206
ए मोचो भाई-बईनमन, आजी आमी दखवां कि परभु जीसु नियाव करुक छांडुन मन-बोहड़ातो सिखिया देयसे। एता फेर परभु जीसु बिसातो दिने गोटोक कुबड़ी बायले के उजरालो। जीसु जरूसलेम बाटे जायसे, मानतर हुन आपलो सिखिया देतो आउर उजरातो सेवा ले पाटे नी गुचलोसे। जहूदीमन जरूसलेम ने रोजे बरक फसह तिहार चो हरिक-उदीम मनातो काजे जाते रला। मानतर जीसु जरूसलेम चो हाल के दखुन गागलो।नियाव करतोर आउर मन-बोहड़ातोर
1 हुदलीदांय हुता रलो लोगमन जीसु के सांगला कि गलीलेयामन जरूसलेम चो मंदिर ने जतरा चेगातो बेरा पिलातुस हुनमन के मोरते माराउन हुनमन चो लोउ के हुनीमन चो जतरा संगे मिसाउन रये।
2 एके सुनुन जीसु हुनमन के बललो: “तुमी काय बिचार करासाहास, ए गलीलेया लोगमन, जमाय गलीलेया लोगमन ले जुगे पापी रला, जेचो किरता हुनमन उपरे असन बिपती पड़ली?
3 मय तुमके बलेंसे नाई; मानतर तुमी पाप ले मन नी बोहड़ालोने तुमी जमाय असने ची नास होआसे।
4 तुमी काय बिचार करासाहास कि हुन अठारा झन जोनमन चो उपरे सीलोह चो गुमट घसरली आउर हुनमन चेपाय होउन मोरला: काय जरूसलेम ने रतो दुसर जमाय लोगमन ले जुगे कसूरदार रला?
5 मय तुमके बलेंसे, नाई;
मानतर तुमी पाप ले मन नी बोहड़ालोने असने मोरुन जाहासे।”
पिलातुस, गलील सहर चो आदो लोगमन के मोरते माराउन हुनमन चो लोउ के जतरा लोउ संगे मिसालो आउर 18 लोगमन उपरे सीलोह चो गुमट घसरलोके हुनमन चेपाय होउन मोरला।
हुनमन चो बिचार ने, महापरभु ए लोगमन के पाप चो डंड देउ रये।
जीसु हुन ढोंगीमन के बललो कि खिसियाउन मन नी बोहड़ाला जाले हुनमन बले असने सत्यानास होदे।
ए पाठ ने आमचो काजे खुबे नंगत सिखिया आसे।
आमचो काजे सबु ले पईल सिखिया एई आय: कोनी मनुक दुख-तकलीस पावतोके दखुन आमी हुनके पापी नी बलतोर आय। कोनी मनुक दुख-तकलीस पायसे जाले, असन नी बिचारा कि हुन मनुक पाप किरता डंड पायसे।
दुसर सिखिया एई आय: तुमी नी बिचारा, जीसु किरिस्त के पतेयालोने दुख-तकलीस नी होये। तुमी बड़े बिपती ले पक्का बाचासे। कसनबलले तुमी परभु चो आहास। मानतर ए संवसार ने रओतले तुमके दुख-तकलीस होते रयदे।
गोटोक आउर सिखिया ए आय: तुमके छांडुन कोनी दुसर उपरे दुख-तकलीस ईलोने तुमी असन नी बिचारा कि तुमी दुसर ले आगर धरमी आहास। होउक सके, महापरभु तुमके चेतानी देतो काजे हुनके दुख-तकलीस दिलो।
फर नी धरतो अंजीर रुक
6 फेर जीसु हुनमन के ए कटाव सांगलो, “कोनी मनुक चो अंगुर-बाड़ी ने गोटोक अंजीर चो रूक रली। हुन हुता फर डगराउक ईलो, मानतर हुता हुनके गोटोक बले फर नी मिरली।
7 तेबे हुन बाड़ी राखा करतो बीता के बललो, ‘दख, मय तीन बरक ले ए अंजीर रूक ने फर डगराउक एयंसे, मानतर गोटोक बले फर नी मिरे। एईकाजे एके गोंदुन देस, काय काजे ए ठान के फोकाहा धरलीसे?’
