जूहन्‍ना दखलो दरसन 2

इफिसुस चो मंडली काजे चिटी

इफिसुस मंडली चो दूत के लिख:

जोन सातठन तारामन के आपलो उजा हाथे धरलोसे, आउर जोन सातठन सोन चो दीयामन चो मंजिगता हिंडेसे-बुलेसे हुन बलेसे,

2 मय तुचो सपाय बुता, मसागत आउर धीरजा के जानेंसे; तुय अडरा लोगमन के खटके मने नी करीस, जोन खुद के मोचो पठालो-लोग आंव बलसोत मानतर नोआत, तुय हुनमन के परखुन फंदी जानलीस।

3 तुय धीरजा धरलिसीस, आउर मोचो किरता तकलीस पाउन-पाउन बले नी थाकलीस।

4 फेर बले, मोके तुचो बिरुद ने बलतोर आय कि तुय मोके आगे चो असन मया नी करीस।

5 सूरता कर कि तुय कहां ले घसरलिसीस, एईकाजे मन बोहड़ाव आउर आगे चो असन बुता कर। मानतर तुय मन नी बोहड़ालीस जाले, मय तुचो लगे एउन तुचो दीया के हुनचो थान ले गुचाउन देयंदे।

6 मानतर हव, तुचो गोटोक गोट मोके नंगत लागली, तुय निकुलियामन^* चो बुतामन ले घिनियाउ आस, जसन मय बले घिनियाउ आंय।

7 सुनतो लोगमन धियान ले सुना, आत्‍मा मंडलीमन के काय बलेसे। जोन जीतेदे, मय हुनके जीवन चो रूक ले फर खाउक देयंदे,^† जोन महापरभु चो सरग राज ने आसे।

इसमुरना चो मंडली काजे चिटी

8 इसमुरना मंडली चो दूत के लिख:

“जोन पईल आउर आखरी आय, जोन मोरुन रये आउर एदांय जीव होलोसे, हुन बलेसे

9 ‘मय तुचो तकलीस आउर गरीबी के जानेसे, फेर बले तुय सवकार आस। जोन लोगमन तुमके बदी देयसोत आउर आपने के, आमी जहूदी आंव बलेसोत हुनमन के मय जानेसे, हुनमन जहूदी नोआत मानतर सयतान^* चो मंडली आत।

10 जोन तकलीस तुके कटलातोर आय, हुनचो ले नी डर। दखा, इबलीस^* तुमीमन ले कोनी-कोनी के जयल घरे परखतो काजे ढकायदे; तुमके दस दिन होओतले तकलीस के कटलातोर होयदे। जीव जाओत ले पतेयातो लाईक रलीस जाले, मय तुके जीवन चो मुकुट देयंदे।

11 सुनतो लोगमन धियान ले सुना, आत्‍मा मंडली के काय बलेसे। जोन जीतेदे, हुनके दुसर मोरना ले नोकसान नी होए’।”^†

पिरगमुन चो मंडली काजे चिटी

12 पिरगमुन मंडली चो दूत के लिख:

“जेचो लगे दुनो पाट लागन खांडा आसे, हुन बलेसे:

13 मय जानेंसे, तुय हुता आसीस जोन थाने सयतान चो आसनगादी आसे। फेर बले तुय मोचो नाव के नी छांडलीस। तुय मोचो उपरे बिसवास करतो के हुन दिनमन ने बले नी छांडलीस, जिदलदांय मोचो पतेयातो गवा अंतिपास के तुमचो मंजी ने मोरते मारला, जोन थाने सयतान रयसे।

14 फेर बले मोके तुचो बिरुद ने बलतोर आय: तुचो थाने असन लोग बले आसोत, जोनमन बिलाम चो सिखिया के मानेसोत, जोन, इसराएलिमन के पाप करातो काजे राजा बालाक के सिखालो कि हुनमन मूरतमन ने चेगालो जिनीसमन के खाओत आउर बेबिचार करोत।

15 आउर तुचो थाने असन लोगमन बले आसोत जोनमन निकुलियामन चो सिखिया के मानेसोत।

16 तुय मन बोहड़ाव, नोहले मय झटके तुचो लगे एयंदे आउर मोचो टोंड ले निकरतो खांडा ले हुनमन संगे लड़ेंदे।

17 सुनतो लोगमन धियान ले सुना, आत्‍मा मंडली के काय बलेसे। जोन जीतेदे, हुनके मय लुकालो मन्‍ना^* के खाउक देयंदे आउर हुनके गोटोक पंडरा पकना बले देयंदे जोन थाने गोटोक नाव लिखलोर रयदे, जेके मिरु बीता के छांडुन आउर कोनी नी जानदे।”

थूआतीरा चो मंडली काजे चिटी

18 थूआतीरा मंडली चो दूत के लिख:

“महापरभु चो बेटा जेचो आंईक ढग-ढकतो आईग असन आउर जेचो तली-पांय झकमकतो पीतल असन आसे, हुन बलेसे:

19 मय तुचो सपाय बुता, मया, बिसवास, सेवा आउर धीरजा के जानेंसे, आउर ए बले जानेंसे कि आगे चो बुतामन ले तुय एबे आगर मसागत करसीस।

20 मानतर मोके तुचो बिरुद ने बलतोर आय: तुय हुन बायले इजेबेल^† के आपलो मंजिगता रउक देयसीस जोन खुद के अगमजानिन आंय बलेसे। हुन मोचो कमेयामन के आपलो सिखिया ले भरमायसे आउर हुनमन के बेबिचार करुक आउर मूरतमन ने चेगालो जिनीसमन के खाउक उकसायसे।

21 मय हुनके बेबिचार करतो ले मन बोहड़ातो काजे मोहका दिले, मानतर हुन, मन बोहड़ातो काजे मन नी करे।

22 दख, मय हुनके दुख चो खटेया धरायंदे आउर जोनमन हुनचो संगे बेबिचार करेसोत, हुनमन बले हुनचो असन बुतामन ले मन नी बोहड़ाला जाले मय हुनमन के बले बड़े भारी तकलीस देयंदे।

23 मय, हुनमन चो चेलामन के मोरते मारेंदे; तेबे सपाय मंडली जानदे कि मन आउर बिचार के मय ची परखु आंय, आउर मय तुमके तुमचो बुता चो हिसाब ने पलटा देयंदे।

24 मानतर तुमी थूआतीरा चो आदो लोग इजेबेल चो अडरा सिखियामन के नी मानास आउर सयतान चो लुकलो भेद के नी सीखलास। मय तुमीमन उपरे आउर बोजा नी तेंगड़े;

25 मानतर हव, जोन तुमचो लगे आसे, हुनमन के मोचो एओतले चमकट धरुन राहा।

26 जोन जीतेदे आउर मोचो मन असन सरासरीदांय ले बुता करते रयदे, मय हुनके जात-जात चो लोगमन उपरे हक संगाउक देयंदे,

27 आउर हुन लोहा चो राजगुबा धरुन हुनमन उपरे राज करेदे। जसन कुमार हांडी के छिदरी-बिदरी करुक सके:^† हुन बले उसने हक पायदे जसन मोचो बुआ ले मय पावलेंसे;

28 आउर मय, हुनके पाहतेया तारा देयंदे।

29 सुनतो लोगमन धियान ले सुना, आत्‍मा मंडलीमन के काय बलेसे।”