेलामन बलला, “पिलामन के हुनचो ले लापी गुचाहा। हुनके असकट नी करा।”
16 जीसु पिलामन के आपलो लगे हागदेउन बललो:
“पिलामन के मोचो लगे एउक दियास, आउर हुनमन के नी ठेबाहा: कसनबलले महापरभु चो राज असने मन चो आय।
हुनमन बिचारला कि पिलामन चो काई मोल नीआय। मानतर जीसु चो बिचार भिने रली । हुनके, हुनमन ले काई तकलीस नी रली।
17 मय तुमके सते बलेंसे, जोन महापरभु चो राज के पिलामन असन नी पतेयालोने, हुन हुता केबई नी ओलुक सके।”
पिलामन खुदे जीसु लगे हरिक ले जाते रला।
हुन बले मन नी करे कि बड़े लोग पिलामन के हुनचो ले लापी गुचाओत।
महापरभु हुन बड़े लोग उपरे दया करो जोनमन पिलामन के परभु ले लापी गुचायसोत।
पिलामन चो बारे ने जीसु आगे बले बलु रये, लूका 17:2 “कोनी बले ए नानीमन ले गोटोक के पाप करायसे जाले, हुनचो काजे ए नंगत आय कि हुनचो टोडरा ने जता पकना ओराउन समुंद ने पकाउन देओत।” पिलामन तुमचो खोज ने हिंडसोत। हुनमन तुमचो उपरे पुरा भोरसा करसोत। तुमी बलतो गोट के करतो काजे अमदेया तियार रयसोत। तुमी हुनमन के महापरभु लगे नी आनलोने महापरभु खुदे तुमचो उपरे दया करो! पिलामन तो हुनचो लगे एउची आत।
तुमी बलासाहास कि पिलामन ने कसुर करतो टकर रयसे। हव, मानतर हुनचो उमर हिसाब देतो इतलो नीआय। पिलामन हुनी फासला करदे जसन हुनमन के बाट दखादे। पिलामन चो एई टकर आय। पिलामन बड़े बाड़लोने आपलो मन-इछा चो बाढ़ती करेसोत। तेबे तकलीस चो मूर होयसे। मानतर हुनचो पुरा बनतो ले आगे पक्का करा कि हुन किरिस्त लगे एवो।
जीसु, मंडली घर चो मुखिया के पांच ठन हुकुममन सूरता करायसे
ए कटाव मत्ती 19:16-30 आउर मरकुस 10:17-31 ने लिखलोर आसे। ए गोटोक खुबे नंगत कहनी आय, जोन थाने परभु हुन सवकार मनुक चो बेबार के सांगेसे।
18 कोनी धरम मुखिया जीसु के पूछलो: “ए नंगत गुरु, जुग-जुग चो जीव पावतो काजे मोके काय करतोर आय?”
19 जीसु हुनके बललो:
“तुय मोके काय काजे नंगत बलसीस?
कोनी बले नंगत नीआत, मानतर महापरभु एकलाय ची नंगत आय।
परभु जीसु ए सवकार जुवान के ए समंजाउक मन करते रलो कि हुन महापरभु आय। एईकाजे जीसु हुनके आपलो पाटे-पाटे एतो काजे बललो, जसन चेलामन हुनचो संगे रते रला। मत्ती 16:16 पद ने लिखलोर आसे, “जीवत महापरभु चो बेटा किरिस्त।”
20 तुय हुकुममन के जानसीस: बेबिचार नी करतोर आय, मोरते नी मारतोर आय, चोरतोर नोआय, फंद साकी नी देतोर आय, आपलो आया-बुआ के मान करतोर आय।”
21 हुन बललो: “मय तो ए जमाय के मोचो जुवान बेरा ले मानते एयंसे।”
22 असन सुनुन जीसु हुनके बललो:
“तुचोने गोटकी ची गोट एबे बले उना आसे, आपलो जमाय जाकमन के बिकुन सपाय धन के गरीब लोगमन के बाटुन देस, आउर तुके सरग ने धन मिरेदे, आउर तुय मोचो पाट-पाट आव।”
जीसु हुन जुवान के दस हुकुममन चो अरथ सांगलो, जोन मनुक जात चो नाता चो बारे ने आय। पईल भाग महापरभु आउर मनुकमन चो नाता चो बारे ने आय। ए जुवान दुसर भाग के पूरा करुन रलो मानतर पईल भाग ने समपुरन नी रलो। हुनचो ने गोटोक उना रली कि हुनचो महापरभु संगे पक्का नाता नी रली। महापरभु चो बाट ने जातो काजे हुनचो धन-माल अड़ंगा होते रये । कोनी दुसर काजे काई दुसर तीज अड़ंगा होउक सके। नियम-कानुन ए सुंदर जुवान के कसुरदार बलते रली। धन आउर बुता बाटले सरग ने जाउक चे नी होये। सोजे महापरभु ची उंट के सूजी चो काना बाटले निकराउक सके आउर महापरभु ची नवा जनम देउक सके।
23 असन सुनुन हुन खुबे मुरमुरा होलो, कसनबलले हुन खुबे सवकार रये।
24 जीसु हुनके दखुन बललो: “सवकारमन के महापरभु चो राज ने ओलतोर कितरो खट-खट आय!
25 महापरभु चो राज ने सवकारमन चो ओलतोर ले, सूजी काना ले ऊंट चो छिंगड़तोर खुबे सरसरा होयदे।”
26 सुनतो बीतामन बलला: “असन आय जाले फेर कोचो मुक्ति होउक सके?”
