196
ए मोचो मीतमन, तुमी सपाय के किरिस्त चो नाव ने जुहार। मय नंगत आंसे आउर आसा करेंसे कि तुमी बले नंगत आसास। महापरभु आमके गोटोक नंगत मोहका दिलोसे कि आमी हुनचो जीवत बचनमन ले सीखुं। इआ, एके पढ़तो ले आगे आमी पारथना करुं।ए मोचो मीतमन, आजी आमी लूका लिखलोर नंगत खबर चो 4:1-14 पदमन के पढ़वां। आजी चो पढ़तो पाठमन आत:
परभु जीसु के परखतोर;
परभु जीसु, गलील आउर नासरत ने बोहड़ुन जातोर;
आपलो लोगमन हुनके नी पतेयातोर;
परभु जीसु, नासरत के छांडुन कफरनहुम ने सेवा-बुता करुक मुरियातोर।
ए मोचो मीतमन, सयतान, परभु जीसु के गोटोक मनुक चो रुप ने परखलो, जोन मनुकमन चेई होतो जचई रली। जसन सबु चो जीवना ने जचई होउआय।
मनुकमन उपरे होतो सपाय जचईमन एता आसे आउर ए तीन बरन चो आय।
1. सयतान, परभु जीसु के देहें काजे लागतो तीजमन के पुरा करतो काजे पकनामन के रोटी उलटाउक बललो। जीव रतो काजे रोटी लागुआय आउर रोटी काई अडरा तीज नोआय। देहें काजे रोटी लागुआय आउर परभु जीसु भुके रये। फेर एता काय अडरा रये? आपलो खुबे सकत के आपलेई सेवा ने लगातोर अडरा आय। हुनके ए बड़े गोट चो सत के दखाउक पड़ेदे। मत्ती 4:4 पद हिसाब ने, “मनुक सोजे रोटी ले ची जीव नी रये।” ए गोट, सोजे आपलेई देहें चो लालच के पुरा करतो काजे जीवतो लोगमन चो सिखिया चो उलटा आय। आमचो रोजे चो जीवना-खावना ने एबे चो लोग असन बलसोत, “खाहा-पीया, हरिक-उदीम ने राहा। कसनबलले काली के तो आमके मरतोर ची आय।” मनुकमन चो गोट ए आय जाले एताय सपाय सरुन जायसे। लालच करतोर पतेयातो लोग काजे सराप आय।
ए मोचो मीतमन, ए जचई बाटले आमचो परभु जीसु ए संवसार चो लोग, मन करतो नीती के फंदी ठेबालो।
2. परभु जीसु के सयतान ए संवसार चो राजमन के देयंदे बललो। अडरा सकत आउर अडरा राजनीती ले आपलो सकत के बड़ाउआत। जुद, जीवना चो नीती आय, लोग-कुड़ा के उकसातो काजे घिनियातोर आउर डरातोर कोड़ा आय। ए सयतान चो हिसाब आय आउर असन करलोने संवसार चो राजमन के सयतान देयंदे बलेसे। महापरभु चो राज ने ओलतो काजे मनुक के मन बोहड़ाउक पड़ेदे। जूहन्ना 3:3 पद ने लिखलोर आसे, जीसु हुनके बललो, “मय तुके सते सांगेंसे, कोनी बले नवा जनम नी धरलोर, महापरभु चो राज के दखुक नी सकोत।” मत्ती 4:10 पद चो हिसाब ने, सरासरी समया चो बारे ने सांगेसे, “तुय, परभु आपलो महापरभु के पांय पड़ आउर हुनचेई सेवा कर।” हुनचो पाछे 2 कुरिंथी ने पठालो बीता पउलुस आमके बलेसे, “आमी संवसार ने रलोने बले संवसारी लोगमन असन लड़ई-झगड़ा ने नी रउं। कसनबलले आमचो लड़ई-हतियार संवसारी नोआय। मानतर ए हतियार ने सयतान चो भाड़ामन के भोसड़ातो महापरभु चो सकत आसे। एईकाजे आमी महापरभु चो गियान चो बिरुद करतो सपाय घड़लो गोटमन के काटुन आमचो बिचार के किरिस्त चो हुकुम मानतो लाईक बनाउंसे।”
