घर-बुड़ाउ बेटा ची नाई, हुन देस बले नानागती होउ रये।

एदांय तुमी दखुक सकास कि जोन देस ने खुबे धन-माल आसे बलुन हुन बिचारते रये, हुन देस ने भूक पड़ली आउर हुन नी जाने कि एदांय काय करतोर आय।

तुमी हुनचो हाल जानुक मन करसाहास जाले, हुन आपलो घरे जातो काजे डरेसे।

हुनके नी डरतोर रली, मानतर हुन घरे जातो काजे डरेसे।

एबे हुन खुबे मसकिल ने फसु रये, हुन खुबे नानागती होउ रये आउरअसन बुता करुक जाते रये, जेके कोनी बले जहूदी खुबे नानागती नी होलोर करुक ची नी सकोत।

घर-बुड़ाउ बेटा इतलो नानागती होउ रये कि हुनके काई चे बुता नी मिरते रये।

हुन आपलो मीत लगे गेलो, जोन हुनचो नंगत समया ने संगे रये आउर हुनके बललो, “विजय, काय तुके सूरता आसे, तुय मोचो थाने पीवतो-खातो काजे एते रयीस आउर मय मंद आउर लेकीमन काजे पयसा देते रयें?

तुके सूरता आसे काय?

एदांय मय नानागती होलेसे।

काय, तुय मोके आपलो घरे रहुक देसे नोहले मोके काई बुता-भयना देउक सकसे?”

तेबे हुनचो नंगत समया चो मीत बललो, “मोचो मीत, मोके खेमा कर, मय तुके संग देउक नी सकें। तुचो सपाय पयसा-कोहड़ी सरली, एदांय मोचो आउर तुचो काई नाता नीआय। मोचो कमेया तुके बाहरे जातो बाट दखायदे।” हुन गोटोक गांव ले दुसर गांव ने जाते-जाते थाकलो आउर बिचारलो कि हुन देस ने हुनचो कोनी मीत नीआत। सरासरी ने हुन सहर चो बाहरे गोटोक बरांहा पोसतो बीता थाने गेलो। खुबे लापी ले एउन बरांहा पोसतो बीता के बललो, “मोके काई बुता देस।” बरांहा पोसतो बीता बललो, “तुय जानसीस आमचो राज खुबे नानागती होलीसे, मोचो लगे बरांहा चरातो बुता आसे, मानतर मय तुके पयसा-कोहड़ी देउक नी सकें आउर तुके बरांहामन चो खातो कोंडा-भुसा के खाउक पड़ेदे। हुन इतलो नानागती होउ रलो कि बरांहा चरातो बुता करुक राजी होलो।

डंडिक आगे तुमी बिचारते रलास होती, मय खुबे फोबाउन-फोबाउन सांगेसे, जेबे मय बलले, हुनचो नंगत समया चो मीतमन हुनके साका होउक मन नी करला।

आमचो परभु जीसु सरसरा बललो, “हुनके कोनी बले काई नी दिला।”

आजी कोनी-कोनी किरिस्‍ती लोगमन काय काजे असन बिचारुआत, “ए संवसार चो लोगमन आमचो नंगत मीतमन आत।” मानतर हुनमन आमके पाप बाटे नेउआत आउर महापरभु ले लापी गुचाउन देउआत। ए घर-बुड़ाउ बेटा के बले असनी लागली, जसन केबे-केबे किरिस्‍तीमन के बले लागुआय। हुनमन हुनके आपलो घर आउर आपलो बुआ ले खुबे लापी नेते रओत, तेबले बले हुन बिचारते रये, हुनमन आपलो मीतमन आत। हुन, आपलो घर लोगमन के लिखलो काई चिटी आमचो लगे नीआय।

ए सत आय, एदांय आमी सुंदर छापा के दखुंसे।

ए सबु ले सुंदर छापा आय आउर ए हुन सुंदर घर चो छापा आय जेके आमी सांगते रउं।

हव, ए कितरो सुंदर घर आय।

ए मोचो बुआ चो घर आय।

“मोचो बुआ घरे रतो काजे खुबे ठान आसे......”

