194
ए अध्या ने आमी:बेतलहेम चो कोटासार ने जीसु चो जनम;
जीसु के परघातोर: सरगदूतमन, धोरईमन के जीसु चो जनम-खबर सांगतोर;
जीसु के जुहार-भेट करतो काजे धोरईमन बेतलहेम जातोर;
मरियम चो छर-फर होतोर आउर जीसु चो खतना;
मंदिर ने सिमोन संगे घटलो गोट;
मंदिर ने अगमजानीन हन्ना संगे घटलो गोट;
नासरत ने बोहड़तोर;
जीसु बारा बरक चो होलो बेरा जूसुफ आउर मरियम संगे जरूसलेम जातोर।
बेतलहेम चो कोटासार ने जीसु चो जनम
1 हुनी दिनमन ने, (जूहन्ना जनमलो खिंडिक मयना पाछे) बड़े राजा ओगुस्तुस कयसर गोटोक हुकुम निकरालो कि जमाय संवसार चो लोगमन सरकारी कागत ने नाव लिखातोर आय।
2 ए पईल नाव लिखातोर हुदलदांय होली, जिदलदांय क्विरिनियुस, सीरिया चो राज करतो बीता रये।
पद 2 पढ़लोने असन बिचारुक सकोत, “गुलाय संवसार चो लोगमन चो नाव लिखुक होओ।”
रोमी सरकार संवसार चो सपाय देसमन ले पटी धरते रये।
जूनानी बोली ने मंजपुर के ओइकोमेने बलसोत जेचो अरथ ‘बसापत होलो मंजपुर’।
एई हुन दिनमन चो सपाय मंजपुर के दखायसे। हुन दिनमन ने जूरोप ने लोगमन पटी नी देते रला, फेर बले कयसर अगस्तुस चो समया ने रले, हुनमन के बले पटी देउक लागती।
कयसर अगस्तुस कोन रये? हुन जूलियस कयसर चो पोसवा बेटा रये। असली ने हुनचो नाव ओकटावियानुस रये आउर हुन कयसर नाव के मन करलो। हुनके कयसर नाव धरतो हक रये। एबे अगस्तुस गोटोक नाव नी रये मानतर पन रये। राज दरबार बाटले हुनके राजा, महाराजा आउर अधिनायक पन दिला। मानतर हुन हरिक नी होलो। एचो पलटा हुन अगस्तुस पन के मन करलो। हुन आपने के भगवान बनातो उआट ने रये।
बईद लूका, कयसर अगस्तुस चो नाव के उधापड़े नी लिखलो। ए राजा, मंजपुर चो सपाय देसमन चो लोग ले पटी धरतो काजे गोटोक नियम कागत ने दसकत करलो। हुनके आपलो जमाय राज के आपलो हक ने करतो काजे गोटोक सेना तियार करतो काजे आउर सुख-भोग जीवना जीवतो काजे खुबे पयसा चो जरूरत रली। सिरिया चो राजा कुरेनियुस चो समया ने पईल हार, नाव लिखातो बेरा पटी उसील करतो नियम बनाउ रये।
3 आउर जमाय लोगमन नाव लिखातो काजे आपलाहान सहर ने गेला।
4 तेबे जूसुफ बले गलील राज चो नासरत सहर ले जहूदिया परघन ने दाउद चो सहर बेतलहम ने गेलो, कसनबलले हुन दाउद चो कुटुम आउर बंस चो रये।
5 जूसुफ, आपलो माहला करलो कुंआरी लेकी मरियम संगे जोन पेटेहारिन रये, नाव लिखातो काजे गेलो।
6 हुनमन बेतलहम ने अमरतो बेरा मरियम चो नंगत होतो दिन पुरली,
7 आउर हुन आपलो पईलात बेटा के नंगत होली आउर हुनके फटई ने गुंडियाउन चारा-गोरला ने सोवाली, कसनबलले हुनमन के ठेबतो काजे कहांय ठान नी मिरली।
जूसुफ आउर मरियम, गलील चो नासरत सहर ले निकरुन जहूदिया परघन चो दाउद चो सहर बेतलहेम ने गेला।
जूसुफ आउर मरियम, दुनो के काय काजे हुता जाउक पड़ली?