3. सयतान, परभु जीसु के मंदिर चो गुबा ले खाले घसरतो काजे परखते रये। एचोले हुनचो संवसार ने एतो उआट के आउर लोगमन के आपलो सकत दखाउक सकतो। मानतर परभु जीसु राज गादी पावतो काजे सरसरा बाट नी धरलो। मयमा चो मुकुट पिंदतो काजे हुनके काटा चो मुकुट पिंदतोर रली। इसटीपलर असन बलेसे, “दुय बरन ले महापरभु चो इजीत धरुक सकोत,
पईल, हुनचो सकत के धियान नी देउन।
दुसर, हुनचो उपरे अंताज लगाउन मानतोर।” दुनो पाप आय।
काई बले नी करतोर सरसरा आय आउर हुनचो पाछे टोंड अलटते, असन बलतोर कि महापरभु चेटियामन के खोआयसे जाले, हुन आमचो बले दखा-रखा करेदे। मानतर उबजास 3:9 पद ने महापरभु बलेसे, “आपलो कपार चो पसना चो रोटी खासे।” बललोने, कोनी बले दुसर देस ने मिसनरी बनतो काजे हुनके हुन देस चो भासा के पढ़ुन सीखुक पड़ेदे, तेबे महापरभु हुनके साका होयदे। आमी महापरभु चो संगवारी आंव, पुतरा नोआंव। बईद एडवर्ड जडसन आपलो बुआ अडोनीराय जडसन के बरमा देस ने दुख उठातो के दखुन बललो, “आमी दुख उठालो नोहलोर भलई पाउंसे जाले आमचो ले आगे दुसर लोग दुख उठालासे, आउर एचो किरता आमचो पाछे चो लोग बले भलई पावदे।” परभु जीसु फंद आउर आत्मिक ढोंग चो बिरुद करलो। व्यवस्थाविवरन 6:16 पद चो हिसाब ने हुनचो उत्तर सत्यानास करतो बीती रये। “तुय आपलो महापरभु जहोवा चो जचई नी कर। जसन तुय मस्सा ने हुनचो जचई करलीस।” सत गोट ए आय कि परभु जीसु आपलो गांव नासरत ने सेवा-बुता करुक मुरियालो, जोन थानो लोग हुनके नी पतेयाला आउर हुनके बाहरे निकराउन दिला। मंडली घरे हुन, जसाया 61:1-2 पदमन चो गोट के पक्का ले सांगलो।
ए मोचो मीतमन, इआ आमी, ‘परभु जीसु के परखतोर’ चो बारे ने पढ़वां।
1 जिदलदांय जीसु जरदन नंदी ले बोहड़ुन ईलो, तेबे हुन पवितर आत्मा ले भरपुर रलो, आउर आत्मा हुनके रान ने नीलो, आउर सयतान पाप ने पाड़तो काजे दुय कोड़ी दिन ले जीसु के परखते रलो।
2 इतरो दिन ने हुन काईची नी खादलो आउर हुन दिनमन पुरा होली तेबे हुनके भूक लागली।
एता आमचो पुरे परभु जीसु किरिस्त चो जचई आय।
मत्ती, मरकुस आउर लूका लिखलो नंगत खबर ने ए जचई चो बारे ने लिखलोर आसे।
जूहन्ना ए गोट चो बारे ने नी लिखलोसे।
कसनबलले हुन, परभु जीसु चो महापरभु-गुन के खास धियान देउन परभु जीसु के, महापरभु चो बेटा चो रुप ने दखायसे।
तीनो नंगत खबरमन ने परभु जीसु चो मनुक रुप के जोर दिलासे ।
मनुक चो रुप ने हुनचो जचई होली।
लूका लिखलोर नंगत खबर ने हुनके मनुक चो बेटा चो रुप ने दखालोर आसे।
लूका 3:38 पद ने बलेसे, “आउर हुन इनोस चो, आउर हुन सेत चो, आउर हुन आदम चो, आउर हुन महापरभु चो रलो।”
ए मरियम चो पुरखा-पाटी आय, जोन जीसु किरिस्त चो थर के पाटकुती नेयसे।
एई थर चो आमी बले आंव।
