210
ए मोचो मीतमन, परभु चो नाव ने मोचो बाटले तुमके जुहार!आगे चो पाठ ने आमी जीसु चो टोंड ले गोटोक कहनी सुनलु जोन थाने गोटोक सवकार मनुक रये आउर हुनचो दुआरे गोटोक गरीब मनुक बेमार पड़ून रये, जेचो घाव के कुकुरमन चाटते रओत। दुनो चो मोरतो समया अमरली आउर मोरलो पाछे सवकार मनुक चो आत्मा पतालपुरे अमरली। मानतर गरीब लाजर चो आत्मा के अबराहम चो कोरा मिरली। हुनमन चो असन होतोर सवकार नोहले गरीब किरता नाई, मानतर हुनमन चो मन चो किरता आय।
मोरलो पाछे हुनमन चो दसा बदलली। गरीब लाजर, सवकार होलो आउर सवकार मनुक गरीब होलो। एदांय ईया आजी आमी हुनचो पुरे चो पाठ पढ़ुक मुरियावां।
24 हुन चिचियाउन बललो, ‘ए बुआ अबराहम, मोचो उपरे जीव दुखुन लाजर के पठाउन देस कि हुन आपलो अंडकी चो टीप के पानी भीजाउन मोचो जीब के सितर करो, कसनबलले मय ए ढग-ढकतो आईग ने खुबे कलपडाहा होयंसे’।
दुनो चो दसा उलटा होउ रली। लाजर सुख ने रलो आउर सवकार मनुक डंड ने रलो।
25 तेबे अबराहम हुनके बललो, ‘ए बेटा, सूरता करुन दख कि तुय आपलो जीवना बेरा नंगत-नंगत तीजमन के पावलीस आउर लाजर अडरा तीजमन के। मानतर एबे हुन एथा अस्तिर ने आसे, आउर तुय हुता कलपडाहा होयसीस।
26 मानतर ए गोटमन के छांडुन दिले बले, आमचो आउर तुचो मंजिगता ने खुबे बड़े खोदरा तियार करलोर आसे, एईकाजे कोनी बले ए थान ले हुन पाट जाउक मन करेसे हुन नी जाउक सके, आउर कोनी हुन पाट ले ए पाट आमचो लगे नी एउक सके’।
सपाय लोग मोरलो पाछे हुनमन चो देहें मोठ ने माटी उलटदे।
मानतर जीसु चो फेर जीव उठलो किरता किरिस्तीमन चो आत्मामन हुनचो लगे जायसोत।
2 कुरुंथी 5:8 पद ने पउलुस लिखेसे, “एईकाजे आमी ढाढ़ुस करुंसे आउर संवसारिक देहें ले अदरे होउन परभु संगे रतोर खुबे नंगत समंजुसे।”
महापरभु के नी मानतो मनुक आजी बले मोरलो पाछे पतालपुर ने डंड पावतो थाने ची जायसोत।
इफिसी 4:8-10 पद आमके गोटोक छापा दखायसे।
एईकाजे धरमसास्तर ने लिखलीसे, ‘जेबे हुन डेंग ने चेगलो, हुन कयदीमन के बांधून नीलो, आउर मनुकमन के दान दिलो।’
हुन डेंग ने चेगलो बललोने, काय जानुक होयसे?
