195
ए मोचो मीतमन, किरिस्त ने तुमके मोचो जुहार! परभु चो दया ले मय नंगत आंसे आउर आसा करेंसे कि तुमी बले नंगत आसास। आमचो काजे ए खुबे नंगत गोट आय कि आमी फेर ले जीवत महापरभु चो बचन के पढ़वां। मय मोचो गोट के सुनतो नवा लोगमन के सांगेसे कि आजी-काली आमी लूकालिखलोर नंगत खबर ले पढ़ुंसे। जोन नवा नियम चो तीसर किताप आउर बाईबल चो बयालिसवां किताप आय। आगे चो पाठमन ने आमी जीसु चो बेतलहम ने जनम, हुनचो परघाव, दूतमन बाटले हुनचो जनम चो बारे ने धोरईमन के सांगतोर, मंदिर ने सिमोन संगे घटलो गोट आउर मंदिर ने हन्ना संगे घटलो गोट के पढ़लु। आजी आमी एचो ले आगे चो पाठमन के पढ़वां आउर ए खास गोटमन चो बारे ने बिचार करवां: जीसु नासरत ने बोहड़ुन एतोर, जीसु बारा बरक चो होलो बेरा जूसुफ आउर मरियम संगे जरूसलेम जातोर आउर अध्या तीन ले, जूहन्ना बपतिस्मा देतो बीता चो सेवा-बुता आउर मरियम चो पुरखा-पाटी चो बारे ने दखवां।इआ, आमी हुनमन नासरत ने बोहड़तो बारे ने दखवां।
39 जिदलदांय जूसुफ आउर मरियम, महापरभु चो कानुन हिसाब ने जमाय के निबड़ाला, तेबे गलील राज ने आपलो सहर नासरत ने बोहड़ुन गेला।
40 आउर जीसु बाड़ते, आउर सकत आउर अकल ने भरपुर होते गेलो;
आउर महापरभु चो दया हुनचो उपरे रली।
बईद लूका, हुन लेका पिला जीसु के, सोजे जचकी सास्तर हिसाब ले चे नाई, मानतर पिलामन चो बईद चो नंजर ने बले दखेसे।
परभु देहें चो हिसाब ने आउर आत्मा चो हिसाब ने सकत पावते गेलो आउर बुद ने समपुरन होते गेलो। हुन पिला उपरे महापरभु चो दया रये। हुन देहें, आत्मा आउर बुद ने बाड़ते गेलो।
एदांय आमी दखवां, ‘जीसु बारा बरक चो होलो बेरा जूसुफ आउर मरियम संगे जरूसलेम जातोर’।
ए मोचो मीतमन, एदांय गोटोक गोट चो बारे ने लिखलोर आसे, जेके एकलाय बईद लूका ची सांगेसे। कसनबलले हुन पिलामन चो बईद आय आउर हुन आमचो परभु के पिला आउर मनुक चो रुप ने दखेसे। बईद लूका जीसु चो पिला बेरा चो गोटोक गोट के सांगेसे, जिदलदांय हुन बारा बरक चेई रलो। नंगत खबर ने हुनचो आगे चो समया चो बारे ने काई चे लिखलोर नीआय। एईकाजे खिंडिक लोग हुनचो जीवना चो ए समया के ‘चिमचाम समया’ बलुआत। मानतर मय हुनके चिमचाम समया नी माने, कसनबलले मय पतेयायंसे, ए बचन के जुना नियम चो समया ने लिखला, तुमी एके धियान ले दखले जानासे। जीसु बारा बरक चो रलो बेरा जोन गोट होउ रये हुनके लूका खुबे सरसरा आउर दुसर बरन ले सांगेसे।
41 हुनचो आया-बुआ हर बरक फसह तिहार काजे जरूसलेम ने जाते रला।
42 जिदलदांय जीसु बारा बरक चो होलो, तेबे हुनमन हर बरक असन तिहार चो नीती हिसाब ले जरूसलेम ने गेला।
43 तिहार चो दिनमन के पुरा करुन भाति, जिदलदांय हुनमन बोहड़ुक मुरियाला, तेबे लेका जीसु जरूसलेम ने ठेबुन रलो; मानतर हुनचो आया-बुआ एके नी जानला।
44 जीसु आपलो गांव चो लोगमन संगे आसे, असन बिचारुन हुनमन गोटोक दिन चो बाट पुरे जीतला, आउर हुनके आपलो कुटुम चो लोगमन आउर जान-चीन लोगमन ने डगराउक मुरियाला।
