एक लाख चवालीस हजार (1,44,000) इसराएलिमन के मोहर लगातोर
7
एचो पाछे मय, मंजपुर चो चारो खुटे चारझन सरगदूतमन के उबलोके दखले। हुनमन मंजपुर, समदूर आउर कोनी रूक-राई ने लेहरा नी बोहो बलुन,† मंजपुर चो चारो कुती चो लेहरा के ठेबाउन रओत।
2 फेर मय, गोटोक आउर सरगदूत के जीवत महापरभु चो मोहर धरुन बेर उदिया बाटले एतोके दखले; हुन, चारो सरगदूतमन के जोर ले चिचियाउन बललो, जोनमन के मंजपुर आउर समदूर चो नोकसान करतो काजे हक दिलोर रये,
3 “आमी महापरभु चो कमेयामन के मोहर लगाओत ले, मंजपुर, समदूर आउर कोनी रूक-राई के काई नोकसान नी करा।”†
4 तेबे मय मोहर लगालो लोगमन चो गनती के सुनले, इसराएल चो लोगमन चो सपाय बंसमन ले एक लाख चवालीस हजार लोगमन के मोहर लगाला:
5 जहूदा चो बंस ले बारा हजार; रुबेन चो बंस ले बारा हजार, आउर गाद चो बंस ले बारा हजार लोगमन के मोहर लगाला।
6 आसेर चो बंस ले बारा हजार, नपताली चो बंस ले बारा हजार, आउर मनस्से चो बंस ले बारा हजार लोगमन के मोहर लगाला।
7 सिमोन चो बंस ले बारा हजार, लेवी चो बंस ले बारा हजार आउर इसाकार चो बंस ले बारा हजार लोगमन के मोहर लगाला।
8 जबुलून चो बंस ले बारा हजार, जूसुफ चो बंस ले बारा हजार, आउर बिनयामीन चो बंस ले बारा हजार लोगमन के मोहर लगाला।
गोटोक खुबे बड़े भीड़
9 एचो पाछे मय गोटोक असन बड़े भारी भीड़ के दखले, जोन थाने सबु जात आउर बंस आउर भासा चो लोगमन रओत, जेके कोनी गनुक नी सकता, हुनमन पंडरा फटई पींदुन आउर खजूर* पलंगामन धरुन आसनगादी आउर मेंडा पिला चो पुरे उबा रओत।
10 आउर हुनमन खुबे जोर ले चिचियाउन बलसोत, “आसनगादी ने बसलो आमचो महापरभु आउर मेंडा पिला चो जय-जय होओ, जोन आमके मुक्ति दिलासे।”
11 आउर सपाय सरगदूतमन, हुन आसनगादी चो आउर धरम-सियानमन चो आउर चारो जीवमन चो भोंवरक उबा रओत, फेर हुनमन आसनगादी चो पुरे भुट-भुटनाय पड़ुन महापरभु के डंडासरन करुन,
12 बलला, “आमीन। आमचो महापरभु चो जय-जय, मयमा, गियान, धन-धन, मान, सकत आउर बल जुग-जुग रओ, आमीन।”
13 एके दखुन, गोटोक धरम-सियान मोके पूछलो, “ए पंडरा फटई पींदलो लोगमन कोन आत? आउर कहां ले ईलासोत?”
14 मय हुनके बलले, “ए मालिक, तुय ची जानीस।”
तेबे हुन मोके बललो, “ए हुनमन आत, जोनमन बड़े भारी तकलीस पाउन ईलासोत; एमन आपलाहान फटई के मेंडा पिला चो लोउ ले धोउन पंडरा करलासोत।
15 एचई किरता हुनमन महापरभु चो आसनगादी पुरे आसोत, आउर हुनचो मंदिर ने रात-मंजन सेवा करते रयसोत; जोन आसनगादी ने बसलोसे हुन, हुनमन संगे रयदे आउर सरन देयदे।
16 हुनमन केबई भूक-पियास नी होदे; आउर हुनमन के घाम-तोप बले नी लागे।
17 कसनबलले मेंडा पिला, जोन आसनगादी चो मंजारे आसे, हुनमन के दखा-राखा करेदे, आउर हुनमन के जीव देतो पानी पजरतो लगे नेयदे। महापरभु हुनमन चो आंईकमन ले जमाय आंसू के पोछेदे”।