बायले आउर बोड़ा-साप
12
फेर सरग ने गोटोक बड़े चीना दखा दिली बललोने, गोटोक बायले “बेर” के ओड़ुन रये, आउर “जोन” हुनचो पांय खाले रये, आउर हुनचो मुंडे बाराठन तारामन चो मुकुट रये।
2 हुन पेटेहारिन रली, आउर छर-फर होतो चो दुखा ले कहरते रये।
3 गोटोक आउर चीना सरग ने दखा दिली; दखा, गोटोक बड़े लाल रंग चो बोड़ा-साप रये, जेचो सातठन मुंडी आउर दसठन सींग रये, आउर हुनचो मुंडीमन ने सातठन राज-मुकुट रये।
4 हुनचो लेंगड़ी बादरी चो तारामन चो तीन भाग ले गोटोक भाग के झीकुन मंजपुर ने घसराली। हुन बोड़ा-साप, बायले छर-फर होले पिला के गिरतो काजे हुनचो पुरे तंवलते रये।
5 हुन गोटोक बेटा के नंगत होली, जोन, लोहा चो गुबा† धरुन सपाय जातमन उपरे राज करतोर रये, हुन पिला, महापरभु आउर हुनचो आसनगादी लगे उठाय होलो;
6 आउर हुन बायले छीड़ा बाटे पराली; हुनी थाने महापरभु बाटले हुनचो काजे गोटोक जगा तियार करुन रये कि हुता हुनके बारा सव साठ दिन होओतले पोसोत।
7 फेर सरग ने लड़ई होली, मीकाईल आउर हुनचो सरगदूतमन, बोड़ा-साप ले जुद करुक निकरला; बोड़ा-साप आउर हुनचो दूतमन बले हुनमन ले जुद करला,
8 मानतर बोड़ा-साप जीतुक नी सकलो, आउर एचो पाछे सरग ने हुनमन के ठान नी मिरली।
9 तेबे हुन बड़े बोड़ा-साप बललोने, हुनी जुना साप जेके इबलीस आउर सयतान बलसोत, जोन सपाय संवसार के भरमातो बीता आय, हुनके आउर हुनचो दूतमन के मंजपुर ने घसराला।
10 फेर मय सरग ले गोटोक बड़े राग सुनले, “एबे आमचो महापरभु चो मुक्ति, सकत, राज, आउर किरिस्त चो हक दखा दिलीसे, कसनबलले आमचो भाईमन के रात-मंजन महापरभु पुरे बदी देतो बीता के घसराला”।
11 हुन मेंडा पिला चो लोउ, आउर आपलो गवई चो बचन किरता, हुनमन हुनके जीतला आउर आपलो जीव के मया नी करला आउर मोरना के बले सहला।
12 एईकाजे ए सरगदूतमन आउर हुता रतो लोगमन हरिक होआ; ए मंजपुर आउर समदूर, तुमचो उपरे हाय, कसनबलले इबलीस खुबे रीस ले तुमचो लगे उतरुन ईलोसे, हुन जानेसे कि हुनचो खिंडिक ची बेरा बाचलीसे।
13 जिदलदांय बोड़ा-साप दखलो कि हुनके मंजपुर ने घसरालासे, हुन लेका-पिला के नंगत होलो बायले के तकलीस दिलो।
14 मानतर हुन बायले के बड़े सारंया चो असन दुयठन पाटकी दिला कि साप चो पुरे ले उड़ुन छीड़ा ने जाओ, जोन थाने हुनके साढ़े तीन बरक होओतले पोसोत।
15 साप, हुन बायले चो पाटकुती आपलो टोंड ले नंदी चो असन पानी फूरकली कि हुनके पूर नेओ।
16 मानतर भुंय, हुन बायले के साका होली आउर आपलो टोंड फाड़ुन हुन नंदी के सोकली, जोन बोड़ा-साप फुरकुन रये।
17 तेबे बोड़ा-साप हुन बायले के रीस होलो आउर हुनचो बाचलो पिला-झीलामन ले जुद करतो काजे गेलो, जोन महापरभु चो हुकुममन के मानसोत, आउर परभु जीसु दिलो सत गवई ने पतेयातो लाईक रयसोत।
18 हुन बोड़ा-साप समदूर चो बारु उपरे उबा होलो।