45 जिदलदांय हुनमन के हुन नी मिरलो, तेबे डगराते-डगराते हुनमन जरूसलेम ने फेर बोहड़ुन गेला।
आमी बचन ने पढ़ुंसे, मरियम आउर जूसुफ गोटोक सोज आउर तिरतिरा पिला के पोसते रओत।
ए मोचो मीतमन, हुन आपलो मयमा-उजर धरुन गुलाय बाटे नी बुलते रये।
जुग मंजी चो लोगमन ने परभु जीसु चो बारे ने, हुनचो पिला आउर जुवान बेरा चो अचरित बिचारमन रये।
मय ए गोट के नी पतेयायें कि हुन, हुनमन चो कोनी बिचार असन दखा दिलो होती। हुन तो गोटोक सोजे पिला रलो।
ए मोचो मीतमन, हुन दिनमन ने लोगमन कहांय होओ जाते रले गोहड़ा-गोहड़ा जाते रओत। जेबे जरूसलेम ले जातो समया अमरली, तेबे जोनमन के गलील जातोर रये, हुनमन सपाय बेर उदेया चो डेबरी बाट चो गोटोक नानी सहर ने रुंडला कि हुनमन, आपलाहान घरे जातो काजे बाट हिंडुक मुरियाओत। ए हुनी ठान रये जोन थाने हुनमन जीसु के छांडुन रला। जूसुफ, मरियम के असन बललो होती, जीसु कहां आसे? आउर मरियम बलली होती, मय बिचारते रले हुन तुचो संगे आसे। हुनमन हुनके आपलो जानतो लोग-बाग ने गुलाय डगराला। जिदलदांय हुनमन जानला कि हुन भुलकलोसे, तेबे हुनमन जरूसलेम ने बोहड़ुन ईला। हुनमन हुनके तीन दिन ले डगराला आउर तुमके काय लागेसे, हुनमन हुनके कहां भेटला? हुन, मंदिर ने रये।
46 तीन दिन पाछे हुनमन, जीसु के मंदिर ने भेटला, हुन हुता धरम-गुरुमन चो मंजिगता ने बसुन हुनमन चो सुनतो आउर पूछतो के दखला।
47 आउर जमाय, जोन जीसु चो गोट के सुनते रओत, हुनमन हुनचो अकल आउर हुनचो दिलो उत्तर ले भक्याउन गेला।
48 तेबे जीसु चो आया-बुआ हुनके दखुन भक्याला आउर हुनचो आया हुनके पूछली:
ए बेटा, तुय आमचो संगे असन काय काजे करलीस? दख, तुचो बुआ आउर मय हरेयान होउन तुके डगराते रलु।
49 जीसु हुनमन के बललो:
तुमी काय काजे मोके डगराते रलास? काय, तुमी नी जानासाहास कि मोके मोचो बुआ चो मंदिर ने रतोर निचट आय?
50 मानतर हुन बललो गोट चो भेद के हुनमन नी समजला।
ए मोचो मीतमन, जिदलदांय मरियम आउर जूसुफ हुनके मंदिर ने भेटला, हुदलदांय हुन, हुनी समया चो बड़े-बड़े गियानीमन चो मंजी रउन हुनमन चो गोट सुनते आउर पूछते रये।
हुन जोन गोट बले पूछते रये हुनमन हुनचो उत्तर देउक नी सकला आउर हुनचो उत्तर के सुनुन भक्याते रओत।
तुमी सूरता करा हुन बारा बरक चेई रये। ए मोचो मीतमन, मय बिचारेंसे ए गोट पक्का आय जूसुफ आउर मरियम हुनके खिंडिक रीस होउ रला।
जीसु बललो, “मोके मोचो बुआ चो बुता करतोर आय।” ए गोट के हुनमन नी समजतो के हुन भक्यालो। जूसुफ हुनचो बुआ होले हुनचो लगे एउन बलतो, “नंगत गोट आय, तुय एता काय करतो काजे होयसीस। तुय एता बड़ई बुता करले नंगत होती?” नाई, जूसुफ हुनचो बुआ नी रये, हुन आपलो सरग चो बुआ चो बुतामन चो बारे ने बलते रये। हुन समया ने मरियम हुनचो बुतामन चो बारे ने नी सहराली कि हुन कोन रये आउर हुनके काय बुता करतोर रये। मानतर हुन, ए सपाय गोट के आपलो मने संगाउ रये।
51 तेबे जीसु हुनमन संगे नासरत ने ईलो, आउर हुनमन चो गोट के मानते रलो; आउर जीसु चो आया ए जमाय गोटमन के आपलो मने धरुन रली।
