9
जिदलदांय पांचवां सरगदूत तोड़ी फूकलो, तेबे मय गोटोक तारा के मंजपुर ने घसरतो के दखले, आउर हुनके पेंदी नोहलो दराहां चो कुची के दिला।
2 जिदलदांय हुन पेंदी नोहलो दराहां के उगाड़लो, तेबे कुंड ले बड़े भारी भाटी असन कुमला उठली, जोन कुमला ले बेर आउर बादरी अंधार पड़ुन गेली।
3 हुन कुमला ले मंजपुर ने थापामन निकरला, आउर हुनमन के मंजपुर चो बिचु-काकड़ा असन सकत दिला।
4 हुनमन के बलला, “तुमी मंजपुर चो लाटा-बुटामन आउर रूक-राईमन के नोकसान नी करा, मानतर जोन लोगमन चो कपारे महापरभु चो मोहर लगालोर नीआय, हुनमन के ची नोकसान करा।”
5 लोगमन के मोरते मारतो चो हक हुनमन के नी दिला, मानतर पांच मयना होओतले लोगमन के तकलीस देतो हक दिला आउर हुनमन चो दुखा, असन आय जसन बिचु-काकड़ा चाबलो लोगमन के होउआय।
6 हुन दिनमन ने लोग मोरना के डगरादे, मानतर मोरना नी मिरेदे; हुनमन मोरतो काजे मन करदे, मानतर मोरना हुनमन ले लापी परायदे।
7 हुन थापामन चो रूप, लड़ई काजे तियार करलो घोड़ामन असन रये, आउर हुनमन चो मुंड ने सोन चो मुकुट पींदलो असन आउर हुनमन चो थमना मनुकमन चो असन रये,
8 हुनमन चो चूंदी, बायलेमन चो चूंदी असन आउर दात, बीजापुलिया-बागमन चो दात असन रये।
9 हुनमन के लोहा चो झिलम असन झिलम रओत; आउर हुनमन चो पाटकीमन चो गरजन खुबे रथमन आउर लड़ई काजे परातो घोड़ामन असन रये।
10 हुनमन के बिचु-काकड़ामन चो असन लेंगड़ीमन आउर बिस-काटामन रये, आउर पांच मयना लोगमन के तकलीस देतो चो सकत हुनमन चो लेंगड़ीमन ने रये।
11 पेंदी नोहलो दराहां चो दूत हुनमन चो राजा रये; हुनचो नाव इबरानी बोली ने अबदोन, आउर जूनानी भासा ने अपुलयोन आय।
12 पईल गराहां होली; दखा, एचो पाछे आउर दुयठन गराहांमन एतो बिती आय।
13 जिदलदांय छटवां सरगदूत तोड़ी फूकलो, तेबे जोन सोन चो बेदी महापरभु चो पुरे आसे, हुनचो चारो सींगमन ले गोटोक राग सुनले।
14 जेचो लगे तोड़ी रली हुन, छटवां सरगदूत के बलतोके सुनले, “बड़े फरात नंदी लगे बांदलोर हुन चारो सरगदूतमन के ढीलुन देस।”
15 हुन सरगदूतमन के हुनी समया, दिन, मयना, आउर बरक काजे तियार करुन रओत, आउर लोगमन चो तीन भाग चो गोटोक भाग के मोरते मारतो काजे ढीलुन दिला।
16 हुन घोड़ामन ने बसलो पलटनमन के गनतोके मय सुनले, बीस करोड़ रओत।
17 मोके दरसन ने, घोड़ामन आउर घोड़ामन ने बसलो लोगमन दखा दिला, जोनमन चो झिलम रग-रगतो आईग असन लाल, धुमरकांत असन नीलिया, आउर गंधक* असन हरदिया रये, हुन घोड़ामन चो मुंडी बीजापुलिया-बागमन चो असन रये, आउर हुनमन चो टोंड ले आईग, कुमला, गंधक निकरते रये।
18 ए तीनो रबीमन बललोने आईग, कुमला आउर गंधक जोन हुनमन चो टोंड ले निकरते रये, जेचोले लोगमन चो तीन भाग ले गोटोक भाग के मोरते मारला।
19 हुन घोड़ामन चो सकत टोंड आउर लेंगड़ी ने रये; हुनमन चो लेंगड़ीमन सापमन असन रये, आउर लेंगड़ीमन ने मुंडीमन रये, एचई ले हुनमन लोगमन के तकलीस देते रओत।
20 हुन रबी ले बाचलो लोगमन आपलो अडरा बुतामन ले मन नी बोहड़ाला, आउर देव-भूतमन चो आउर सोन, रूप, पीतल, पकना आउर रूक चो बनालो मूरतमन चो सेवा करुक नी छांडला, जोन मूरतमन सुनुक, दखुक आउर हिंडुक नी सकोत;
21 आउर हुनमन, बेबिचार, माने-मारा, पांगन-नासन आउर चोरतो बुतामन के नी छांडला आउर हुन बुतामन ले महापरभु बाटे मन नी बोहड़ाला।