जूहन्ना दरसन
दखलो अगमगोट
जूहन्ना दरसन दखलो गोट
1
महापरभु, जीसु किरिस्त परगट होतो गोट, एईकाजे दिलो कि हुन आपलो कमेयामन के जोन गोटमन झटके घटतो बिती आय दखाओ; आउर जीसु किरिस्त आपलो सरगदूत के पठाउन आपलो कमेया जूहन्ना के दखाउन सांगलो।
2 जूहन्ना, महापरभु चो बचन आउर जीसु किरिस्त चो गवा होलो बललोने, काई बले हुन दखलो हुनचो गवई दिलो।
3 धन-धन आय हुन, जोन ए अगमगोट चो बचन के पढ़सोत आउर जोन सुनसोत आउर जोन एता लिखलो बिती गोटमन के मानसोत; कसनबलले हुन गोटमन चो घटतो बेरा लगे अमरलीसे।
सातठन मंडलीमन के जुहार
4 जूहन्ना बाटले आसिया राज चो सातठन मंडलीमन चो नाव ने चिटी:
महापरभु, सातठन आत्मामन आउर जीसु किरिस्त बाटले तुमके दया आउर अस्तिर मिरते रओ।
महापरभु जोन आसे, जोन रये, जोन एउआय;† आउर सातठन आत्मामन जोन महापरभु चो आसनगादी पुरे आसोत,
5 आउर जीसु किरिस्त जोन पतेयातो लाईक गवा आउर मोरुन जीव उठलोमन ने पईलात आय आउर मंजपुर चो राजामन उपरे राज करु आय।†
हुन आमके मया करुआय, आउर हुन आपलो लोउ बाटले आमके पापमन ले छंडालोसे।
6 जीसु आमके गोटोक राज आउर आपलो बुआ महापरभु काजे पुजारीमन बनालोसे;† हुनचो मयमा आउर सकत जुग-जुग होओ, आमीन।
7 दखा, हुन बादरी उपर ले एयसे,† सपाय लोग आउर हुनके भाला ले भूसलो† लोगमन बले हुनके दखदे, आउर मंजपुर चो सबु जात चो लोगमन हुनचो किरता छाती पेटुन-पेटुन गागदे। हव, आमीन।
8 परभु महापरभु, जोन आसे, जोन रये, आउर जोन एउआय,† आउर जेके सबुले आगर सकत आसे, हुन बलेसे “मय ची अलफा आउर ओमेगा बललोने मूर आउर सरती आंय।”
जूहन्ना, किरिस्त चो दरसन पावतोर
9 मय, तुमचो भाई जूहन्ना, जीसु चो दुख, राज आउर धीरजा ने तुमचो संगी आंसे। महापरभु चो बचन आउर जीसु चो गवई होलो किरता मय सजा काटुन-काटुन पानी मंजारे पतमुस नाव चो ढिपका ने रले।
10 परभु चो दिने मोके पवितर आत्मा ईली, आउर मय आपलो पाटकुती तोड़ी राग असन बड़े राग ने बलतोके सुनले,
11 “जोन बले तुय दखसीस हुनके किताप ने लिख, आउर एके सातठन मंडलीमन, बललोने इफिसुस, इसमुरना, पिरगमुन, थूआतीरा, सरदीस, फिलादेलफिया, आउर लवदीकिया ने पठाव।”
12 मोके सांगतो बीता कोन आय बलुन उलटुन दखले, तेबे सोन चो सातठन दीयामन दखले।
सोन चो लामन ने सातठन दीयामन (1:12)
13 हुन दीयामन चो मंजिगता “मनुक चो बेटा”† असन गोटोक माने के दखले, जोन लेड़ी लगले फटई पींदुन रये, आउर छाती ने सोन चो पाट बांधुन रये।
14 हुनचो चूंदी, ऊन आउर करा पकना असन पंडरा रये, आउर हुनचो आंईक ढग-ढकतो आईग असन रये।
15 हुनचो पांय भाटी ने तपालो निरवा पीतल असन रये, आउर हुनचो राग घुमर गरजतो असन रये।†
16 हुन आपलो उजा हाथे सातठन तारामन धरुन रये, आउर हुनचो टोंड ले दुनो पाट खुबे लागन बिती गोटोक खांडा निकरते रये। हुनचो थमना मुंडे बेरा चो बेर असन बरते रये।
17 जसन मय हुनके दखले, उसने मय हुनचो पांय लगे मुछियालो* असन घसरले। हुन आपलो उजा हाथे मोके थापुन बललो “नी डर; मय पईल आउर आखरी आंय आउर मय जीव आंसे;†
18 मय मोरुन रले, एदांय दख, मय जुग-जुग काजे जीव आंसे; मोरना आउर पतालपुर चो कुचीमन मोचो लगे आसे।
19 एईकाजे जोन गोटमन तुय दखलिसीस आउर जोन गोटमन होयसे आउर जोन गोटमन एचो पाछे होउआय, हुन सपाय के लिख
20 बललोने, हुन सातठन तारामन जेके तुय मोचो उजा हाथे दखलीस आउर हुन सातठन सोन चो दीयामन चो भेद, ए आय कि हुन सातठन तारामन, सातठन मंडली चो दूतमन आत; आउर हुन सातठन दीयामन, सातठन मंडली आत।”