52 आउर जीसु, महापरभु चो दया ने लंग-लंगा बाड़ते गेलो।
लोगमन हुनके मन करला आउर हुन महापरभु के हरिक करुन रलो।
जीसु आपलो आया-बुआ चो हक ने रलो, ए सत के जानतो ने गोटोक हांसतो लाईक गोट आसे।
एबे चो समया चो जुवानमन बिरुद करसोत आउर आपलेई गोट के मानोत बलसोत।
हुनमन बलसोत आमके हुनमन चो गोट के सुनतोर आय।
मय हुनमन चो गोट के सुनलेसे मानतर इदलदांय ले हुनमन के असन काई नंगत गोट बलतो के नी सुनलेसे।
सोजे उतलेई ची सुनलेसे जितरो हुनमन रेडियो आउर टीवी ने सांगसोत।
मय असन नी बिचारें कि कालेज पढ़तो कोनी पिला के बलतो काजे काई आसे।
हुनचो लगे खुबे बुद होले बले गियान नीआय। जोन गियान हुनके मिरलीसे हुन एबे खिंडिक असन आसे आउर हुनके परखतो काजे हुनचो लगे उआट नीआय। ए खुबे अचरित चो गोट आय कि जीसु किरिस्त आपलो आया-बुआ चो हुकुम के मानलो आउर हुन दिनमन ने जीसु, हुनमन चो हक ने रलो। ए धियान देतो लाईक गोट आय, लेका पिला जीसु, महापरभु चो बेटा रलोने बले आपलो आया-बुआ चो हुकुम मानलो आउर हुनमन चो हक ने रलो।
बईद लूका आमके हुन ‘चिमचाम समया’ चो बारे ने सांगेसे, जिदलदांय जीसु जुवान समो ने बाड़ते रये। हुन बुद ने बाड़लो (मन चो हिसाब ने), लंगलंगा बाड़लो (देंहें चो हिसाब ने), महापरभु चो दया ने बाड़लो (आत्मिक हिसाब ने), मनुकमन चो दया ने बाड़लो (समाज हिसाब ने)। सपाय बानी ने परभु जीसु किरिस्त समपुरन मनुक रुप ने बाड़ते रये।
ए मोचो मीतमन, एता 2 अध्या सरेसे, मानतर आमी अध्या 3 ले पढ़ते चे रवां। ए अध्या ने आमी ए गोटमन चो बारे ने पढ़वां:
जूहन्ना बपतिस्मा देउ बीता चो सेवा-बुता;
जीसु चो बपतिस्मा;
आउर मरियम चो पुरखा-पाटी।
ए मोचो मीतमन, आगे-जुगे चो गोट के पक्का जानतो लूका, जूहन्ना बपतिस्मा देतो बीता चो सेवा-बुता के, संवसार चो आगे-जुगे चो गोट संगे कटारुन लिखेसे। हुन, जूहन्ना सांगलो खिसियातो खबर के आउर जोर देउन सांगलो, जोन जीसु चो एतो चो बारे ने आय। ए मोचो मीतमन, मोसा चो नियम-कानुन हिसाब ने धोवतोर आउर पानी ने बुड़ुन निकरतोर सोजे गोटोक नीती रली। जूहन्ना लगे ईलो लोग के हुन बपतिस्मा दिलो, ए सोजे जीसु किरिस्त एतो चो बाट दखायसे। जीसु किरिस्त पवितर आत्मा ले बपतिस्मा देयदे, जेचोले सते मन बोहड़ादे। ए मोचो मीतमन, ए अध्या ने आमी मरियम चो पुरखा-पाटी चो बारे ने जानुंसे, जोन दुय सत गोटमन के सांगेसे। सबले आगे ए आमके आदम लगले पाटकुती नेयसे, जोन सपाय लोग चो बुआ आय। जीसु समपुरन मनुक रलो आउर मत्ती, जीसु के राजा चो रुप ने दखातो काजे अबराहम चो पुरखा-पाटी अमरतले पाटकुती गेलो। मानतर लूका, जीसु के मनुक रुप ने दखातो काजे आदम लग ले सांगलो आउर गोटोक पाटे मरियम, दाउद चो थर चो रली जोन सुलेमान ले नाई मानतर दाउद चो बेटा नातान ले आय। (1इतिहास 3:5)
इआ एदांय आमी, ‘जूहन्ना बपतिस्मा देउ बीता चो सेवा-बुता’ के दखवां। ए अध्या ने आमके गोटोक बड़े गोट चो बारे ने सांगलोर आसे।
1 बड़े राजा तिबिरियुस कयसर चो राज करतो पंदरा बरक होउन रये, हुदलदांय