एचोले ए जानुक होयसे कि हुन मंजपुर चो तले बले उतरु रये, जोन उतरलो, ए हुनी आय जोन बादरी ले बले उपरे चेगलो कि हुन सपाय के समपुरन करो” बललोने, जेबे आमचो परभु कुरुस चो मोरना पाछे पतालपुर ने उतरलो आउर हुन उपरपुरे अबराहम लगे गेलो। हुन हुता रलो जमाय आत्मामन के आपलो संगे महापरभु लगे नीलो। आजी पतालपुर नी पतेयालो लोगमन के डंड देतो ठान आय, हुन थाने नी पतेयालो लोगमन मोरलो पाछे जायसोत। हुन समया एयसे जेबे पतालपुर चो सपाय आत्मामन के नरक चो आईग ने पकाउन देदे। हुनचो पाछे हुता कोनी नी जादे। जूहन्ना दखलो दरसन 20:14 पद के दखा।
आमचो देहें गोटोक घर असन आय जोन थाने आमचो आत्मा रउआय। मोरलो पाछे आमी ए जुना घर ले नीकरुन जाउंसे। ए देहें के छाड़लो पाछे आत्मा चो काय होयसे आउर हुन कहां जायसे? ए धियान देतो गोट आय।
मोचो मीतमन, सरग गोटोक जगा आय! मोरलो पाछे तुमचो नियाव होयदे आउर तुमी किरिस्त लगे जाहासे नोहले तुमके डंड चो आईग कुंड ने पकाउन देदे। ए सत आय कि महापरभु ए आईग कुंड के मनुक काजे नी बनालो। आईक कुंड सयतान आउर हुनचो दूतमन काजे तियार करलोसे। मत्ती 25 अध्या चो 41 के दखा, तुमके कहां जातोर आय, तुमी काय के छाटसास हुनचो हिसाब ले होयदे।
परभु पक्का बललो कि दुनो चो मंजी खुबे बड़े खोदरा आसे। तुमके कहां जातोर आय, एई जीवना ने बाछतोर आय। मोरलो पाछे मोहका नी मिरे।
27 सवकार बललो, ‘ए बुआ, असन आय जाले मय तुके गुहारेंसे कि तुय हुनके मोचो बुआ चो घरे पठाउन देस,
हुन सवकार मनुक के आपलो भाईमन चो फिकिर धरुक मुरियाली। हुन मन करलो कि हुनचो भाईमन खिसियाओत आउर झटके आपलो मन बोह़ड़ाओत। मोचो मीतमन, पतालपुर ले कोनी बोहड़ुन जाउक सकलोने हुन पक्का नंगत खबर के गुलाय बाटे सांगतो।
28 मोचो पांचझन भाई आसोत, लाजर हुनमन के चेत करुन देओ; नोहले हुनमन बले ए थाने भुगतमान पावदे’।
29 अबराहम हुनके बललो, ‘हुनमन लगे मोसा आउर अगमजानीमन चो कितापमन तो आसे, हुनीमन के पढ़ोत’।
30 सवकार बललो, ‘नाई, बुआ अबराहम, मोरलो लोगमन थान ले कोनी जीव होउन हुनमन लगे गेलोने हुनमन मन बोहड़ादे’।
31 अबराहम हुनके बललो, ‘हुनमन मोसा आउर अगमजानीमन चो कितापमन चो गोट के सत नी करोत जाले, मोरलो थान ले कोनी जीव होलोने बले नी पतेयादे’।”
खुबे लोग चो बिचार आसे कि कोनी मोरलो थान ले जीव उठुन हुता चो गोट के सांगलोने, गनुन नी सकतो असन लोगमन मन बोहड़ादे।
गोटोक मनुक आसे जोन मोरलोमन ले बोहड़ुन ईलो, हुनचो नाव किरिस्त जीसु आय।
हुनके हुनमन अगमजानीमन आउर मोसा ले नानी मानला। मीतमन, बेर नी करा। मोरलो पाछे मोहका नी मिरेदे।
अध्या 17 ने जीसु चो सिखिया खुबे कटुर आसे, मानतर कोचो काजे? हुनमन काजे जोनमन जुवान लेका-लेकीमन के बाट भुलकायसोत।
1 जीसु आपलो चेलामन के बललो: “पाप चो परखतोर होउ ची आय, मानतर जोन मनुक किरता परखतोर होयसे, हुनचो उपरे सराप!