मनुक चेई असन हुनचो बले जचई होली, जसन आमचो होउआय।
सपाय बरन ले हुनचो जचई होली, फेर बले हुन पाप नोहलोर रलो।
ए मोचो मीतमन, जीसु, अंधार चो सकतमन आउर सत्यानास ले छेकी होलोसे।
ए संवसार चो मुर झंझटमन ले छेकी होउ रलो आउर हुनके मनुक जात काजे जीतलो।
मय मानेंसे कि ए गोट के मय समजाउक नी सकें, मानतर तुमके हुनचो खुबे लगे नेउक सकें आउर आसा करेंसे कि सरासरी ने आमी खिंडिक बले सीखुक सकवां।
हुनचो भंवरक नी दखा देतो आउर लुकलो सकतमन रये।
हुन अंधार आउर सत्यानास करतो सकतमन ले बेड़ी होउ रये।
हुन माटी चो बनलो मनुक-जात काजे जुद करलो आउर हुन मनुक-जात काजे जीतलो।
ए मोचो मीतमन, हुन मोचो आउर तुमचो काजे जीतलो।
मुर चो खुबे गोटमन के आमके आमचो मन ने संगाउक पड़ेदे, जिदलदांय आमी जीसु चो जचई चो बारे ने दखुंसे, आमके सांगलोर आसे कि हुन पवितर आत्मा ले भरपुर रलो।
मनुक होलो किरता जचई बेरा महापरभु चो बेटा के पवितर आत्मा ले भरपुर होउक पड़ली।
ए मोचो मीतमन, मय आपलो सकत ले ए संवसार चो सकत के जीतुक नी सकें।
रोमी 7:21पद ने पउलुस आमके सांगेसे, “एईकाजे मय जानेसे कि मोचो ने ए नियम आसे:
जोन मोके नंगत बुता करुक भावले बले अडरा बुतामन के ची करायसे।” काय, तुमचो जीवना ने ए सत नोआय? रोमी 8:3-4 पदमन ने पउलुस बलेसे, “कसनबलले देहें चो लालच किरता नियम-कानुन निमल होउन, जोन बुता करुक नी सकली, हुनके पुरा करतो काजे महापरभु आपलेई बेटा के मनुक-रूप ने पापी असन पाप-जतरा होतो काजे संवसार ने पठालो। महापरभु, हुनचो देहें ने पाप चो डंड पावतो हुकुम दिलो। एईकाजे एदांय, नियम-कानुन चो नीती पुरा करतो काजे आमी देहें चो हिसाब ले नाई, मानतर आत्मा चो हिसाब ले चलुं।” एईकाजे पउलुस गलाती 5:16 पद ने बलेंसे, “तुमी पवितर आत्मा बाटले चलसास जाले, देहें चो लालच बुतामन के कसनी बरन ले बले पुरा नी करासे।”
ए मोचो मीतमन, आमचो काजे पवितर आत्मा लागुआय। व्यवस्थाविवरन 8:2 पद ने महापरभु इसराएलीमन के बललो, “सूरता कर कि तुचो महापरभु जहोवा तुके चालीस बरक ले रान भीतरे चो बाट ले एईकाजे आनलो कि तुके सोज बनाओ आउर तुचो जचई करुन जानो, तुचो मने काय आसे आउर तुय हुनचो हुकुममन के मानसे कि नाई?” दुसर बरन ले सांगलोने महापरभु इसराएलीमन के परखलो। महापरभु अडरा गोटमन ले कोकई नी परखे। आमके सांगलोर आसे कि जीसु के परखतो ले आगे हुन, पवितर आत्मा दखालो बाटले राने गेलो। दुसर बरन ले सांगलोने, परभु जीसु खुद के परख होतोर नी डगरालो। लूका 22:42 पद ने परभु जीसु किरिस्त गतसमनी ने पारथना करलो, “ए बुआ, तुय मन करसीस जाले ए दुख चो बटका मोचो ले गुचाव।”
