197
ए मोचो मीतमन, तुमी सपाय के किरिस्त ने मोचो जुहार! मय नंगत आंसे आउर आसा करेंसे तुमी बले नंगत आसास। महापरभु चो दया ले आमके हुनचो बचन सीखतो फेर गोटोक मोहका मिरलीसे। आगे आमी लूका 4:1-14 बचन के सीखलु।ए मोचो मीतमन, इआ आजी आमी लूका 4:15 पद ले पढ़ुक मुरियावां, एके धियान ले सुना।
15 आउर हुन हुता चो मंडली-घरमन ने सिखाते रलो, आउर जमाय लोगमन हुनके सहराला।
परख होलो पाछे परभु जीसु, गलील ने बोहड़ुन ईलो आउर मंडली घरमन ने सिखालो।
लोगमन हुनचो मयमा करला, हुनचो जय-जय आउर बड़ाई करला। ए पद ने धारनिक गोटमन चो बारे ने गोटेयायसोत असन लागेसे।
ए मोचो मीतमन, तुमी जानास असन होउक सके, तुमी परभु चो बड़ाई करुन बले हुनके नी पतेयाउक सकास। असन बले होउक सके, आमी धारनिक गीत गावले बले हुनचो बललो गोटमन के नी मानुक सकवां। जोन लोग-कुड़ा ‘होसाना चो गीत’ गावला आउर हुनके राजा बनाउक मन करला, हुनीमन दुसर दिने जीसु के कुरुस ने चेगाउक मन करतो उबढंगरी लोग-कुड़ा संगे होला। गोटोक दिने परभु जीसु चो जय-जय करला आउर दुसर दिने हुनके कुरुस ने चेगाला। एदांय आमी महापरभु चो बचन ने लिखलो सबुले नंगत गोटमन ले गोटोक गोट के दखवां। ए गोटोक घटलो गोट आय जोन उजर संगे भिने दखा देयसे आउर असने बरन ले बईद लूका आमके सांगेसे।
16 आउर हुन नासरत ने ईलो, जोन थाने हुन पिला बेरा रलो; आउर नीती असन *बिसातो दिने मंडली-घरे जाउन धरमसास्तर चो पाठ पढ़तो काजे उबा होलो।
17 अगमजानी जसाया चो किताप हुनके दिला आउर हुन किताप के उगाड़ुन, ए गोट के पढ़लो जोन थाने असन लिखलोर रये:
18 “महापरभु चो आत्मा मोचो उपरे आसे,
एईकाजे कि हुन गरीब-दुरीबमन के नंगत खबर सुनातो काजे मोके अबिसेक करलोसे,
आउर कयदीमन के छंडातो चो
आउर कानामन के दखतो सकत देतो चो गोट सुनातो काजे
आउर चेपालो लोगमन के छंडातो काजे
19 आउर महापरभु चो हरिक होतो समया चो गोट सांगतो काजे मोके पठालोसे।”
20 तेबे जीसु किताप के बंद करुन मंडली-घर चो सेवक के दिलो, आउर बसुन सिखाउक मुरियालो; आउर मंडली-घरे रलो जमाय लोगमन खुबे धियान देउन हुनचो बाटे दखते रला।
21 तेबे हुन हुनमन के बललो:
पवितर सास्तर चो ए गोट आजी तुमचो पुरे पुरा होलीसे, जसन एके पढ़तो के सुनलास।
ए गोट के एकलाय लूका चे लिखलोसे आउर ए इतलो अचरित गोट आय, आमी एके पाटसुना नी करुक सकुं।
आमके सांगलोर आसे, परभु जीसु चो परख होलो पाछे घरे बोहड़ुन ईलो।
सते, मान पावलो लोग आपलो सहर काजे खुबे गुमान चो गोट होयसोत।
जसन हुनचो नीती रली, बिसातो दिने हुन नासरत चो मंडली घरे गेलो।
धियान दियास, हुन केबई नी मानलो कि चुनलो ठान के छाड़ुन संवसार चो आउर कोनी लगे आराधना करुक सकुं।
मय क्रिकेट खेलुआंय।