2 कोनी बले ए नानीमन ले गोटोक के पाप करायसे जाले, हुनचो काजे ए नंगत आय कि हुनचो टोडरा ने जता-पकना ओराउन समूंद ने पकाउन देओत।
मोचो बिचार ने निसा-पानी बिकतो लोगमन के एई डंड देतोर आय। पिलामन के अडरा बाट दखातोर खुबे बड़े पाप आय। ए पतालपुरे जातो ले बले आगर अड़रा आय। हुता तुमचो बेटा-बेटीमन तुमके बलदे, “बाबा, मय बले एता आंसे, कसनबलले मय तुचेई सिखालो गोट ने चलले।” एचो ले आगर तकलीस आउर काय होउक सके!
3 एईकाजे चेत करुन राहा; तुचो भाई तुचो उलटा काई पाप करेसे जाले हुनके दागा देउन समजाव, आउर हुन पसतायसे जाले हुनके खेमा करुन देस।
4 दिनभर ने सात हार हुन, तुचो बिरुद पाप करेसे आउर सातो हार हुन, तुचो पुरे एउन, ‘मय पसतायंसे’ बलेसे जाले, तुय हुनके खेमा करुन देस।”
5 तेबे *पठालो-लोगमन (चेलामन) परभु के बलला: “आमचो बिसवास चो बाड़ती कर।”
6 परभु बललो:
“तुमचो लगे नानी सरसुन बीचा इतरो बिसवास आसे जाले, ए तुतुपाक चो रूक के बला कि तुय चेर संगे उखनी होउन समूंद ने रोपी हो, तेबे हुन तुमचो हुकुम के मानेदे।
एचो अरथ ए आय कि लोगमन के खेमा करतो काजे किरिस्तीमन अमदेया तियार रतोर आय। मानतर जीसु, पाप करतो लोग के दागा नी देस बलुन नी बले। पापी आपलो करलो पाप के मानो। हुन घन-घन पाप करले बले हुन पसतालोने हुनके खेमा करतोर ची आय। जीसु आपलो चेलामन के सत-सेवा करतो काजे हुकुम देयसे।
एता जीसु फेर गोटोक हार कटुर होलो असन लागेसे। लोगमन हुनके सोज आय बलसोत। मानतर हुनचो गोटमन ले जानुक होयसे कि हुन कटुर बले रये। हुन, पिलामन संगे सुसार बेबार करते रये, मानतर पिलामन के बाट भुलकातो लोगमन संगे जुगे कटुर रलो।
7 तुमीमन ने असन कोन आसे, जेचो कमेया नांगर फांदेसे नोहले मेंडा चरायसे, आउर हुन बेड़ा बाटले ईलो बेरा हुनके बलदे कि तूरते एउन खाउक बस?
8 आउर असन नी बले कि मोचो भात-पेज तियार कर, आउर जिदलदांय ले मय नी खायें, हुदलदांय ले करांड के बांधुन मोचो सेवा-बुता कर, पाछे तुय बले खासे?
9 काय, मालिक हुन कमेया चो धन-धन करेदे, जोन हुनीची बुता के करलो जेचो हुकुम हुनके मिरुन रये?
एके समंजातो काजे मय तुमके नानी असन कटाव सांगेंसे।
कोनी-कोनी लोगमन चो बिचार आय, हुनमन भाईगमानी बचन के मानसोत आउर नंगत घर लग चो लोग आत आउर लोगमन ले मया करसोत। एईकाजे महापरभु हुनमन के सहराउन बलेदे, “तुय खुबे नंगत मनुक आस। तुय सरग ने ठान पावलीस।” तुमी ‘दस हुकुममन’ के आउर ‘भाईगमानी बचन’ के मानसाहास, जेके मानुन पुरुक नी होये। तेबे काय, तुमी बिचारसाहास कि एचो ले तुमी मुक्ति पाउक सकासे? मोचो मीतमन, महापरभु आमके बनालोसे एईकाजे आमके हुनके मानतोर ची आय। आमके ए गोट के पक्का जानतोर आय कि मुक्ति महापरभु बाटले खुबे मोल चो बर आय। तुमी हुनके मसागत करुन पाउक नी सकासे। मानतर महापरभु चो नियममन के मानतोर चे आय।
10 असने बरन ले तुमी बले, जेबे हुन जमाय बुता के सारलो पाछे जेके करतो चो हुकुम तुमके देउन रये, तेबे बला, ‘आमी कमेया आंव, आमके जोन बुता करतोर रये हुनकेची करलुसे’।”
जीसु दसझन कोढ़ बेमार बीतामन के छुक-छुका करेसे। कोढ़ बेमार ले छंडालो गोटोक सामरी बीता धन-धन करतो काजे बोहड़ुन एयसे।
11 एचो पाछे जीसु जरूसलेम जाउक निकरलो आउर हुनके सामरिया आउर गलील परघन चो मंजिगता ले जातोर रये।
सूरता करा कि परभु जीसु जरूसलेम बाटे जायसे।
12 तेबे जीसु के कोनी गांव चो भीतरे ओलतो बेरा दसझन कोढ़ बेमार मनुकमन भेटला।
13 हुनमन फयले उबा होउन जोर ले चिचियाउन बलला: ए जीसु मालिक, आमके जीव दुख!
