202
ए मोचो मीतमन, किरिस्त ने तुमी सपाय के मोचो जुहार! महापरभु चो खुबे दया ले मय नंगत आंसे आउर आसा करेंसे तुमी बले नंगत आसास। महापरभु आमके आपलो जीवत बचन के सीखतो काजे फेर गोटोक सुंदर मोहका दिलोसे। पढ़तो ले आगे आमी महापरभु ले साहरा मांगु, इआ पारथना करवां।ए मोचो मीतमन, आजी आमी लूका लिखलो नंगत खबर 9:1-56 पदमन के पढ़वां। एचो पाठमन आय :
परभु जीसु माहान हुकुम देयसे आउर बारा चेलामन के पठायसे;
परभु जीसु, पांच हजार लोगमन के खोआयसे;
परभु जीसु आपलो मोरना आउर मोरलो थान ले जीव उठतो बारे ने सांगेसे;
परभु जीसु, एकलाय बेटा ले अडरा आत्मा के निकरायसे;
परभु जीसु, जरूसलेम बाटे जायसे;
ए मोचो मीतमन, एदांय आमी पढ़वां,‘परभु जीसु माहान हुकुम देयसे आउर बारा चेलामन के पठायसे।’
1 जीसु आपलो बारा चेलामन के लगे हागदेउन, हुनमन के देव-भूतमन के निकरातो आउर बेमारमन ले उजरातो सकत आउर हक दिलो
आमचो जीसु परभु ए संवसार ने रलो बेरा आपलो चेलामन के चेकरातो बरदान दिलो।
चेकरातोर गोटोक बरदान चो ‘चिना’ आय।
ए पठालो लोग चो चिना रये, ए दखातो काजे कि हुनमन पठालो लोग आत।
जिदलदांय मंडलीमन तकलीस ने रये (नवा नियम लिखतो ले आगे) पठालो लोग चो एई चिना रये कि हुनमन लगे चेकरातोर बरदान रये। पतरस, बेमार बीता के चेकराउक सकलो आउर मोरलो बीता के जियाउक सकलो। पउलुस बले बेमार बीता के चेकराउक सकलो आउर मोरलो बीता के जियाउक सकलो। असन करुक सकतोर गवई रये कि हुनमन परभु जीसु चो सत पठालो लोग रओत। परभु जीसु चेलामन के महापरभु चो राज चो बारे ने सांगतो काजे आउर बेमारमन के चेकरातो काजे पठालो। असन चेकरातोर बुता परभु जीसु, कुरुस ने मोरतो ले आगे होते रली।
चेकरातोर खास नोआय। तुमी चिटीमन के धियान ले पढ़ले जानासे कि पउलुस के चेकरातो बरदान रये, मानतर हुन आपलो सेवा बुता चो सरासरी समया ने एके मुरे नी बावरलो। 1 तीमुथियुस 5:23 पद ने लिखलोर आसे, हुन तीमुथियुस के पेट चो बेमार काजे खिंडिक-खिंडिक अंगुर रस खातो काजे बललो मानतर हुन, हुनके नी चेकरालो। 2 कुरिंथी 12:7 पद चो हिसाब ने, पउलुस चो देहें ने काटा गड़ु रये। हुन एके गुचातो काजे महापरभु ले गुहारलो, मानतर महापरभु एके नी गुचालो। 2 तीमुथियुस 4:20 पद ने असन बले लिखलोसे, “तुरफिमुस के बियाद आसे गुने मिलातुस ढिपका ने छांडले।” पउलुस आपलो मीत तुरफिमुस के काय काजे नी चेकरालो?
