193
ए मोचो मीतमन, परभु जीसु चो पवितर आउर सकत नाव ले तुमके मोचो जुहार! तुमचो पारथना ले मय नंगत आंसे आउर आसा करेंसे कि तुमी बले नंगत आसास।ए मीतमन, आजी चो बाईबल पढ़ई ने मय तुमके सुवागत करेंसे। मय आपलो नवा मीतमन के सांगेसे कि आजी-काली आमी लूका लिखलो नंगत-खबर ले पढ़ुंसे।
आगे चो पाठमन ने आमी पढ़लु, नंगत-खबर काय काजे लिखला, जिबराएल सरगदूत, जकरिया के दखा देउन जूहन्ना चो जनम चो बारे ने सांगतोर आउर जिबराएल सरगदूत मरियम के दखा देउन जीसु चो कुंआरी ले जनमतो खबर सांगतोर।
आजी आमी पाछे चो पाठमन के पढ़वां आउर जानवां –
मरियम, इलीसिबा ले भेट-घाट होतोर; जूहन्ना चो जनम आउर अध्या 2 चो मूर चो गोट के जानवां।
36 आउर दख, तुचो कुटुम चो इलीसिबा के बले डोकरी बेरा बेटा होतोर आसे, जेके बांझीन बलते रओत, एबे हुन छय मयना ले पेटे ठेबलीसे।
37 कसनबलले महापरभु ले सपाय बानी होउक सके।”
ए मोचो मीतमन, बपतिस्मा देतो बीता जूहन्ना जनमतोर बले गोटोक अचरित गोट रये। मानतर हुनचो जनम कुआंरी ले नी होउ रये। सरगदूत बलते रये, असन काई तीज़ नी आय जोन महापरभु करुक नी सके। ए खुबे नंगत गोट आय आउर आमके आजी-काली ए गोट ने चमकट रतोर आय। मय ए गोट के आउर नंगत ले बलुक मन करेंसे कि कोनी-कोनी ए गोट के उलटा-पुलटा करुन हुनचो अरथ के सत्यानास करसोत। जेबे महापरभु काई बले करतो बिचार करलो, तेबे हुनके करेदे ची। मानतर आमचो बललो काजे महापरभु नी करे। खुबे लोगमन ए पद के आपलो लालच नोहले मन-इछा असन बावरुआत। महापरभु काईची होओ करुक सके। जेबे कोनी बलेसे, ‘महापरभु ले सपाय बानी होउक सके’ आउर महापरभु हुनके करतो काजे देउ रलो बुता के करुक नी सकलोने, नी पतेयातो लोग एचई किरता महापरभु के बदी देयसोत। महापरभु काई बले बिचार करलोने हुन हुनके करेसे ची। कसनबलले असन काई ची नीआय जेके महापरभु करुक नी सके। मानतर एचो अरथ ए नोआय कि हुनके पतेयातो लोग काई ची बले मन करलोने हुन हुनके करेदे। कसनबलले काई-काई गोटमन हुनचो उआट हिसाब ले नोआय। इआ, आमी सपाय गोट के नंगत ले समजुं आउर जीसु आमके साका होलो पलटा हुनके बदी होउक नी देउं।
38 मरियम बलली:
“दख, मय परभु चो कमेयीन आंय, मोचो संगे तुचो सांगलो गोट असन होओ।”
तेबे सरगदूत हुनचो लगे ले जाते गेलो।
ए पद ने मरियम आपनेके महापरभु चो मन-इछा असन होउक देयसे। हुन, सरगदूत के बलली, “तुचो गोट असने ची मोचो संगे होओ।” हुदलीदांय हुनचो उपरे गोटोक बादरी ढाकली आउर मय बिचारेंसे, हुन बादरी जीसु किरिस्त चो मोरलोमन ले जीव उठत ले हुनचो उपरे रली। जीसु किरिस्त चो जीव उठतोर हुनचो कुंआरी ले जनम होतो गोट के सिद करेसे। ए मोचो मीतमन, तुमी कुंआरी ले जनम होलो गोट के नी मानुन मोरलो थान ले जीव उठलो गोट के पतेयाउक नी सकास। नोहले कुंआरी ले जनमलो गोट के पतेयाउन मोरलो थान ले जीव उठलो गोट के नाई बलुक नी सकास। कुंआरी ले जनमतोर आउर मोरलोमन ले जीव उठतोर दुनो गोटकी बरन चो गोट आय। हुन दुनो सत होओ नोहले फंद होओ।