8 मानतर हुन मालिक के बललो: ‘ए मालिक, एके ए बरक काजे बले रउक देस, मय एचो चारो-कुती कोड़कुन खत देयंदे।
9 फेर एतो बरक फर धरली जाले नंगत आय, नोहले हुनके गोंदुन देवां’।”
मोचो बिचार ने, जीसु फर नी धरतो अंजीर रुक आउर इसराएल के कटारुन सांगेसे।
हुन रुक चो मालिक के रुक ले फर पावतो आसा आउर हक रली। मानतर हुन रूक फर नी धरतोके खुबे मुरमुरा होलो आउर हुन, रुक के बुंदे गोंदतो फासला करलो। इसराएल चो लोग महापरभु चो हुकुममन के मानलोने हुनमन के बरमन देतो बायदा रली आउर नी मानला जाले, हुनमन के सराप मिरतोर रली। इसराएलीमन के महापरभु खुबे मया करते रलो। मानतर हुनमन महापरभु चो हुकुममन के नी मानला आउर किरिस्त के बदी दिला आउर असन बलला, “हुनचो लोउ चो डंड, आमचो उपरे आउर आमचो पिला-झीलामन उपरे पड़ो।” मत्ती 27:25 पद ने दखुन दखा, महापरभु हुनमन के डंड दिलो आउर महापरभु चो बललो गोट असन हुनमन के बिजातीमन कयद करला।
ए खुबे अचरित गोट आय, हुनमन आजी बले आपलो देस ने अस्तिर ने रउक नी सकसोत। रूस आउर अरब देसमन हुनमन के तकलीस नी देयसोत। मानतर महापरभु डंड देयसे। इसराएल चो रयत, महापरभु चो चुनलो लोग आत। महापरभु हुनमन के आपलो देस ने आनेदे आउर आजी हुनमन आपलो देस ने बोहड़ेसोत। मानतर हुनमन चो दुक-पुछ किरता हुता अस्तिर नी आय। एचोले जानुक होयसे कि जोन बले संवसार ने होयसे हुन सपाय महापरभु चो हुकुम हिसाब ले ची होयसे।
जीसु, कुबड़ी बायले के उजरातोर
10 *बिसातो दिने जीसु जहूदीमन चो गोटोक मंडली-घर ने सिखाते रये।
11 आउर हुता गोटोक बायले रये जेके अठारा बरक ले गोटोक निमल करतो देव-भूत तकलीस करते रये। हुन कुबड़ी, खटके उबा होउक नी सकते रये।
12 जीसु हुनके दखुन हागदेउन हुनके बललो: “ए बायले, तुय आपलो दिनई ले उजरलीस।”
13 जीसु हुनचो उपरे हाथ थापलो, आउर हुन तूरते सलसला उबा होली आउर हुन महापरभु के सहराली।
14 हुन बायले के जीसु बिसातो दिने उजरालो, एईकाजे जहूदी मंडली-घर चो मुखिया रीस होउन लोगमन के बललो:
“बुता करतो काजे छय दिन आसे, हुनी दिनमन ने एउन उजराय होआ, मानतर बिसातो दिने, नाई।”
बाईबल ने जितरो बले बेमारमन चो बारे ने लिखलोर आसे, हुन सपाय बेमार ले आगर तकलीस ए कुबड़ी करतो बेमार रये। ए सपाय झंझट हुनके उजरालो किरता नोआय, मानतर बिसातो दिने जीसु हुनके उजरालो गुने फरीसीमन रीस होला। ए बायले 18 बरक ले बेमार पड़ु रये। हुन करांड ले लोउन हुनचो मुंड, मांडी के टेकते रये। वेमाउत बलेसे कि हुन खुबे लोउन रये आउर हुनचो हाल खुबे नानागती होउ रये।
15 ए सुनुन परभु हुनके बललो: “ए कपटीमन, काय तुमी बिसातो दिने तुमचो बयला नोहले गदई के कोटा ले ढीलुन पानी खुआउक नी नियासे?