तुमी धियान दियास, पउलुस आपलो सेवा बुता चो सरासरी समया ने अमरु रये आउर हुनी समया ने ए ‘चिना’ बललोने, बरदान मंडलीमन ने नी होते रये। एचो ले जानुक होयसे कि पवितर सास्तर मंडली चो अंग बनली, चेकरातो बरदान एदांय दखा नी देये। चेकरातो हक एदांय मनुक थान ले महापरभु चो बचन, धरम सास्तर चो पन्ना ने गेली। आपलो जीवना चो सरासरी समया ने जूहन्ना चेतानी देउ रये कि नंगत उआट ची मनुक चो बललोने, पठालो लोग चो चिना आय। 2 जूहन्ना 1:10 पद ने लिखलोर आसे, “कोनी तुमचो लगे एउन ए सिखिया नी देयसे जाले, हुनके घरे बले एउक नी दियास आउर हुनके जुहार बले नी करा।” गलाती 1:8 पद ने पउलुस बलेसे, “मानतर आमी होउं नोहले कोनी सरगदूत बले होओ, आमी आगे तुमके सुनालो नंगत खबर के छांडुन आउर दुसर नंगत खबर के सुनायसोत जाले हुनमन के सराप लागो।”
एता सराप के जूनानी भासा ने अनाथेमा बलुआत। एचो अरथ आय नरक ने पड़लो आत्मा। ए खुबे कटुर गोट आय, जोन महापरभु चो बचन ने समपुरन हक संगायसे।
2 आउर जीसु हुनमन के महापरभु चो राज चो गोट सांगतो काजे आउर बेमार लोगमन के उजरातो काजे पठालो।
3 जीसु हुनमन के बललो, “बाट काजे आपलाहान संगे काईची नी निया बललोने बड़गा, झोरा, खादी-पीदी, पयसा आउर दुय जोड़ी कुड़ता।
कोनी-कोनी लोग आजी चो समया ने ए पद के आपलो सेवा बुता काजे बांवरुआत। असन परचार करुमन ले बाचुन राहा आउर दखा कि हुन चंदा रुंडायसे कि नाई। कहांय होओ जातो बेरा आपलो संगे झोरा, खातो तीज, आउर पयसा नेयसे कि नाई। आमचो परभु जीसु ए हुकुममन आपलो चेलामन के दिलो आमके नोआय।
4 जोन घरे तुमी ओलुआहास, हुन सहर के छांडोतले तुमी हुनी ची घरे राहा।
भूतियार आपलो भूति पावतो लाईक आसे। मोके लागेसे, कोनी मनुक महापरभु चो बचन के सांगेसे जाले हुनके पयसा-कोहड़ी ले साहरा करतोर आय। परभु जीसु चो समया ने एबे चो असन नी रये। चेलामन के लोगमन चो घरे रउक पड़ते रये। कसनबलले हुदलदांय होटलमन नी रये। हुनमन के घरमन ने खोआ-पीया आउर सगा-मान करते रओत।
5 जोनमन तुमके नी मानदे, तुमी हुन सहर ले जातोदांय आपलाहान पांयमन चो धुरला के फापड़ुन दियास कि हुनमन काजे उलटा गवई होओ।”
6 चेलामन निकरुन गांव-गांवमन ने नंगत खबर सांगते आउर बेमार लोगमन के उजराते सपाय बाटे बुलते रओत।
हुनमन चो सेवा-बुता चो असर हेरोदेस उपरे बले पड़ली।
7 राज करतो बीता हेरोद अंदिपास, ए जमाय गोट के सुनलो आउर खुबे अकचक्यालो, कसनबलले लोगमन बलते रओत कि जूहन्ना बपतिस्मा देतो बीता मोरलो थान ले जीव होलोसे,
8 आउर कोनी बलते रओत कि एलिया अगमजानी दखा दिलोसे, आउर कोनी बलसोत कि आगे बेरा चो कोनी अगमजानी मोरलो थान ले जीव पड़लोसे।
9 हेरोद अंदिपास बललो:
“जूहन्ना चो मुंड के तो मय कटाउ रले, मानतर ए मनुक कोन आय, जेचो खुबे गोट के मय सुनेंसे?”