एदांय आमी, ‘मरियम, इलीसिबा ले भेट-घाट होतोर’ के दखवां।
खिंडिक समया पाछे मरियम, इलीसिबा ले भेट-घाट होतो फासला करली, जोन जहूदीमन चो डोंगरी राज ने रते रली।
39 पाछे मरियम तियार होउन तूरते जहूदिया राज चो डोंगरी परघन चो गोटोक सहर ने गेली,
40 आउर जकरिया चो घरे जाउन इलीसिबा के जुहार-भेट करली।
41 जसने इलीसिबा, मरियम चो जुहार सुनली, हुदलीदांय पिला हुनचो पेट ने कुलबुललो, आउर इलीसिबा पवितर आत्मा ले भरपुर होली।
ए मोचो मीतमन, आजी आमी जेचो बारे ने गोटेयाउंसे, हुन गोटोक अचरित गोट आय। तुमी ए पदमन ने घटलो गोटमन के पतेयाहा नोहले नी पतेयाहा। मय एबे चो लोगमन काजे खुबे फिकिर करेंसे, जुगे करुन हुन बचन सुनातो लोगमन काजे, जोनमन बाईबल चो अचरित गोटमन के सरसरा सांगतो बाटले आपने के बुद बीता दखाउक मन करसोत। मीतमन, तुमी बाईबल चो अचरित गोटमन के पतेयाहा नोहले नी पतेयाहा, मानतर जोन गोटमन ए पदमन ने घटलीसे हुन अचरित गोट ची आय। ए बायले पवितर आत्मा ले भरपुर होली आउर लेका-पिला हुनचो पेट ने कुलबुललो।
42 आउर हुन जोर ले बलली:
“तुय बायलेमन ने धन-धन आस, आउर तुचो पेट चो पिला धन-धन आय!
लूका लिखलो नंगत खबर ने ए पईल गीत आय आउर ए खुबे सुंदर आय। लूका गोटोक गीत-कुरिया बले रये, जोन आमके बड़े दिन बेरा चो खुबे गीतमन दिलोसे, ए सबुले पईल गीत आय जेके इलीसिबा गाउ रली।
43 आउर असन दया मोके कहां ले मिरली कि मोचो परभु चो आया मोचो लगे ईलीसे?
44 जिदलदांय मय तुचो जुहार चो गोट सुनले, तेबे मोचो पेट चो पिला हरिक ने कुलबुललो।
45 धन-धन आय हुन, जोन सतपतेयाली कि महापरभु चो बाटले हुनके बललो गोटमन पुरा होयदे।”
पवितर सास्तर ने इलीसिबा चो बारे ने खिंडिक असन सांगलोर आसे, हुन नवा नियम ने गीत गावतोने पईल आय।
तुमचो लगे असन कोनी गावतो लोग आसोत जाले हुनके पाटसुना नी करा। हुनचो लगे असर करतो गुन रये आउर हुन पतेयाते रये। हुनचो मनुक नी पतेयातो किरता कोंदा होउ रलो, मानतर इलीसिबा कोंदी नी होली। हुन महापरभु उपरे बिसवास करली आउर एदांय हुन मरियम के उकसायसे।
ए मोचो मीतमन, मरियम गोटोक जुवान लेकी आय आउर इलीसिबा गोटोक डोकरी आय। इलीसिबा खुबे बरक ले महापरभु चो लय ने चलते रये आउर हुन मरियम के समजायसे कि जोन गोटमन हुनचो संगे होली हुन सपाय पुरा होयदे। दुसर लोग संगे मय बले इलीसिबा के खिंडिक मान देउक मन करेंसे। मानतर हुनके परभु कटार नी बनातोर आय। हुन सोजे गोटोक बायले रली, जसन मरियम बले गोटोक बायले रली आउर इलीसिबा, मरियम के ढाढ़ुस दिली।
46 तेबे मरियम बलली:
“मोचो जीव परभु के सहरायसे।
47 आउर मोचो आत्मा, मोचो मुक्ति करु महापरभु ले हरिक होली,
48 कसनबलले हुन आपलो कमेयीन चो दीन हाल के दखलो,
एईकाजे दखा,
एदांय ले जमाय जुग चो लोग मोके धन-धन बलदे,
एदांय मरियम गोटोक गीत गायसे आउर ए गीत के ‘मरियम चो गीत’ नाव ने लोग जानुआत।