पुन्तियुस पिलातुस जहूदिया परघन चो दखा-राखा करतो बीता रये
आउर हेरोद अंदिपास, गलील परघन ने राज करते रये
आउर हुनचो भाई फिलिपुस, इतूरया आउर तरखोनीतिस उपरे राज करते रये,
आउर लिसानियास, अबिलेने चो राज करतो बीता रये।
ए पद ने आमी छय लोग के दखुंसे, जेचोले आमके समया चो बारे ने जानुक होयसे। जिदलदांय जीसु किरिस्त चो जनम होली, हुदलदांय कयसर अगसतुस राजा रये। मानतर जिदलदांय जूहन्ना आपलो सेवा-बुता करुक मुरियालो, हुदलदांय तिबिरियुस कयसर राजा रये। संवसार चो आगे-जुगे चो गोट आमके ए सांगेसे कि तिबिरियुस बुद बीता रलो, मानतर दया नोहलोर चतुर आउर चलाक बीता रये। हुन गोटोक कटुर आउर कोनी धरम के नी मानतो बीता रये। हुन गुलाय संवसार उपरे राज करतो काजे होलो। एदांय आमी हुनचो हक ने रलो राजामन चो बारे ने दखवां।
2 हुदलदांय हन्नास आउर काइफा *बड़े पुजारीमन रला, हुनी समया ने महापरभु, रान ने जकरिया चो बेटा जूहन्ना के गोटेयालो।
हन्ना आउर कयफा बड़े पुजारीमन रओत।
हुता दुय झन बड़े पुजारी काय काजे रओत?
ए दुनो बड़े पुजारीमन रोम राज चो सकत चो चिना रला, जोन हुन दिनमन ने जरूसलेम चो धरम मुखियामन रओत।
हन्ना राजगादी चो पाटकुती चो सकत रये मानतर कयफा, रोम राज के पुरे संगालो।
ए मोचो मीतमन, नीती हिसाब ने दखलोने, जूहन्ना बले आपलो बुआ असन मंदिर ने सेवा करतो। हुन गोटोक धरम मुखिया बनुक सकतो, मानतर हुन एके नी मानुन गोटोक छीड़ा राने गेलो आउर आपलो पुजारी पन के छांडलो। हुन हुता चो अडरा नीती ले सेवा-बुता करुक मन नी करते रये। एईकाजे हुन अगमजानी बनलो। एता चो हिसाब ले जूहन्ना गोटोक पुजारी होतोर रली, मानतर हुन गोटोक अगमजानी बनलो। । जूहन्ना बपतिस्मा देतो बीता हुन बड़े-बड़े लोगमन ले गोटोक आय, जोन समया-समया ने एउआत। हुन एलिया चो बारे ने सूरता करालो, कसनबलले हुनमन चो कोनी-कोनी नीती-नियम गोटकी कटार रली। हुन, लोगमन के ए बले सूरता करालो कि जोन एतो बीता आय, हुन किरिस्त आय। जूहन्ना बपतिस्मा देउ बीता गोटोक अचरित मनुक रलो। लूका आमके हुनचो अचरित जनम चो बारे ने सांगलोसे, ए जिबराएल सरगदूत चो सांगलो बाटले होली। हुनचो पिला समया सरली आउर एदांय हुनचो जीवना ने सेवा-बुता चो मूर होयसे।
ए मोचो मीतमन, हुन गोटोक पुजारी, गोटोक अगमजानी आउर गोटोक सिखिया देउ बीता रलो। हुन पिला बेरा ले ची पुजारी रलो, कसनबलले हुन जकरिया चो बेटा रये। मानतर हुनके महापरभु अगमजानी होतो काजे बाछलो।
3 आउर जूहन्ना जरदन नंदी चो आली-पाली चो गुलाय परघनमन ने जाउन, पापमन चो खेमा काजे मन बोहड़ातो चो बपतिस्मा चो गोट सांगलो।
आमी दखुंसे कि जूहन्ना, ‘मन बोहड़ातो बपतिस्मा’ चो बारे ने सांगेसे आउर हुन, अगमजानीमन ले सरासरी अगमजानी आय।
सत गोट ए आय कि हुन जुना नियम समया चो मनुक आय, जोन जुना नियम ले निकरुन नवा नियम नियम ने अमरलोसे।
हुन अचरित, ढाड़ी बीता आउर उंट रुंआ चो फटई पींदलोसे।
