बायले-मनुक
3
असने ची, ए बायलेमन, तुमी बले आपलाहान मनुक चो तलेया राहा, एईकाजे कि तुमचो मनुकमन ले कोनी बले महापरभु चो बचन के नी मानसोत जाले,
2 हुनमन तुमचो भक्ति संग चो पवितर चलनी-बुलनी के दखुन, कोचई ले बचन नी सुनले बले, आपलाहान बायले चो नंगत चलनी-बुलनी बाटले परभु के जानदे।
3 तुमचो सजारी होतोर ढोंग काजे नी होओ, बललोने, बेनी पाड़तोर, सोन-रूप पींदतोर, बरन-बरन चो फटई पींदतोर,
4 मानतर तुमचो भीतर चो नंगत गुन बललोने सोज होतोर आउर आपने के नानी बनातोर असन गुन ले सजारी होआ जोन केबई नास नी होए। महापरभु चो नंजर ने ए खुबे मोल चो आय।
5 आगे-जुगे, महापरभु उपरे आसा करतो पवितर बायलेमन, आपने के असने सजारते रओत, आउर आपलाहान मनुक चो तलेया ने रओत।
6 जसन सारा, आपलो मनुक अबराहम चो हुकुम मानुन हुनचो तलेया ने रली आउर हुनके मालिक बलते रली। उसने तुमी बले डर नोहलो भलई करलास जाले, हुनचो बेटीमन बलाय होआसे।
7 उसनेची ए मनुकमन, तुमी बले नंगत बुद ले आपलाहान बायले संगे जीवना-खावना करा, आउर बायले के निमल आउर तुमचो संगे जुग-जुग जीवना चो हकदार आय समजुन इजित-मान करा, तेबे तुमचो पारथना करतोने अड़ंगा नी लगे।
भलई करलो किरता डंड पावतोर
8 सरासरी ने, ए भाईमन, तुमी सपाय, गोटकी सोर ने राहा, दया करा, भाई-दादा असन मया करा, जीव-दुखा, आउर सोज होआ।
9 अडरा चो पलटा अडरा नी करा, झगड़ा खीजतो पलटा झगड़ा नी करा, मानतर हुनचो पलटा हुनके बर दियास। कसनबलले तुमके बर पावतो हकदार होतो काजे हागदिलोसे।
10 कसनबलले
“जोन बले जीव रउक मन करेसे,
आउर नंगत दिन दखुक मन करेसे,
हुन आपलो जीब ले अडरा गोट,
आउर आपलो टोंड ले कपट गोटमन नी गोटेयाओ।
11 हुन अडरा बुता छांडुन भलई ची करो;
हुन सपाय संगे मिलुन-मिसुन रओ आउर अस्तिर चो बाट ने चलो।
12 कसनबलले परभु धरमकारीमन के दखते रयसे,
आउर हुनमन चो पारथना सुनते रयसे।
मानतर परभु अडरा बुता करुमन के पाट करेसे।”†
13 तुमी भलई करतो काजे पुरे रलास जाले, तुमके कोन नोकसान करुक सके?
14 तुमी धरम करलो किरता डंड पायसास जाले, धन-धन आहास; मानतर लोगमन डरालो काजे नी डरा, आउर फिकिर बले नी करा।
15 मानतर किरिस्त के परभु मानुन हुनके आपलो मन ने पवितर समजा। कोनी तुमचो आसा चो बारे ने काई पूछलोने, हुनके सोज आउर डर संगे सांगतो काजे अमदेया तियार राहा,
16 आउर तुमचो मन-चेतन बले सुद रओ, एईकाजे कि किरिस्त ने तुमचो नंगत चलनी-बुलनी के निंदरतो लोग, जोन गोटमन चो बारे ने तुमके बदी देयसोत, हुनमन लाज पड़ोत।
17 तुमी भलई करुन डंड पावतोर, महापरभु चो मन-इछा आय जाले, ए अडरा करुन डंड पावतो ले नंगत आय।
18 कसनबलले किरिस्त आमी सपाय के महापरभु लगे अमरातो काजे
आमचो सपाय पापमन काजे गोटकी ची हार देहें चो हिसाब ले मोरलो,
आउर आत्मा बाटले जीव उठलो।
बललोने, ओधरमीमन काजे
धरमकारी मोरलो।
19 हुनचो पाछे किरिस्त, कयदी रलो आत्मामन के बले नंगत खबर सुनालो,
20 हुदलदांय जोनमन हुकुम नी मानला, महापरभु हुनमन काजे धीरजा धरु रलो। जिदलदांय नूह डोंगा बनाते रलो, हुन डोंगा ने चेगलो किरता खिंडिक असन लोग ची बललोने, आठझन ची पानी ले बाचला।†
21 हुन पानी, बपतिस्मा चो कटार आय, जोन एबे तुमके जीसु किरिस्त चो मोरलोमन ले जीव उठलो बाटले बचायसे; एचो अरथ ए देहें चो मईल के धोअतोर नाई, मानतर सुद मन-चेतन ले महापरभु चो हक ने रतोर आय।
22 किरिस्त सरग ने जाउन महापरभु चो उजा हाथ बाटे बसलो; आउर जमाय सरगदूतमन आउर जमाय हकदारमन आउर सकत बीतामन के महापरभु हुनचो हक ने करुन दिलोसे।