, ए हुनी घर आय।

छापा ने घर चो पुरे मय आंसे, बुआ के खिड़की बाटले बाहरे दखतोके मय दखेंसे।

जिदलदांय ले बेटा घर छांडुन गेलो हुदलीदांय ले हुनचो बुआ खिड़की बाटले ओंजारुन दखते रयसे।

काय तुमी जानास, हुन काय काजे खिड़की बाटले ओंजारुन दखते रयसे? हुन जानते रये, गोटोक दिने हुनचो बेटा खोड़ेयाते-छटेयाते धीरे-धीरे एयदे। कोनी पुछेसे, “काय तुमी पतेयायसाहास कि तुमी गोटकी हार मुक्‍ति पावलोने अमदेया काजे मुक्‍ति पावलास?” हव। आउर कोनी पूछेसे, “काय, तुमी पतेयायसाहास कि किरिस्‍तीमन पाप करुक सकोत?” हव। “काय कोनी किरिस्‍ती पाप ने पड़ुन रउक सके?” नाई। कसनबलले बुआ आपलो घर ले दखेसे आउर बलेसे, “मोचो सपाय बेटामन घरे एयसोत, मोचो बेटामन बरांहा गुड़ा ने रउक मन नी करोत। कसनबलले हुनमन ने बरांहा-गुन नीआय। एईकाजे बोहड़ुन भाती मोचो घरे एयसोत। हुनमन चो भीतरे बेटा-गुन आसे। हुनमन चो भीतरे मोचो गुन आसे आउर हुनमन बुआ चो घर के छांडुन आउर कोनी थाने हरिक नी रओत। संवसार ने गोटकीची असन ठान आसे जोन थाने हुनमन हरिक होदे आउर हुन आय बुआ चो घर। मोचो बेटामन ले कोनी बले परदेस ने जाउन बरांहामन संगे मिसुन कितलेई घिन-घिना आउर कितलेई पाप ने फंसलोने बले हुन मोचो बेटा आय जाले गोटोक दिने हुन बलेदे, “मय उठेंदे आउर बुआ चो घरे जायंदे”। एईकाजे कि हुन बड़े घर ने रउ मोचो बुआ आय। मूर ले धरुन एबे ले कोनी बरांहा असन नी बललासे, “मय उठुन मोचो बुआ घरे जायंदे।” नाई, केबई नाई। बरांहामन के केचड़-पोहड़ ठानमन भाउआय। हुनमन बुआ घरे जाउक मन नी करुआत। बुआ घरे हुनी ची जाउक मन करुआय जोन हुनचो बेटा आय। गोटोक दिने बेटा बलेदे, “मय उठेंदे आउर बुआ लगे जायंदे।”

हुन घिन-घिना आउर फाटलो फटई पींदुन रये आउर खुबे अडरा बास देते रये।

छी! हुन बरांहा असन बास देते रये! बेटा उबा आसे आउर बुआ हुनचो लगे जायसे आउर पोटारुन चूमेसे।