हेरोद अंदिपास, जीसु के दखुकलाय मन करते रये।
हेरोद राजा, जूहन्ना के जेल ने ढाकालो आउर मोरते मारालो। मरकुस आमके सांगेसे कि हेरोदेस डरते रये, कसनबलले हुन बिचारते रये जूहन्ना बपतिस्मा देतो बीता के मय मोरते माराले। काय, जेके मय माराउ रयें हुन मोरलो थान ले जीव उठलोसे! एईकाजे, परभु जीसु के दखतो काजे हेरोदेस हलवाल होउ रये।
10 पठालो-लोग (चेलामन) बोहड़ुन ईला आउर जोन बले हुनमन करला, जमाय गोट के जीसु के सांगला। तेबे जीसु हुनमन के अलगे करुन आपलो संगे बेतसयदा गांव ने नीलो।
11 मानतर लोगमन के जीसु चो खबर मिरली आउर हुनचो पाट-पाट गेला;
जीसु हुनमन के हरिक ले भेट होलो, आउर महापरभु चो राज चो गोट सांगलो, आउर चेकरतो काजे मन करतो बीतामन के उजरालो।
एता पांच हजार लोगमन के खोआतो काजे तियार करेसे। जीसु हुनमन के बिसातो काजे अलगे नीलो, मानतर हुनमन के बिसातो काजे मोहका नी मिरली। ए गोट सत आय कि लोग-कुड़ा के बुद नी रये। फेर बले आमचो परभु जीसु हुनमन के खुबे दया ले आपलो मानलो, हुनमन के सिखालो आउर बेमार रलो लोग के चेकरालो।
एदांय आमी पढ़वां, ‘परभु जीसु पांच हजार लोगमन के खोआयसे’। एता चेलामन आपने के जीसु के सला देउ चो रुप ने दखायसोत। ए खुबे दुख चो गोट आय कि आजी आमीमन ले खुबे लोग असने करतो दोसी आंव। ए मोचो मीत, परभु जीसु के आमचो ले सला धरुक नी लागे।
12 जिदलदांय सांज होउक मुरियाली, तेबे बारा चेलामन जीसु लगे एउन बलला: “लोगमन के जाउक देस, कसनबलले हुनमन आली-पाली चो गांव-पारामन ने जाउन खातो आउर रतो उआट करोत, कसनबलले आमी एथा चिमचामनाय जगा ने आसुं।”
13 मानतर जीसु हुनमन के बललो:
“तुमी ची लोगमन के खाउक दियास।” हुनमन बलला: “पांचठन रोटीमन आउर दुयठन मछरी के छांडुन आमचो लगे आउर काईची नीआय, मानतर हव, आमी जाउन ए जमाय लोगमन काजे खातो तीज घेनलोने होउक सके।”
एदांय हुनमन पयसा-कोहड़ी चो सला-देउ आउर मुखिया बनला।
14 लोग-कुड़ा तो पांचेक हजार मनुकमन रओत। तेबे जीसु चेलामन के बललो: “लोगमन के पचास-पचास चो धाड़ी-धाड़ी ने बसाहा।”
15 हुनमन उसने करला, आउर जमाय लोगमन भुंये बसला।
सरासरी ने हुनमन आपलो नंगत ठाने आसोत; परभु जीसु चो हुकुम मानसोत।
16 तेबे जीसु हुन पांचठन रोटी आउर दुयठन मछरी के धरलो, आउर सरग बाटे दखुन महापरभु के धन-धन करलो आउर हुनके गोंदा-गोंदा करुन लोगमन के देतो काजे चेलामन के दिलो।
17 जमाय लोगमन पेट भोरते खाउन हरिक होला, आउर उरलो गोंदामन ले बारा फाडरीमन भोरली।
मत्ती, मरकुस, जूहन्ना बले पांच हजार लोग के खोआतो बारे ने लिखलासे।
धियान दियास कि आमचो परभु जीसु आपलो चेलामन के नी करुक सकतो बुता सोपलो। एईकाजे कि हुन खुदे आपलो बुता करुक मन करते रये आउर ए गोट के सरसरा समंजुक होयसे। संवसार के बनाउ, जोन मूर ने मछरीमन के बनालो आउर भाटा ने फसल के खुबे ले बड़ालो, हुन एदांय आपलो बचन चो हुकुम ले खातो तीज बनायसे, असन होउक सके लोग-कुड़ा ने खुबे लोग पेट भरते पईल हार खादला होती। बाचलो बीती ‘गोंदामन’ उसन नोआय, जोन एबे चो समया ने कचरा टुकनी ने पकाउआत। मानतर हुन, नी बाटलो रोटी चो गोंदामन रये। महापरभु अमदेया आमके पूरुन-उरतले देउआय।
मोचो मीतमन, एदांय आमी ‘परभु जीसु चो मोरतोर आउर मोरलो थान ले जीव उठतोर’चो बारे ने पढ़वां।
18 जीसु एकला पारथना करतो बेरा, चेलामन हुनचो लगे गेला, तेबे जीसु हुनमन के ए गोट पूछलो: “लोगमन मोके कोन आय बलसोत?”