हुन आपलो पिंदा-वाड़ा ले भिने दखा देयसे। हुनचो खातो तीज आउर हुनचो दखा देतोर बले भिने आय। हुनके बले उसने बेबार करदे जसन खुबे अगमजानीमन के करला बललोने, हुनके बले मोरते मारदे।
ए मोचो मीतमन, आजी चो समया ने अगमजानीमन चो गोट के कोनी नी मानोत। संवसार हुन मनुक के नी माने, जोन जीवना चो नीती-नियम चो बिरुद करेसे। तुमी मान पाउक मन करसाहास जाले जसन लोग होयसोत तुमी बले उसने होआ आउर सिखिया देतो लोगमन काजे एई गोट सत आय। महापरभु, अगमगोट बलतो मंडली उपरे दया करो, जोन संवसार चो हिसाब ने काईचे नोआय। मानतर मंडली, अगमगोट के खास बरन ले सांगतो ठान आय।
ए मोचो मीतमन, संवसार महापरभु चो राग के सुनाउक मन नी करे, जुगे करुन नियाव चो बारे ने। जूहन्ना चो सिखिया खुबे कटुर रये।
4 जसन जसाया अगमजानी चो किताप ने लिखलोर आसे:
“रान ने गोटोक हागदेतो बीता चो राग होयसे कि,
परभु चो बाट तियार करा,
आउर हुनचो सड़कमन के सलक बनाहा।
5 गोटोक-गोटोक खोदरा के पाटतोर होयदे,
आउर गोटोक-गोटोक डोंगरी आउर ढिपका के सम करतोर होयदे;
आउर कोकटी-बाकटी बाट के
सीधा आउर खोदरा-ढिपका बाट के सलक करतोर होयदे।
6 आउर जमाय जात चो लोगमन महापरभु चो मुक्ति के पावदे।”
7 खुबे लोगमन जूहन्ना ले बपतिस्मा धरतो काजे निकरुन ईला, मानतर जूहन्ना हुनमन के बललो:
“ए साप चो पिलामन, तुमके कोन सांगलो कि महापरभु चो एतो बिती रीस ले पराहा।
ए मोचो मीतमन, कोनी सिखाउ बीता आपलो एतवार दिन चो सिखिया ने “ए साप चो पिलामन” बलुन मूर करलोने हुन, कितलो दिन हुन मंडली ने रउक सकेदे? मोके लागेसे हुन, एतो एतवार के मंडली ने सिखिया देतो काजे नी रयदे। लोग तुरते हुनके खेददे आउर मय जूहन्ना चो बललो ए गोट के बलतो काजे सला नी देयंसे। मानतर मय पक्का असने बिचारेंसे कि ए गोट खुबे मंडलीमन चो बारे ने सत होयदे।
8 एईकाजे मन बोहड़ातो लाईक फर आना;
आउर आपलो मन ने असन बिचार नी करा कि आमचो पुरखा अबराहम आय (आमी डंड ले बाचुंदे), कसनबलले मय तुमके बलेंसे, महापरभु ए पकनामन ले अबराहम काजे पिलामन जनमाउक सके।
ए मोचो मीतमन, जूहन्ना दिलो सिखिया गोटोक पसतातो सिखिया रये। सत गोट ए आय कि ए सिखिया एबे आमी देतो सिखिया नोआय। बिसवास ने पसतातोर होयसे। 1थिसलुनी 1:9 पद ने पउलुस, थिसलुनीकिया मंडली चो बिसवासीमन के बललो, “मुरतमन के छाड़ुन महापरभु बाटे बोहड़ा कि जीवता आउर सत महापरभु चो सेवा करुक होओ।” ए मोचो मीतमन, तुमी काई तीज बाटले नी बोहड़लोर, महापरभु बाटे बोहड़ुक नी सकास। जेबे तुमी महापरभु बाटे बोहड़ेसाहास तेबे पाप ले मन बोहड़ायसाहास - हुनी पसतातोर आय। तुमी किरिस्त के आपलो मुक्ति-देउ मानलोने, संवसारी तीजमन ले बोहड़ेसाहास। तुमी महापरभु चो मया चो बारे ने सुनलासाहास होती। मानतर तुमके मने नी ईली आउर तुमी भक्यायसाहास कि असन काय काजे आय? ए मोचो मीतमन, तुमके हुनचो हागदेतो राग के सुनुक पड़ेदे, जोन छिड़ा राने हागदेयसे, “मन बोहड़ाहा आउर पसताहा।” पसतातोर, बिसवास चो गोटोक भाग आय। पसतातोर ए समया चो सिखिया नोआय, आमी महापरभु चो दया चो बारे ने सांगुसे। मानतर तुमी महापरभु चो दया के मानतो लोग आहास आउर हुनचो बाटे बोहड़लासाहास जाले, तुमके आपलो पापमन ले मन बोहड़ाउक पड़ेदे। तुमी आपलो पापमन ले नी बोहड़लासाहास जाले, सते तुमी महापरभु बाटे नी बोहड़लासाहास। ए मोचो मीतमन, मुक्ति पावतोने पसतातोर बले आसे, मानतर आजी महापरभु चो बचन आय, पठालो लोग चो बुता 16:31 पद “परभु जीसु किरिस्त उपरे बिसवास करले तुय मुक्ति पावसे।”