16 ए बायले जोन अबराहम चो थर चो आय, जेके सयतान अठारा बरक ले बांधुन संगाउ रये, बिसातो दिने छंडाय होतोर काय, ए नंगत नोआय?”
मोके समजुक नी होयसे, ए बायले कसन ने सयतान चो बांधन ने रली।
हुन अडरा बायले नी रली, मानतर गोटोक भगतीन रली। मंडली घरे आमचो माहान बईद जीसु हुनके बललो, “तुय उजरुन जा।” तेबे हुन तूरते उजरली आउर महापरभु चो मयमा करली। जीसु हुनके नी छिंउन बले उजराउक सकतो, मानतर हुनचो बिसवास के चमकट करतो काजे आउर हुनके आपलो लोग असन मानुन सत मया ले छीवलो। आमके बले जीसु आपलो मानुन सत मया ले छिंवो।
मंडली घर चो मुखिया हुनके दागा दिलो। मानतर तुमी धियान दियास, हुन बायले मंडली घरे उजरतो आसा ने नी एउ रये। मंडली घर चो लोगमन बले हुनचो संगे नंगत बेबार नी करला। हुनमन जहूदी नीती-नियम के खुबे मानते रओत आउर ए 18 बरक ले बेमार पड़लो कुबड़ी बायले के कोनी जीव नी दुखते रओत। हुता चो धरम पंडितमन काजे बिसातो दिन खुबे खास गोट रये। बिसातो दिन हुनमन काजे खिंडिक चे असन दुखतो जुआंड़ी रये। एबे बले बिसातो दिन के मानतो काजे गोटोक सोर नीआत। धरम चो बारे ने झगड़ा करतो ले नंगत आय, महापरभु चो गोट के मानतोर।
17 जिदलदांय जीसु ए गोटमन के सांगलो, तेबे हुनचो सपाय बयरीमन लाज पड़ला, मानतर जीसु करलो महासंदे चो बुतामन ले सपाय लोगमन हरिक होला।
लोगमन जीसु चो गोटमन के हरिक ले सुनते रओत, मानतर हुन गोटमन असन नी चलते रओत।
धरम चो गोटमन के मानुन आपलो मन के कटुर करतोर आउर जीसु के आपलो मन ले निसकातोर मनुक चो जीवना ने होउक सके।
तुमीमन बला-बली ने सिद होउक सकास। मानतर सबु ले खास गोट एई आय: काय, तुमी किरिस्त के पतेयालास? एचो आउर काई उपाय नीआय। काय, तुमी जीवन चो तकलीस ले खुबे असकट होलासाहास? जीसु लगे आपलो तकलीस आउर पाप के आना। तुमी किदलीदांय बले जीसु लगे एउक सकास, हुन तुमचो सपाय मन-इछा के पुरा करतो काजे बाट दखते रयसे।
सरसुन बीचा आउर पाग चो कटाव
18 फेर जीसु पूछलो:
“महापरभु चो राज कसन आसे? मय हुनचो कटार काय ले करेंदे?
19 हुन सरसुन बीचा असन आय जेके गोटोक मनुक आपलो बाड़ी ने बुनलो, आउर हुन बाड़ुन रूक होउन गेली, फेर बादरी चो चड़ईमन हुनचो खेंदामन ने आपलो गूड़ा बनाला।”
20 जीसु फेर पूछलो: मय महापरभु चो राज चो कटार काय ले करेंदे?