खिंडिक लोग के मय असन बलतोके सुनुन भक्याउआंय कि हुनमन क्रिकेट खेलतो बेरा बले उसनेची महापरभु चो आराधना करुक सकोत, जसन हुनमन एतवार दिने मंडली ने करुआत।
हुनमन चो बलतो गोट सत आय।
मानतर मय अमदेया हुनमन के गोटोक गोट पूछुआंय, “एतवार दिने बियाने तुमी झोरा धरुन खेल-भाटा ने जायसाहास, तेबे काय तुमी महापरभु चो आराधना करुक जायसाहास कि खेलुक जायसाहास? सत गोट तो ए आय कि क्रिकेट खेल-भाटा ने, महापरभु चो आराधना करतो काई बिचार नी रउआय। तुमी महापरभु चो आराधना करतो काजे एतवार दिने बियाने मंडली ने जाहा, पाछे क्रिकेट खेलतो काजे खेल-भाटा ने जाहा। बिसातो दिने मंडली घरे जातोर आमचो परभु जीसु चो नीती रये। परभु जीसु चो समया ने मंडली घर जहूदीमन काजे सबले खास धारनिक ठानमन ले गोटोक रये। बेबीलोन ने कमेया बुता करतो बेरा ए ठान बनली। जहूदीमन आपलो देस, मंदिर आउर बेदी ले लापी रओत। एता काई दुक-पुछ नीआय कि हुनमन, धारनिक आउर महापरभु के डरतो लोगमन लगे महापरभु चो बचन सुनतो आउर आराधना करतो काजे ईला। जहेजकेल 14:1 आउर 20:1 पद ने सांगलोर आसे कि सियान लोगमन जहेजकेल चो भंवरक रुंडा होला आउर एताय ले मंडली घर चो मुर होली असन लागेसे। देस ले निकरलो पाछे बले मंडली-घरमन रये। मुर ने ए मंडली घरमन मोसा चो नियम-कानुन के सपाय के सिखातो काजे रली। पाछे, हुता बचन सांगुक आउर पारथना करुक बले मुरियाला। मंडली-घर सपाय लोग के नियम-कानुन चो सिखिया देतो ठान रये। परभु जीसु चो समया ने सपाय बड़े सहरमन ने मंडली-घरमन रये। परभु जीसु किरिस्त चो जीवना ने हुन चिमचाम बरकमन ले गोटोक दिन चो बारे ने मय सांगुक सकें। हुन गोटोक बड़ई रये आउर हुन दिनमन ने बुता करते रये। हप्ता चो छय दिन चो बारे ने काई नी जानें। मानतर गोटोक गोट के जानें कि सपाय बिसातो दिने हुन मंडली-घरे गेलो। हुन चुनलो ठान ने आराधना करुक गेलो कि हुता गवई देउक सको।
ए मोचो मीतमन, हुन डंडिक काजे आपलो घरे ईलोसे आउर एबे हुन मंडली-घरे आसे। हुनके धरमसास्तर दिला आउर हुन हुनके पढ़ुक मुरियालो आउर हुन जसाया ले पढ़ेसे। हुन दिनमन ने बाईबल के अध्या आउर पदमन ने नी बाटु रओत। बाटु रलोने जसाया 61:1, 2 पदमन ले पढ़तो। एता धियान देतो गोट ए आय कि हुन कहां पढ़ुन सारलो। हुन एके नी पढ़ुन किताप के ढापलो, “....आउर आमचो महापरभु चो पलटा धरतो दिने...” आउर हुनके सेवक चो हाथे बोहड़ाउन दिलो। ए अचरित गोट आय कि हुन पूरा बचन के नी पढ़ुन आदो ने ठेबलो। हुन “आमचो महापरभु चो पलटा धरतो दिन....” चो बारे ने मुरे नी पढ़लो।