9 आउर एबे टंगिया, रूकमन चो बूंदे संगालोर आसे;
कसनबलले जोन रूक नंगत फर नी धरेसे, हुनके गोंदुन आईग ने पकाउन देयदे।”
जूहन्ना चो समया ने, जोन रुक फर नी धरते रये, हुनके फोकाहा आय बलुन काटते आउर डसाते रओत। जूहन्ना चो सिखिया कटुर रये। जूहन्ना, महापरभु बाटले छंडावा काजे मया चो खबर नी आनु रये। महापरभु हुनके उसन सिखिया देतो काजे नी बाछुन रये। हुनचो सिखिया, एतो समया चो नियाव काजे आय। आमके ए गोट के समजुक पड़ेदे कि ए महापरभु चो बचन चो गोटोक भाग आय, जोन आमचो समया काजे बले आय। महापरभु जितलो आगर इसराएल के मन करते रये, हुन उतलो फर धरतो लाईक नी रये। एईकाजे एदांय महापरभु हुनचो नियाव करतो काजे होयसे। ए मोचो मीतमन जूहन्ना, इसराएल के बलते रये, ‘हुनमन फर नी धरला जाले रूक चो बुंदे टंगेया संगालोर आसे’। आजी परभु जीसु किरिस्त एई गोट मंडली के बलेसे।
10 लोग-कुड़ा हुनके पूछला: “तेबे आमके काय करतोर आय?”
11 जूहन्ना हुनमन के बललो:
“जेचो लगे दुयठन कुड़ता आसे, गोटोक के हुनके देतोर आय, जेचो लगे नीआय। आउर जेचो लगे भात आसे, हुनके बाटा करतोर आय।”
जूहन्ना इसराएलीमन के सरसरा आउर समजतो लाईक गोट ने सांगते रये कि हुनमन आपलेई काजे जीवसोत आउर आपलो तीजमन के दुसर संगे नी बाटोत।
12 पट्टी उसील करतो बीतामन बले बपतिस्मा धरतो काजे एउन रओत, हुनमन हुनके पूछला: “ए गुरुजी, आमी काय करुआंव?”
13 जूहन्ना हुनमन के बललो:
“कानुन चो हिसाब ले आगर पट्टी उसील नी करा।”
आमी एता दखुंसे कि पटी धरतो लोग रओत, जोनमन लालच करुआत बलुन सपाय जानते रओत। तेबे बले हुनमन जूहन्ना लगे एउन पूछला: “आमी काय करुआंव?” हुनमन बले परभु बाटे मन बोहड़ाला।
14 भीड़ मंजिगता रोम राज चो पाईकमन रला, हुनमन बले जूहन्ना के पूछला:
“आमी काय करुआंव?”
हुन, हुनमन के बललो: “बेरपेला कोचई ले पयसा नी झीका आउर कोकई फंद बदी नी दिया। आपलो भूती ले हरिक राहा।”
अलग ठान ले आउर अलग समाज ले ईलो लोगमन के जूहन्ना ए सिखिया दिलो। ए मोचो मीतमन, तुमी बड़ई आहास जाले बड़ई बुता बाटले, तुमी किरिस्ती होतो गोट के दखाहासे। तुमी पाईक आहास जाले आपलो पाईक बुता बाटले दखाहासे, तुमी घर समालतो बायले आहास जाले आपलो घर समालतो बाटले तुमी किरिस्ती होतो गोट के दखाहासे। बलतो अरथ ए आय कि तुमी जोन आहास हुनकेई दखाहासे। मत्ती 7:20 ने लिखलोर आसे, “हुनचो फर ले तुमी हुनके चिताहासे।”
15 जोन लोगमन किरिस्त चो एतो बाट टाकते रला, हुनमन आपलाहान-आपलाहान मन ने जूहन्ना चो बारे ने बिचारुक मुरियाला कि हुन किरिस्त तो नोआय?