21 हुन पाग असन आय, जेके कोनी बायले तीन सोली चटकलो पिसान ने मिसाली आउर बेरा होते-होते जमाय चटकलो पिसान, पाग होउन गेली।
जमाय किरिस्ती-संस्तामन आउर मंडलीमन सरसुन बीचा असन किरिस्ती लोगमन चो चीना आत।
सरसुन बीचा बुटा बनुआय, रूक नोआय। किरिस्ती लोगमन चो बुतामन खुबे बड़े नोहले माहान दखा देयसे। मानतर हुनमन ने किरिस्त चो गुन नीआय। एता खास गोट चेड़ईमन चो डेरा आय। एमन सयतान चो चीना आत, जोन किरिस्ती-संस्तामन आउर मंडलीमन ने रयसोत।
पाग बले अडरा बुता चो चीना आय। बाईबल ने दो कम सव हार ‘पाग’ चो बारे ने लिखलोर आसे। जुना नियम ने तीन कोड़ी पंदरा हार आउर नवा नियम ने एक कोड़ी तीन हार। कोनी-कोनी लोग चो बिचार ने पाग, नंगत-खबर आय, जोन गुलाय संवसार ने बिगरुन जायदे आउर संवसार के बदलेदे। किरिस्त ईलोने ची अस्तिर करेदे आउर हुनचो राज एवोतले असन नी होये। नंगत मंडली बले हुनचो राज के बसापत करुक नी सके। किरिस्त आपलो समया ने एयदे आउर राज करेदे।
जरूसलेम जातो बेरा जीसु सिखिया देयसे
22 आउर जीसु बाटे चो गांव-सहरमन ने होउन सिखिया देते-देते जरूसलेम सहर जाते रये।
लूका 9:51 पद ने लिखलोर आसे, हुन कुरुस ने दुख उठातो काजे जरूसलेम जायसे। जेबे हुनचो सरग जातो दिन लगे अमरली, तेबे हुन जरूसलेम जातो पक्का बिचार करलो, ए आमचो मुक्ति-देउ चो सरासरी हार जरूसलेम जातोर रली।
23 कोनी हुनके पूछलो, “ए परभु, काय मुक्ति पावतो लोगमन खिंडिक आत?”
24 जीसु हुनमन के बललो: “साकुड़ बाट ले ओलतो काजे खुबे मसागत करा, कसनबलले मय तुमके बलेंसे, खुबे लोगमन हुन बाट ले ओलतो काजे होदे, मानतर ओलुक नी सकदे।”
25 जिदलदांय घर चो मुखिया उठुन कपाट ढाकुन रयदे, हुदलदांय तुमी दुआरे उबा होउन कपाट के ठक-ठकाउन बलासे: “ए मालिक, आमचो काजे कपाट उगाड़”, हुन बलेदे, “मय तुमके नी जाने, तुमी कहां चो आहास?”
26 हुदलदांय तुमी बलासे: “आमी तुचो संगे खाते-पीवते रलु आउर तुय आमचो गांव-सहरमन ने सिखिया देउन रयीस।”
27 “मानतर हुन बलेदे, ‘मय तुमके बलेंसे, मय नी जाने तुमी कहां चो आहास। ए ओधरम करतो लोगमन मोचो ले लापी गुचा’।”
28 “जिदलदांय अबराहम, इसहाक, जाकूब आउर जमाय *अगमजानीमन के महापरभु चो राज ने बसलोर दखासे, मानतर आपने के हुताले निसकालोर दखासे, तेबे तुमी हुता गागासे आउर दात कडरासे।
29 बेर उदिया (पूरब) आउर बेर बुड़ती (पचिम), बेर उदिया उजा हाथ (दखिन) आउर बेर उदिया डेबरी हाथ (उत्तर) ले लोगमन एउन महापरभु चो राज चो भोज ने मिसदे।
30 दखा, जोन लोग पाटे आसोत, हुनमन पुरे होदे आउर जोनमन पुरे आसोत हुनमन पाटे होदे।”
जीसु के हुन असन काय काजे पूछलो?