ए मोचो मीतमन, परभु जीसु के परखतोर चालीस दिन चो पाछे नी होली। मानतर परभु जीसु के सयतान सरलगा चालीस दिन परखलो। लूका आमके सांगेसे कि परखलो पाछे हुनके भूक लागली। राने परखलो पाछे बले सयतान, परभु जीसु के परखुक नी छांडलो। गतसमनी पदर ने दुसर हार सयतान हुनके परखलो। ए अध्या चो 13 पद ने लूका आमके सांगेसे, “जिदलदांय सयतान परखुन सारलो, तेबे खिंडिक समया काजे हुनचो ले लापी गेलो।” खिंडिक आउर गोट बले आमके समजुक पड़ेदे कि सयतान गोटोक मनुक आय। मय समजेंसे, तीस ले नब्बे परतिसत सेवकमन हुनके मनुक नोआय बलसोत। मानतर धरमसास्तर सरसरा सांगेसे कि सयतान गोटोक मनुक आय। जिदलदांय हुन जीसु किरिस्त के परखलो काय, हुन देहें रुप ने ईलो? काय, हुन आत्मा चो रुप ने ईलो? नोहले काय, हुन उजर-दूत चो रुप ने ईलो? बाईबल आमके सांगेसे कि हुन, हुनचो संगे छमाछम गोटेयालो। आमके ए गोट के समजुक पड़ेदे कि सयतान चलाक आय। 1 पतरस 5:8 पद आउर 2 कुरिंथी 11:14 पद चो हिसाब ने, “हुन गोटोक समया ने नांदतो बीजापुलिया-बाग असन, कोके धरुन खायंदे बलुन डगरायसे आउर हुन, दुसर समया ने उजर-सरगदूत असन आय। मोहका मिरलोने हुन बाछलो लोग के बले भरमाउक सके।”
ए मोचो मीतमन, परभु जीसु के परखतो चो अरथ काय आय? परखतो सबद चो दुय अरथ आसे। पईल आय, ‘फुसियातोर आउर अडरा बुता करतो काजे उकसातोर’ आउर दुसर आय, ‘बाट भुलकातोर’। कोनी मनुक, कोकेई अडरा बुता करतो काजे बाट भुलकायसे जाले एचो अरथ आय, हुनचो मने असन काई अडरा गोट आसे, जोन हुनके आपने के सोपतो काजे उकसायसे। जिदलदांय ले कोनी मनुक के काई अडरा गोट आपनेके सोपतो काजे नी उकसाये तेबे हुन परखतोर नोआय। मानतर आमचो परभु जीसु काजे ए गोट सत नी रये। जूहन्ना 14:30 पद ने हुन बलुक सकलो, मय एदांय तुमचो संगे जुगेदांय ले नी गोटेयायें। कसनबलले ए संवसार चो मुखिया एयसे आउर मोचो उपरे हुनचो काई हक नीआय।
ए मोचो मीतमन, मय तुमचो बारे ने नी जानें। मानतर जिदलदांय बले हुन मोचो लगे एयसे हुनके पांय मंडातो काजे ठान मिरुआय। इबरानी 7:26 पद हिसाब ने आमचो परभु पवितर, कपट नोहलो, सुद-मन आउर पापीमन ले भिने रये। परभु जीसु चो जचई, हुनके अडरा करातो काजे नी रये।
परखतो सबद चो दुसर अरथ बले आसे। उबजास 22:1पद आमके सांगेसे, “महापरभु, अबराहम के परखलो…।” एता महापरभु अबराहम के परखलो पाछे, “महापरभु, इसराएलीमन के राने चालीस बरक ले परखलो।” एता ए गोट के समजुक पड़ेदे कि काय, जीसु किरिस्त जचई ने पड़ुक सके? काय, ए परखतोर नंगत रली? ए सोजे गोटोक परखतोर रली, जसन सपाय लोगमन के परखुआत। समजतो काजे, जसन टायर आउर मोटर-गाड़ी के परखुआत। हुनके बनाउ बीता टी बी ने आपलो नवा कार के दखाउ आय, आउर हुन कार के खोदरा-ढीपका बाट ने चलाउन दखाउआत कि हुन कार कितलो बरसक आसे। सपाय बानी के परखेसोत आउर काई बले तीज टुटु रलोने कार बनातो कंपनी काजे लाज चो गोट आय।
