मंडली धरम-सियानमन आउर जुवानमन काजे सिखिया
5
तुमीमन ले जोन धरम-सियानमन आत, मय तुमके समजायंसे कि मय बले तुमीमन असन गोटोक धरम-सियान आंय आउर किरिस्त डंड पावलो चो गोट काजे गवई आंसे आउर एतो समया ने दखा देतो मयमा चो भागी बले आंय।
2 मय तुमके ए गोट के समजायसे कि महापरभु तुमके सोपलो लोग-गोहड़ा के राखा करा; कोचई बललो काजे नाई आउर अडरा कमानी काजे बले नाई, मानतर मन देउन महापरभु चो मन-इछा के जानुन हरिक मन ले करा।
3 तुमके सोपलो लोगमन उपरे हक नी दखाहा, मानतर हुन लोग-गोहड़ा काजे तुमी गोटोक बाट-दखाउ बना।
4 जिदलदांय राखा करुमन चो मुखिया एयदे, हुदलदांय तुमके केबई नी कुउतो मयमा चो मुकुट देयदे।
5 उसनेचे ए जुवानमन, तुमी धरम-सियानमन चो हक ने राहा, आउर आपने के नानी बनाउन गोटोक-दुसर चो सेवा करतो काजे तियार राहा। कसनबलले
“महापरभु गुमानीमन चो बिरुद करुआय,
मानतर आपने के नानी बनातो लोग के दया करुआय।”†
6 एईकाजे आपने के नानी बनाउन महापरभु चो सकत हाथे सोपुन दियास, तेबे महापरभु, नंगत समया ने तुमचो बाड़ती करेदे।
7 आपलो जमाय फिकिरमन के हुनचो हाथे छांडा, कसनबलले हुन तुमचो धियान करेसे।
8 तुमी चेत आउर चलाक ने राहा; कसनबलले तुमचो बयरी सयतान, नांदतो बीजापुलिया-बाग असन, कोके धरुन खायंदे बलुन डगरायसे।
9 ए गोट के तुमी जाना, संवसार ने तुमचो भाईमन खुबे डंड ने आसोत। एईकाजे बिसवास ने चमकट रउन सयतान चो बिरुद करा।
10 डंडिक समया काजे दुख-तकलीस पावलो पाछे, जमाय बरन ले दया करु महापरभु, तुमके जुग-जुग चो मयमा काजे जीसु किरिस्त संगे गोटकी होतो काजे हागदिलोसे, आउर हुन खुदे तुमके संपुरन आउर चमकट आउर सकत बीतामन बनायदे।
11 हुनचो राज जुग-जुग रओ। आमीन।
सरासरी जुहार
12 सिलवानुस*, जेके मय पतेयातो लाईक भाई समजेसे, हुनचो हाथ ले खिंडिक लिखाउन तुमके उकसायंसे कि महापरभु ची सत दया करुआय, आउर तुमी हुनचेई ने चमकट राहा।
13 तुमचेई असन बेबिलोन ने बाछलो लोगमन, आउर किरिस्त ने मोचो बेटा मरकुस तुमके जुहार बलसोत।
14 मया ले चूमुन गोटोक-दुसर के जुहार करा।
किरिस्त के मानतो तुमी सपाय के अस्तिर मिरते रओ।