कसनबलले हुन दुनो दाउद बंस चो रला।
जेबे मय ए गोट के पढ़ले आउर एता चो अचरित सत के जानले, तेबे मय खुबे हरिक होले।
कयसर अगस्तुस आपने के भगवान बनातो उआट करलो।
हुन मन करलो कि लोगमन हुनचो पुजा-पाठ करोत। हुन पटी धरतो नियम निकरालो किरता नासरत ने रतो गोटोक बायले-मनुक के नाव लिखातो काजे बेतलहेम जाउक पड़ली। हुन बायले पेटेहारिन रये जेचो पेटे महापरभु चो बेटा रये। ए गोटोक भक्यातो गोट आय कि कयसर अगस्तुस आपने के भगवान बनातो उआट करलो, मानतर आजी कोनी बले हुनचो इजितमान नी करोत आउर हुनके पटी बले नी देओत। मानतर मरियम चो पेटे रलो नानी पिला के आमी सपाय आराधना करुंसे आउर हुनके आपलो मुक्तिदेउ मानुंसे।
कयसर अगस्तुस, अगमगोट के पुरा करतो काजे महापरभु चो हाथ ने गोटोक ओजार रये। मीका 5:2 पद ने लिखलोर आसे, “ए बेतलहेम एपराता, तुय जहूदा चो हजारों ने गनती ने नानी होले बले, तुचोले मोचो काजे गोटोक निकरेदे, जोन इसराएलीमन ने राज करेदे आउर हुनचो एतोर गोट जुना बेरा ले बललोने, मूर बेरा ले होलीसे। ए गोटोक अचरित गोट आय।
जोन बले घटली सपाय महापरभु बाटले होली। कोनी बले कयसर के बोलतो जाले, तुय डंडिक ठेब, पेटेहारिन आउर छर-फर होतो बायलेमन के तुके पटी देतो किरता गुलाय बुलुक पड़ेसे। मय बिचारेंसे, हुन असन बलतो, “मय पिलामन आउर पिलाहारिनमन चो फिकिर नी करें, मोके सोजे पटी धरतोर, पयसा जुआतोर आउर सुख-भोग चो फिकिर आसे।” एदांय हुन सबु गोट आउर कयसर बले नीआय।
बईद लूका ए भाग ने मनुक-गुन चो बारे ने लिखलोसे। हुन बलेसे, मरियम आपलो नानी पिला के फटई ने गुंडियाली। ए कितरो अचरित गोट आय कि पिलामन चो फटई के महापरभु चो बेटा के पिंदाली, हुन समपुरन मनुक रये बललोने, महापरभु देहें रुप ने दखा दिलो।
जीसु के परघातोर: सरगदूतमन, धोरईमन के जीसु चो जनम-खबर सांगतोर
8 हुन परघन ने आदो धोरईमन रओत, जोनमन राती बेरा भाटा ने रउन आपलो-आपलो गोहड़ी चो राखा-पाहरा करते रओत।
खुबे लोग पूछुआत, “जीसु चो जनम केबे होली?”