16 तेबे जूहन्ना हुन जमाय के बललो: मय तुमके पानी ले बपतिस्मा देयंसे, मानतर हुन एयसे, जोन मोचो ले खुबे बड़े आय। मय हुनचो पनई-डोरी के ढीलतो लाईक बले नोआंय। हुन तुमके पवितर आत्मा आउर आईग ले बपतिस्मा देयदे।
17 गउं के भूसा ले अलगातो सूप हुनचो हाथे आसे, आउर हुन आपलो कोठार के छुक-छुका करेदे;
आउर गउं के आपलो गदेया ने संगायदे।
मानतर भूसा के हुन, केबई नी लिबतो आईग ने पकाउन देयदे।
जूहन्ना सरसरा सांगेसे कि हुनचो सांगतो ए खबर सरासरी नोआय। हुन, एतो बीता काजे बाट तियार करेसे। मोचो मीतमन, जूहन्ना पानी ने बपतिस्मा दिलो। मानतर परभु जीसु किरिस्त अन्नीस सव बरक ले पवितर आत्मा ले बपतिस्मा देयसे। हुन दुसर हार ईलो जाले आईग ले बपतिस्मा देयदे। आईग, नियाव के दखायसे।
खिंडिक लोग बिचारुआत कि ए कटाव पेंतिकुस दिन चो आय, जेबे लोगमन रुंडा होलो थाने पवितर आत्मा ईली, तेबे हुनमन चो मुंड उपरे आईग असन दखा दिली।
ए मोचो मीतमन, एता ए गोट के धियान दियास कि पठालो लोग 2:3 पद ने लिखलीसे ‘आईग असन’ बललोने, हुन आईग नी रये। पवितर आत्मा चो एतोर, आईग ले बपतिस्मा चो अगमगोट पुरा होतोर नोआय। हुन गोट आमचो परभु चो दुसर हार एतोदांय होयदे।
19 मानतर जूहन्ना, राजा हेरोद अंदिपास के हुनचो भाई फिलिपुस चो बायले, हेरोदिया के राकलो काजे, आउर हुनचो करलो जमाय अडरा बुता काजे दागा दिलो।
20 एईकाजे हेरोद, जूहन्ना के जयल-घरे ढकालो, जोन हुनचो जमाय अडरा बुतामन ले जुगे अडरा रली।
ए मोचो मीतमन, जूहन्ना सपाय चो पुरे हेरोदेस के दागा दिलो, कसनबलले हुन आपलो भाई फिलिपुस चो बायले हेरोदिया के राकु रये।
एई गोट काजे हेरोदिया खुबे रीस होउ रये आउर जूहन्ना के जयल घरे ढाकतो काजे बलली। तेबे हेरोदेस, जूहन्ना के जयल घरे ढाकुन हुनचो मन-इछा के पुरा करलो।
एदांय आमी दखवां ‘जीसु चो बपतिस्मा’
21 जिदलदांय जमाय लोगमन बपतिस्मा धरला, आउर जीसु बले बपतिस्मा धरलो पाछे पारथना करते रये, तेबे बादरी उगाड़ी होली,
22 आउर पवितर आत्मा परेंया असन होउन हुनचो उपरे उतरलो, आउर सरग ले असन गोट होली:
“तुय मोचो लाडरा बेटा आस, मय तुचो ले खुबे हरिक आंसे।”
ए मोचो मीतमन, एता धियान दियास कि लूका, सपाय गोटमन के ओरी ने नी लिखेसे।
कसनबलले हुन असन करते रले जूहन्ना के धरतो ले आगे ची जीसु चो बपतिस्मा चो बारे ने लिखतो।
ए मोचो मीतमन, परभु जीसु चो बपतिस्मा बेरा (त्रियेक) महापरभु चो तीनो रूप दखा दिली।
पवितर आत्मा जीसु चो उपरे उतरली जोन महापरभु चो तीनो रूप ले गोटोक आय आउर सरग चो बुआ सरग ले गोटेयायसे।
इआ, आमी ‘मरियम चो पुरखा-पाटी’ चो बारे ने जानवां –