14 जीसु हुनमन के दखुन बललो: “जाहा, आउर खुद के पुजारीमन के दखाहा।” तेबे हुनमन जाते रओत आउर बाटे-बाटे बेमार ले छुक-छुका होला।
15 हुनमन ले गोटोक मनुक जिदलदांय जानलो कि हुन बेमार ले छुक-छुका होलो, तेबे हुन बड़े राग ले महापरभु चो जय-जय करते बोहड़लो,
16 हुन जीसु के जलजला पांय पड़ुन जुहार करलो, हुन *सामरेया रये।
एके दखुन फरीसीमन भक्याला।
17 एके दखुन जीसु बललो:
“काय, जमाय छुक-छुका नी होला? फेर हुन नवझन मनुकमन कहां आसोत?
18 काय, ए परदेसी के छांडुन महापरभु के धन-धन करतो काजे आउर कोनी नी निकरला?”
19 तेबे जीसु हुनके बललो:
“उठुन जा, तुचो बिसवास तुके छुकनाय करलीसे।”
जीसु दस झन कोढ़ बेमार बीतामन के छुक-छुका करलो।
हुनमन ले गोटोक मनुक बोहड़ुन ईलो आउर जीसु के धन-धन करलो।
हुन सामरिया रलो। जीसु हुनचो पापमन के खेमा करुन हुनचो उपरे दया करलो। दुसर नव झन मनुकमन कोढ़ बेमार ले तो छंडाय होला, मानतर पाप ले नी छंडाय होला। धन-धन करतोर किरिस्तीमन चो गुन आय। तुमी अयतवार दिने अराधना ने काय काजे जाउआहास? काय, तुमी हुता महापरभु चो आराधना आउर हुनचो करलो दया काजे धन-धन करासाहास? धन-धन करतोर आराधना चो गोटोक भाग आय। आमी महापरभु के धन-धन ले आगर आउर काई देउक नी सकुं। हुनके धन-धन करतोर कितरो नंगत आय! आमी धन-धन संगे आपलो गुहार के बले हुनके सांगुक सकुं। आमचो मन अमदेया हुनचो काजे धन-धन ले भोरुन रतोर आय। जीसु, महापरभु चो राज चो आत्मिक गोट के एता दखायसे।
20 गोटोक हार फरीसीमन जीसु के पूछला:
महापरभु चो राज केबे एउआय? तेबे जीसु हुनमन के बललो: “महापरभु चो राज चीना संगे दखतो असन नी एये।
21 कोनी बलुक नी सकदे, ‘दखा, महापरभु चो राज एथा आसे!’
नोहले ‘हुता आसे!’
कसनबलले दखा, महापरभु चो राज तुमचो मंजिगता आसे।”
जीसु गोटोक सत गोट सांगलो, “महापरभु चो राज दखा देतो असन नी एये।”
जीसु कोचो संगे गोटेयाते रलो?