हुन ए भाग चो पाछे चो कोनी भाग के नी पढ़े। काय, तुमी जानास, काय काजे? हुन लोग-कुड़ा के दखुन बललो, “आजी ची ए गोट तुमचो पुरे सत होली।” एता धरमसास्तर चो गोटोक भाग पुरा होते रये आउर दुसर भाग परभु जीसु चो दुसर हार एतो लगले पुरा होते रये। पलटा धरतो दिन एबले नी अमरलीसे। पलटा धरतो दिन काय आय? भजन गीत 2:8 पद हिसाब ने, ए हुन समया आय जेचो बारे ने महापरभु बललोसे, “मोके मांग, मय तुके जात-जात चो लोगमन के तुचो पांय खाले करुन देयंदे आउर मंजपुर चो सपाय राजमन के तुचो हक ने करुन देयंदे।” परभु जीसु, बिजातीमन के कसन ने आपलो हक ने करतो काजे जायसे? भजन गीत 2:9 पद हिसाब ने, “तुय हुनमन के लोहो-बड़गी ले छिदरी-बिदरी करसे, तुय हुनमन के हांडी-कुंडरी असन रन-बन करसे।” उसन बरन ले आमचो परभु सकत संगे एयदे। ए पलटा धरतो दिन होयदे। हुन परभु चो माहान दिन होयदे आउर ए सपाय परभु जीसु चो दुसर हार ईलो बेरा होयदे। हुन पईल हार गरीबमन के नंगत खबर सुनाउक ईलो कि हुनमन मुक्ति पाओत। हुन पवितर आत्मा ले भरपुर होउन मुक्ति चो खबर सुनाउक ईलो। आमीमन एबे बले हुन अचरित दिन बललोने, नंगत खबर चो दिन ने आंसु। हुन दुसर हार पलटा धरतो दिने एयदे।
22 आउर जमाय लोगमन जीसु के सहराला, आउर हुनचो टोंड ले निकरलो दया-धरम चो गोट के सुनुन भक्याउन गेला, आउर बलला:
काय, ए जूसुफ चो बेटा नोआय?
लोगमन हुनके दखला आउर बड़ई जूसुफ चो बेटा आय बलुन सूरता करला। हुता सपाय नसलो असन लागली। हुन किरिस्त कसन ने होउक सके? लूका एके खुबे सरसरा करेसे कि परभु जीसु आमचो निमलमन के आपलो उपरे उठालो।
23 आउर जीसु हुनमन के बललो, “सते तुमी ए कहका मोके बलासे, ‘बईद, तुय आपने के छुकनाय कर’। तुमी ए बले मोके बलासे, ‘ए गोटमन के तुचेई गांव ने कर, जोन आमी सुनलुसे कि तुय कफरनहूम ने करलिसीस’।”
24 आउर हुन बललो: मय तुमके सते सांगेंसे: कोनी बले अगमजानी आपलेई गांव ने इजित-मान नी पाए।
25 आउर मय तुमके सते सांगेंसे: अगमजानी एलिया जीव रलो बेरा जिदलदांय साढ़े तीन बरक ले पानी-बरसा नी होली कि गुलाय देस ने बड़े भूक पड़ली, तेबे इसराएल राज ने खुबे रांडीमन रला।
26 मानतर सयदा राज चो सारफत गांव ने गोटोक रांडी के छांडुन आउर कोचई लगे एलिया के नी पठालो,
27 अगमजानी एलिसा जीव रलो बेरा इसराएल राज ने खुबे कोढ़ बेमारमन रला;
मानतर सीरिया राज चो नामान के छांडुन आउर कोनी छुक-छुका नी होला।
परभु जीसु एके अचरित बरन ले समजायसे। हुन दुय झन बिजातीमन ले कटारुन सांगेसे, जोनमन इसराएल देस चो बाहरे चो रओत। साराफत चो रांडी आउर सीरिया चो नामान, जोनमन चो जीवना ने महापरभु अचरित बुता करु रये। हुन, हुनमन के ए समजातो काजे होते रये कि हुनमन महापरभु चो निज लोग, परभु जीसु के नी मानतो किरता महापरभु चो खुबे बर पावतोले लापी होते रला। हुनमन इसराएल चो खुबे रांडीमन आउर कोढ़ बेमारमन असन होदे जोनमन के एलिया चो समया ने नी चेकराला।
28 ए गोट के सुनते खन मंडली-घर ने रलो जमाय लोगमन रीस होला,