ए अध्या चो आदो भाग मरियम चो पुरखा-पाटी चो बारे ने सांगेसे, जूसुफ चो बारे ने नोआय। मत्ती लिखलोर नंगत खबर ने आमी जूसुफ चो पुरखा-पाटी के दखुंसे। मत्ती लिखलोर नंगत खबर, अबराहम ले मूर होउन दाउद आउर सुलेमान चो बाटले, परभु जीसु किरिस्त लगे अमरेसे आउर राजगादी चो हक जूसुफ ले मिरली। मानतर लूका लिखलोर नंगत खबर चो पुरखा-पाटी अलग बरन चो आय। ए मत्ती लिखलोर नंगत खबर चो उलटा ओरी ने लिखलोर आसे, लूका आगे दाउद लगे अमरुन पाछे आदम लगे अमरेसे। लूका मरियम चो कहनी के सांगेसे आउर ए पक्का हुनचेई पुरखा-पाटी आय। ए मोचो मीतमन, दाउद चो राज घरो चो लोउ, मरियम चो नस-नस ने बले बोहते रये आउर जीसु चो लोउ मरियम बाटले ईलीसे, जोन दाउद चो राजगादी चो हकदार बनलो।
ए पुरखा-पाटी चो बारे ने दुयठन गोटमन ने खुबे धियान देउक पड़ेदे।
पईल, बईद लूका ए गोट के पक्का करेसे कि जूसुफ, परभु जीसु किरिस्त चो बुआ नी रये।
23 जिदलदांय जीसु सेवा-बुता करुक मुरियालो, हुनचो उमर तीसेक बरक होउन रये, आउर (जसन लोगमन बिचारते रला) हुन
जूसुफ चो बेटा आय,
आउर जूसुफ, एली चो बेटा रये,
एता जसन बरन ले ‘बेटा’ सबद के लिखलासे, उसन दुसर थाने लिखलोर नीआय।
जूसुफ, हेली चो बेटा नी रये, मानतर ‘बेटा’ बुआ चो पुरखा-पाटी दखातो काजे जोड़ला, जोन घर चो मालिक आय हुनी बुआ होते रये।
दुसर बरन ले सांगलोने, पुरखा-पाटी के मनुकचेई नाव हिसाब ले लिखलोर आसे।
मत्ती लिखलोर नंगत खबर ने जूसुफ ले पुरखा-पाटी लिखलोर आसे आउर जाकूब ले जूसुफ जनमलो।
दुसर खास गोट ए आय जेके आमके धियान देउक पड़ेदे।
आमी पद 31 ने पढ़ुंसे, “आउर हुन मलेआ चो, आउर हुन मिन्ना चो, आउर हुन मतात चो, आउर हुन नातान चो आउर हुन दाउद चो।”
ए मोचो मीतमन, मत्ती, जीसु चो पुरखा-पाटी के दाउद चो बेटा सुलेमान ले डगरायसे, जोन राज घर चो पुरखा-पाटी आय। मानतर लूका, जीसु चो पुरखा-पाटी के दाउद चो बेटा नातान ले डगरायसे। मरियम चो नसमन ने बले दाउद थर चो लोउ रये। एईकाजे जीसु किरिस्त दाउद थर चो आय।
लूका, जीसु किरिस्त के ‘मनुक चो बेटा’ आउर ‘संवसार चो मुक्ति-देउ’ चो रुप ने दखायसे। हुनचो पुरखा अबराहम अमरतले चे नोआय, मानतर आदम अमरतले आय, जोन महापरभु चो ‘पईल बेटा’ आय, जेके महापरभु बनाउ रलो। मानतर हुन पाप करलोके डेंग ठान ले घसरलो। जीसु, सरासरी आदम आउर महापरभु चो बेटा आय। हुन, मनुकमन चो नाता महापरभु ले फेर ले चमकट करुकलाय ईलो, जेके आदम आगे भुलकाउ रये। ए मोचो मीतमन, परभु जीसु के पतेयातो बाटले ए नाता चमकट होउक सके।
ए मोचो मीतमन, आजी आमचो काजे मोहका आसे कि जीसु किरिस्त के पतेयातो बाटले टुटलो नाता के फेर जोड़ुं। एचोले आमी फेर हरिक होउक सकुं जसन गोटोक बेटा हरिक होउआय।
आमचो पढ़ई समया एताय सरेसे। मोके आसा आसे, एके पढ़तो बाटले तुमके खुबे बर मिरली। परभु, तुमी सपाय के साका होओ आउर आत्मिक जीवना ने बड़ाओ।