19 हुनमन बलला: “कोनी-कोनी बलसोत कि जूहन्ना बपतिस्मा देतो बीता; आउर कोनी-कोनी बलसोत कि एलिया अगमजानी; आउर कोनी-कोनी बलसोत कि जुना अगमजानीमन ले कोनी फेर जीव उठलोसे।”
20 जीसु हुनमन के पूछलो:
“मानतर तुमी मोके कोन आय बलसास?” पतरस बललो: “तुय महापरभु चो किरिस्त आहास।”
21 तेबे जीसु हुनमन के नंगत चेत कराउन हुकुम दिलो, ए गोट के कोकई नी सांगा।
एता सबुले खास सुवाल ए आय, जीसु कोन आय?
परभु जीसु आपलो बारे ने जानुक मन करते रये कि लोगमन हुनचो बारे ने काय बलसोत। मय पक्का जानेंसे कि हुन एईकाजे पूछते रये कि लोगमन सरसरा जानोत, जीसु कोन आय। हुनचो बारे ने लोगमन दुक-पुछ ने रओत। धियान दियास, हुनचो काजे लोगमन चो बिचार खुबे बड़े रये। फेर बले हुन कोन रये एके समजतो ने हुनमन चुकते रओत। सबुले नंगत गोट पतरस बललोसे, हुन ए आय, मत्ती 16:16 पद हिसाब ने, “तुय जीवत महापरभु चो बेटा किरिस्त आस।”
22 जीसु आउर बललो:
“मय *मनुक चो बेटा के खुबे दुख-डंड पावतोर जरुर आय, आउर धरम-सियानमन, *पुजारीमन चो मुखियामन आउर धरम-पंडितमन मोके काई नी समजुन मोरते मारदे, आउर मय तीसर दिने फेर जीउन उठेंदे।”
जीसु फेर आपलो मोरना चो बारे ने हुनमन के सांगेसे। मानतर धियान दियास, हुन आपलो मोरना थान ले जीव उठतो बारे ने सांगलोर नोहलोर केबई आपलो मोरना चो बारे ने नी सांगे।
23 जीसु जमाय के बललो: “कोनी मोचो चेला होउक मन करेसे जाले, हुन आपलो मन-इछा के छांडुन भाति रोजे दिने आपलो *कुरूस के बोउन मोचो संगे एओ।
24 कसनबलले जोन कोनी आपलो जीव के बचाउक मन करेदे हुन, हुनके हजायदे; मानतर जोन कोनी मोचो काजे आपलो जीव के हजायदे हुनी, हुनके बचायदे।
25 मनुक जमाय संवसार के पाउन आपलो जीव के हजालोने, हुनके काय नफा होयदे?
26 जोन कोनी मोचो ले आउर मोचो गोटमन ले लाज होदे;
मय मनुक चो बेटा बले, हुनचो ले लाज होयंदे, जिदलदांय मय आपलो बुआ आउर पवितर सरगदूतमन चो मयमा संगे एयंदे।
एता हुन मुक्ति पावतो बुता के नी दखायसे, हुन मुक्ति पावलो लोग चो हाल के सांगेसे।
एचई बारे ने हुन गोटेयाते रये, “जोन मोचो ले आउर मोचो गोटमन ले लाज होयदे, मय, मनुक चो बेटा बले हुनचो ले लाज होयंदे।”
आजी चो समया ने तुमी कसन बरन चो किरिस्ती आहास? काय तुमी हुनमन असन आहास, जोन हुनके मानसोत आउर हुनचो सेवा करसोत आउर हुनचो मयमा करतो काजे होयसोत? ए मोचो मीतमन, एबे चो आमचो रतो समया ने ए खुबे खास गोट आय।
ए मोचो मीतमन, इआ एदांय आमी ‘रुप बदलतो’ बारे ने पढ़वां। रुप बदलतो बारे ने लिखतो बेरा बईद लूका काई-काई दुसर गोटमन के बले लिखेसे, जेके दुसर नंगत खबर लिखुमन छांडलासे।
27 मय तुमके सते सांगेंसे, एथा रतो लोगमन ले कोनी-कोनी महापरभु चो राज के नी दखोतले नी मोरदे।”
समोन पतरस आमके ए पद चो अरथ सांगेसे।