ए गीत आमके खुबे नंगत गोटमन सिखायसे। मरियम आपलो गीत ने आमके बलेसे कि हुनके गोटोक मुक्ति-देउ लागेदे आउर हुनचो ले हरिक आसे। ए मोचो प्रोटेस्टेंट मीतमन इआ, आमी हुनके धन-धन करुं। आमी हुनके परभु बनाउन हुनचो पुरे डंडासरन नी करुं। मानतर आमके हुनके धन-धन करतोर आय। ए हुनचो काजे गोटोक मयमा आउर भाग चो गोट आय कि हुन महापरभु चो बेटा के ए संवसार ने आनतो काजे हुनचो आया बनली। आमी हुनके आगर बड़ाई नी करुं आउर हिनस्ता बले नी करुं। हुन गोटोक अचरित बायले रये आउर महापरभु हुनके बाछतोर उधापड़े नोआय। हुन महापरभु चो आगे ची करलो पक्का फासला रये, महापरभु केबई अडरा नी करे।
इआ, एदांय मरियम चो गावलो गीत के सुनुं-
49 कसनबलले हुन सकत चो महापरभु, मोचो काजे अचरित बुता करलोसे।
हुनचो नाव पवितर आय।
50 हुनचो दया हुनके डरतो लोगमन उपरे, पीड़ी-पीड़ी ले बनुन रहेसे।
51 हुन आपलो बांहा चो बल दखालो, आउर जोन आपने के बड़े मानते रओत, हुनमन के रन-बन करलो।
52 हुन बलबीतामन के राजगादी ले निकराउन दिलो
आउर दीन लोगमन के हक चो ठान (राजगादी) ने बसालो।
53 हुन भूके रलो लोगमन के नंगत-नंगत जाकमन ले उमकालोसे,
आउर सवकारमन के चुचाय हाथे निसकाउन दिलो।
54 महापरभु आपलो सेवा करु इसराएल, बललोने इसराएलिमन के दखा-राखा करलो कि
हुनमन महापरभु करलो दया के सूरता करोत,
55 हुन आमचो पुरखामन अबराहम आउर हुनचो थर संगे बलुन रये कि हुनचो दया हुनमन संगे जुग-जुग काजे रउआय।”
हुन गायसे, “हुन आपलो बांहामन चो सकत दखालो।”
जसाया 53:1 पद ने अगमजानी बललो, “जहोवा चो सकत कोके दखा दिली?”
हुनचो पाछे तूरते, जसाया ए गोट सांगेसे कि महापरभु चो मेंडा पिला जोन संवसार चो पाप के बोउन नेयसे। महापरभु आपलो बांहामन चो सकत आउर मया के सपाय लोगमन के मुक्ति देतो बाटले दखायसे।
मरियम आपलो गीत ने अबराहम के बले सूरता करेसे आउर जुना नियम ने अबराहम के छाड़ुन आउर कोनी नंगत लोग नी रला। मंजपुर ने सबुले आगर अबराहम चो बारे ने बाईबल सांगेसे।
56 मरियम तीन मयना असन इलीसिबा संगे रउन भाति आपलो घरे बोहड़ली।
इआ, आमी दखवां, ‘जूहन्ना चो जनम’
ए मोचो मीतमन, ए अध्या चो आदो भाग ने बपतिस्मा देतो बीता जूहन्ना चो जनम आउर जकरिया चो गीत चो बारे ने सांगेसे। मय एता कोनी-कोनी खास गोटमन के जोर देउन सांगेंदे।
57 तेबे इलीसिबा चो नंगत होतो बेरा अमरली, आउर हुन गोटोक लेका पिला के नंगत होली।
58 हुनचो घर लग चो लोगमन आउर कुटुम चो लोगमन एके सुनुन, हुनचो संगे हरिक होला कि परभु हुनचो उपरे बड़े दया करलोसे।
59 इलीसिबा लेका पिला के जनमालो पाछे आठवां दिने, पिला चो खतना करतो काजे लोगमन ईला, आउर हुनचो नाव, हुनचो बुआ चो नाव ने जकरिया संगातो काजे होला।
60 आउर हुनचो आया बलली:
“नाई, हुनचो नाव जूहन्ना संगातोर आय।”
आमी दखुंसे, लोगमन हुन पिला चो नाव हुनचो बुआ चो नाव हिसाब ले जकरिया संगाला, मानतर इलीसिबा सपाय गोटमन के खुबे धियान ले दखते रये। हुन बलली, एचो नाव जूहन्ना संगावा।
61 आउर हुनमन इलीसिबा के बलला: “तुचो कुटुम ने ए नाव चो कोनी नीआत!”
