महापरभु चो रीस चो सातठन बटका
16
फेर मय मंदिर ले कोनी बड़े राग ले सातझन सरगदूत के असन बलतोके सुनले, “जाहा, महापरभु चो रीस चो सातठन बटका के मंजपुर ने उलदुन दियास।”
2 तेबे पईल सरगदूत जाउन आपलो बटका के मंजपुर ने उलदुन दिलो, तेबे जोन मनुकमन चो देहें ने हुन पसु चो चीना रये आउर जोन लोग हुनचो मूरत चो सेवा करते रओत, हुनमन चो देहें ने गोटोक बरन चो घिन-घिना आउर खुबे दुखतो बिती गरीक निसकली।
3 दुसर सरगदूत आपलो बटका के समदूर ने उलदुन दिलो, तेबे समदूर मोरलो मनुकमन चो लोउ असन होली आउर हुनचो जमाय जीव-जनतुरमन मोरला।
4 तीसर सरगदूत आपलो बटका के नंदीमन ने आउर पानी चो जमाय पजरामन ने उलदुन दिलो, आउर पानी लोउ उलटली।
5 तेबे मय, पानी उपरे हक संगाउ बीता सरगदूत असन बलतोके सुनले;
“तुय पवितर आस आउर रलीस,
तुय सत-धरम ले नियाव करलीस,
एईकाजे तुय सत-नियावकारी आस।
6 कसनबलले हुनमन पवितर लोग
आउर अगमजानीमन चो लोउ बोहाउन रओत,
आउर तुय हुनमन के लोउ पीयालीस,
कसनबलले हुनमन एचई लाईक आत।”
7 फेर मय बेदी ले असन राग सुनले;
“हव, ए सबुले सकत चो परभु, महापरभु!
तुचो नियाव नंगत आउर सत आय।”
8 चवथा सरगदूत आपलो बटका के बेर उपरे उलदुन दिलो, आउर बेर के आईग ले लोगमन के झुझरातो चो हक मिरली।
9 लोगमन बड़े आंच ले मसरला आउर महापरभु चो नाव के, जेके बिपतीमन उपरे हक आसे, निंदरला आउर हुनचो मयमा करतो काजे मन नी बोहड़ाला।
10 पांचवां सरगदूत आपलो बटका हुन पसु चो आसनगादी ने उलदलो आउर हुनचो राज ने अंधार पड़ली, लोग दुख-डंड चो किरता आपलो-आपलो जीब चाबुक मुरियाला,
11 आपलो डंड आउर गरीकमन चो दुखा काजे सरग चो महापरभु के निंदरला, मानतर आपलो अडरा बुतामन ले मन नी बोहड़ाला।
12 छटवां सरगदूत आपलो बटका के बड़े फरात नंदी ने उलदलो, आउर हुनचो पानी सुकली कि बेर-उदिया बाटले एतो राजामन काजे बाट तियार होओ।
13 फेर मय, हुन बोड़ा-साप चो टोंड ले, आउर पसु चो टोंड ले, आउर हुन फंदी अगमजानी चो टोंड ले, तीन असुद आत्मामन के मेंडकामन चो रूप ने निकरतो के दखले।
14 ए जादु दखातो बिती असुद आत्मामन आत, ए तीनो असुद आत्मामन संवसार चो सबु राजामन लगे एईकाजे जायसोत कि हुन सबुले सकत चो महापरभु चो नियाव चो दिने लड़ई करतो काजे हुनमन के रूंडा करोत।
15 परभु बलेसे, “दख, मय चोर असन एयंसे; धन-धन आय जोन चेत ने रयसे, आउर आपलो फटई चो राखा करेसे, तेबे हुनमन के नांगड़ा बुलुक आउर लाज होउक नी पड़ेदे।”
16 आउर हुनमन राजामन के, इबरानी बोली ने हरमगिदोन बलतो जगा ने रूंडा करला।
17 सातवां सरगदूत आपलो बटका के लेहरा ने उलदलो, आउर मंदिर चो आसनगादी ले “पुरा होली” बलुन बड़े राग सुना दिली।
18 फेर पानी जागली, बादरी चड़लली आउर बड़े भारी भुंय-डोल होली, असन बड़े भारी भुंय-डोल मनुक चो उबजास होलो बेरा ले केबई होउन नी रली।
19 एचोले हुन बड़े सहर चो तीन गोंदा होली, आउर राज-राज चो सहरमन भोसड़ली, आउर महापरभु बड़े बेबिलोन चो सूरता करलो, आउर हुन आपलो रीस चो मंद हुनमन के पीयालो।
20 आउर पानी मंजार चो सपाय ढिपकामन ओदरली, आउर बड़े-बड़े डोंगरीमन बले सलमट होली।
21 बादरी ले लोगमन उपरे चालीस-पचास किलो बजन चो खुबे बड़े-बड़े करामन पड़ली; आउर ए गराहां बड़े भारी रये, एईकाजे लोगमन महापरभु के निंदरला।