एके समजतोर मसकिल आय।
हुन सत मन ले ए गोट के पूछलो होती। किरिस्त चो अचरित बुतामन के दखुन खुबे लोगमन हुनचो पाट-पाट जाते रला। मानतर जिदलदांय हुनमन दखला कि हुनचो पाट-पाट गेलोने खुबे दुख-डंड मिरेसे, तेबे हुनमन बोहड़ुन गेला। लोगमन हुनचो पाट-पाट एते रला आउर बोहड़ुन जाते बले रला। एईकाजे मरकुस 14:50 पद ने लिखलोसे कि सपाय चेलामन हुनके छांडुन पराला। जीसु आगे चे सरसरा सांगु रये, हुनचो पाट-पाट गेलोने दुख उठाउक पड़ेदे।
जीसु एचो सरसरा उत्तर नी दिलो एईकाजे ए गोट चो अंताज लगातोर रली। जीसु हुनके बललो, हुन आपलो मुक्ति के पक्का जानो। मानतर जीसु एता बले सरसरा सांगलो कि मुक्ति पावतो खुबे लोगमन ले कोनी कोनी अबराहम, इसहाक आउर जाकूब थर चो नी होदे।
31 हुदलीदांय आदो फरीसीमन जीसु लगे एउन हुनके बलला: “एता ले निकरुन जाहा, कसनबलले हेरोद राजा तुके मोरते मारतो काजे होलोसे।”
32 तेबे जीसु हुनमन के बललो: “जाउन हुन कोलेया के सांगा, दख, मय आजी आउर काली देव-भूतमन के निकरायंदे आउर बेमार लोगमन के उजरायंदे, आउर तीसर दिने मोचो बुता के सारेंदे।
33 तेबले बले मोके आजी काली आउर परान दिने बुता करते रतोर जरुर आय;
कसनबलले होउक नी सके कि कोनी अगमजानी के जरूसलेम चो बाहरे मोरते मारोत।”
जीसु फरीसीमन के चेतानी देते-देते हेरोदेस के कोलेया बलेसे। ए सत गोट आय कि मनुक, पसु रुप ने नी जनमे। मानतर पसु कटार चो जीवना जीयेसे। एता परभु जीसु, लोगमन चो मुक्ति आउर आपलो मोरलो थान ले जीव उठतो चो बारे ने सांगेसे।
जीसु गागलो
34 “ए जरूसलेम!
ए जरूसलेम!
तुय अगमजानीमन के मोरते मारसीस, आउर जोनमन के तुचो लगे पठालोसे, हुनमन चो उपरे तुय पकना फिंगुन मोरते मारसीस। कितरो हार मय मन करले कि जसन कुकड़ी-माय आपलो पिलामन के पाटकी खाले लेपटायसे उसनेची मय बले तुचो पिलामन के जुहा करें, मानतर तुय मन नी करलीस।
35 ए जरूसलेम चो रतो लोगमन दखा, तुमचो घर छांडा पड़ेदे।
मय तुमके बलेंसे:
तुमी मोके फेर केबई नी दखासे जिदलदांय ले तुमी नी बलासे, ‘धन-धन आय हुन, जोन परभु चो नाव ने एयसे।’”
जीसु, जरूसलेम काजे फिकिर करेसे, जोन सहर चो लोग हुनके कुरुस ने चेगाला, मत्ती 5:35 पद ने जीसु, “ माहान राजा चो सहर” आउर आपलो फेर एतो अगम गोट के सांगेसे।
हुनचो फेर ले एतोर मयमा आउर हरिक-उदीम चो गोट होयदे।
ए मोचो मीतमन, अध्या 13 एता सरेसे, जरूसलेम चो लोग हुनके कुरुस ने चेगाला। मानतर हुनचो बायदा आसे कि हुन मयमा संगे फेर एयदे।
जीसु कटावमन सांगुन-सांगुन सिखायसे
अध्या 14 ने, जीसु गोटोक फरीसी घरे भोज खातोर आउर दुय ठन कटावमन चो बारे ने आसे, जेके एकलाय लूका ची आपलो नंगत खबर ने लिखलोसे। गुमट बनातोर आउर राज के लड़ई काजे तियार करतोर।
ए दुनो कटाव चेलामन चो गुन चो बारे ने आय। जीसु सरासरी ने गोटोक गोट पूछलो: लोन चो सुवाद नसले फेर हुन काय काम देयदे?
