मेंडा पिला आउर हुनचो लोग
14
फेर सियोन डोंगरी उपरे हुन मेंडा पिला उबलोके मय दखले, हुनचो संगे एक लाख चवालीस हजार (1,44,000) लोग आसोत, जोनमन चो कपारे हुनचो आउर हुनचो बुआ चो नाव लिखलोर आसे।
2 आउर सरग ले मोके गोटोक असन राग सुना दिली, हुन राग घुमर गरजतो असन आउर बादरी घुड़ललो असन रये, आउर जोन राग के मय सुनले, हुन असन लागते रये जसन खुबे सारंगी बजातो लोगमन मिसुन सारंगी बजायसोत।
3 हुनमन आसनगादी चो पुरे आउर चारो जीवमन आउर धरम-सियानमन पुरे गोटोक नवा गीत गावते रओत, हुन एक लाख चवालीस हजार लोग, जोनमन के मंजपुर ले घेनुन रओत, हुनमन के छांडुन आउर कोनी हुन गीत के सीखुक नी सकला।
4 ए हुनीमन आत, जोनमन बायलेमन संगे असुद नी होउन कुंआरा आसोत; जोन थाने मेंडा पिला जायसे, एमन बले हुनचो पाट-पाट जायसोत, एमन के महापरभु आउर मेंडा पिला चो पईल फर होतो काजे लोगमन ले घेनलासे।
5 हुनमन दोख नोहलो आत, केबई फंद गोट नी गोटेयालासे।
तीनझन सरगदूतमन
6 फेर मय गोटोक आउर सरगदूत के बादरी चो मंजिगता उड़तो के दखले, जेचो लगे मंजपुर ने रतो सपाय जात, आउर कुटुम, आउर भासा चो लोगमन के सुनातो काजे जुग-जुग चो नंगत खबर रये।
7 हुन बड़े राग ले बललो, “महापरभु के डरा आउर हुनचो मयमा करा, कसनबलले हुनचो नियाव करतो बेरा अमरलीसे। हुनके डंडासरन करा, जोन सरग, मंजपुर, समदूर, आउर पानी पजरतो ठान बनालोसे”।
8 एचो पाछे, दुसर सरगदूत असन बलते ईलो; “नास होली, हुन बड़े बेबिलोन सहर नास होली, जोन आपलो बेबिचार चो मंद के संवसार चो सपाय जात चो लोगमन के पीयालीसे।”
9 एचो पाछे, तीसर सरगदूत बड़े राग ले असन बलते ईलो, “जोन कोनी हुन पसु आउर हुनचो मूरत चो सेवा करदे, आउर आपलो कपारे नोहले हाथे हुनचो चीना लगादे,
10 हुनमन महापरभु चो रीस चो निरवा मंद पीवदे, जेके हुनचो रीस चो बटका ने रिकालासोत। हुनमन पवितर सरगदूतमन आउर मेंडा पिला चो पुरे गंधक ले जरतोर आईग ने डंड पावदे।
11 हुनमन चो डंड चो कुमला जुग-जुग उठते रयदे, आउर जोन हुन पसु आउर हुनचो मूरत चो सेवा करसोत आउर जोन हुनचो नाव चो चीना लगाउक देयसोत, हुनमन के रात-मंजन अस्तिर नी मिरेदे।”
12 पवितर लोगमन चो धीरजा महापरभु चो हुकुममन के मानतोने आउर जीसु के पतेयातोने आसे।
13 फेर मय सरग ले गोटोक राग सुनले, “लिख: एदांय ले धन-धन आत, जोनमन परभु ने मोरलासोत” आत्मा बलेसे, हव।
“कसनबलले हुनमन आपलो सपाय जोड़-बुतामन ले बिसादे आउर हुनमन करलो बुतामन चो फर हुनमन पावदे।”
संवसार चो कटई
14 फेर मय गोटोक पंडरी-बादरी के दखले, आउर हुन बादरी ने मनुक चो बेटा असन कोनी बसलोसे, जेचो मुंडे सोन चो मुकुट आउर हाथे लागन बिती हीरा आसे।
15 गोटोक आउर सरगदूत मंदिर ले निकरुन बादरी उपरे बसलो बीता के बड़े राग ले चिचियाउन बललो, “आपलो हीरा ले कटई कर, कसनबलले संवसार चो फसल पाकलीसे, आउर कटई चो बेरा अमरलीसे।”
16 जोन बादरी ने बसुन रये, हुन, संवसार ने आपलो हीरा धरालो आउर संवसार चो कटई होली।
17 फेर आउर गोटोक सरगदूत, सरग चो मंदिर ले निकरलो, हुनचो हाथे बले लागन बिती हीरा रये।
18 फेर गोटोक आउर सरगदूत, जेके आईग चो उपरे हक देउन रओत, बेदी ले निकरलो आउर जोन सरगदूत लगे लागन बिती हीरा रये, हुनके चिचियाउन बललो, “आपलो लागन बिती हीरा ने संवसार चो अंगुर झोपा के काट, कसनबलले अंगुर पाकलीसे।”
19 तेबे हुन सरगदूत संवसार ने आपलो हीरा धरालो, आउर संवसार चो अंगुर फर के काटुन आपलो महापरभु चो रीस चो बड़े रस-कुंड ने उलदलो;
20 आउर सहर चो बाहरी, हुन रस-कुंड ने अंगुर के रमंदला, आउर रस-कुंड ले इतलो लोउ निकरली कि चार हाथ डेंग आउर दुय सव मील दूर होओतले लोउ चो पूर बोहली।