27 जीसु बललो: “जोन मनुकमन ले नी होउक सके, हुन महापरभु ले होउक सके।”
28 पतरस हुनके बललो: “दखा, आमी तो घर-बार के छांडुन तुमचो संगे होलुसे।”
29 जीसु हुनमन के बललो: “मय तुमके सते बलेंसे, कोनी बले महापरभु चो राज काजे घर, बायले, भाईमन, आया-बुआ, नोहले आपलो पिला-झीलामन के छांडलोसे,
30 ए बेरा ने हुनचो ले कितरोई आगर मिरलीसे, आउर एतो जुग ने सरग ने जुग-जुग चो जीव मिरेदे।”
हुनचो मन-इछा नी रली, तेबले बले लिखलोर आसे कि जीसु हुनके मया करलो।
धन चो किरता हुन जीसु ले अलग होलो।
हुन जीसु चो पाट-पाट गेलोने कुरुस चो छांय ने मुक्ति पावतो।
कसनबलले जीसु ए समया ने कुरुस चो खुबे लगे अमरु रलो।
ए जुवान कोन रलो? मय नी जाने। मानतर हुन जुवान तुमी होउक सकास। काय, हुन पाछे जीसु चो पाट-पाट ईलो? आसा तो एई आय कि हुन ईलो। काय, तुमी हुनचो पाट-पाट होउक मन करसाहास? हुन तुमके मया करेसे।
जरीहो ने ओलतो बेरा जीसु, काना मनुक के दखतो सकत देतोर
एके पढ़तोले आगे मय तुमके सांगुक मन करेंसे कि बाईबल चो बारे ने जानतो बीतामन नंगत खबरमन के गोटकी कटार नीआय बलसोत। कसनबलले मत्ती दुयझन कानामन चो गोट लिखलोसे मानतर मरकुस आउर लूका गोटकीच काना चो बारे ने लिखलासे। तेबले बले ए भाग के धियान देउन पढ़लोने ए गोट पक्का होयसे कि एता खास गोट जीसु बाटले चेकरतो बुता आय। मरकुस 10:46 पद ने गोटोक काना मनुक चो नाव के खास करुन लिखलोर आसे। बरतुलमय किरकिरुन बलते रये, “जीसु, दाउद चो बेटा……” लूका चो ए भाग ने जीसु, जरीहो ने ओलतो बेरा हुन काना मनुक के दखतो सकत दिलो। ए मनुक बले हाग देउन जीसु के दाउद चो बेटा बलुन रये।
35 जेबे जीसु जरीहो सहर लगे अमरलो, तेबे गोटोक काना सड़क रेटे बसुन मुटी मांगते रये।
36 हुन भीड़ चो कोलार सुनुन पूछुक मुरियालो: “काय होयसे?”
37 हुनमन हुनके सांगला:
“जीसु नासरतेया जायसे।”
हुन काना मनुक, जीसु के दाउद चो बेटा बलतो अरथ एई रये कि हुन, हुनके राजा मानते रये। हुनके पक्का पतेयाते रलो कि जीसु हुनके दखतो सकत देयदे, एईकाजे हुनके ओगाय करतोर मसकिल रये। हुन जीसु के पतेयालो। ए मनुक संगे जीसु चो बेबार सोज आउर हरिक चो रये।
38 आउर हुन चिचियाउन बललो:
“ए जीसु, दाउद चो बेटा! मोके जीव दुख!”
39 जोन लोगमन पुरे-पुरे जाते रओत, हुनमन दागा देउन बलला:
ओगाय रा, मानतर हुन आउर बले अदिक चिचियाउन बलुक मुरियालो: “ए दाउद चो बेटा! मोके जीव दुख!”
40 तेबे जीसु ठेबलो आउर हुकुम दिलो, हुनके मोचो लगे आना, जेबे हुन जीसु लगे ईलो तेबे हुनके पूछलो:
41 “तुय काय मन करसीस कि मय तुचो काजे करुन देयंदे?”
हुन जीसु के बललो: “ए परभु, असन कर कि मोके दखुकलाय होओ।”
42 जीसु हुनके बललो: “दखुक मुरियाव, तुचो बिसवास तुके उजराली।”
43 आउर हुन तूरते दखुक मुरियालो, हुन महापरभु के जुहार करते जीसु चो पाट-पाट गेलो, असन दखुन जमाय लोगमन महापरभु के जय-जय करला।
दखतो सकत पाउन हुन मनुक जीसु संगे गेलो आउर खिंडिक दिन चो पाछे हुन काय दखलो?
जीसु कुरुस ने आपलो जीव देयसे।
आजी खुबे लोगमन जोनमन छुक-छुका दखुक सकसोत, जीसु के कुरुस ने जीव सोपुन देतो के नी दखुक सकसोत, जोन हुनमन चो जीवना आउर पाप खेमा काजे आय।
तुमी एबले एके नी दखलासाहास जाले तो दखा आउर जिया।
ए मीतमन, ए आमचो आजी चो पाठ रली। महापरभु ओनियाव नी करे। हुन आमचो बाटे धियान देयसे कि आमी हुनके काई मागुं। आमी निमल रलो बेरा, पटी धरतो बीता चो असन पारथना के सुनुन हुन आमके दया करलोसे। हुन पिलामन के मया करेसे, एईकाजे आमके पिलामन के हुनचो लगे आनतोर आय आउर आमचो आउर महापरभु चो मंजी काई अड़ंगा लगाउक नी देतोर आय। जीसु आमके आंईकमन दिलोसे कि आमी कुरुस ने हुनचो जतरा के दखुं जोन आमचो पाप खेमा करुन जीव देयसे।
एदांय चो पाठ ने आमी जकई चो मुक्ति, आमचो बरमन चो बाड़ती, जीसु मंदिर के सुद करतोर आउर जरूसलेम काजे जीसु गागतो चो बारे ने पढ़वां।