तुमी हरिक डगरायसास जाले, परदेस ने बले हरिक नी मिरे।

तुमी महापरभु चो बेटा-बेटीमन आहास, पाप करुन बाचुक नी सकास। मोचो मीतमन, तुमी बरांहा गुड़ा ने अमरुक सकास, मानतर हुन थाने तुमके केबई हरिक नी मिरे। तुमी बुआ चो बेटा-बेटीमन आहास जाले, गोटोक दिन एयदे जेबे तुमी बलासे, “मय उठेंदे आउर बुआ घरे जायंदे” आउर तुमी जाहासे। जेबे बले हुनचो पुरे जाहासे तुमी मन बोहड़ाहासे। 1 जूहन्‍ना 1:9 पद ने लिखलोर आसे, “आमी आमचो करलो पापमन के महापरभु पुरे मानलु जाले, हुन आमचो करलो पापमन के खेमा करुन सपाय ओधरम ले सुद करतो काजे पतेयातो लाईक आउर धरमी आय।” असन बरन ले गोटोक पापी बेटा, बुआ चो घर चो संगत ने बोहड़ुन एउआय। खिसियातोर ची बोहड़तो बाट आय। काय, तुमी केबई धियान दिलासाहास, बुआ काय बलेसे? आउर आपलो बेटा काजे काय करेसे? हुन बलेसे, “उजर फटई आन।” हुन नाहलो पाछे हुनके उजर फटई पींदाला। “आमी आमचो करलो पापमन के मानलोने, हुन आमचो करलो पापमन के खेमा करतो काजे आउर आमके सपाय ओधरम ले सुद करतो काजे पतेयातो लाईक आउर धरमी आय।” आमचो परभु जीसु आमके सुद करुआय, हुन आपलो करांड ने तुआल बांदलोसे आउर हुन आपलो लगे बोहड़ुन एतो सपाय पिलामन के पोछुन सुद करेसे। हुनमन के सुद करुकची पड़ेदे, कसनबलले हुनमन परदेस ले बोहड़ुन ईलासे। हुनमन के सुद करुन भाती परभु जीसु चो धारनिक फटई के पींदायदे। मुंदी पिंदातोर, बेटा जुवान होतो चो आउर हक पावतो चो चीना आय। हुनके आगे चो दसा ने आनला, एचो पलटा हुनचो ले काई ची नी धरला। हुनके आपलो बुआ घरे आपलो पन देउन दिला। परभु जीसु एदांय बुआ महापरभु चो उजा बाटे आसे, हुन एबे बले परदेस ने आपलो हात-पांय मईल करतोमन चो सेवा करतो काजे आपलो करांड ने तुआल बांदुन तियार आसे। आमी हुनचो पुरे मन बोहड़ाउन आमचो करलो पापमन के मानलोने, हुन आमचो पापमन के खेमा करुन सपाय ओधरम ले सुद करतो काजे पतेयातो लाईक आउर धरमी आय। जसन घर-बुड़ाउ बेटा ईलो, आमके बले उसनी ची एतोर आय। “ए बुआ, मय पाप करलेसे, एदांय मय तुचो बेटा बलाय होतो लाईक बले नीआंय। मोके तुचो गोटोक कमेया असन संगाव।” तेबे बुआ बलेदे, “मय तुके केबई बले कमेया नी बनायें। तुय मोचो बेटा आस मय तुके सुद करेंदे, तुके खेमा करेंदे, तुके फेर ले मोचो संगे मिसायंदे आउर बुता करतो लाईक बनायंदे। बेटा, बेटा ची आय। ए मोचो मीतमन, ए कहनी ने आउर गोटोक घर-बुड़ाउ बले आसे।

ए लेका चो गोट के सुना, हुन कसन गुरमुरेसे आउर बुआ के गोट उलटायसे। सते एई ची घर-बुड़ाउ बेटा आय। जेबे हुनचो भाई घरे बोहड़ुन ईलो आउर हुनचो काजे हरिक-उदीम मनायसोत, एके सुनुन हुन खुबे रीस होलो। हुन भीतरे ओलतो काजे आउर हरिक-उदीम मनातो काजे मन नी करलो। तेबे हुनचो बुआ बाहरे एउन भोज ने मिसतो काजे हुनके समंजाउक मुरियालो।

खुबे किरिस्‍तीमन परदेस ने नी रयसोत आउर महापरभु काजे जीउक मन करसोत मानतर नी सकोत।

काय काजे?

हुनमन के सपाय बरन चो आत्‍मिक बरमन दिलोर आसे मानतर हुनमन एके नी धरोत।

महापरभु बलेसे, “ए सपाय तुमचो काजे आसे, 'जोन बले मोचो आय हुन सपाय तुचो आय, एके धर'।”

आमचो सरग चो बुआ सपाय आत्‍मिक बरमन ने सवकार आय आउर हुन जमाय आमचो काजे आय, मानतर हुन बेरपेला एके धरतो काजे नी बलेसे। आमके हुनचो लगे जाउन धरतोर आय।