ए खुबे सीत बेरा नी होली नोहले धोरईमन आपलो छेरी-मेंडीमन संगे भाटा ने नी रता। जीसु चो जनम चो तारिक जानतोर जरूरत नीआय, जसन हुनचो कुरुस ने चेगालोर दिन बले जानतोर जरूरत नीआय। हुनचो जनम केबे होली बलुन पवितर सास्तर नी सांगे। मानतर खास गोट एई आय कि हुन जनम धरलो। पवितर सास्तर ए बले नी सांगे, हुनके केबे कुरुस ने चेगाला, मानतर खास गोट एई आय कि हुन आमचो पाप काजे मोरलो।
9 आउर परभु चो गोटोक सरगदूत हुनमन चो लगे दखा दिलो, आउर परभु चो मयमा चो उजर हुनमन चो चारो कुती बरली, आउर हुनमन खुबे डरला।
10 तेबे सरगदूत हुनमन के बललो: “नी डरा, कसनबलले मय तुमके खुबे हरिक चो नंगत खबर सुनायंसे, जोन जमाय लोगमन काजे आय,
11 आजी दाउद चो सहर बेतलहम ने तुमचो काजे गोटोक मुक्ति देतो बीता जनमलोसे, आउर हुनी किरिस्त परभु आय,
ए गोटोक अचरित गोट आय कि गोटोक नानी पिला ए संवसार ने ईलो आउर हुनचो काजे तुमचो मन ने नंगत बिचार उबजेसे।
तुमचो मन ने हुनचो काजे दया-मया होयसे।
असनेची महापरभु ए संवसार ने ईलो।
जसन हुन खुबे सकत आउर मयमा ने दुसर हार एयदे उसने हुन पईल हार बले एउक सकतो।
मानतर एचो पलटा हुन सबुले नानी बनुन गोटोक पिला चो रूप ने ईलो।
जोरज मकडोनालड एचो बारे ने असन लिखेसे:
हुनमन सपाय गोटोक राजा चो बाट दखते रला,
जोन हुनमन चो बयरीमन के नास करुन हुनमन के बड़े पन देतो काजे एयदे,
मानतर तुय गोटोक नानी पिला चो रूप ने ईलीस,
आउर ए गोट ने गोटोक बायले के गगालीस।
असन बरन ले मुक्तिदेउ ए संवसार ने ईलो। हुन आपलो महापरभु-गुन के नी छांडलो, मानतर आपलो मयमा के छांडलो। हुनके जुहार-भेट करतो काजे खिंडिक धोरईमन आउर सरगदूतमन ची रला। मानतर सपाय संवसार हुनचो जनम बेरा हुता रतोर रये। पटी उसील करतो पलटा कयसर के हुनचो आराधना करतो काजे बेतलहेम ने रतोर रये। जीसु किरिस्त बेरपेला हुनके ए सपाय कराउक सकते रये, मानतर हुन असन नी करलो। हुन आपलो महापरभु-गुन के नी छांडलो मानतर आपलो मयमा के छांडुन गोटोक नानी पिला होउन ईलो।
12 आउर तुमी हुनके असन चिताहासे कि तुमी गोटोक लेका पिला के फटई ने गुंडियालोर आउर चारा-गोरला ने सोवालोर भेटासे।”
बईद लूका, जीसु चो मनुक-गुन चो बारे ने फेर बलेसे, हुन ए संवसार ने मनुक रूप ने ईलो आउर आमचो निमल मनुक-गुन के जानलो।
महापरभु, मनुकमन चो बारे ने जानेसे। हुन तुमके आउर मोके जानेसे। हुन आमके जानेसे, कसनबलले हुन ए संवसार ने मनुक बनुन ईलो। एचो अरथ एई आय, आमी महापरभु चो बारे ने बले जानुक सकुं कि हुन आमचो निमल मनुक-गुन के जानलो।
13 तेबे उधापड़े हुन सरगदूत चो संगे सरगदूतमन चो गोहड़ायेक दखा-देउन महापरभु चो जय-जय करुन बलला:
14 “सरग ने महापरभु चो मयमा,
आउर मंजपुर ने, जोन मनुकमन ले हुन हरिक आसे, हुनमन के अस्तिर मिरो।”
सरगदूतमन असन नी बलला, ‘मंजपुर ने मनुकमन के अस्तिर मिरो’।
हुनमन असन बलला, “जोनमन ले महापरभु हरिक आसे, हुनमन के अस्तिर मिरो।”
सरगदूतमन फोकाहा गोट नी बलला, जसन एदांय खुबे लोग बलसोत, इआ,आमी अस्तिर बनावां।
ए मोचो मीतमन, “दुसटमन काजे काई अस्तिर नीआय” जहोवा चो एई बचन आय। (जसाया 48:22) आमी असन समया ने जीउंसे, आमके नांगर फार के खांडा बनातोर आय। खांडा के नांगर फार नाई! कसनबलले आमी दुसट संवसार ने जीउंसे। आमी सयतान राज करतो संवसार ने जीउंसे। एईकाजे एता काई अस्तिर नीआय। तेबले बले जोन मनुकमन ले महापरभु हरिक आसे हुनमन अस्तिर ने आसोत। तुमी हुनमन ले गोटोक आहास, जोन किरिस्त लगे ईलासाहास आउर हुनके आपलो मुक्तिदेउ मानलासाहास। तेबे तुमी महापरभु चो ए अस्तिर के जानुक सकास। रोमी 5:1 पद ने लिखलोर आसे, “एदांय परभु जीसु किरिस्त के सत पतेयातो बाटले महापरभु आमके धारनिक मानलोसे आउर आमी महापरभु संगे मिलुन-मिसुन अस्तिर ने आंसु।” जिदलदांय जीसु पईल हार ईलो, असन बरन चो अस्तिर के आनलो। हुनचो दुसर हार एतोदांय हुन अस्तिर चो राजकुमार होउन एयदे। हुदलीदांय संवसार ने बिगरलो ओधरम आउर बईर के हुन नास करेदे। हुन ए मंजपुर ने अस्तिर बनायदे। मानतर हुन एओतले ए मंजपुर ने काई अस्तिर नी होयदे।
जीसु के जुहार-भेट करतो काजे धोरईमन बेतलहेम जातोर
15 जिदलदांय सरगदूतमन हुनमन लगे ले सरग ने गेला, तेबे धोरईमन आपलाहान गोटेयाला, जो, आमी बेतलहम ने जाउन ए घटलो बिती गोट जेके परभु चो सरगदूत आमके सांगलोसे, दखवां।
16 आउर हुनमन तूरते डगराते जाउन मरियम आउर जूसुफ के, आउर चारा-गोरला ने सोवालोर लेका-पिला के भेटला।
धोरईमन तुरते बेतलहेम गेला। हुता हुनमन मरियम, जूसुफ आउर लेका पिला जीसु के दखला। मोचो अंताज ने पिला के दखुक जातो लोगमन ले हुनमन पईल रला। कसनबलले मत्ती सांगेसे, तारा-गनतियारमन खुबे पाछे हुनके दखुक गेला। सत गोट ए आय कि परभु जीसु घरे रतो बेरा हुनमन हुनके भेटला। हुदलदांय खुबे मयना होउ रये असन लागेसे।
17 जिदलदांय धोरईमन हुनमन के दखला तेबे हुन लेका-पिला काजे सरगदूत हुनमन के सांगलो गोट के मरियम आउर जूसुफ के सांगला,
18 आउर जमाय सुनतो लोगमन धोरईमन चो गोट के सुनुन भक्याउन गेला।
19 मानतर मरियम ए जमाय गोट के आपलो मने संगाउन बिचार करते रली।
20 आउर धोरईमन, जसन हुनमन के सरगदूत सांगुन रलो, उसनेची जमाय के सुनुन आउर दखुन महापरभु चो मयमा आउर जय-जय करुन बोहड़ला।