महापरभु चो राज केबे एयदे बलुन फरीसीमन पूछलोके जीसु उत्तर दिलो।
जीसु बलतो चो भेद ए नोआय कि महापरभु चो राज हुन भक्ति नोहलो आउर बईर करतो फरीसीमन चो मने रली, मानतर ए आय कि महापरभु चो राज हुनमन चो मंजी रलो राजा परभु जीसु किरिस्त ने आसे।
हुन हुताय हुनमन चो मंजी रलो।
जीसु आपलो फेर एतो चो बारे ने सांगेसे
मनुकमन आपलो आउर संवसार चो बाड़ती करतो उआट करते रयसोत। हुनमन महापरभु नोहलोर महापरभु चो राज के बनाउक खोजेसोत। एई ए जुग चो सपाय ले बड़े धोका आय। गोटोक समया ने किरिस्त नोहलोर हजार बरक चो राज तो एयदे।
जीसु, राज चो मयमा चो बारे ने आपलो सिखानीमन ने खुबे सांगलोसे। सत ए आय कि जीसु आपलो फेर एतोर नोहले बदलुन जातो गोट के जोर नी दिलोसे। गोटोक थियोलाजी चो गियानी ए सिखाते रलो कि परभु जीसु नंगत बेबार चो नंगत गुरजी रलो आउर एतो समया चो गोटमन चो बारे ने आउर हुनचो मंजपुर ने फेर एतो गोट चो बारे ने सिखालो। हुन गियानी, आपलो डगराउन पावलो गोट चो बारे ने गोटोक किताप बले लिखलो।
ए खास गोट ने जीसु आपलो चेलामन के चेतायसे कि हुनचो फेर एतो चो बारे ने हुनमन धोका नी खाओत।
किरिस्त चो फेर एतोर दुय भाग ने होयदे। पईल भाग ने, मंडली चो लोगमन के बादरी ने उठाउन नेतोर होयदे, बललोने सत पतेयातोमन के उचाउन नेतोर, जेके 1थिस्सलुनी 4:13-18 पदमन ने लिखलोर आसे। मानतर एता परभु जीसु आपलो फेर एतो चो दूसर भाग चो बारे ने सांगेसे, जेबे हुन मंजपुर ने आपलो राज के बनायदे। ए बिसवासीमन के उठाउन नेतोर आउर खुबे तकलीस चो समया पाछे होतो गोट आय।
22 जीसु आपलो चेलामन के बललो: “हुन बेरा एयसे, जेबे तुमी मनुक चो बेटा चो राजपाट चो गोटोक दिन के दखुकलाय मन करासे, मानतर तुमके दखुक नी मिरे।
23 लोगमन तुमके बलदे:
दखा, हुन एथा आसे!
नोहले हुता आसे!
मानतर तुमी जाते नी जाहासे आउर हुनमन चो पाटे नी होआसे।
जीसु पईल हार ईलोके हुनमन हुनके नी चिताला, कसनबलले हुनमन जुद जीतलो किरिस्त चो बाट दखते रला, जोन हुनमन के रोम राज ले छंड़ायदे। हुन गोटोक बाबु होउन जनमु रलो आउर गांवरिया रलो। जेबे हुन फेर एयदे, तेबे हुन बेतलहम असन नानी गांव ने नाई, मानतर मयमा संगे एयदे। बललोने, हुन आपलो चेलामन के चेतानी देयसे कि हुनमन काचेई ले धोका नी खाओत, जोन बलुआत कि किरिस्त एता आसे नोहले किरिस्त हुता आसे आउर हुनचो एतो समया चो बारे ने सांगदे। एईकाजे तुमी किरिस्त चो फेर एतो समया के पक्का ले सांगुक नी सकास।
24 जसन बादरी चो गोटोक कोना ले पानी जागुन छिक-छाक होयसे आउर दुसर कोना ने बरेसे, उसनेची मनुक चो बेटा बले आपलो एतो दिने होयदे।
जेबे जीसु ए मंजपुर ने आपलो राज तियार करुक एयदे, तेबे पानी जागलो असन छिक-छाक बुग-बाग होयदे। मत्ती 24 अध्या के कटारुन दखा।
25 मानतर जरुर आय कि हुन आगे डंड पायदे, आउर ए जुग चो लोगमन हुनके काई नी समजदे।
कुरुस, महापरभु चो उआट ने रली। परभु जीसु, करुस चो डंड सहलो कसनबलले हुन तुमके आउर मोके बचाउक मन करते रलो। हुन आपलो संगे होतो गोट के सरसरा सांगलो: हुन तकलीस सहेदे आउर हुनके आपलेई लोगमन निंदरदे।
26 जसन नूह चो दिने होउन रली, उसने मनुक चो बेटा चो दिने बले होयदे।
नूह चो समया ने काय हाल रली?