फरीसी घरे, जीसु भोज खातोर
1 गोटोक *बिसातो दिने, फरीसीमन चो गोटोक मुखिया, जीसु के आपलो घरे खाउक नेवता दिलो, आउर हुनमन जीसु चो नीस डगरातो काजे घत ने रओत,
सत गोट तो ए आय हुन फरीसी, जीसु ने काई नीस डगरातो काजे हुनके आपलो घरे नेवतु रये। पईल पद सपाय गोटमन चो बारे ने सांगेसे। भोज सरासरी बेरा चो गोट किरता बला-बली होली।
2 आउर गोटोक मनुक जीसु चो पुरे रये, हुनके हाथ-पांय फुला चो बेमार रये।
मोचो बिचार ने जीसु के भोज ने हागदेतोर हरिक मन ले नोआय। मानतर हुनके फांदा ने फसातोर रली। मोके तो असन लागेसे कि हुनमन जानुन बुजुन हुन बेमार बीता के हुन लगे बसाउ रओत। जीसु, हुनमन के गोटोक सुवाल पूछलो आउर हुनमन उत्तर देतो काजे डरला।
3 जीसु, धरम-पंडितमन आउर फरीसीमन के पूछलो: “नियम-कानुन चो हिसाब ने बिसातो दिने कोकई उजरातोर नंगत आय कि नाई?”
4 मानतर हुनमन ओगाय रला। तेबे जीसु हुन बेमार बीता चो हाथ के धरुन उजरालो आउर जाउक दिलो।
5 आउर जीसु हुनमन के बललो:
“तुमचो मंजिगता ने असन कोन आसे जेचो बेटा नोहले बयला, बिसातो दिने चुंआ ने घसरुन गेलोने, तुमी हुनके तूरते नी निसकाहासे?”
जीसु ए जानते रये कि फरीसीमन के काई बले जरुरत पड़लोने हुनमन बिसातो दिने बले हुनके करदे।
मानतर हुनमन जीसु चो पुरे ए गोट के नी मानते रओत।
तेबे जीसु बललो, एईकाजे मय ए मनुक के हाथ-पांय फुला बेमार ले उजरायंसे।
6 धरम पंडितमन आउर फरीसीमन जीसु के गोट उलटाउक नी सकला।
हुनके उजरालो किरता भोज थाने हुनमन खुबे बला-बली होला।
नेवतलो लोगमन के नंगत बेबार काजे सिखिया
7 जीसु दखलो कि नेवतलो लोगमन, पुरे-पुरे चो मुखियामन चो ठानमन ने बसते रओत, तेबे जीसु गोटोक कटाव हुनमन के सांगलो।
हुन समया ने एबे चो असन बसतो काजे कुरजी-टेबुल नी रये। नेवतलो लोगमन के बसातो काजे तखत चो चार थर बनाते रओत। ए कटाव हिसाब ने भोज ने नेवतलो लोगमन ने जुवान आउर डोकरा फरीसीमन रला। जिदलदांय भोज खातो काजे हागदिला, तेबे सपाय लोग पुरे-पुरे बसतो काजे हलवाल होला। हुता गोटोक डोकरा फरीसी रये, जोन आपलो जुवान बेरा ले पुरे चेई ठान ने बसते रलो। मानतर डोकरा होलो किरता हुनके सकत नी रये। एईकाजे हुनके पाटकुती चो ठान मिरली।
तुमी बिचारुक सकास कि हुनमन पुरे-पुरे चो ठानमन ने बसतो काजे कितरो हलवाल होते रओत होती। परभु जीसु हुनमन के नंगत बेबार सिखायसे।
ए मोचो मीतमन, आमचो आजी चो पढ़तो समया सरली। आमी आगे चो पाठ ने परभु जीसु ले नंगत बेबार चो बारे ने सीखवां।