ए मीतमन, जसन गोटोक आया करुआय उसने मरियम सपाय गोट के आपलो मने संगाउन बिचारते रये।
जीसु चो जीव चो डर काजे मरियम आउर जूसुफ, लेका पिला के धरुन खिंडिक समया काजे मिसर देस ने गेला आउर पाछे नासरत ने बोहड़ला।
हुन मनुक चो थर ने एउ रलो आउर मोसा चो नियम-कानुन चो हक ने जनमुन रलो। एईकाजे हुन नियम-कानुन के मानलो।
मरियम छर-फर होतोर आउर जीसु चो खतना
21 आठ दिन पुरलो पाछे, बाबू चो खतना करतो बेरा अमरली, तेबे हुनचो नाव जीसु संगाला, जेके सरगदूत, मरियम पेटे ठेबतो ले आगे बलुन रये।
22 अगमजानी मोसा बाटले दिलोर नियम-कानुन हिसाब ले, हुनमन चो सुद होतो चो दिन पुरली, तेबे हुनमन जीसु के महापरभु पुरे सोपतो काजे जरूसलेम ने नीला।
मोसा चो नियम-कानुन हिसाब ने छर-फर होलो पाछे बायले के चालीस दिन होओतले असुद मानते रओत। मरियम के गोटोक पापी चो रुप ने परभु काजे भेट आनतोर रली। जसन कि हुन बलली, हुनके मुक्ति देउ लागुआय।
23 (जसन महापरभु चो कानुन ने लिखलोर आसे कि जमाय पईलात लेका पिला महापरभु काजे पवितर आसोत।)
24 आउर महापरभु चो कानुनमन चो हिसाब ने गोटोक जोड़ी पंडकी, नोहले परेंया चो दुयठन पिलामन के आनुन जतरा करतोर आय।
मरियम आउर जूसुफ जतरा काजे गोटोक परेंया जोड़ा के चेगाला, जेचोले जानुक होयसे हुनमन गरीब रला। जतरा चेगातोर मरियम काजे रली, लेका-पिला काजे नोआय। आमचो जानतो हिसाब ने जीसु केबई बले जतरा नी चेगालो।
मंदिर ने सिमोन संगे घटलो गोट
25 आउर दख, जरूसलेम ने सिमोन नाव चो गोटोक मनुक रये, आउर हुन मनुक धरमकारी आउर भगत रये; आउर इसराएल देस ने अस्तिर चो बाट दखते रये, आउर पवितर आत्मा हुनचो उपरे रये।
26 आउर पवितर आत्मा हुनके बलुन रये कि जिदलदांय ले तुय महापरभु चो किरिस्त के नी दखसे हुदलदांय ले नी मोरसे।
27 आउर पवितर आत्मा हुनके मंदिर ने नीलो, आउर जिदलदांय जीसु चो आया-बुआमन, नियम-कानुन चो नीती असन करतो काजे हुनके मंदिर ने आनला,
28 तेबे सिमोन, जीसु के पावलो, आउर महापरभु के जय-जय करुन बललो:
सिमोन नाव चो गोटोक मनुक रलो।
जिदलदांय मोसा चो नियम-कानुन हिसाब ने परभु जीसु के मंदिर ने आनु रओत, सिमोन हुदलदांय पवितर आत्मा बाटले मंदिर ने रये। महापरभु सिमोन ले बायदा करु रये कि हुन महापरभु चो मुक्ति के दखेदे। हुन काय दखलो? हुन गोटोक नानी असन लेका पिला के दखलो। मुक्ति गोटोक मनुक आय, ए तुमचो करतो काई तीज नोआय। मुक्ति गोटोक मनुक आय आउर हुन मनुक परभु जीसु किरिस्त आय। हुन तुमचो लगे आसे नोहले तुमचो लगे नीआय। तुमी हुनचो उपरे भोरसा करसाहास नोहले हुनचो उपरे भोरसा नी करसाहास। काय, आजी तुमचो लगे किरिस्त आसे?
