आजी आमी पढ़वां, जुग-जुग चो जीवना काजे आमके एबे चो जीवना ने तियार होतोर आय आउर तियार होतो काजे आमचो लगे ‘ महापरभु चो बचन’ आसे।

आजी चो पाठ:

चलाक भंडारी चो कटाव;

ए कटाव के कोनी-कोनी गलत समंजुआत कसनबलले एता असन लागेसे कि जीसु कोनी दुसट मनुक चो पाटेया होयसे। आमी पक्‍का जानुंसे, हुन भंडारी दुसट मनुक रये। कोनी-कोनी ए कटाव चो सपाय लोगमन के मुखिया असन आउर नंगत चलनी-बुलनी चो आय बलुन बिचारसोत। तुमचो मने बले असन मेलाय बिचार आसे जाले तुमचो बिचार के बदलुन दियास नोहले ए कटाव ने तुमके खट-खट लागेदे। ए कहनी चो खास मनुक गोटोक दुसट मनुक आय। जेबे मय पास्‍टर रले, तेबे सिखातो काजे खुबे पाठ तियार करले आउर हुनमन चो सीरसक दिले ‘धरमसास्‍तर चो दुसट मनुक’। कसनबलले दुसटमन खुबे रओत आउर ए भंडारी बले हुनमन ले गोटोक आय। मय आगेले सांगले, लूका आपलो कटावमन के कटारतो असन बनायसे आउर हुनी गोटकी नंगत-खबर लिखु बीता आय जोन असन करेसे। हुनचो सपाय कटावमन गोटोक दुसर ले कटारुक सकतो असन आय।

ए कटाव ने आमचो परभु गोटोक संवसारी मनुक चो बारे ने सांगेसे। महापरभु चो बचन आमके सांगेसे कि संवसार आपलो ची लोग के मया करेसे आउर महापरभु चो लोग के बईर करेसे।

दखा, जूहन्‍ना 15:18,19 ने जीसु खुदे बलेसे, “संवसार तुमके बईर करलोने तुमी जाना कि हुनमन आगे मोके बले बईर करला। तुमी संवसार चो होलोने संवसार तुमके आपलो असन मया करती। मानतर तुमी संवसार चो नोआहास आउर मय तुमके संवसार ले बाछलेसे। एईकाजे संवसार तुमके बईर करेसे।” महापरभु चो बेटा-बेटीमन ए संवसार चो नोआत आउर ए संवसार चो हिसाब ने जीवना नी जीओत। गलातीमन के लिखलो चिटी 1 अध्‍या चो 4 पद ने पउलुस बलेसे, “हुनी आमचो पापमन काजे आपने के देउन दिलो कि आमचो महापरभु आउर बुआ चो मन-इछा ले आमके एबे चो अडरा संवसार ले छड़ाओ। रोमीमन 12:2 पद ने पउलुस बलेसे, “एदांय तुमी ए संवसारी लोग असन नी होआ, मानतर तुमी मन बोहड़ाउन नवा होलो किरता तुमचो चलनी-बुलनी महापरभु के भावतो असन होओ। तेबे तुमी तुमचो काजे महापरभु चो भलई, नंगत आउर सिद इछा पक्‍का ले जानासे।” एचई बारे ने 1 जूहन्‍ना 2:15 पद ने जूहन्‍ना लिखेसे, “तुमी ए संवसार के नोहले संवसार चो काई तीजमन के मया नी करा। कोनी ए संवसार के मया करेसे जाले हुन महापरभु के मया नी करे।”

संवसार ने गोटोक नियम आसे जेके आमी ‘जीवन चो नियम’ बलुंसे। ए चलाक भंडारी एई नियम के मानेसे।

संवसार चो पईल कानुन आय, ‘आपलो दखा-रखा’। बेपार ने कपट करतोर ची आय असन लागेसे आउर चलाक मनुक के संवसार सहरायसे। कानुन, चलाक आउर दुसट बीतामन चो पाटेया होयसे। संवसार चो नियम-कानुन हिसाब ने, दोसी मनुक के दोसी नी ठेबाओत ले हुन दोस नोहलोर आय। मानतर असली ने हुन कसुरदार आय। महापरभु चो बचन एचो उलटा आय। महापरभु बलेसे, मनुक दोस नोहलोर पक्‍का होओत ले, हुन कसुरदार ची आय। रोमीमन 3:23 पद ने पउलुस लिखेसे, “कसनबलले सपाय लोग पाप करलासे आउर महापरभु चो मयमा ले लापी होलासे।” मनुक,महापरभु चो पुरे केबई दोस नोहलोर नीआय। मानतर हुनके महापरभु चो पुरे दोस नोहलोर बलुक सकोत। रोमीमन 8:1 पद ने पउलुस, रोम चो मंडली के लिखेसे, “जोन जीसु के मानलोसे, हुनमन चो उपरे डंड चो हुकुम नीआय। कसनबलले हुनमन देहें चो हिसाब ले नाई, मानतर आत्‍मा चो हिसाब ले चलसोत।” मनुक, परभु जीसु किरिस्‍त के आपलो मुक्‍ति-देउ मानलोने हुन, पतेयातो किरता दोस ले छंडावा पायसे। मनुक दोस ले छंडाय होतो काजे गोटकीच बाट एई आय।

