आखरी बिपतीमन संगे सरगदूत
15
फेर मय सरग ने गोटोक महाजंजाल चीना के दखले, बललोने सातझन सरगदूतमन लगे सातठन आखरी बिपतीमन रली, कसनबलले हुन बिपतीमन सरलो पाछे महापरभु चो रीस सरेदे।
2 तेबे मय आईग मिसलोर कांच चो असन गोटोक समदूर दखले, आउर जोन लोग हुन पसु के, आउर हुनचो मूरत के, आउर हुनचो नाव चो नमर उपरे जीतुन रओत, हुनमन के कांच चो समदूर लगे महापरभु चो सारंगी के धरुन उबलोर दखले।
3 हुनमन महापरभु चो कमेया, मोसा चो गीत आउर मेंडा पिला चो गीत गाउन-गाउन बलते रओत,
“ए सबुले सकत परभु महापरभु,
तुचो बुतामन बड़े आउर महाजंजाल आय;
ए जुग-जुग चो राजा तुचो बेबार नंगत आउर सत आय।”
4 “ए परभु, तुके सपाय डरदे,
आउर सपाय तुचो नाव चो बड़ाई करदे,
कसनबलले तुय ची पवितर आस,
सपाय जातमन एउन तुचो पुरे डंडासरन करदे,
कसनबलले हुनमन तुचो धरम बुतामन के दखलासोत।”
5 एचो पाछे, मय सरग चो मंदिर ने गवई चो तम्बु के उगाड़लोर दखले।
6 आउर हुन सातझन सरगदूतमन, जोनमन लगे सातठन बिपतीमन रये, केकती चो सुद आउर चमकतो फटई पींदुन आउर छाती ने सोन चो पाट के बांधुन, मंदिर ले निकरला।
7 तेबे हुन चारो जीवमन ले गोटोक, हुन सातो सरगदूतमन के महापरभु, जोन जुग-जुग काजे जीव आसे, हुनचो रीस ले भोरलोर सोन चो सातठन बटकामन दिलो।
8 आउर महापरभु चो मयमा आउर सकत किरता, मंदिर कुमला ले भोरली, आउर जिदलदांय ले हुन सातझन सरगदूतमन चो सातठन गराहांमन नी सरली, हुदलदांय ले मंदिर ने कोनी ओलुक नी सकला।