फिलेमोन
काजे पठालो-बीता पउलुस चो चिटी
1
जीसु किरिस्त चो किरता कयदी होलो पउलुस आउर भाई तीमुथियुस बाटले, मीत-भाई आउर संगे सेवा-बुता करु फिलेमोन,
2 आउर आमचो बईन अफिया, बचन सुनातोने आमचो संगवारी अरखिपुस आउर तुचो घरे बसतो मंडली काजे चिटी।
3 आमचो बुआ महापरभु आउर परभु जीसु किरिस्त बाटले तुमके दया आउर अस्तिर मिरते रओ।
फिलेमोन चो मया आउर बिसवास
4 मय पारथना करतो बेरा तुके सूरता करुन महापरभु के रोजे धन-धन करेंसे।
5 कसनबलले मय तुमचो मया आउर बिसवास चो गोट के सुनेंसे जोन परभु जीसु आउर सपाय पवितर लोगमन काजे आसे।
6 मय पारथना करेंसे कि तुय आपलो बिसवास दुसर के सांगतो बेरा किरिस्त बाटले आमके मिरलो सपाय नंगत बरमन चो बारे ने लोगमन पक्का ले जानोत।
7 ए मोचो मीत-भाई, तुचो मया ले मोके खुबे हरिक आउर ढाढ़ुस लागली। तुचो किरता पवितर लोगमन चो जीव के बले खुबे सितर लागली।
उनेसिमुस काजे गुहार
8 एईकाजे किरिस्त भाई असन नंगत गोटमन चो हुकुम तुके देतो हक मोके आसे।
9 तेबले बले मय सियान पउलुस, जोन किरिस्त जीसु चो दूत आउर हुनचो किरता कयदी आंसे, तुके मया ले गुहार करतोर खुबे नंगत लागली।
10 किरिस्त ने आपलो बेटा उनेसिमुस काजे तुके गुहारेंसे जोन जयल घरे मोचो सीस-बेटा होलो।
11 आगे हुन तुचो काई काम चो नी रये, मानतर एदांय हुन, आमी दुनो काजे खुबे काम* चो आसे।
12 हुनकेई बललोने, उनेसिमुस के, जोन मोचो कारजा-गोंदा आय, मय हुनके तुचो लगे बोहड़ाउन देयंसे।
13 मय मन करते रले कि हुन मोचो संगे रओ, आउर तुमचो बाटले मोचो सेवा-सुस्तारा करो। कसनबलले नंगत खबर सुनालो किरता मय कयद ने आंसे।
14 मानतर तुचो मन नोहलो काई बले मोके करुक नी भाये। कसनबलले जोन बले भलई तुय करुआस, बेरपेला ले नाई, मानतर तुचो हरिक मन ले होओ।
15 होउक सके, हुन अमदेया तुचो संगे रतो काजे खिंडिक दिन तुचो ले अलगे होलो।
16 एदांय ले सोजे कमेया असन नाई, मानतर कमेया ले नंगत बललोने, भाई कटार राहा, हुन मोचो मया चो भाई आय। एईकाजे हुन तुचो संगे खुद-भाई आउर किरिस्त भाई असन रओ।
17 तुय मोके आपलो मीत मानसीस जाले, जसन मोचो सगा-मान करुआस उसनेची हुनके बले सगा-मान कर।
18 हुन तुचो काई नोकसान करलोसे, नोहले हुनचो बाटले काई बले लागा आसे जाले, हुनके मय तुके देयंदे।
19 मय, पउलुस मोचो हाथ ले लिखेंसे कि हुनचो लागा मय छुटेंदे। (आउर तुके सांगुक नी पड़े कि तुचो जीवना मय दिलो लागा आय।)
20 ए भाई, परभु चो नाव ने मोके तुचो बाटले नफा होओ कि मोचो जीव के सितर लागो।
21 मय तुचो उपरे भोरसा करुन तुके लिखेंसे आउर मय ए बले जानेंसे, मय जोन बले बलेंदे, हुनचो ले बले आगर तुय करसे।
22 मोचो काजे डेरा दखुन रा, मोके आसा आसे कि तुमचो पारथना ले महापरभु मोके जयल घर ले छंडाउन तुमके सोपेदे।
सरासरी गोट