सातठन मोहरमन के टुटातोर
6
फेर मय, मेंडा पिला* के किताप चो सातठन मोहरमन ले गोटोक मोहर के टुटातोके दखले, तेबे मय, हुन चारझन जीवमन ले गोटोक, बादरी चड़ललो असन “आव” बलतोके सुनले।
2 तेबे मय गोटोक बीता के पंडरा घोड़ा† ने धनुकांड धरुन बसलोके दखले, आउर हुनके गोटोक मुकुट दिला, तेबे हुन, आउर खुबे लड़ई ने जीततो काजे निकरलो।
3 जिदलदांय हुन दुसर मोहर के टुटालो; तेबे मय दुसर जीव हागदेतो के सुनले “आव”।
4 आउर फेर गोटोक लाल घोड़ा निकरलो, हुन थाने बसलो बीता के गोटोक बड़े खांडा आउर मंजपुर चो अस्तिर के गुचातो हक दिलो, कसनबलले लोगमन आपने-आपने मोरते मारा-मारी होओत।
5 जिदलदांय मेंडा पिला तीसर मोहर टुटालो तेबे तीसर जीव के “आव” बलतोके सुनले, फेर मय दखले, कोनी करेया घोड़ा ने बसुन रये, जेचो हाथे किलो काटा रये।
6 तेबे मय, हुन चारझन जीवमन चो मंजिगता ले कोकई ए बलतोके सुनले, “गोटोक दिन चो भूती पलटा, दुय सोली गउं आउर गोटोक दिन चो भूती पलटा, छय सोली जोंदरी*, मानतर जयतून तेल आउर अंगुर रस के नोकसान नी कर।”
7 जेबे हुन चवथा मोहर टुटालो, तेबे मय चवथा जीव के “आव” बलतोके सुनले।
8 मय, हरदी रंग चो गोटोक घोड़ा के दखले, आउर हुनचो उपरे बसु बीता चो नाव “मोरना” आय। पतालपुर हुनचो पाट-पाट होयसे आउर हुनके मंजपुर चो चार भाग ले गोटोक भाग चो लोगमन के खांडा मारुन, भूक पड़ाउन, रबी उठाउन, आउर बाग-भालुमन ले मारातो चो हक दिलो।
9 जिदलदांय हुन पांचवां मोहर टुटालो, तेबे मय बेदी चो खाले हुनमन चो आत्मामन के दखले, जोनमन के महापरभु चो बचन सांगलो आउर गवई दिलो किरता मारुन रला।
10 हुनमन बड़े राग ले चिचियाउन बलला, “ए पवितर आउर सत मालिक, तुय केबले नियाव नी करसे? आउर मंजपुर ने रतो लोगमन ले आमचो लोउ चो पलटा केबले नी धरसे।”
11 तेबे सपाय के पंडरा फटई दिलो आउर बललो, “डंडिक ठेबा आउर बिसाहा, कसनबलले तुमचो संगवारी कमेयामन आउर भाईमन तुमचो असन जतरा होउक बाचलासे, हुनमन चो बले गनती पुरुक दियास।”
12 जिदलदांय हुन छटवां मोहर टुटालो, तेबे गोटोक बड़े भुंयडोल होतोके दखले,† आउर बेर कामरा असन करेया आउर जोन, लोउ असन लाल होउन गेली,
13 आउर बादरी उपर चो तारामन मंजपुर ने असन घसरला, जसन लेहरा-धुका ले अंजीर रूक चो काचा फर घसरुआय।
14 फेर बादरी कागत गुंडियालो असन सरकली; आउर सबु डोंगरी आउर पानी मंजिगता चो ढिपका बले आपलाहान ठान ले सरकली।
15 तेबे मंजपुर चो राजामन, मुखियामन, पलटन चो बड़े मुखियामन, सवकारमन, बलेयारमन, कमेयामन आउर सबु छुट ने रलो लोगमन बले करपनमन आउर सिलपटमन ने लुकला,†
16 आउर हुनमन डोंगरी आउर सिलपटमन के बलुक मुरियाला, “आमचो उपरे घसरा आउर जोन आसनगादी ने बसलोसे, हुनचो नंजर ले आउर मेंडा पिला चो रीस ले आमके लुकाहा।
17 कसनबलले हुनमन चो रीस ले डरतो महाजंजाल चो दिन ईलीसे,† एदांय कोन कटलाउक सके?”