62 तेबे हुनमन अक्याउन पिला चो बुआ के पूछला, ‘तुय हुनचो नाव काय संगाउक मन करसीस?’
63 आउर हुन गोटोक पटी मांगुन लिखलो, हुनचो नाव जूहन्ना आय, आउर जमाय अचरित होउन गेला।
64 एकदांय जकरिया चो टोंड आउर जीब खेलली;
आउर हुन गोटेयाउक आउर महापरभु चो जय-जय करुक मुरियालो।
हुन दिनमन चो नीती हिसाब ले, नवा जनमलो लेका पिला के आपलेई कुटुम चो लोगमन चो नाव संगाते रओत।
जेबे लेका पिला चो सटी समया अमरली, तेबे हुनचो लोग-बाग बिचारला होती कि हुनचो नाव जकरिया संगादे। इलीसिबा असन नुआय बलली। तेबे हुनमन जकरिया ले गुहारला, हुन गोटेयाउक नी सकलो किरता हुनमन काजे लिखुन दिलो, “एचो नाव जूहन्ना आय।” ए नाव महापरभु सरगदूत बाटले आगतले हुनके देउ रये। एके दखुन हुता रलो लोगमन भक्याला।
एचो पाछे जकरिया फेर गोटेयाउक मुरियालो आउर तूरते महापरभु चो मयमा-गीत गावलो। हुनचो मने पक्का बिसवास नी रली। मानतर लेका पिला जनमलोके हुन महापरभु ने खुबे हरिक होलो। फेर बले जकरिया महापरभु के कम पतेयातोर आमचो गुन के दखायसे, आमीमन ले बले कोनी-कोनी बिसवास ने निमल रउंसे।
ए मोचो मीतमन, जेबे महापरभु आमचो पारथना चो उत्तर देयसे, तेबे आमी हरिक ले उबा होउंसे। मय केबे-केबे बिचारु आंय महापरभु आमचो असन निमल बिसवासीमन चो पारथना चो उत्तर देउआय कि आमी हरिक मनाउक सकुं। कसनबलले गोटोक नियम आसे, निमल बिसवासी जुगे हरिक नी होयसोत, मानतर जोन बिसवास ने चमकट आसोत, हुनमन कसनीचे बेरा हो हरिक ने रयसोत।
65 आउर हुन आली पाली चो रतो जमाय लोगमन ए गोटमन के सुनुन-जानुन डरला, आउर ए गोटमन जहूदिया देस चो सपाय डोंगरी परघन ने जगुर-पगुर होउन गेली,
66 आउर जमाय सुनतो लोगमन आपलो-आपलो मन ने बिचारुन बलला, ए लेका कसन होयदे?