हुन काय गोट सांगुक मन करते रये?
27 नूह डोंगा ने चेगलो आगे, लोगमन खाते-पीवते, बिया-दान करते रला, तेबे बड़े पूर एउन हुनमन सपाय के बुड़ाउन मोराली।
ए गोटमन ने काय अडरा रली? बिया करतोर पाप नोआय। खातोर आउर पीवतोर ने काय अडरा रली? आमके जीव रतो काजे खातोर चे आय। जीसु असन काय काजे बललो? नूह चो समया ने लोगमन महापरभु के नी मानुन नास होते रओत। आजी चो समया ने बले असने ची आसे। लोगमन खातो-पीवतो बाटे भीड़लासे आउर बिया नी होलोर बले लाटा-फांदा ने रयसोत। हुनमन, महापरभु बाटले एतो डंड के नी जानोत– केबे एयदे? आमी नी जानुं।
28 आउर असने लूत चो दिने बले सदोम चो लोगमन खाते-पीवते, दिया-ठोआ करते, रोपते आउर घर बनाते रला,
29 मानतर जोन दिने लूत सदोम सहर ले निकरलो हुनी दिने आईग आउर गंधक बादरी ले घसरली आउर जमाय के डसाउन दिली।
परभु चो असन बलतोर खुबे अचरिज गोट आय, कसनबलले लूत चो चलनी-बुलनी नूह ले खुबे भिने रये। दुनो चो हाल गोटकी कटार रली। सदोम ने कोकई डर नी रये। हुनमन भुंई बिकते रओत। हुनमन लूत चो चेतानी के नी मानला, हुनके खटके नी पतेयाला।
लूत के निकराओत ले महापरभु सदोम चो नास नी करलो। असनेची महापरभु आपलो मंडली-लोगमन के उठाउन नेओत ले जुगे तकलीस एउक नी देयदे, जोन किरिस्त चो राज एतो ले आगे होयदे। ए गोटोक अचरित गोट आय कि जीसु, लूत के कटारेसे। मत्ती 24 अध्या ने, हुन जयतुन डोंगरी ने आपलो चेलामन संगे बिचार करतो बेरा लूत चो बारे ने नी सांगलो। हुन एईकाजे असन करलो कसनबलले मत्ती लिखलो नंगत खबर ने, ए मंजपुर ने आपलो राज बनातो काजे आपलो एतो चो बारे ने सांगते रये। मानतर लूका लिखलो नंगत खबर ने हुनचो बारे ने खुबे गोट आसे। सदोम सहर आपलो पापमन किरता सत्यानास होतो असन होउ रये आउर लूत हुताले निकरते खन हुन सहर नास होली। मोके पूरा बिसवास आसे कि किरिस्तीमन ए संवसार ले जाते खन, ए संवसार ने महा तकलीस होउक मुरियायदे।
30 मय मनुक चो बेटा, दखा देतो दिने बले असने ची होयदे।
आजी ए संवसार ने महापरभु चो लोग आसोत जोन खुबे बरन ले लूत चेई असन आत। हुनमन जीसु के आपलो मुक्ति-देउ मानसोत। मानतर संवसार चो लोग संगे मिलुन-मिसुन रयसोत। किरिस्ती होलो किरता संवसार ने डंड एतो ले आगे हुनमन के उठाउन नेदे। आजी संवसार, मंडली चो चेतानी के धियान नी देयसे। जसन लूत चो समया ने रली, उसने आजी संवसार बिचारेसे कि आमी फोकाहा गोटमन सांगुसे ।
31 हुन दिने कोनी छानी उपरे आसे आउर हुनचो जाकमन खाले घरे आसे जाले, हुनके नेतो काजे खाले नी उतरो;
उसने बेड़ा ने रलो बीता घरे नी बोहड़ो।
मत्ती लिखलो नंगत खबर ने जीसु, ए समया चो महा-तकलीस चो बारे ने सांगेसे।
32 लूत चो बायले के सूरता करा!