29 आउर उबा होउन जीसु के सहर ले खोर ने निकराला, आउर जोन डोंगरी ने हुनमन चो सहर रली, हुनचो सिग ने नेउन हुनके हुताले खाले घसराउंदे बलते नीला,
30 मानतर जीसु हुनमन चो मंजिगता ले निकरुन जाते गेलो।
जीसु किरिस्त चो सहर चो लोगमन हुनके नी पतेयाला।
नासरत चो भंवरक डोंगरीमन आसे आउर हुनमन, हुनके घसराउन मारतो काजे डोंगरी चो टीपे नीला। ए उड़गाड़ी लोग-कुड़ा ले हुनचो बाचतोर गोटोक अचरित गोट रये।
ए मोचो मीतमन, एदांय आमी ‘परभु जीसु, नासरत के छांडुन कफरनहूम ने सेवा-बुता करुक मुरियातो’ चो बारे ने पढ़वां।
31 जीसु, गलील परघन चो कफरनहूम सहर ने ईलो, आउर बिसातो दिने लोगमन के सिखाते रये।
ए मोचो मीतमन, ए पद ले धरुन ए अध्या सरत ले परभु जीसु आमचो संगे रउं।
जिदलदांय परभु जीसु संवसार ने रलो हुदलदांय आमीमन ले खुबे लोग हुनचो संगे गोटोक दिन रउक मन करतु। लूका आमचो काजे एके पक्का करेसे। मत्ती आउर मरकुस दुनो ए गोट के लिखलासे कि जीसु किरिस्त, नासरत ले छांडुन समदूर रेटे चो गलील ले सेवा-बुता करुक मुरियालो। हुन असन एईकाजे करलो कसनबलले आपलो लोगमन हुनके नी पतेयाला। लूका 10:15 पद चो हिसाब ने गोटोक दिने हुन कफरनहूम चो लोगमन के बललो, “ए कफरनहूम, काय, तुय बिचारसीस कि तुके सरग ने इजित-मान मिरेदे? तुय पतालपुर ले बले खाले जासे।” हुता हुनचो सेवा बुता के पतेयातो काजे हुनमन लगे कितलो नंगत मोहका रली।
32 लोगमन हुनचो गोट के सुनुन भक्याउन गेला, कसनबलले हुनचो गोट हक संगे रली।
ए मोचो मीतमन, बिसातो दिने जिदलदांय परभु जीसु सिखाते रलो तेबे धरम-पंडित नोहले फरीसी असन नाई, मानतर हकदार असन सिखालो।
33 हुन मंडली-घरे देव-भूत धरलो गोटोक मनुक रये।
34 हुन खुबे जोर ले किरकिरुन बललो:
ए जीसु नासरतेया, आमके तुचो ले काय बुता?
काय, तुय आमके नसाउक ईलीसीस?
मय तुके जानेंसे कि तुय कोन आस? तुय महापरभु चो पवितर लोग आस।
35 जीसु हुनके दागा देउन बललो: ओगाय रा; आउर हुनचो थान ले निकरुन जा। तेबे देव-भूत हुन मनुक के लोगमन चो पुरे कचाड़ुन, नोकसान नी करुन हुनचो ले निकरुन गेली।
36 एके दखुन जमाय भक्याला, आउर हुनमन गोटोक-दुसर ले गोटेयाउक मुरियाला आउर बलला: ए कसन गोट आय कि हुन हक संगे आउर बल संगे देव-भूतमन के हुकुम देयसे, आउर हुनमन निकरुन जायसोत।
37 एईकाजे चारो कुती जमाय जगा ने जीसु चो गोट जगुर-पगुर होली।
आमी असन समया ने रउंसे जेबे सयतान आपलो घिनघिना बुता करुक मुरियालोसे आउर एबे चो समया ने लोगमन सयतान चो पुजा-पाट करसोत। अडरा आत्मामन आमचो परभु जीसु चो समया ने बले बुता करते रओत आउर एबे बले बुता करसोत। आमचो परभु जीसु गोटोक मनुक ले अडरा आत्मा के निकरालो। सयतान चो सकत आउर हक ने रलोने ची नीसा तीजमन के खातोर-पीवतोर, अडरा बुतामन आउर बड़े भारी पापमन करुक सकोत।