हुन बललो, हुन महापरभु चो राज के दखलोसे। हुन एके कहां दखलो? डोंगरी ने पतरस, परभु जीसु संगे रये आउर हुन आपलो आंईक ले दखलो गवा रये। हुन आमके एचो बारे ने 2 पतरस 1:16-18 पदमन ने असन बरन ले सांगेसे, “कसनबलले आमचो परभु जीसु किरिस्त चो सकत आउर फेर एतो गोट के जेबे आमी सांगलु, तेबे आमी छंद ले घड़लो कहनीमन के नी सुनालु। कसनबलले आमी हुनचो मयमा चो गवा-साकी आंव। जेबे बुआ महापरभु ले जीसु, मान आउर मयमा पावलो, तेबे हुन मयमा-उजर ले गोटोक राग सुना दिली, “ए मोचो लाडरा बेटा आय, एचोले मय खुबे हरिक आंसे।” जिदलदांय आमी जीसु संगे पवितर डोंगरी ने रलु, तेबे सरग ले एतो राग के सुनलु। एई गोट के समोन आमके सांगेसे आउर ए मोचो काजे खुबे आय। मोचो बिचार ने एबे चो बिगियानीमन ले आगर, हुता रलो लोग जानतोर रली।
28 आठ दिन चो पाछे, पतरस, जूहन्ना आउर जाकूब के जीसु, संगे नेउन पारथना करतो काजे डोंगरी ने गेलो।
परभु जीसु, पतरस जाकूब आउर जूहन्ना के पारथना करतो काजे डोंगरी ने नीलो। हुन पारथना करतो बेरा हुनचो थमना चो रुप बदलली। ‘रुप बदलतोर’ के, जूनानी भासा ने ‘मेटामोरफूम’ आउर अंगरेजी ने ‘मेटामोरफोसिस’ बलुआत। जोन गोट हुता घटली हुन कोसा चो कीड़ा असन आय, सबुले आगे कोसा कीड़ा के दखले हुन आपने कोसा ने ढाकी होयसे आउर पाछे गोटोक सुंदर फिलफिली बनुन बाहरे एयसे। रुप बदलतोर परभु जीसु चो परभु गुन के नी दखायसे, मानतर मनुक-गुन के दखायसे। जेबे तुमी डोंगरी ने परभु जीसु किरिस्त के रुप बदललो दखसाहास, तेबे पक्का ले हुनकेई चे दखसाहास जोन एतो दिने आमके बदलेदे। मोरलोमन के जियायदे आउर जोन जीव आसोत हुनमन के बदलेदे बललोने, मेटामोरफोसिस होदे। एचो पाछे सपाय के बदलेदे आउर महापरभु चो पुरे आनेदे।
29 जिदलदांय हुन पारथना करते ची रलो हुनचो थमना चो रंग बदलली;
आउर हुनचो फटई बले झकमक होउन बरूक मुरियाली,
ए पद चो अरथ ए नोआय कि हुनचो उपरे उजर दखाउन हुनके बराला, मानतर उजर हुनचो देहें भीतर ले बाहरे निकरली आउर हुनचो भीतर ले बाहरे दखा दिली। कोनी-कोनी लोग असन भकवा गोट पुछुआत, “काय आमी सरग ने फटई पींदवां?” मय बिचारेंसे आमी पींदवां, मानतर मय नी पतेयाएं कि आमके फटई लागेदे। कसनबलले आमीमन के मयमा उजर चो फटई पींदायदे, जसन आमचो परभु जीसु के उजर चो फटई पींदालो।
30 आउर दखा, मोसा आउर एलिया दुयझन मनुकमन हुनचो संगे गोटेयाते रओत।
31 हुनमन सरग चो मयमा-उजर ने दखा दिला;
आउर महापरभु चो मन असन जीसु चो मोरना जरूसलेम ने होतो गोट के गोटेयाते रओत।
ए मोचो मीतमन, दुय झन मनुकमन डोंगरी ने दखा दिला : नियम-कानुन बाटले मोसा, अगमजानीमन बाटले एलिया, हुनमन दुनो हुनचो संगे गोटेयाते रओत। हुनमन कोचो बारे ने गोटेयाते रओत? हुनमन एतो समया ने परभु जीसु चो मोरना चो बारे ने गोटेयाते रओत। पउलुस बलेसे, जोन नंगत खबर के मय सांगेंसे हुनचो गवई, नियम-कानुन आउर अगमजानी दुनो दिलासे। नंगत खबर, जुना नियम चो उलटा नोआय। पउलुस एके रोमी 3:21 पद ने सांगेसे, “मानतर एदांय नियम-कानुन नोहलोर महापरभु चो धारनिक दखा दिली, जेचो गवई नियम-कानुन आउर अगमजानीमन देयसोत।” नियम-कानुन आउर अगमजानीमन आमके सांगसोत कि गोटकी चे बरन ले महापरभु आमके बचाउक सके, आउर हुन आय धारनिक होतोर, जेके आमी बिसवास ले पाउक सकुं। जुना नियम ने एके जतरा बाटले पावते रओत। जतरा करतोर ची मोसा चो नियम-कानुन चो मूर रये। हुन जतरा चेगातो मेंडा पिला, परभु जीसु चो चिना रये, जोन आमचो पापमन काजे मोरलो। महापरभु चो मेंडा पिला जेचो बारे ने अगमजानीमन सांगलासे, हुन संवसार चो पाप के उठाउन नेयदे।
