बड़े बेसवा
17
हुन सातझन सरगदूतमन जोनमन लगे सातठन बटकामन रये, हुनमन ले गोटोक एउन मोके बललो, “ए बाटे आव, मय तुके पानी खंडे बसलो हुन बड़े बेसवा† के बललोने हुन बड़े सहर चो डंड के दखायंदे,
2 जेचो संगे मंजपुर चो राजामन बेबिचार करला आउर मंजपुर चो रतो लोगमन हुनचो बेबिचार चो मंद ले मातुन रला।”
3 मोके पवितर आत्मा समाली, तेबे हुन सरगदूत मोके छीड़ा ने नीलो, आउर मय गोटोक लाल रंग चो पसु के दखले, जेचो गुलाय देहें ने महापरभु के निंदरतो नावमन लिखुन रये, आउर हुनचो सातठन मुंडी आउर दसठन सींग रये। हुनचो उपरे गोटोक बायले बसुन रये।
4 हुन बायले बांगा रंग चो आउर लाल रंग चो फटई पींदुन रये, हुन सोन आउर मोल बिती मनीमन, आउर मोतीमन ले खची होउन रये। हुनचो हाथे गोटोक सोन चो बटका रये, जोन घिन-घिना तीजमन ले आउर हुनचो बेबिचार चो असुद तीजमन ले भोरुन रये।
5 हुनचो कपारे, भेद चो नाव लिखुन रये “बड़े बेबिलोन* मंजपुर चो बेसवामन आउर घिन-घिना बुता करतो लोगमन चो माय।”
6 मय, हुन बायले के पवितर लोगमन चो लोउ बललोने, जीसु चो गवामन चो लोउ पीउन मातलोके दखले आउर भक्याले।
7 तेबे हुन सरगदूत मोके बललो, “तुय काय काजे भक्यालीसीस? ए बायले चो आउर हुन पसु, जोन थाने हुन बसलीसे, जेचो सातठन मुंड आउर दसठन सींग आसे, एमन चो भेद के मय तुके सांगेंदे।”
8 जोन पसु तुय दखलीस, हुन आगे रये, एदांय नीआय, हुन पेंदी नोहलो दराहां ले झपके निकरुन नास ने पड़ेदे। मंजपुर चो लोगमन जोनमन चो नाव संवसार चो मूर बेरा ले जीवन चो किताप ने लिखलोर नीआय, हुन पसु चो गती के दखुन अचरित होदे। हुन पसु आगे रये, एदांय नीआय आउर फेर एउआय।
9 ए गोट जानतो काजे बुद लागुआय, हुन सातठन मुंड, सातठन डोंगरीमन* आत, जोन थाने हुन बायले बसलीसे†।
10 आउर हुन, सातझन राजामन बले आत, हुनमन ले पांचझन चो राजपाट बुड़ली, आउर गोटोक एबे आसे आउर एकलो एबले नी ईलोसे, आउर जिदलदांय हुन एयदे खिंडिक दिन काजे रयदे ची।
11 जोन पसु आगे रये आउर एदांय नीआय, हुन आठवां आय, हुन सातठन ले गोटोक आय, आउर हुन नास ने पड़ेदे।
12 जोन दसठन सींगमन तुय दखलीस, हुनमन दसझन राजामन आत, जोनमन एबले राज के नी पावलासोत, मानतर हुनमन पसु संगे डंडिक काजे राजामन चो असन हक पावदे।
13 ए सबु एक सोर ने आसोत आउर हुनमन आपलाहान सकत आउर हक, हुन पसु के देयसोत।
14 हुनमन मेंडा-पिला ले लड़दे आउर मेंडा-पिला हुनमन के जीतेदे, आउर हुनचो संगे चो हागदिलोर, बाछलोर आउर पतेयातो लोगमन बले जीतदे, कसनबलले हुन परभुमन चो परभु आउर राजामन चो राजा आय।
15 फेर हुन मोके बललो, “जोन बेसवा के पानी खंडे बसलोके तुय दखलीस, हुन लोगमन, भीड़, जातमन आउर भासामन आत।
16 जोन दसठन सींगमन के तुय दखलीस, हुनमन आउर पसु हुन बेसवा के बईर करदे; आउर हुनके नानागती आउर नांगड़ी करदे, आउर हुनचो मास खादे आउर हुनके आईग ने डसादे।
17 कसनबलले महापरभु आपलो मन-इछा पुरा करातो काजे हुनमन के गोटकी सोर करलो कि जिदलदांय ले महापरभु चो बचन पुरा नी होए, हुदलदांय ले गोटोक मन होउन आपलाहान राजपाट पसु के देओत।
18 हुन बायले, जेके तुय दखलीस, हुन बड़े सहर आय जोन मंजपुर चो राजामन उपरे राज करेसे।”