कसनबलले हुनमन जानला कि परभु चो हाथ हुनचो संगे रली।
67 आउर जूहन्ना चो बुआ जकरिया पवितर आत्मा ले भरपुर होलो, आउर अगमगोट गोटेयाउक मुरियालो:
68 “परभु, इसराएल चो महापरभु धन-धन होओ,
कसनबलले हुन आपलो लोगमन उपरे नंजर करलो आउर हुनमन के छंडालोसे।
69 आउर आपलो कमेया
दाउद चो कुटुम ने आमचो काजे बड़े सकत चो गोटोक मुक्ति देउ के पठालो,
ए मोचो मीतमन, ए गोटोक पक्का गोट आय कि जूहन्ना गोटोक असन-तसन पिला नी रये। जकरिया नवक मयना कोंदा रलो मानतर जूहन्ना चो जनमलो पाछे हुन गोटेयाउक मुरियालो आउर गीत बले गावलो। पईल गीत इलीसिबा गावली, दुसर गीत मरियम आउर एदांय जकरिया बले गीत गायसे, हुनचो गीत अगमगोट आय। जकरिया दाउद चो थर चो नी रये, मानतर ए गोट के मानेसे कि हुनचो बेटा, जीसु किरिस्त चो पुरे-पुरे जातो बीता आय। जसन मलाकी आउर जसाया अगमजानीमन आगेले ची सांगु रओत। किरिस्त चो एतो गोट के सांगतो बीता एकलाय जूहन्ना ची रये। पुर-पुरे हिंडतो बीता रतोर ए दखायसे कि किरिस्त चो एतोर खुबे लापी नीआय बललोने, हुन झटके एयदे।
70 जसन हुन आपलो पवितर
*अगमजानीमन बाटले मूर बेरा ले सांगुन रये,
71 बललोने, आमचो बयरीमन ले आउर आमके नंगत नी भावतो जमाय लोगमन चो बल ले आमचो मुक्ति करलोसे,
72 कि आमचो पुरखामन उपरे दया करुन आपलो पवितर बायदा के सूरता करो,
73 आउर हुन किरिया, जोन महापरभु आमचो पुरखा अबराहम ले खाउ रये
74 कि हुन आमचो बयरीमन चो बल ले आमके छंडायदे। कसनबलले पवितर आउर धरम ले
75 जीव रतो बेरा नी डरुन हुनचो सेवा-बुता करुक होओ,
ए मोचो मीतमन, ए बायदामन महापरभु अबराहम ले करु रये।
मानतर इलीसिबा, मरियम आउर जकरिया एबे बले पतेयाते रओत कि जोन बायदामन महापरभु अबराहम ले करलोसे हुन पक्का पुरा होयदे।
ए मीतमन, आजी बले कोनी-कोनी लोग, महापरभु करलो बायदा पुरा होयदे कि नाई बलुन आसा छांडलासे आउर महापरभु उपरे बिसवास नी करोत।
ए मोचो मीतमन, तुमी पतेयायसास कि महापरभु आपलो करलो बायदा तुमचो काजे पुरा करेसे, तेबे महापरभु, अबराहम ले करलो बायदा के बले तुमके पतेयाउकची पड़ेदे।
76 आउर तुय, ए बाबू, सपाय ले बड़े महापरभु चो अगमजानी बलाय होसे,
कसनबलले तुय, परभु चो बाट तियार करतो काजे हुनचो पुरे-पुरे हींडसे।
77 एईकाजे कि हुनचो लोगमन के मुक्ति चो गियान देओ, जोन पापमन चो खेमा ले हुनमन के मिरेसे।
78 ए आमचो महापरभु चो हुन बड़े दया ले होयदे;
जेचो किरता सरग ले आमचो उपरे बड़े बियान चो उजर बरेदे।
79 कसनबलले अंधार आउर मोरना चो छांय ने बसलो बीतामन के उजर देओ,
आउर आमके अस्तिर चो बाट ने हिंडाओ।”
80 आउर हुन लेका बड़े बाड़ते आउर आत्मा ने बल पावते रलो, आउर इसराएल ने दखा देतो दिन ले राने रलो।
ए मोचो मीतमन, जूहन्ना हुन समया चो मान पावतो अगमजानी होतोर रली।
हुन परभु चो बाट तियार करतो काजे हुनचो पुरे-पुरे जाते रलो। जूहन्ना जानते रये कि किरिस्त हुनमन चो मंजी आसे। बपतिस्मा देउ बीता जूहन्ना असन-तसन मनुक नी रलो। हुनके महापरभु गोटोक खास बुता करतो काजे तियार करु रलो।