32 पतरस आउर दुसर चेलामन खुबे झूमते रओत; आउर जिदलदांय नंगत ले चेतला, तेबे जीसु चो मयमा-उजर आउर हुन दुयझन मनुकमन के जीसु चो संगे उबा होलोर दखला।
33 जिदलदांय मोसा आउर एलिया चो जातो बेरा होली, तेबे पतरस जीसु के बललो:
“गुरुजी, आमके एता रतोर नंगत आय, एईकाजे आमी तीनठन मांडो बनावां, गोटोक तुचो काजे, गोटोक मोसा काजे आउर गोटोक एलिया काजे।” पतरस खुदे नी जानते रलो कि हुन काय बलेसे।
ए मोचो मीतमन, एता समोन पतरस काई तो बललो। हुदलदांय हुनके ओगाय रतोर रली, मानतर हुनके बलतोर आय। मोचो अंताज ने, हुन बिचारेसे, हुन काई खास गोट सांगेसे। मानतर लूका जोड़ेसे, “हुन नी जानते रये हुन काय बलेसे।” आजी खुबे लोग पतरस असन खिंडिक धारनिक गोटमन बलसोत। मानतर हुनमन नी जानोत कि हुनमन काय बलसोत। पतरस तीन ठन मांडो बनातो सला देयसे, जोन मोसा आउर एलिया के परभु चो कटार ने आनेसे। हुन ए तीनो ने परभु जीसु के पईल ठान देयसे। धरम के मानतो लोगमन मोसा आउर परभु जीसु के धरम चो मूर करु बलुआत। तुमके अचरित लागेदे, मानतर परभु जीसु कोनी धरम के मूर नी करलोसे। हुन कोनी धरम नी बनालो। हुन संवसार चो पापमन काजे कुरुस ने मोरलो। हुनी मुक्ति-देउ आय। एईकाजे आमके धरम बाटले नी बचालोर आसे। मोके सूरता आसे डाकटर केराल खुबे हार बललो, “जिदलदांय मय जीसु लगे इले, तेबे मय आपलो धरम के छांडले।” खुबे लोग के आपलो धरम के छांड़ुन परभु जीसु के पावतोर जरुरत आसे।
34 जसन पतरस गोटेयाते ची रलो, गोटोक बादरी एउन हुनमन के ढाकली, आउर बादरी हुनमन के ढाकतो के दखुन हुनमन डरुन गेला।
35 आउर हुन बादरी ले गोटोक राग निकरली: “ए मोचो बेटा आय, जेके मय बाछलेसे, हुनचो गोट के सुना।”
36 आउर असन गोट होलो पाछे, पतरस, जूहन्ना आउर जाकूब, जीसु के एकलाय दखला।
हुदलदांय हुनमन दखलो-सुनलो गोट के मने संगाला आउर हुनमन कोकई नी सांगला।
ए मोचो मीतमन, एदांय आमी ‘परभु जीसु एकलाय बेटा ले अडरा आत्मा के निकरातोर’ चो बारे ने पढ़वां।
37 दुसर दिने जिदलदांय जीसु आउर हुनचो तीनझन चेलामन डोंगरी ले उतरुन ईला, खुबे लोग-कुड़ा हुनमन के भेटला।
38 आउर लोग-कुड़ा ले गोटोक मनुक असन बलुन चिचियालो: “ए गुरुजी, मय तुके गुहारेंसे, मोचो गोटकी ची बेटा आय, हुनचो उपरे दया कर।
39 गोटोक भूत हुनके धरुआय आउर हुन तूरते किरकिरुआय, आउर भूत हुनके कचाड़ुन चेत नोहलोर करलोने हुनचो टोंड ले फेफल निकरुआय; आउर भूत हुनके रमंदुन निमल करुन भाति खुबे तकलीस ने छांडुआय।
40 मय तुचो चेलामन के भूत निकराउक गुहारले, मानतर हुनमन निकराउक नी सकला।”
41 जीसु हुनमन के बललो:
“तुमी जिदाहा आउर नी पतेयातो लोगमन आहास!