परभु जीसु किरिस्त फसुक नी सके, फेर काय हुन नंगत रली? हव नंगत रली आउर मोके गोटोक कहनी बाटले एके समजाउक दियास। मय बेर बुड़ती चो टेक्सास सहर चो लेका आंय। आमी बरजोस नंदी चो जोड़ान लगे रते रलु, नंदी ने डोबरी इतलो बले पानी नी रये। ए सुखु रये। मानतर सीतकार बेरा तुमी आपने बले पोंहरुक सकतास। गोटोक बरक पुर ईली आउर रेल जातो पुलिया के बोहाउन नीली। तुरते संताके रेल बाट ने बुता करतो लोग हुता ईला। जिदलदांय पुलिया बनाउन सारला तेबे हुनमन दुय ठन रेल चो इंजनमन आनला आउर दुनो के गोटोक सहर ले जोड़ला। आमचो नानी असन सहर ने दुय ठन इंजन गोटकी संगे सिटी बजातो के केबई नी सुनु रलु, एईकाजे सपाय लोगमन पुलिया लगे पराते ईला। आमी 27 झन रलु। लोग-कुड़ा ले गोटोक बरसक आदमी पूछलो, तुमीमन काय करसाहास? इंजीनियर हुनके बललो, “आमी पुलिया के परखुंसे।” जुवान आदमी पूछलो, “काय, तुमी बिचारसाहास ए पुलिया टुटेदे?” इंजीनियर हांसी-खेली करतो हिसाब ने बललो, “नी टुटे।” जुवान मनुक भक्याउन भाति पूछलो, “तुमी जानास कि ए पुलिया नी टुटे, फेर काय काजे इंजनमन के पुलिया ने आनलासाहास?” इंजीनियर बललो, “ए गोट के पक्का करतो काजे कि ए नी टुटेदे।”
ए मोचो मीतमन, परभु जीसु के परखतोर उसने बरन चो रली। हुन आमके इबरानी 7:25-26 पद हिसाब ने दखालो, “आमचो मुक्ति-देउ, पवितर, कपट नोहलोर, सुद मन आउर पापीमन ले भिने आय।” लोग हुनचो बाटले महापरभु लगे एयसोत। हुन, हुनमन के पुरा-पुरा मुक्ति देउक सके। परभु जीसु के असन बरन ले परखला, जसन बरन ले आमके केबई नी परखलासे। जिदलदांय आमके परखसोत तेबे आमचो सकत इतलो कटलाउक होयसे, आमचो कटलातो सकत ले आगर होली जाले, आमी मुरमुरा होउन हार मानुंसे। मानतर जीसु किरिस्त केबई मुरमुरा नी होलो आउर हार बले नी मानलो। हुनके तीन बरन ले परखला, देहें चो हिसाब ने, मन चो हिसाब ने आउर आत्मा चो हिसाब ने।
परभु जीसु के देहें चो हिसाब ने परखला
3 आउर सयतान हुनके बललो:
“तुय महापरभु चो बेटा आस जाले, ए पकना के रोटी होतो काजे हुकुम देस।”
सयतान, परभु जीसु के पाप करतो काजे नी बललो, जीव रतो काजे रोटी लागु ची आय।
गोटोक हार परभु जीसु पांच हजार लोगमन के खोआलो आउर दुसर हार चार हजार लोगमन के खोआलो।
हव्वा, अदन-पदर चो मंजी चो रुक के दखली कि हुता चो फर खातो काजे नंगत आसे आउर हुनके खादली।
1 जूहन्ना 2:16 पद ने, जूहन्ना एके देहें चो लालच नोहले देहें चो इछा बलेसे।
तुमी जानास लोग के जीवतोर चे आय आउर जीव रतो काजे खाउक चे पड़ुआय। आजी चो समया ने खुबे लोग चो असने बिचार आसे, आमी काय खाउंदे, काय पीउंदे आउर काय पींदुंदे? खुबे लोग काजे जीवना चो अरथ एई आय। लोग दुसट होदे, चोरदे, मंद बिकदे, देहें चो लालच के पुरा करतो काजे काई चे होओ करदे। बायलेमन गोटोक फटई काजे नोहले सोना-चांदी काजे आपलो इजीत के बिकदे।
