मोहर लगालो किताप आउर मेंडा पिला
5
आसनगादी ने बसलो महापरभु चो उजा हाथे, दुनो पाट लिखलोर गोटोक किताप के दखले,† जेके सात हार मोहर लगाउन रओत।
2 फेर मय, गोटोक बलबीता सरगदूत के दखले, हुन चिचियाउन बलते रये, “ए किताप चो मोहर टुटातो आउर हुनके उगाड़तो लाईक कोन आसे?”
3 मानतर सरग, मंजपुर आउर तलपुर ने, हुन किताप के उगाड़तो लाईक आउर हुनचो भीतरे दखतो लाईक बले कोनी नी होला।
4 तेबे मय, सुयकुन-सुयकुन गागुक मुरियाले, कसनबलले हुन किताप के उगाड़ुन भीतरे दखतो लाईक कोनी नी मिरला।
5 एके दखुन, धरम-सियानमन ले एकलो मोके बललो “नी गाग; दख, जहूदा बंस चो हुन बीजापुलिया-बाग,* जोन दाउद चो थर आय, जीतलोसे। हुन, किताप चो सातठन मोहरमन के टुटाउक आउर हुनके उगाड़ुक सके।”
6 तेबे मय, हुन आसनगादी आउर चारझन जीवमन आउर धरम-सियानमन चो मंजिगता गोटोक जतरा करलो असन मेंडा पिला के उबलोर दखले, हुनचो सातठन सींग आउर सातठन आंईक रये; जोन गुलाय मंजपुर ने पठालो महापरभु चो सातठन आत्मामन आत।
7 हुन मेंडा पिला एउन आसनगादी ने बसलो महापरभु चो उजा हाथ ले किताप के धरलो।
8 जिदलदांय हुन, किताप के धरलो तेबे हुन चारझन जीवमन आउर चवबीस झन धरम-सियानमन, मेंडा पिला के डंडासरन करला, हुन सबु चो हाथे सारंगी-बाजा आउर धूप ले भोरलो सोन चो बटकामन रये, जोन पवितर लोगमन चो पारथना आय।
9 हुनमन नवा गीत गाउक मुरियाला,
“तुय ए किताप के धरतो आउर एचो मोहर के टुटातो लाईक आस;
कसनबलले तुय जतरा होउन आपलो लोउ ले
लोगमन के सपाय भासा-बोली, जात-बंस आउर राज-राज ले
महापरभु काजे घेनलिसीस,
10 आउर तुय हुनमन के आमचो महापरभु काजे राजामन आउर पुजारीमन बनालिसीस;
आउर हुनमन मंजपुर ने राज करदे।”
11 फेर मय दखले, तेबे हुन आसनगादी आउर जीवमन आउर धरम-सियानमन चो चारो-कुती खुबे सरगदूतमन चो राग सुनले, जोनमन चो गनती कोटी-कोटी रये,†
12 आउर हुनमन चिचियाउन बलते रओत,
“जतरा करलो मेंडा पिला, सकत, धन, गियान, बल, मान, मयमा
आउर जय-जय पावतो लाईक आय!”
13 फेर मय सरग, मंजपुर, तलपुर आउर समदूर चो सपाय जीवमन के आउर जोन बले हुता आसे, हुनमन असन बलतोके सुनले,
“जोन आसनगादी ने बसलोसे, हुनचो आउर मेंडा पिला चो
जय-जय होओ, आउर मान, मयमा, आउर हुनचो राज जुग-जुग रओ।”
14 तेबे चारझन जीवमन “आमीन” बलला, आउर धरम-सियानमन डंडासरन करला।