मय किदलदांय ले तुमके सहुक सकेंदे? तुचो बेटा के एथा आन।”
42 जिदलदांय हुन जीसु लगे एते रलो, तेबे देव-भूत हुनके जोर ले भुंये कचाड़ुन अलटुन दिली। मानतर जीसु देव-भूत के दागा दिलो आउर लेका के उजराउन हुनचो बुआ के दिलो।
43 तेबे जमाय लोग महापरभु चो बड़े बल-बपू के दखुन अचरित होला।
एता लिखलो सपाय गोट एबे चो समया काजे आय।
परभु जीसु आपलो मयमा ने गेलो, तेबे हुनचो चेलामन हुनचो संगे आसोत।
आमी ए संवसार ने डोंगरी खाले आंसु, जोन थाने डाहाल-बिकाल आउर निमल आसे। एबे चो समया ने संवसार अडरा आत्मा धरलो लोग असन बेबार करेसे। मंडली, संवसार के जमाय तीज पुरातो लाईक नीआय। जिदलदांय परभु जीसु किरिस्त, भीड़ संगे गोटेयाते रये, तेबे लेका पिला चो बारे ने हुनमन नी पतेयातो किरता दागा दिलो। एता सरसरा समजुक होयसे, हुन चेलामन आउर दुक-पुछ करतो लोग के दागा दिलो। ए मोचो मीतमन, हुन लेका पिला खुबे नानागती होउ रये। परभु जीसु हुनचो बुआ बाटे किदंरलो आउर हुनके बिसवास करतो काजे बललो। दूसर नंगत खबर लिखु बीतामन आमके सांगसोत, हुनचो बुआ बिसवास काजे सुयकुन-सुयकुन गागलो। हुनचो चेलामन डाहाल-बिकाल होउन भक्याउन रओत। कसनबलले एचो ले आगे हुनमन अडरा आत्मा के निकराउ रओत, मानतर एबे हुनमन निकराउक नी सकला। आमचो परभु जीसु किरिस्त हुनमन के चमकट करेसे, कसनबलले एता चो हाल दुसर ले खुबे तकलीस आउर भिने आय। परभु जीसु अडरा आत्मा के दागा दिलो आउर पिला के चेकरालो आउर हुनके, हुनचो बुआ चो हाथे सोपुन दिलो। अडरा आत्मा के निकरातो बेरा जीसु जानलो कि एके निकरातोर खुबे झंझट रये।
ए मोचो मीतमन, एदांय आमी ‘परभु जीसु, जरूसलेम बाटे जातो’ चो बारे ने पढ़वां।
लेका के अडरा आत्मा ले छंडालो पाछे परभु जीसु आउर चेलामन जरूसलेम जातो पक्का बिचार करला। गोटोक हार फेर परभु जीसु आपलो उपरे एतो मोरना चो बारे ने सांगेसे।
44 “ए गोटमन के खुबे धियान देउन सुना, कसनबलले मोके बललोने, मनुक चो बेटा के मनुकमन चो हाथे धराय होतोर ची आय।”
45 मानतर हुनमन ए गोट चो अरथ के नी समजला, आउर ए अरथ हुनमन ले लुकुन रली;
कसनबलले हुनमन एके जानुक नी सकला आउर हुनमन ए गोट चो अरथ जीसु के पूछतो काजे डरते रला।
मोरना थान ले जीव उठतो बारे ने हुनमन काई चे नी समजला। एता हुन आपलो मोरना चो बारे ने सांगते रये आउर तुमी बिचारुक सकास कि हुनमन एचो बारे ने हुनके पक्का पूछला होती।
46 जीसु चो चेलामन चो मंजिगता ने गोट निसकली कि हुनमन थान ले सबुले बड़े कोन आय।