38 जीसु मंडली-घर ले उठुन समोन (पतरस) चो घरे गेलो। समोन चो सतरी के जर धरु रली, आउर हुनमन, हुनचो काजे जीसु के गुहारला।
39 जीसु हुनचो ओचना लगे जाउन जर के दागा दिलो आउर जर हुनचो ले उतरुन गेली, आउर समोन चो सतरी तूरते उठुन हुनमन चो सेवा-सुस्तारा करुक मुरियाली।
असन लागेसे आराधना चो पाछे परभु जीसु, समोन पतरस घरे गेलो।
हुन मुंडे बेरा चो पेज खाउक गेलो होती।
जीसु, समोन पतरस घरे रलोदांय समोन पतरस चो बायले चो आया बललोने, पतरस चो सतरी के जर ले उजरालो।
हुनके खुबे जर रली, एचो ले जानुक होयसे कि ए गोटोक बड़े बेमार रली।
आमचो परभु जीसु, “उतरुन जा” बलुन जर के दागा दिलो।
हुन तुरते उठली आउर हुनचो सेवा करली। परभु जीसु जेके बले चेकरालो हुन धीरे-धीरे नाई मानतर तुरते चेकरलो। ए गोटोक भक्यातो लाईक गोट रये।
खिंडिक बरक आगे, मय गोटोक सभा चो बारे ने सुनले जोन गोटोक ‘बिसवास ले उजरातो’ बीता बाटले रये। गोटोक खोड़ेया के सभा ने आनला आउर हुनके चेकरलो बलला, तेबले बले हुनके खोड़ेयाते-खोड़ेयाते नीला। हुनचो पाछे सभा ने गोटोक मनुक ईलो, जोन आपलो देहें भीतरे केंसर बेमार आसे बललो। बिसवास बाटले उजरातो बीता बललो कि हुन तुरते केंसर ले चेकरलोसे। ए भक्यातो लाईग गोट आय कि लोग असन बरन चो गवई के कसन ने मानसोत। हुन खोड़ेया तुरते कसन ने नी चेकरलो? आमचो परभु चेकराउ रले हुन तुरते चेकरतो। कोनी-कोनी असन पूछतोके मय सुनलेसे, “काय तुमी परभु ले उजरातो गोट के नी पतेयायसाहास?” मोचो उत्तर असन आय, “आउर दुसर बरन चो उजरातोर कसन आय?” सपाय बरन चो उजरातोर महापरभु बाटले ची आय।
बईद लूका आमके एई सांगेसे, जेके बईदमन नी समजुआत। टेक्सास सहर ने गोटोक खुबे नंगत बईद आमचो मंडली ने रये। हुन गोटोक हार मोके बललो, “मय परची लिखुन देउआंय मानतर महापरभु चेकराउआय। मय देहें के तकलीस देतो भाग के निकराउआंय, मानतर एकलाय महापरभु ची चेकराउआय। महापरभु के छाड़ुन आउर कोनी चेकराउक नी सके।” ए कितलो नंगत गवई आय।
40 बेर बसतोदांय, जोनमन लगे बरन-बरन चो बेमार पड़लो लोगमन रओत, हुनमन के जीसु लगे आनला, आउर हुन गोटोक-गोटोक चो उपरे हाथ संगाउन हुनमन के उजरालो।
41 देव-भूतमन बले खुबे लोगमन ले निकरुन गेला, आउर किरकिरुन बलला: तुय महापरभु चो बेटा आस, मानतर जीसु हुनमन के दागा दिलो आउर गोटेयाउक नी दिलो, कसनबलले हुनमन जानुन रला कि हुन किरिस्त आय।
42 जिदलदांय बियान पावली, तेबे जीसु निकरुन गोटोक रान जगा ने गेलो, आउर लोग-कुड़ा हुनके डगराते-डगराते हुनचो लगे ईला, आउर हुनके जाउक नी देउन बलला: आमचो थान ले नी जा।
43 मानतर जीसु हुनमन के बललो: मोके दुसर-दुसर सहरमन ने बले महापरभु चो राज चो नंगत खबर सांगतोर ची आय, कसनबलले एचई काजे मोके पठालोर आसे।
