दुयठन पसु
13
तेबे मय गोटोक पसु के समदूर ले निकरतो के दखले, जेचो दसठन सींग आउर सातठन मुंड रये। हुनचो सींगमन ने दसठन राज-मुकुट, आउर हुनचो मुंडीमन ने महापरभु के निंदरतो नावमन लिखलोर रये।
2 जोन पसु के मय दखले, हुन चिता-बाग असन रये; आउर हुनचो पांय भालु चो असन आउर टोंड बीजापुलिया-बाग चो असन रये, हुन बोड़ा-साप आपलो सकत आउर आपलो आसनगादी आउर बड़े हक हुनके देउन दिलो।
3 मय हुनचो मुंडीमन ले, गोटोक मुंडी ने, असन बड़े घाव होलो के दखले बललोने, हुन मोरेदेबे असन लागते रये, मानतर हुनचो जीव-धरा घाव छुक-छुका छांडली, आउर मंजपुर चो सपाय लोग भक्याउन हुन पसु चो पाट-पाट गेला।
4 लोगमन हुन बोड़ा-साप चो सेवा-सासन करला, कसनबलले बोड़ा-साप आपलो हक, पसु के देउन रये। लोगमन असन बलुन पसु चो सेवा-सासन करते रओत, “ए पसु चो असन कोन आसे आउर कोन एचो संगे लड़ुक सके”?
5 हुन पसु के, ढोड़तो आउर महापरभु के निंदरतो काजे गोटोक टोंड दिलो, आउर हुनके दुय कोड़ी दुय मयना होओतले आपलो बुता करतो हक देउन रला।
6 हुन, महापरभु चो नाव के, मंदिर के, आउर सरग ने रउमन के निंदरुक मुरियालो।
7 हुनके पवितर लोगमन संगे लड़ुन जीततो हक दिलो, आउर सपाय बंस, कुटुम, भासा आउर जात उपरे बले हक दिलो।
8 मंजपुर ने रतो सपाय लोगमन हुन पसु चो सेवा-सासन करदे। मानतर जेचो नाव जीवन चो किताप ने लिखलोर आसे, हुनमन पसु चो सेवा-सासन नी करदे। हुन किताप संवसार चो मूर ले आगे जतरा होलो मेंडा पिला चो आय।
9 सुनतो लोगमन धियान ले सुना।
10 जेके जयल ने ढाकतोर आय,
हुनके जयल ने ढाकदे,
जेके खांडा ले मारतोर आय,
हुनके खांडा ले ची मारदे।
असनी बेरा महापरभु चो पवितर लोगमन के धीरजा आउर बिसवास ने रतोर आय।
11 फेर मय गोटोक दुसर पसु के मंजपुर ले निकरतो के दखले, हुनके मेंडा पिला असन दुयठन सींग रये, मानतर हुन बोड़ा-साप असन गोटेयाते रये।
12 हुन, पईल पसु चो सपाय हकमन के धरुन आपन काम करते रये, आउर हुन, मंजपुर आउर हुता रतो लोगमन ले हुन पईल पसु चो सेवा-सासन कराते रये, जेचो जीव-धरा घाव छांडुन रली।
13 हुन बड़े-बड़े जादु दखाते रये, इतलीचे नाई मानतर हुन लोगमन चो पुरे सरग ले मंजपुर ने आईग बले घसराते रये,
14 हुन जादुमन चो किरता, जेके हुन पसु चो पुरे दखातो चो हक दिलोर रये, हुन मंजपुर चो रतो लोगमन के भरमाते रये, आउर मंजपुर चो रतो लोगमन के बलते रये, जोन पसु के खांडा पाउन रली, हुन जीव उठलोसे, हुनचो मूरत बनावा।
15 दुसर पसु के, पसु चो मूरत के जीव उठातो हक दिलो कि हुन मूरत के गोटेयाउक सकतो आत्मा दिलो, आउर जितरो लोग हुन मूरत चो सेवा-सासन नी करोत, हुनमन के मोरते मारो।
16 हुन नानी-बड़े, गरीब-सवकार, आउर कोचई हक ने नी रलो लोग आउर कमेया, सपाय चो उजा हाथे नोहले कपारे गोटोक-गोटोक चीना माराउन दिलो।
17 एईकाजे कि जेचो थाने चीना, बललोने, हुन पसु चो नाव नोहले नमर नी होलोर, कोनी दुसर ले काई घेनुक-बीकुक नी सके।
18 एके समजतो काजे बुद लागुआय, जेके बुद आसे, हुन ए पसु चो नमर जोड़ो, कसनबलले हुन मनुक चो नाव चो नमर आसे, आउर हुनचो नमर, छय सव छयसठ (666)* आय।