तुमी बिचारसाहास होती कि जीसु चो रुप बदललो पाछे हुनमन सोज आउर हुकुम मानतो लोग होला। हुनचो उलटा हुनमन लालची होला। हुनमन मुकुट चो बारे ने बिचारते रओत आउर कुरुस के नी मानते रओत। हुनमन आपलो काजे फंद बड़ाई मन करते रओत। हुन दिन ले आजी बले हुनचो चेलामन के सराप आसे। हुन मंडली चो खुबे पापमन ले गोटोक आय। गलाती 5:26 पद ने पउलुस गलाती चो किरिस्तीमन के लिखेसे, “आमी गुमान करुन गोटोक-दुसर के नी खुरलाउं आउर गोटोक-दुसर के ईरका नी होउं।”
47 मानतर जीसु हुनमन चो मन चो गोट के जानुन गोटोक पिला के धरुन आपलो लगे उबा करलो,
48 आउर हुनमन के बललो:
“जोन कोनी बले ए पिला के मोचो नाव ने इजित-मान करेसे, हुन मोके मानेसे; आउर जोन कोनी मोके मानेसे, हुन, मोके पठाउ के मानेसे; कसनबलले जोन तुमचो मंजिगता सपाय ले नानी आय, हुनी बड़े आय।”
ए गोटोक बड़े सिखानी आय। मोचो बिचार ने मंडली ने सबुले बड़े भगत, हुनीमन आत जोन ओगाय रउन हुनचो सेवा पतेयातो लाईक करुआत।
49 जूहन्ना जीसु के बललो: “गुरुजी, गोटोक मनुक के तुचो नाव ले देव-भूतमन के निकरातोके आमी दखलुसे; आमी हुनके मना करलु, कसनबलले हुन आमचो संग चो नोआय।”
50 मानतर जीसु हुनके बललो: “हुनके मना नी करा; कसनबलले जोन तुमचो बिरुद ने नोआय, हुन तुमचो बाटे आसे।”
51 जिदलदांय जीसु चो सरग जातो दिन लगे अमरली, तेबे हुन, जरूसलेम ने जातो काजे पक्का मन करलो।
52 जीसु *सामरीमन चो गोटोक गांव ने जाउन आपलो रतो काजे ठान तियार करुकलाय लोगमन के पुरे पठालो।
53 मानतर सामरीमन हुनके ठेबुक नी दिला, कसनबलले हुन जरूसलेम सहरे जातो बीता रये।
ए मोचो मीत, सामरी लोगमन जीसु के हिनस्ता करतो बाटे धियान दियास। ए कटाव चो किरता आमी ‘नंगत सामरी’ चो बारे ने बिचारुंसे, मानतर हुनमन जहूदीमन असन नंगत लोग नी रओत। जहूदी आउर सामरी दुनो परभु के हिनस्ता करु रओत।
54 एके दखुन हुनचो चेलामन जाकूब आउर जूहन्ना, जीसु के पूछला:
“ए परभु, काय तुय मन करसीस कि आमी हुकुम देउं सरग ले आईग घसराउन हुनमन के लाकड़ी उलटाउन देउं?”
जूहन्ना के लोगमन अमदेया सीदा-सादा मनुक आय बलुन बिचारुआत, मानतर एता तुमी हुनचो रीस चो बारे ने बले धियान दियास।
55 मानतर जीसु हुनमन के दागा दिलो (आउर बललो, तुमी नी जानास कि तुमी कसन बरन चो जीव चो आहास। कसनबलले मय मनुक चो बेटा, लोगमन चो जीव धरतो काजे नाई, मानतर बचाउक ईलेसे;)
56 तेबे जीसु आउर हुनचो संगे रलो लोगमन दुसर गांव ने गेला।
परभु जीसु, कसने बरन चो बले टुटा-भांगा करतो आत्मा के दागा देउआय। “मनुक चो बेटा नास करतो काजे नाई, मानतर बचातो काजे ईलोसे।” ए कितलो मन भेदतो दागा आय। दुसर मोहका ने, लूका 19:10 पद ने हुन बललो, “कसनबलले मनुक चो बेटा हाजलो लोग के डगराउक आउर मुक्ति देउक ईलोसे।” परभु जीसु पईल हार ईलोके लोगमन पक्का ले नी समजला। मोचो मीतमन, आजी चो समया एताय सरेसे। परभु तुमी सपाय के बर देओ।