एता आउर गोटोक एकलाय गावलो गीत आसे, जेके सिमोन आमचो काजे गायसे।
29 “ए मालिक, एबे तुय, मय तुचो कमेया के, तुचो गोट असन अस्तिर ने जाउक (मोरुक) देस,
30 कसनबलले मय मोचो आंईक ले हुन मुक्ति देउ के दखलेसे,
31 जेके तुय जमाय राजमन चो लोगमन पुरे तियार करलिसीस,
32 कसनबलले हुन बिजातीमन काजे सत उजर,
आउर हुन तुचो निज लोग इसराएल काजे मयमा होओ।”
गोटोक असन मनुक ए अचरित गोट बललो, जोन जीवना काजे आपलेई काजे बिचारते रये आउर हुन गोटोक परघन चो कोंटी ने रये। फेर बले हुन संवसार चो मुक्ति देउ के दखलो। महापरभु चो बचन ले जुगे करुन नवा नियम मोचो काजे खुबे अचरित चो गोट आय। ए खिंडिक असन लोग के दिलोर आसे, फेर बले ए गोट पक्का आय कि ए संवसार चो सपाय लोग के बाट दखायसे। कोनी दुसर धरम हुन बाट के नी दखाला, तुमी दखासे संवसार चो कोनी धरम, खिंडिक असन लोग काजे, गोटोक जात काजे, नोहले कोनी देस काजे ची रयसे। मानतर किरिस्ती धरम मुर ले सपाय संवसार काजे आउर सपाय लोग काजे आय।
33 आउर जीसु चो आया-बुआमन ए गोटमन के सुनुन भक्याउन गेला, जोन जीसु काजे सिमोन बलते रये।
34 तेबे सिमोन हुनमन के बर देउन हुनचो आया मरियम के बललो: “दख, हुन, इसराएल ने खुबे लोगमन चो नास होतो, आउर खुबे लोगमन चो हरिक होतो काजे ठेबालोर आसे; आउर गोटोक असन चीना होयदे जेचो बिरुद ने लोगमन गोटेयादे,
35 कसनबलले हुन खुबे लोगमन चो लुकाउन संगालोर बिचार के पुरे आनेदे, मानतर तुचो काजे, तुके असन दुख एयदे जसन तुचो कारजा-बोवरा के गोटोक खांडा ले छिंगड़ाउन दिलो”।
धियान दियास कि लूका हुनमन के, जूसुफ आउर हुनचो आया बलुन सांगेसे, हुनचो आया आउर बुआ नी बले॥
मुक्ति देउ के ए संवसार ने आनतो काजे मरियम के खुबे बड़े मोल देउक पड़ली आउर हुनके जीसु किरिस्त चो कुरुस खाले उबुन हुनचो मोरना के दखतो खुबे मोल बले देउक पड़ली।
किरिस्त चो कुरुस खुबे लोगमन के असर करली।
लोगमन छापा बनाला, गीतकुरियामन गीत लिखला, लिखुबीतामन आउर बचन सांगु बीतामन हुन समया चो गोटमन के लिखलासे।
हुनचो मोरना काजे जीव दुखतो बिचार फोकाहा आय। किरिस्त मन नी करे कि कोनी हुनके जीव दुखोत, मानतर हुन तुमचो बिसवास के मन करेसे। पाछे लूका चो नंगत खबर ने परभु जीसु, कुरुस चो बाट ने रलो बेरा खिंडिक बायलेमन गागा-बोगा होते रओत। जीसु हुनमन बाटे उलटुन बललो, “जरूसलेम चो बेटीमन, मोचो काजे नी गागा, मानतर आपलो काजे आउर आपलो पिला-झिलामन काजे गागा।” (लूका 23:28)
तुमचो लगे जीसु किरिस्त काजे आंसू आसे जाले हुनके आपलो घर-लोग काजे बचाउन संगाउन राहा। हुनचो काजे नी गागा। कसनबलले हुनके तुमचो जीव दुखतोर नी लागे। जीसु किरिस्त तुमचो बिसवास के मन करेसे।