44 आउर हुन जहूदिया राज चो मंडली-घरमन ने नंगत खबर सांगते रलो।
हुनचो दिन चो मूर, आराधना ने सिखातो ले होयसे।
एदांय सांज होली।
परभु जीसु किरिस्त आराधना घर ले बाहरे लोग-कुड़ा लगे गेलो।
हुन सपाय के छिंवते आउर चेकराते गोटोक मनुक ले दुसर लगे गेलो।
मत्ती 8:17 पद ने, मत्ती लिखलोसे, ‘असन बरन ले जसाया अगमजानी बाटले बललो गोट पुरा होली:
“हुन आपने आमचो निमलमन के धरलो आउर आमचो बेमार-डंडमन के उठालो’।”
आमचो परभु जीसु अचरित बरन ले चेकरालो।
जसाया 53:4 पद ने लिखलोर आसे, “पक्का हुन आमचो बेमारमन के सहलो आउर आमचेई दुख-तकलीसमन के उठालो।
फेर बले आमी हुनके महापरभु ले मार-पेट करलो आउर नानागती करलो समजलु। इसराएली जात चो लोग हुनके मार-पेट करला आउर नानागती करला। फेर बले परभु जीसु खुबे दया करुन लोग चो निमलमन के आउर बेमारमन के आपलो उपरे धरलो।
ए मोचो मीतमन, आमचो अंताज ने हुन, हुनमन चो बिसवास किरता हुनमन के नी चेकरालो। मानतर हुनमन चो दुख-तकलीस के दखुन हुनमन के जीव दुखलो आउर हुनमन के चेकरालो। आमके सांगलोर आसे कि आजी चो समया ने असने दया करतोर आय। गलाती 6:2 पद ने लिखलोर आसे, “तुमी तकलीस बेरा गोटोक-दुसर के साका होउन किरिस्त चो नियम-कानुन के पुरा करा।”
ए मोचो मीतमन, लूका लिखलोर नंगत खबर चो 4 अध्या एताय सरेसे। एदांय आमी लूका लिखलोर नंगत खबर 5:1-4 पदमन के पढ़वां:
परभु जीसु किरिस्त आपलो चेलामन के दुसर हार हागदेयसे;
परभु जीसु, कोढ़ बेमार बीता के चेकरायसे;
परभु जीसु गोटोक लकवा मारलो मनुक के चेकरायसे;
परभु जीसु, मत्ती के हागदेयसे;
परभु जीसु, जुना फटई आउर जुना तूमा चो बारे ने सांगेसे।
इआ एदांय आमी ‘परभु जीसु किरिस्त आपलो चेलामन के दुसर हार हागदेतो’ चो बारे ने पढ़वां।
1 जिदलदांय जीसु गनेसरत समूंद रेटे उबा रलो, तेबे महापरभु चो गोट के सुनतो काजे लोगमन जीसु लगे उपरा-पेला होते रओत।
2 तेबे हुन समूंद-खंडे बांदलोर दुयठन डोंगामन के दखलो, आउर मछरी मारुमन डोंगा ले उतरुन झारीमन के धोअते रओत।
3 जीसु हुनमन थान ले गोटोक डोंगा ने चेगलो, जोन समोन चो रये, आउर समोन के, डोंगा के खंड ले खिंडिक खोल बाटे नेउक बललो।
तेबे जीसु, डोंगा ने बसुन लोगमन के सिखाउक मुरियालो।
गनेसरत चो समूंद के ची गलील चो समदूर बलुआत। मछरी धरुमन आपलो डोंगा के छाड़ुन आपलो जाल के धोवते रओत। परभु जीसु किरिस्त, पतरस चो डोंगा ने चेगलो आउर हुन डोंगा के खंड ले खिंडिक लापी गुचातो काजे बललो। कितलो नंगत ठान आय। मय बिचारेंसे, ए गोट ले आमके नंगत सला मिरेसे। सपाय मंडली, मछरी धरतो डोंगा असन आय। महापरभु चो बचन सांगतो ठान आय। जीसु हुनमन के बलु रये कि हुनमन के मनुकमन के धरतो बीतामन बनायदे। एचो अरथ ए नोआय कि जिदलदांय बले आमी महापरभु चो बचन के सांगवां, तेबे मय आउर तुमी मछरी धरवां- चेलामन नी धरला। मानतर एचो अरथ ए आय कि जोन बले ए बुता करेसे, हुनके नी भुलकतोर आय कि हुनचो जीवना चो सबुले बड़े बुता लोगमन के परभु लगे आनतोर आय।
