जूहन्‍ना दखलो दरसन 8

सातवां मोहर आउर सोन चो आरती

जिदलदांय मेंडा पिला सातवां मोहर के टुटालो, तेबे सरग ने आधा-एक घंटा होओतले झांय पसरली।

2 तेबे मय महापरभु चो पुरे उबा रतो सातझन सरगदूतमन के दखले, आउर हुनमन के सातठन तोड़ी दिला।

3 फेर आउर गोटोक सरगदूत सोन चो आरती धरुन ईलो

धूप देतो सोन चो आरती (8:3)

आउर बेदी लगे उबा होलो। हुनके पवितर लोगमन चो पारथनामन संगे आसनगादी चो पुरे रलोर सोन चो बेदी ने चेगातो काजे खुबे धूप दिला^†।

4 हुन धूप चो कुमला, पवितर लोगमन चो पारथनामन संगे सरगदूत चो हाथ ले महापरभु लगे अमरली।

5 तेबे सरगदूत, आरती ने बेदी चो आईग के रापलो आउर मंजपुर ने रिकाउन दिलो, तेबे बादरी चड़लली आउर कोलार आउर पानी जागली आउर भुंयडोल होउक मुरियाली।^†

सातठन तोड़ीमन के फूकतोर

6 तेबे हुन सातझन सरगदूत, जोनमन लगे सातठन तोड़ीमन रये, फूकतो काजे तियार होला।

7 पईल सरगदूत तोड़ी फूकतोके लोउ मिसलो करा आउर आईग के मंजपुर ने रिकाला;^† जेचोले मंजपुर चो तीन भाग ले गोटोक भाग, रूक-राईमन चो तीन भाग ले गोटोक भाग आउर सपाय लाटा-बुटामन डसुन गेली।

8 दुसर सरगदूत तोड़ी फूकतोके आईग जरतो गोटोक बड़े भारी डोंगरी समदूर ने घसरली, आउर समदूर चो तीन भाग ले गोटोक भाग चो पानी लोउ उलटली,

9 आउर समदूर चो जीवमन ले तीन भाग ले गोटोक भाग मोरला, आउर तीन भाग ले गोटोक भाग पानी जाहाजमन बले नसली।

10 फेर तीसर सरगदूत तोड़ी फूकतोके, गोटोक बड़े तारा, होला असन जरते बादरी ले टुटुन^† नंदीमन चो तीन भाग ले गोटोक भाग ने आउर पानी पजरतो थाने घसरली।

11 हुन तारा चो नाव कोचेला आय, जेचोले तीन भाग ले गोटोक भाग पानी, कोचेला असन पीता होली,^† आउर खुबे लोगमन हुन पीता पानी पीवलोके मोरला।

12 फेर चवथा सरगदूत तोड़ी फूकतोके, ‘बेर’ चो तीन भाग ले गोटोक भाग ने, ‘जोन’ चो तीन भाग ले गोटोक भाग ने आउर ‘तारामन’ चो तीन भाग ले गोटोक भाग ने बिपती ईली। जेचोले एमन चो तीन भाग ले गोटोक भाग अंधार होली आउर दिन आउर रात चो तीन भाग चो गोटोक भाग बले अंधार होली।^†

13 फेर मय, गोटोक सारंया के बादरी ने उड़तो के दखले आउर जोर ले ए बलतोके सुनले, “हुन तीनझन सरगदूतमन चो तोड़ी फूकतोर बाचलीसे, जेचो राग किरता मंजपुर ने रतो लोगमन के हाय-हाय।”