लूत चो बायले महापरभु चो हुकुम के नी मानतो लोगमन चो कटार आय।
सदोम ने हुनचो बेटीमन आउर संगवारीमन रओत। होउक सके कि हुन दिने हुनमन चो भोज रये। हुनचो मन घन-घन बलते रये “बोहड़ुन जा।” हुन काय काजे उलटुन दखली? हुनके बिसवास नी रली कि महापरभु हुन सहर चो नास करेदे। एईकाजे आमके लूत चो बायले के सूरता करतोर आय। महापरभु चो बचन के पतेयातोर आमचो काजे खुबे खास गोट आय।
33 जोन मनुक आपलो जीव के बचाउक मन करेसे, हुन हुनके हजायदे, आउर जोन आपलो जीव के हजायदे हुन आपलो जीव के बचायदे।
ए बचन धियान देतो गोटोक गोट आय। हुन समया जीव के बचातो काजे जितरो होउक सके उतरो मसागत करुन दखदे, मानतर समया जीतु रयदे। हुनमन के आपलो जीव देतो काजे तियार रतोर आय आउर जीसु के आपलो जीव देतोर आय। हुन समया ने जीव के बचातोर फोकाहा होयदे।
34 जीसु बललो: मय तुमके बलेंसे हुनी राती दुयझन गोटकी खटेया ने रदे, गोटोक के नेयदे आउर दुसर के छांडेदे।
35 दुयझन बायलेमन गोटकी जता ने रुचते रदे, गोटोक के नेयदे आउर दुसर के छांडेदे।”
36 (दुयझन बेड़ा ने होदे, हुताले गोटोक के नेयदे आउर दुसर के छांडेदे।)
नूह चो जुग ने संवसार ले कोके उठाउन नेउ रला?
संवसार ने कोन बाचु रओत?
एता जीसु बादरी ने उठाउन नेतो गोट के नी सांगेसे।
एता मत्ती 24:37-41 पदमन असन, भक्ति नी करतो लोग के नियाव करतो काजे पुरे आनतोर आय आउर हजार बरक चो राज ने ओलतो लोगमन के मंजपुर ने छाड़ुन देतोर आय।
एता धियान दियास कि जीसु चो हिसाब ने, मंजपुर गुलटिया आसे। गोटोक खटेया ने दुयझन रदे, गोटोक के नेयदे आउर दूसर के छाड़ुन देयदे। दुयझन बेड़ा ने रदे, गोटोक के उठाउन नेयदे आउर दूसर के छाड़ुन देयदे। पईल गोट राती चो आय आउर दूसर मंजन चो। मंजपुर ने गोटोक पाट राती होयदे आउर दूसर पाट मंजन बललोने, मंजपुर गुलटिया आसे।
37 असन सुनुन चेलामन जीसु के पूछला:
“ए परभु, ए जमाय कहां होयदे?
जीसु हुनमन के बललो: जोन थाने मोड़ी आसे, हुता गिदाहामन जुहा होदे।”
ए पद के जूहन्ना दखलो दरसन किताप चो 19:27 पद ले कटारा। एके हरमगिदोन जुद बलसोत। ए जुद चो सरासरी हुन समया होयदे, जिदलदांय किरिस्त मंजपुर ने आपलो राज बनातो काजे एयदे।