सरगदूत आउर नानी किताप
10
फेर मय आउर गोटोक सकत बीता सरगदूत के बादरी ओड़ुन सरग ले उतरतो के दखले। हुनचो मुंड उपरे पानी-धनु रये, आउर हुनचो थमना बेर असन आउर पांय आईग चो खमा असन रये।
2 हुनचो हाथे गोटोक नानी किताप उगाड़लोर रये, हुन आपलो उजा पांय समदूर ने आउर डेबरी पांय मंजपुर ने मांडलो,
3 आउर इतरो जोर ले चिचियालो, जसन कि बीजापुलिया-बाग नांदेसे; जिदलदांय हुन चिचियालो तेबे गरजतो चो सातठन राग सुना दिली।
4 जिदलदांय सातठन गरजन चो रागमन सुनले, मय लिखतो काजे होते रये, मानतर सरग ले गोटोक राग सुनले, “जोन गरजन चो सात रागमन सुनलिसीस मोहर लगाव आउर हुनके कोकई नी सांग आउर नी लिख।”
5 तेबे जोन सरगदूत के मय समदूर आउर मंजपुर ने उबा होलोर दखुन रयें, हुन आपलो उजा हाथ के सरग बाटे उचालो,
6 आउर सरग आउर जोन बले हुता आसे, मंजपुर आउर हुता जोन बले आसे, समदूर आउर हुता जोन बले आसे, ए सपाय के बनाउ महापरभु, जोन जुग-जुग ले जीव आसे, हुनचो किरिया खाउन बललो, “एदांय बेर नी होए।
7 सातवां सरगदूत तोड़ी फूकलो दिने, महापरभु चो भेद चो गोट, जोन आपलो कमेयामन बललोने अगमजानीमन के सांगुन रये, पुरा होयदे।”
8 जोन राग आगे मोके सरग ले गोटेयाउन रलो हुनी राग ले फेर मोके गोटेयालो, “जा, जोन सरगदूत समदूर आउर मंजपुर ने उबा आसे, हुनचो हाथ ले उगाड़लो किताप के धर”।
9 मय, सरगदूत लगे गेले आउर हुनके बलले, “ए नानी किताप के मोके देस”। हुन मोके बललो, “धर, आउर एके खा; ए तुचो पेट के पीता करेदे, मानतर तुचो टोंडे ओंडार तेल असन सुवाद लागेदे।”
10 मय हुन नानी किताप के, हुन सरगदूत चो हाथ ले धरुन खादले, हुन मोचो टोंडे ओंडार तेल असन सुवाद लागली, मानतर खादलो पाछे, मोचो पेट पीता होली।
11 आउर हुन मोके बललो: “तुके खुबे लोगमन, जातमन, भासा-बोलीमन आउर राजामन चो बारे ने अगमगोट फेर सांगतोर आय।”