4 सिखिया देउन सारलो, तूरते हुन समोन के बललो:
“तुचो डोंगा के हुन खोल बाटे ने, आउर तुचो संगवारीमन संगे मछरी धरतो काजे झारी के पकाहा।”
ए मोचो मीतमन, परभु जीसु लोगमन के गोटेयाउन सारुन पतरस के बललो, “एदांय तुय मछरी धरतो काजे झारी के खोल बाटे पकाव।”
मत्ती 4:19 आउर मरकुस 1:17 पद ने मत्ती आउर मरकुस आमके सांगसोत, जिदलदांय परभु जीसु एमन के पईल हार हागदिलो, हुनमन गलील समदूर चो रेटे बुलते रओत।
हुन समोन पतरस आउर हुनचो भाई अंदरियास के समदूर ने झारी पकातो के दखलो। कसनबलले हुनमन मछरी धरुमन रओत। परभु जीसु हुनमन के बललो, “मोचो पाटे इआ, मय तुमके मनुकमन के धरतो बीता बनायंदे।” एदांय एमन आपलो मछरी धरतो पेसा बाटे बोहड़ुन गेलासे। एचोले जानुक होयसे कि परभु जीसु आपलो चेलामन के तीन हार हागदिलो।
हुनमन ले खुबे लोग के जरूसलेम ने भेटु रये। एचो बारे ने जूहन्ना आपलो पईल अध्या ने सांगेसे। जिदलदांय जूहन्ना बपतिस्मा देतो बीता हुनचो बारे ने सांगलो, तेबे हुनचो चेलामन ले कोनी नी जानते रओत कि जीसु कहां रउआय। फिलिपुस, नतनएल, समोन पतरस आउर अंदरियास, जूहन्ना चो पाट-पाट जातो लोग रओत। हुदलदांय परभु जीसु हुनमन के आपलो चेला बनातो काजे नी हागदिलो, मानतर हुनमन के सोजे भेटु रये। पाछे परभु जीसु गलील समदूर बाटले जातो बेरा हुनमन के मछरी धरतो के दखलो आउर हुनमन के आपलो पाटे एतो काजे हागदिलो। हुनमन आपलो जाल के छांडला आउर हुनचो पाट-पाट गेला। एदांय हुनमन आपलो मछरी धरतो पेसा बाटे बोहड़ुन गेला। पाछे बईद लूका आमके सांगेसे, परभु फेर एक हार हुनमन के, लोगमन के आपलो बाटे आनतो काजे हागदिलो। हुदलदांय परभु हुनमन के, पठालो लोग बललो। जिदलदांय परभु जीसु किरिस्त, लोग-कुड़ा के डोंगा उपर ले बलते रये, समोन पतरस डोंगा ने बसुन सुनते रये। जिदलदांय हुन बलुन सारलो, तेबे हुन समोन के बललो, “आपलो डोंगा के गड़ेंया बाटे ने आउर जाल पकाव। एदांय मय तुचो संगे मछरी धरुक एयंसे। ए मोचो मीतमन, ए कितलो नंगत गोट आय कि परभु जीसु लोगमन संगे रोजे दिना मिलुन-मिसुन रते रये आउर हुनमन चो बुता ने साहरा करते रये बललोने, बचन सांगलो पाछे हुन पतरस संगे मछरी धरतो बाटे भिड़लो! इबरानी 4:15 पद ने बाईबल बलेसे, “आमचो बड़े पुजारी जीसु किरिस्त आमचो निमल बेरा आमके जीव दुखुआय; कसनबलले हुनके बले सपाय गोटमन ने आमचो असन परखला, तेबले बले हुनचोने काई पाप नी रली।” आजी बले हुन आमके साहरा करतो काजे आमचो संगे रयसे।
ए मोचो मीतमन, आजी आमचो सीखतो समया एताय सरेसे, परभु तुमी सपाय के बर देओ।