सयतान, मनुक के आपलो निलज नंजर ने दखलो। जिदलदांय हुन अयूब 2:4 पद ने महापरभु ले बललो, “चामड़ी चो पलटा चामड़ी। मानतर जीव चो पलटा मनुक काईच होओ देउआय।” ए गोट सत नोआय, कसनबलले अयूब आपने के नी सोपलो। परभु जीसु, सयतान के हरातो काजे आत्मा चो खांडा के बावरलो जोन महापरभु चो बचन आय। लूका 4:5-8 पदमन के पढ़ा। जूहन्ना बलेसे, ए जचई चो नाता आंईक चो लालच ले रली।
हव्वा, अदन-पदर ने मंजी चो रुक के दखली आउर बिचारली कि हुन खुबे सुंदर आसे। सयतान, परभु जीसु के डोंगरी ने निलो, हुनके ए संवसार चो राजमन के दखालो आउर हुनके सपाय के देयंदे बललो। ‘संवसार चो राज’ ने बड़े रोम राज रये। मानतर परभु जीसु किरिस्त कुरुस बाटले राजगादी चो बाट ने जाते रये। सयतान बलते रये “कुरुस के छाड़ुन देस।” 1 कुरिंथी 1:18 पद ने पउलुस बलेसे, “कुरूस चो खबर, नास होतो लोगमन काजे फोकाहा गोट आय।” जिदलदांय सयतान राजगादी बाटे जातो काजे सरसरा बाट सांगते रये, तेबे दुख चो बाट ने जातोर कितलो भकवा गोट आय।
ए मोचो मीतमन, मोके काई बलुक दियास, जेचोले तुमके तकलीस होउक सके। परभु जीसु किरिस्त नोहलोर ए संवसार ने राज बनातोर आउर हुनके पावतो काजे होतोर फोकाहा आय। दुय ची झन राज करुमन आसोत - परभु जीसु किरिस्त आउर सयतान।
तुमी जीसु चो मान नी करास जाले तुमके सयतान के मानुक पड़ेदे। 1कुरिंथी 2:2 पद ने पउलुस बललोसे, “कसनबलले मय मन ने पक्का टेक धरुन रले कि तुमचो मंजिगता कुरूस ने चेगालो जीसु किरिस्त के छांडुन काई गोट के नी जानें।”
9 तेबे सयतान हुनके जरूसलेम ने नीलो आउर मंदिर चो सबु ले सिग ने उबा करलो, आउर बललो: “तुय महापरभु चो बेटा आस जाले, आपने के एथा ले खाले घसराव।
10 कसनबलले असन लिखलोर आसे:
‘महापरभु आपलो दूतमन के तुके बचातो काजे हुकुम देयदे’।
11 ‘आउर हुनमन तुके झोकदे
कि तुचो पांय ने पकनामन नी पाओ’।”
12 जीसु हुनके बललो:
“धरमसास्तर ने असन बले लिखलोर आसे:
‘तुय, परभु आपलो महापरभु के नी परखतोर आय’।”
13 जिदलदांय सयतान जमाय परखलो पाछे खिंडिक दिन काजे हुनचो लगे ले जाते गेलो।
हव्वा, अदन-पदर ने मंजीगता रलो रुक चो फर के लालच करली।
कसनबलले हुन कोकेई होओ बुद बीता बनाउक सकते रये।
जूहन्ना 2:16 पद ने, ‘जीवन चो गुमान’ के परखतो बारे ने बलेसे।
हुन आत्मा आउर बिसवास चो गोट बलेसे।
सयतान मन करते रये कि जीसु आपने के महापरभु चो बेटा आंय बलुन दखाओ।
एईकाजे हुन बललो, “दखाव, सिद कर, तेबे लोग तुके मानदे।”
ए बिसवास नी रये, ए अंताज रये - महापरभु के अंताजतोर रये।
बिसवास बलले, ओगाय रउन महापरभु चो बाट दखतोर आउर हुनचो मन-इछा ने चलतोर आय।
