बाट-दखाउ किरिस्त
4
किरिस्त आपलो देहें ने डंड पावलो, हुनचेई बिचार के हतियार असन बनाउन आपलो देहें ने डंड पावतो काजे तियार राहा। कसनबलले जोन कोनी देहें ने डंड पावलोसे, हुन पाप ले छंडाय होलोसे।
2 एईकाजे तुमी आपलो बाचलो जीवना के, संवसारी मनुकमन चो लालचमन ने नाई, मानतर महापरभु चो मन-इछा असन जिया।
3 कसनबलले तुमी बिजातीमन असन निलजाहा बुतामन, होस-नंजरेया होतोर, मतवार होतोर, खावरी-फांदा ने रतोर आउर घिन-घिना मूरत सेवा करुन खुबे समया बिजातीमन चो मन-इछा असन बुता करलास, एई खुबे होली।
4 तुमी हुनमन चो निलजाहा बुतामन ने संग नी दियास गुने हुनमन भक्यालासोत आउर तुमचो इजित धरसोत।
5 मानतर हुनमन के, जीव रतोमन आउर मोरलोमन चो नियाव करु महापरभु पुरे हिसाब देउक पड़ेदे।
6 एईकाजे मोरलोमन के बले नंगत खबर सुनालो कि देहें ने, मनुकमन चो नीती ले हुनमन चो नियाव होओ, मानतर आत्मा ने हुनमन महापरभु चो मन-इछा ले जुग-जुग जीव रओत।
महापरभु चो नंगत भंडारी
7 सपाय गोटमन चो सरासरी तूरते होयदेबे, एईकाजे मन-मंडाउन पारथना करतो काजे चेत ने राहा।
8 सबुले नंगत गोट ए आय कि तुमी गोटोक-दुसर ले खुबे मया करा, कसनबलले “मया खुबे पापमन के ढाकुआय।”†
9 नी गुरमुरुन गोटोक-दुसर चो सगा-मान करा।
10 महापरभु बाटले सपाय के बरन-बरन चो बरदान मिरलीसे, तेबे नंगत भंडारीमन असन गोटोक-दुसर चो सेवा करा।
11 सिखातो लोग, असन सिखाओत कि हुन महापरभु चो बचन आय। सेवा करतो लोग, महापरभु चो दिलो सकत ले ची सेवा करोत, जेचोले सबु गोट ने जीसु किरिस्त बाटले महापरभु चो मयमा होओ। मयमा आउर हक, जुग-जुग काजे हुनचेई आय। आमीन।
किरिस्तीमन चो डंड पावतोर
12 ए मोचो मीत भाईमन, आईग असन डंड तुमके परखतो काजे एउन पड़लीसे, एके तुमी, मोचो संगे कसन ने असन होयसे बलुन, नी भक्याहा।
13 मानतर जेबे-जेबे तुमी किरिस्त चो डंड ने भागी होयसास, हरिक होआ, जेचोले हुन मयमा संगे एतो बेरा बले तुमी खुबे हरिक-उदीम होआसे।
14 किरिस्त के मानतो किरता कोनी तुमके बदी देयसे जाले, तुमी धन-धन आहास, कसनबलले महापरभु चो आत्मा, जोन मयमा चो आत्मा आय, हुन तुमचो भीतरे रयसे।
15 तुमीमन ले कोनी माने मारुन, चोरुन, अडरा बुता करुन आउर दुसर चो बुता ने अड़ंगा लगाउन डंड नी पाहा।
16 किरिस्त के मानतो किरता डंड पावलास जाले, लाज नी होआ। मानतर एचई काजे महापरभु चो मयमा करा।
17 कसनबलले हुन समया अमरलीसे, महापरभु आगे आपलो घर-लोग चो नियाव करेदे। पईल आमचेई नियाव होयसे जाले, महापरभु चो नंगत खबर के नी मानतो लोग चो काय गती होयदे?
18 आउर “धरमकारी लोग खुबे खट-खट ले मुक्ति पायसोत जाले,
ओधरमी आउर पापीमन चो काय गती होयदे?”†
19 एईकाजे जोन महापरभु चो मन-इछा ले डंड पायसोत, हुनमन भलई बुता करुन आपलाहान जीव के, सपाय के बनाउ आउर पतेयातो लाईक महापरभु चो हाथे सोपुन देओत।