आजी चो हिसाब ने ए भंडारी कोनी नगर निगम चो मुखिया कटार आय। ए भंडारी, हुन सवकार चो धन-माल चो मालिक असन रये आउर सवकार चो बेपार के नोकसान करते रये आउर रुपया-पयसा के अदल-बदल करुन खाते रये। हुन असन बुता करते रये जसन बेंक चो साएबमन रुपया-पयसा के अदल-बदल करुन खाउआत। हुन आपलो मालिक चो धन के बुड़ाते रये।

एदांय हुनचो कागजात परखतो आउर हुनचो ले पयसा चो हिसाब धरतो समया ईली। कसनबलले हुनचो लगे मालिक चो मोहर रये आउर लेका-जोका हुनी करते रलो। हुन संवसार चो कानुन असन, ‘आपलो दखा-रखा’ नीती बाटे पलटलो।

ए मनुक कुली-भुती करतो लाईक नी रये। हुन मुठी मांगतो काजे खुबे लाज होते रये। एबे तुमी एके पढ़ुन हांसासे कि हुन मुठी मांगतो काजे लाज होते रये। मानतर चोरतो आउर लंद-फंद करतो काजे लाज नी होते रये। खुबे दुख चो गोट ए आय कि आजी खुबे लोगमन असनी आसोत।

काय, तुमी महापरभु चो बचन के लोगमन लगे अमरातो काजे आपलो पयसा देउआहास?

चलाक भंडारी चो कटाव ने परभु जीसु बलेसे, “काय तुमी बिचारुआहास कि महापरभु तुमचो उपरे भोरसा करुक सके आउर तुमी हुन दिलो संवसारी धन-माल के फोकाहा नी करासाहास?” धन-माल आत्‍मिक गोट आय। तुमी सोजे दान देतो काजे जुमे नोआहास। मानतर तुमचो पयसा हुता लगाहा जोन थाने लोगमन चो मंजी बचन चो खुबे परचार होयसे आउर खुबे बिगरेसे। ए तुमचो जुमे आय।

जीसु चो गोटमन के सुनुन फरीसीमन, आपलो करलो कसूर के जानला।

परभु फरीसीमन चो मन चो बिचार के जानुन रये। हुन तुमचो मन चो बिचार के बले जानेसे। महापरभु जानेसे कि मोचो मने काय आसे। आमी गोटोक दूसर ले आपलो मन चो बिचार के लुकाउक सकुं, मानतर महापरभु ले नाई। आमी महापरभु चो मान करतोने चोखा होउक नी सकुं।

ए गोटोक खास कटाव आय जेके लूका चेई नंगत खबर ने लिखलोर आसे। मोचो अंताज ने ए घटलो कटाव नोआय। जीसु दुसर कटावमन असन एके बले सते घटलो गोटमन ले सांगलोसे। जीसु हुनी कटाव के सांगलो जोन सुनतो लोगमन चो जीवना ने घटते रये। तेबे हुनमन समजला कि जीसु चो बलतो गोटमन चो अरथ काय आय। हुन ए कटाव ने लाजर चो नाव धरलोसे। जीसु घड़ुन कोचई नाव नी सांगते रये।

ए खुबे नानागती आउर खुबे धन बाढ़ती चो कटाव आय। हुन दुनो चो मंजी एचो ले आगर फरक होउक नी सके।

आमचो परभु मोरना चो कपाट ले असन निकरुन जायसे जसन ए रोजे दिने चो गोट आय। जेबे हुन गरीब मनुक मोरलो तेबे हुनके माटी नी दिला। हुनचो मोड़ी के मेहन्‍ना खोदरा ने पकाला, जोन थाने कचरा पकाउआत आउर डसाउआत। हुन जुग ने गरीबमन के मोरलो पाछे हुताय पकाते रओत। हुन गरीब मनुक मोरलोके हुनचो जीव के सरगदूतमन अबराहम लगे नीला आउर हुनचो कोरा ने बसाला।