ए खुबे अचरित चो गोट आय, जेबे सयतान भजन गीत 91:11-12 पदमन ने धरमसास्तर चो बचनमन के अडरा बरन ले सांगलो। उसने ची जसन हुन अदन-पदर ने हव्वा के फुसियातो काजे एके अडरा बरन ले सांगलो।
ए मोचो मीतमन, जीसु किरिस्त के काय काजे परखलो? ए दखातो काजे कि मोचो आउर तुमचो काजे गोटोक दोख नोहलो मुक्ति-देउ आसे। पाप नोहलोर, दोख नोहलोर लोग के बचातो सकत हुनके आसे। हुन सिद करलोसे कि सपाय हक आउर सकत हुनकेई दिलोर आसे।
ए मोचो मीतमन, आजी सरग ने आमचो काजे गोटोक मनुक आसे, जोन आमके समजुआय आउर आमचो उपरे दया करुक सके। असन मुक्ति-देउ रतोर आमचो काजे हरिक चो गोट आय। 1 जूहन्ना 2:1-2 पदमन ने जूहन्ना लिखलोसे, “ए मोचो बेटा-बेटीमन, तुमी पाप नी करा बलुन मय ए गोटमन तुमके लिखेंसे। मानतर कोनी पाप ने पड़ेसे जाले, आमचो बुआ लगे गोटकी ची धरमी, जीसु किरिस्त आसे जोन आमके साहरा होउक सके। हुनी आमचो पापमन चो खंडान काजे जतरा होलो, सोजे आमचेई पापमन काजे नाई, मानतर संवसार चो सपाय चो पापमन काजे बले आय।” जीवना ने कसने चे बेरा बले जीसु उपरे भोरसा करुक सकुं।
ए मोचो मीतमन, आमी जीसु के परखतो बारे ने नंगत ले पढ़लु।
एदांय आमी ‘परभु जीसु गलील आउर नासरत ने बोहड़तोर आउर आपलेई सहर ने हुनके नी पतेयातो’ बारे ने पढ़वां।
सयतान परखलो पाछे परभु जीसु, पवितर आत्मा ले सकत पावलो।
14 जीसु, पवितर आत्मा चो सकत ले भरपुर होउन गलील ने बोहड़लो।
हुनचो गोट आली पाली चो जमाय राज ने जगुर-पगुर होली।
परखलो पाछे परभु जीसु, पवितर आत्मा ले भरपुर होलो।
कोनी बले मनुक के परखलेने हुन चमकट होउआय नोहले निमल होउआय।
ए बले पाईकमन के सिखातो थानो असन आय। जोनमन चमकट होदे नोहले निमल होदे। पाईकमन चो बारे ने ए गोट सत आय कि फंद आय मय नी जाने। मानतर ए गोट के जानें कि दुख आउर परखतोर तुमके नंगत बनायदे नोहले एरा बनायदे। तुमके सोज बनायदे नोहले कटुर बनायदे। गोटोक जुना गोट आसे जोन बलेसे बेर, मोम के उतायसे मानतर माटी चो कुंडरी के कड़ा करेसे।
ए मोचो मीतमन, महापरभु तुमके केबई कटुर नी करे। हुन फिरोन चो मन के कटुर नी करलो, फिरोन आगतले कटुर मन चो रये आउर महापरभु सोजे हुनके दखालो। आमचो परभु जीसु मनुकमन चो कटार बनलो। इबरानी 2:17 पद ने एके सिद करलोसे। “एईकाजे हुनके असन होतोर रली कि सपाय गोटमन ने आपलो भाईमन असन बनो कि हुन, महापरभु ले नाता संगातो सपाय गोटमन ले, गोटोक जीव दुखतो आउर पतेयातो लाईक बड़े पुजारी बनो। कसनबलले हुन लोगमन चो पापमन काजे जतरा चेगाय होउक सको।” परभु जीसु किरिस्त गोटोक मनुक बनलो। एईकाजे हुनके परखलो पाछे पवितर आत्मा चो सकत ले भरपुर होउक पड़ली।
आमचो परभु जीसु किरिस्त के परखलो पाछे पवितर आत्मा ले भरपुर होउक पड़ली जाले आमके कितलो आगर हुनचो जरुरत आसे।
ए मोचो मीतमन, आजी चो समया एताय सरेसे, परभु तुमी सपाय के बर देओ।