ए मोचो मीतमन, एता अध्या 1 सरली। एदांय आमी अध्या 2 के पढ़वां।
1 हुनी दिनमन ने, (जूहन्ना जनमलो खिंडिक मयना पाछे) बड़े राजा ओगुस्तुस कयसर गोटोक हुकुम निकरालो कि जमाय संवसार चो लोगमन सरकारी कागत ने नाव लिखातोर आय।
2 ए पईल नाव लिखातोर हुदलदांय होली, जिदलदांय क्विरिनियुस, सीरिया चो राज करतो बीता रये।
3 आउर जमाय लोगमन नाव लिखातो काजे आपलाहान सहर ने गेला।
4 तेबे जूसुफ बले गलील राज चो नासरत सहर ले जहूदिया परघन ने दाउद चो सहर बेतलहम ने गेलो, कसनबलले हुन दाउद चो कुटुम आउर बंस चो रये।
5 जूसुफ, आपलो माहला करलो कुंआरी लेकी मरियम संगे जोन पेटेहारिन रये, नाव लिखातो काजे गेलो।
6 हुनमन बेतलहम ने अमरतो बेरा मरियम चो नंगत होतो दिन पुरली,
7 आउर हुन आपलो पईलात बेटा के नंगत होली आउर हुनके फटई ने गुंडियाउन चारा-गोरला ने सोवाली, कसनबलले हुनमन के ठेबतो काजे कहांय ठान नी मिरली।
8 हुन परघन ने आदो धोरईमन रओत, जोनमन राती बेरा भाटा ने रउन आपलो-आपलो गोहड़ी चो राखा-पाहरा करते रओत।
9 आउर परभु चो गोटोक सरगदूत हुनमन चो लगे दखा दिलो, आउर परभु चो मयमा चो उजर हुनमन चो चारो कुती बरली, आउर हुनमन खुबे डरला।
10 तेबे सरगदूत हुनमन के बललो: “नी डरा, कसनबलले मय तुमके खुबे हरिक चो नंगत खबर सुनायंसे, जोन जमाय लोगमन काजे आय,
11 आजी दाउद चो सहर बेतलहम ने तुमचो काजे गोटोक मुक्ति देतो बीता जनमलोसे, आउर हुनी किरिस्त परभु आय,
12 आउर तुमी हुनके असन चिताहासे कि तुमी गोटोक लेका पिला के फटई ने गुंडियालोर आउर चारा-गोरला ने सोवालोर भेटासे।”
13 तेबे उधापड़े हुन सरगदूत चो संगे सरगदूतमन चो गोहड़ायेक दखा-देउन महापरभु चो जय-जय करुन बलला:
14 “सरग ने महापरभु चो मयमा,
आउर मंजपुर ने, जोन मनुकमन ले हुन हरिक आसे, हुनमन के अस्तिर मिरो।”
15 जिदलदांय सरगदूतमन हुनमन लगे ले सरग ने गेला, तेबे धोरईमन आपलाहान गोटेयाला, जो, आमी बेतलहम ने जाउन ए घटलो बिती गोट जेके परभु चो सरगदूत आमके सांगलोसे, दखवां।
16 आउर हुनमन तूरते डगराते जाउन मरियम आउर जूसुफ के, आउर चारा-गोरला ने सोवालोर लेका-पिला के भेटला।
17 जिदलदांय धोरईमन हुनमन के दखला तेबे हुन लेका-पिला काजे सरगदूत हुनमन के सांगलो गोट के मरियम आउर जूसुफ के सांगला,
18 आउर जमाय सुनतो लोगमन धोरईमन चो गोट के सुनुन भक्याउन गेला।
19 मानतर मरियम ए जमाय गोट के आपलो मने संगाउन बिचार करते रली।
20 आउर धोरईमन, जसन हुनमन के सरगदूत सांगुन रलो, उसनेची जमाय के सुनुन आउर दखुन महापरभु चो मयमा आउर जय-जय करुन बोहड़ला।
21 आठ दिन पुरलो पाछे, बाबू चो खतना करतो बेरा अमरली, तेबे हुनचो नाव जीसु संगाला, जेके सरगदूत, मरियम पेटे ठेबतो ले आगे बलुन रये।
22 अगमजानी मोसा बाटले दिलोर नियम-कानुन हिसाब ले, हुनमन चो सुद होतो चो दिन पुरली, तेबे हुनमन जीसु के महापरभु पुरे सोपतो काजे जरूसलेम ने नीला।
23 (जसन महापरभु चो कानुन ने लिखलोर आसे कि जमाय पईलात लेका पिला महापरभु काजे पवितर आसोत।)
24 आउर महापरभु चो कानुनमन चो हिसाब ने गोटोक जोड़ी पंडकी, नोहले परेंया चो दुयठन पिलामन के आनुन जतरा करतोर आय।