फेर बले जिदलदांय मरियम कुरुस खाले उबु रये आउर जीसु चो मोरतो के मुरमुरा मन ले दखते रये। हुनचो तकलीस ले तुमचो मुक्ति चो काई नाता नीआय आउर हुनचो तकलीस ले बले हुनचो मुक्ति चो काई नाता नीआय। हुन माने जात आय गुने हुनके तकलीस होली। हुन जीसु चो संवसारी आया रये आउर हुनके हुनी ची ए संवसार ने आनली। जीसु के पाला-पोसा करुन बड़ाली। हुन हुनचो बेटा रलो। तुमी दखा, जेबे आमचो परभु कुरुस ले खाले दखलो आउर बललो, “ए बाई, ए तुचो बेटा आय।” (जूहन्ना 19:26) ए तो गोटोक मनुकमन चो नाता आय, जसन कोनी आउर संगे नी रये। हुन जीसु चो आया होलो किरता खुबे तकलीस पावते रये आउर हुदलीदांय सिमोन चो अगमगोट पुरा होली, खांडा हुनचो आत्मा के छिंगड़ली।
मंदिर ने अगमजानीन हन्ना संगे घटलो गोट
ए नंगत खबर ने एकलाय गावलो खुबे गीतमन आसे। एदांय गोटोक गीत के दखवां।
36 हुता हन्ना नाव चो गोटोक अगमजानिन रली, जोन खुबे डोकरी रये आउर हुनचो बुआ फनूएल, आसेर बंस चो रये। हुन बिया होलो पाछे सात बरक आपलो मनुक संगे रली।
37 हुन चार कोड़ी चार बरक ले रांडी रये; आउर रोजे मंदिर ने एउन रात-मंजन उपास आउर पारथना करुन महापरभु चो सेवा करते रये।
38 आउर हुन, हुदलदांय मंदिर एउन महापरभु चो जय-जय करुक मुरियाली।
हुन जमाय लोगमन के जीसु चो गोट सांगुक मुरियाली जोन जरूसलेम चो छंडाव चो बाट दखते रओत।
सिमोन असन हन्ना चो बले महापरभु संगे खुबे नंगत नाता रये;
महापरभु हुनके बले आपलो बेटा के आउर किरिस्त के चितातो काजे दया करु रये।
हुन बले महापरभु के धन-धन करली।
ए गोटोक धन-धन गीत आय।
मय ए गोट के बलतो काजे नी ठेबें कि असन बले बलतो लोग आसोत, इसराएल चो हाजलो दस बंस आत।
(दस बंस हुनमन आत जोन असूर चो हक ने ई. पू. आंठवा सताब्दी ने रला आउर इसराएल देस ने नी बोहड़ुन बेर उदेया चो डेबरी बाटे गेला।) तुमी बाईबल चो सपाय समया चो बारे ने डगराले जानासे कि इसराएल कमेया बुता चो पाछे आपलो देस बोहड़लो। एता तुमी सपाय बंसमन के दखुक सकास। हन्ना, असेर बंस चो रली।
मत्ती लिखलो नंगत खबर आमके सांगेसे, जीसु चो जीवना ने एदांय होतो गोट, मिसर बाटे जातोर रये। लूका ए भाग के पुरा छाड़ुन दिलोसे। एके फेर ले सूरता करतोर नंगत आय। कसनबलले सपाय नंगत खबर के अलग-अलग बिचार ने लिखलासे। मत्ती, परभु जीसु के राजा चो रुप ने दखायसे। लूका, हुनके समपुरन नोहले सिद मनुक चो रुप ने दखायसे। लूका चो लिखलो गोट ने तारा गनतियारमन चो एतोर सिद नी होयसे। तारा गनतियारमन राजा के दखुकलाय एउ रओत। जूनानीमन चो बाट दखाउ के दखुकलाय नोआय। लूका, जीसु के सिद मनुक चो रुप ने दखायसे आउर धियान दियास कि लूका कसन बरन ले आपलो ए गोट ए लगले अमरालोसे।
ए मोचो मीतमन, आमचो पढ़तो समया एताय सरेसे। मय आसा करेंसे कि तुमके आजी चो पढ़ई ले पक्का आत्मिक नफा होली। आजी चो पढ़ई ले परभु तुमके खुबे आत्मिक गियान आउर बर देओ आउर बचन चो संगत ने बड़ाओ।
परभु तुमचो संगे रओ।