जूहन्‍ना दखलो दरसन 3

सरदीस चो मंडली काजे चिटी

सरदीस मंडली चो दूत के लिख:

“जेचो लगे महापरभु चो सातठन आत्‍मामन आउर सातठन तारामन आसे, हुन बलेसे, मय तुचो सपाय बुतामन के जानेंसे: तुके जीव आसे बलसोत मानतर तुय मोरलीसीस।

2 उठ, चेत ने रा, आउर जोन काई बले बाचलीसे, हुनके चमकट कर, कसनबलले मय तुचो कोनी बुता के मोचो महापरभु लगे पुरा नी पावले।

3 एईकाजे तुय जोन सिखिया पावलिसीस आउर सुनलिसीस, हुनके सूरता करुन मानते रा आउर मन बोहड़ाव। मानतर तुय नी चेतुन रलीस जाले, मय चोर असन उधापड़े एयंदे आउर तुय जानुक नी सकसे कि मय किदलदांय एयंदे।^†

4 मानतर हव, सरदीस मंडली ने खिंडिक असन लोग बले आसोत जोनमन आपलो फटई के असुद नी करलासोत। हुनमन पंडरा फटई पींदुन मोचो संगे हिंडदे-बुलदे, कसनबलले हुनमन मान पावतो लाईक आत।

5 जोन जीतेदे हुनके असने पंडरा फटई पिंदायदे, मय हुनचो नाव जीवन चो किताप ले केबई नी काटें;^† मानतर हुनचो नाव के मोचो बुआ आउर सरगदूतमन चो पुरे मानेंदे।

6 सुनतो लोगमन धियान ले सुना, आत्‍मा मंडलीमन के काय बलेसे।”

फिलादेलफिया चो मंडली काजे चिटी

7 फिलादेलफिया मंडली चो दूत के लिख: “जोन पवितर आउर सत आय, आउर दाउद चो कुची संगाउआय, जेचो उगाड़लो कपाट के कोनी ढाकुक नी सके आउर ढाकलो कपाट के कोनी उगाड़ुक बले नी सके,^† हुन बलेसे:

8 मय तुचो सपाय बुतामन के जानेंसे; दख, मय तुचो काजे गोटोक कपाट के उगाड़ा छांडलेसे, जेके कोनी ढाकुक नी सके, मय जानेंसे तुचो लगे खिंडिक ची सकत आसे, तेबले बले तुय मोचो बचन के मानलीस आउर मोके नी छांडलीस।

9 दख, मय, सयतान चो मंडली बीतामन के तुचो हाथे करुन देयंदे, जोन खुद के जहूदी आंव बलसोत, मानतर जहूदी नोआत, हुनमन फंद गोटेयायसोत। दख, मय असन करेंदे कि हुनमन तुके पांय पड़दे आउर हुनमन जानदे कि मय तुके मया करेंसे।^†

10 तुय मोचो बचन के धीरजा ले थामलिसीस, एईकाजे मय बले तुके जचई बेरा बचायंदे, जोन मंजपुर ने रतो लोगमन के परखतो काजे गुलाय संवसार ने एतो बिती आय।

11 मय झपके एयंसे, जोन बले तुचो लगे आसे हुनके धरुन रा कि कोनी तुचो मुकुट के झीकुक नी सको।

12 जोन जीतेदे, मय हुनके मोचो महापरभु चो मंदिर ने गोटोक खमा बनायंदे, आउर हुन फेर केबई बाहरे नी निकरेदे। ए खमा ने मय मोचो महापरभु चो नाव आउर मोचो महापरभु चो सहर बललोने महापरभु ले उतरतो नवा जरूसलेम चो नाव लिखेंदे। आउर हुता मय आपलो नवा नाव के बले लिखेंदे।

13 सुनतो लोगमन धियान ले सुना कि आत्‍मा मंडलीमन के काय बलेसे।

लवदीकिया चो मंडली काजे चिटी

14 लवदीकिया मंडली चो दूत के लिख: जोन आमीन आउर पतेयातो लाईक सत गवा आय, आउर हुन, महापरभु बनालो सपाय बितीमन चो मूर आय, हुन असन बलेसे,

15 मय तुचो सपाय बुतामन के जानेंसे कि तुय करा नोहले तोपलो नोआस, नंगत होती कि तुय करा नोहले तोपलो होतीस।

16 कसनबलले तुय उसुम आस; करा नोआस आउर तोपलो बले नोआस एईकाजे मय तुके मोचो टोंड ले उगालेंदेबे।

17 तुय बलसीस, मय धन बीता आउर सवकार आंय आउर मोके काई तीज चो कमी नीआय। मानतर ए नी जानीस कि तुय ओभागी, घिन-घिना, दारदीर, काना आउर नांगड़ा आस।

18 एईकाजे मय तुके सला देयंसे, आईग ने झोकालो सोन के मोचो ले घेन, कि तुय सवकार हो, आउर पंडरा फटई धर कि हुनके पींदुन तुके नांगड़ा रतो चो लाज नी लागो, आउर आंईक ने लगातो काजे काजर धर कि तुय दखुक मुरियाव।

19 मय जोनमन के मया करेंसे, हुनमन के दागा देयसे आउर डंड बले देयसे एईकाजे तुय हरिक ले मन बोहड़ाव।

20 दख, मय दुआरे उबुन कपाट के ठटायंसे कोनी मोचो गोट सुनुन कपाट उगड़ायसे जाले, मय भीतरे जाउन हुनचो संगे भात खायंदे, आउर हुन मोचो संगे।

21 जोन जीतेदे मय हुनके मोचो संगे आसनगादी ने बसायंदे, जसन मय जीतुन भाति मोचो बुआ संगे हुनचो आसनगादी ने बसलेसे।

22 सुनतो लोगमन धियान ले सुना, आत्‍मा मंडलीमन के काय बलेसे।”