25 आउर दख, जरूसलेम ने सिमोन नाव चो गोटोक मनुक रये, आउर हुन मनुक धरमकारी आउर भगत रये; आउर इसराएल देस ने अस्तिर चो बाट दखते रये, आउर पवितर आत्मा हुनचो उपरे रये।
26 आउर पवितर आत्मा हुनके बलुन रये कि जिदलदांय ले तुय महापरभु चो किरिस्त के नी दखसे हुदलदांय ले नी मोरसे।
27 आउर पवितर आत्मा हुनके मंदिर ने नीलो, आउर जिदलदांय जीसु चो आया-बुआमन, नियम-कानुन चो नीती असन करतो काजे हुनके मंदिर ने आनला,
28 तेबे सिमोन, जीसु के पावलो, आउर महापरभु के जय-जय करुन बललो:
29 “ए मालिक, एबे तुय, मय तुचो कमेया के, तुचो गोट असन अस्तिर ने जाउक (मोरुक) देस,
30 कसनबलले मय मोचो आंईक ले हुन मुक्ति देउ के दखलेसे,
31 जेके तुय जमाय राजमन चो लोगमन पुरे तियार करलिसीस,
32 कसनबलले हुन बिजातीमन काजे सत उजर,
आउर हुन तुचो निज लोग इसराएल काजे मयमा होओ।”
33 आउर जीसु चो आया-बुआमन ए गोटमन के सुनुन भक्याउन गेला, जोन जीसु काजे सिमोन बलते रये।
34 तेबे सिमोन हुनमन के बर देउन हुनचो आया मरियम के बललो: “दख, हुन, इसराएल ने खुबे लोगमन चो नास होतो, आउर खुबे लोगमन चो हरिक होतो काजे ठेबालोर आसे; आउर गोटोक असन चीना होयदे जेचो बिरुद ने लोगमन गोटेयादे,
35 कसनबलले हुन खुबे लोगमन चो लुकाउन संगालोर बिचार के पुरे आनेदे, मानतर तुचो काजे, तुके असन दुख एयदे जसन तुचो कारजा-बोवरा के गोटोक खांडा ले छिंगड़ाउन दिलो”।
36 हुता हन्ना नाव चो गोटोक अगमजानिन रली, जोन खुबे डोकरी रये आउर हुनचो बुआ फनूएल, आसेर बंस चो रये। हुन बिया होलो पाछे सात बरक आपलो मनुक संगे रली।
37 हुन चार कोड़ी चार बरक ले रांडी रये; आउर रोजे मंदिर ने एउन रात-मंजन उपास आउर पारथना करुन महापरभु चो सेवा करते रये।
38 आउर हुन, हुदलदांय मंदिर एउन महापरभु चो जय-जय करुक मुरियाली।
हुन जमाय लोगमन के जीसु चो गोट सांगुक मुरियाली जोन जरूसलेम चो छंडाव चो बाट दखते रओत।
ए अध्या ने आमी एई गोटमन के पढ़वां:
बेतलहेम चो कोटासार ने जीसु चो जनम;
जीसु के परघातोर:
सरगदूतमन, धोरईमन के जीसु चो जनम-खबर सांगतोर;
जीसु के दखतो काजे धोरईमन बेतलहेम जातोर;
मरियम छर-फर होतोर आउर जीसु चो खतना;
मंदिर ने सिमोन संगे घटलो गोट;
मंदिर ने अगमजानीन हन्ना संगे घटलो गोट;
नासरत ने बोहड़तोर;
जीसु बारा बरक चो होलो बेरा जूसुफ आउर मरियम संगे जरूसलेम जातोर।
ए मोचो मीतमन, जीसु आठ दिन चो होलोके, मोसा चो नियम-कानुन हिसाब ने हुनके खतना काजे मंदिर ने आनला।
गलाती 4:4-5 पदमन ने पढ़ुंसे – “जिदलदांय बेरा पुरली तेबे महापरभु आपलो बेटा के पठालो जोन बायले ले जनम होलो आउर नियम-कानुन चो हक ने रलो।
कसनबलले नियम-कानुन चो हक ने रतो कमेयामन के बललोने आमके मोल देउन छंडाओ कि आमके बेटा-बेटी होतो हक मिरो।”
ए मीतमन, असन बरन ले हुनमन जरूसलेम गेलो किरता आमके सिमोन आउर हन्ना चो गीत मिरेसे।
बईद लूका, जीसु चो पिला रलो बेरा घटलो गोट के लिखलो कि जीसु बले दुसर पिलामन असन रये।