हुन सवकार मनुक बले मोरुन गेलो आउर हुनके माटी दिला। हुनचो नाहनी खुबे हरिक-उदीम ले करला। मानतर सरगपुरे जातो काजे बाट नी रये।

मोरना गोटोक-दुसर के लापी करतो दसा आय। एचो अरथ हाजतोर नोआय। महापरभु नी खा बललो पाक के खाउन आदम मोरुन गेलो। हुन 900 बरक जीव रलो मानतर पाक खाते खन ची हुन महापरभु चो मयमा ले लापी होलो। जूहन्‍ना 11: 25, 26 पदमन ने जीसु बललो, “फेर जीव उठतोर आउर जीव, मय ची आंय। जोन बले मोके पतेयायसे, हुन मोरुन गेले बले फेर जीयेदे। आउर जोन कोनी बले जीव आसे आउर मोके पतेयायसे, हुन केबई नी मोरे। काय, तुय ए गोट के पतेयायसीस?” मनुक पाप किरता महापरभु ले लापी होयसे। मनुक जीव रउन बले मोरलो कटार आय। पउलुस, इफिसीमन चो मंडली के 2:1 पद ने लिखलोसे, “जिदलदांय तुमी कसूर आउर पापमन चो किरता आत्‍मिक हिसाब ले मोरुन रलास, तेबे हुन तुमके बले जियालो।”

बड़े सहरमन चो कोनी-कोनी ठानमन ने राती बेरा बले कोलार आउर चहल-पहल होयसे। तुमके चेत नोहलो आउर मोरलो लोग के दखतोर आय जाले राती बेरा चो घोटुल नोहले गुरगाल ने जाहा। हुन थाने हुनमन बाजा बजाते रदे, खुबे हरिक-उदीम ले गीतमन गावते रदे, मंद खाउन मातुन रदे, निसा खाउन रदे। कसनबलले हुनमन मोरलासोत आउर जीउक मन नी करसोत।

दूसर मोरना बले आसे जेके आत्‍मिक मोरना बलसोत। एचो अरथ महापरभु ले जुग-जुग काजे लापी होतोर आय। देहें चो मोरना ले, देहें काई काम चो नी रये आउर जीव नोहलो होयसे। कसनबलले आत्‍मा देहें के छाड़ुन जायसे। देहें के माटी देयसोत, जोन थाने हुन कुयेसे आउर माटी ने मिसुन जायसे। कसनबलले मूर किताप उबजास 3:19 पद ने लिखलोर आसे, “सरासरी ने तुय माटी ने मिसुन जासे कसनबलले तुय हुन थान ले निकरुन रयीस।” मोरना गोटोक-दुसर के लापी करतो दसा आय।

आमी पतालपुर के दुय भाग ने बाटा करलोर आसे बलुन समजलु जाले, आमके ए कटाव समजतो काजे सरसरा होयदे। गोटोक भाग, हरिक-उदीम चो ठान नोहले सरग आय जोन अबराहम चो कोरा आय आउर दूसर भाग, डंड चो ठान आय। ए हरिक-उदीम चो ठान खाली होलीसे। कसनबलले परभु जीसु सरग जातो बेरा जुना-नियम चो सत पतेयालोमन के हुनचो संगे नेयदे। इफिसीमन 4:8-10 पद के दखा, डंड चो ठान हुन समया ने खाली होयदे जेबे पंडरा राजगादी चो पुरे नियाव होयदे। जूहन्‍ना दखलो दरसन 20:11-15 के दखा, जोनमन नियाव होतो काजे ए थाने हाजिर होदे, ए हुनमन आत जोन महापरभु के नी मानुन जीवना काटुन मोरलासोत। हुनमन के आईग-कुंड ने पकाउन देदे, ए दूसर मोरना होयदे।

सवकार मनुक चो आत्‍मा डंड पावतो ठाने अमरली, हुता महापरभु के नी मानतो लोगमन चो आत्‍मामन रला। लाजर चो आत्‍मा के नेउन अबराहम चो कोरा ने बसाला। एता धियान दियास, जीसु असन नी बललो कि सवकार मनुक चो आत्‍मा हुन सवकार रये गुने डंड पावतो थाने गेली आउर लाजर के अबराहम चो कोरा ने बसाला, कसनबलले हुन गरीब मनुक रलो। परभु चो बलतो अरथ ए रली कि महापरभु, मनुक चो मन के दखुआय, हुनचो बाहर चो रूप नी दखे।

ए कहनी ने आउर बले खुबे गोटमन आसे जेके परभु ची आमके सांगलो नोहले आमी नी जानतु।