1 जीसु चो बुद बाड़ली - मन आउर बुद चो बाड़ती
2 जीसु लंग-लंगा बाड़लो - देहें चो बाड़ती
3 जीसु, महापरभु आउर मनुकमन चो बर ले बाड़लो - आत्मिक बाड़ती
लूका 2:52 पद ने आमी पढ़ुंसे, “जीसु, महापरभु चो दया ने लंग-लंगा बाड़ते गेलो, लोगमन हुनके मन करला आउर हुन महापरभु के हरिक करुन रलो।”
ए मोचो मीतमन, एके पढ़तोले आगे आमके एचो मूर के जानतोर जरुर आय।
जसन तुमी जानास बईद लूका लिखलो नंगत खबर इतिहास ले भरपुर आसे।
एके जूनानी बुदबीतामन काजे लिखलोर रली।
एके गोटोक महाआत्मिक गोट किरता ले बले लिखलोर आसे कि महापरभु चो बेटा के दखाओ।
महापरभु चो गोटोक दास असन लिखलोसे, तीन माहान देसमन आपलाहान बाटले साहरा करतोर रली, तीनों के खास बरन ले साहरा करतोर रली कि ए संवसार ने किरिस्तीमन बाड़ते जाओत।
जहूदीमन धरम बुता ने, जूनानीमन बिगियान आउर कारिगिरी बुता ने आउर रोमीमन जोन मंजपुर चो मालिक रला, हुनमन राजनीती ने साहरा करला। मत्ती, मरकुस आउर लूका चो नंगत-खबर खास लोगमन काजे लिखलोर आसे। मत्ती लिखलो नंगत-खबर जहूदीमन काजे, मरकुस लिखलो नंगत-खबर रोमीमन काजे आउर लूका लिखलो नंगत-खबर जूनानीमन काजे रली।
डा. गरेगोरी आपलो लिखलो किताप ने, ‘नंगत-खबर चो खास गोट’ 211 पन्ना ने बलेसे – “जूनानी लोग आपलो काई-काई खास गोटमन किरता दुसर माहान जाती चो लोगमन ले फरक दखा देयसोत।”
ए मोचो मीतमन, पउलुस गोटोक सत मनुक रलो, हुन एथेंस ने जाउन जूनानीमन के हुनमन नी दखलो परभु चो बारे ने बललो।
ए मीतमन, जूनानीमन गोटोक समपुरन मनुक के बनातो उआट ले जीसु किरिस्त संवसार ने एतो बाट तियार होली। जेचोले हुन समया चो बुदबीतामन के मुक्ति काजे आउर समपुरन मनुक काजे जीसु के समजुक पड़ली। ए हुनमन के एतो बीता मनुक चो बायदा आउर लालच ने छांड़ुन दिली, जोन ए गोट के पुरा करुक सके।
जूनानी भासा ने ची महापरभु चो बचन गुलाय बाटे बिगरली। जूनानी भासा ने ची संवसार के नंगत-खबर सुनाला। ए बुता पुरा करतो काजे महापरभु, महाराजा सिकंदर के बाछलो।
महाराजा सिकंदर चो बारे ने, हासन नाव चो मनुक असन लिखलोसे - ‘हुन नीती-नियम चो जाल चो डोरीमन के धरलो जोन एसिया खंड ने बिगरु रये आउर आपलो दखलो दुसर-दुसर राजमन ने बिगरालो। बेर-उदिया आउर बेर-बुड़ती देसमन चो नीती-नियम गोटकी होली। भिने-भिने होलो बंसमन बले गोटकी राजा चो हक ने गोटोक गोहड़ी होला। एथेंस चो जूनानी भासा बेबिलोन चो जहूदी गांवमन ने सुनुक होली। मिसर देस के जीतलो किरता बाबुल के बनालो, जोन हुनचेई नाव ले बलाय होली।’
हुन सहर चो नाव अलेकसंदरिया रये, जोन एबे बले आसे। जेबे आमी जीसु किरिस्त चो जनम चो बारे ने पढ़ुंसे, तेबे तुमी ए मूर गोटमन के आपलो मने पक्का संगाउन राहा कि आमी सरसरा समंजुक सकुं।
मय पतेयायंसे कि ए मूर गोटमन ए पाठ पढ़तोने आमके पक्का साहरा होयदे।
ए मोचो मीतमन, आमचो पढ़तो समया एताय सरेसे आउर मय आसा करेंसे कि तुमके आजी चो पढ़ई ले पक्का आत्मिक नफा होली। आजी चो पढ़ई ले परभु तुमके खुबे आत्मिक गियान आउर बर देओ आउर बचन चो संगत ने बड़ाओ।
परभु तुमचो संगे रओ।