नंगत चलनी-बुलनी काजे सिखिया
2
मानतर तुय, नंगत सिखियामन के ची सांग।
2 सियान मनुकमन, मन-मंडाउ, सुसार बेबार बीता आउर चेत ने रउ बीता होओत। हुनमन बिसवास करतोने, मया करतोने आउर धीरजा धरतोने चमकट रओत।
3 असने ची सियानीन बायलेमन चो चलनी-बुलनी बले पवितर लोगमन चो असन मान लाईक रओ। हुनमन बदी देतो लोग आउर मतवारीन नाई, मानतर नंगत-नंगत गोटमन सिखातो बीतीमन होओत।
4 तेबे हुनमन जुवान बायलेमन के, आपलो-आपलो मनुक आउर पिलामन के मया करतो काजे समजाउक सकदे।
5 जेचोले जुवान बायलेमन मन-मंडाउ, पवितर, घर चो बुता-भयना करतो बीती, भलई करु बीती, आपलाहान मनुक चो तलेया ने रतो बीती होदे, तेबे महापरभु चो बचन के बदी नी होए।
6 असने ची जुवान मनुकमन के बले समजाते रा कि हुनमन मन-मंडाउक सीखोत।
7 तुय आपलो सपाय भलई बुतामन ले लोगमन काजे बाट-दखाउ बन। तुचो सिखिया सुद, मानतो लाईक, नंगत आउर दोख नोहलो होओ,
8 जेचोले बिरुद करतो लोग के आमके बदी देतो काईची मोहका नी मिरे आउर हुनमन लाज पड़दे।
9 कमेयामन के हुकुम देस कि हुनमन आपलाहान मालिकमन चो हक ने रउन सपाय बरन ले हुनमन के हरिक करोत आउर हुनमन के गोट नी उलटाओत,
10 आउर चोरी-खंगारी नी करोत, मानतर सबु बरन ले पतेयातो लाईक रओत। तेबे सपाय लोग मुक्ति देउ महापरभु चो सिखिया के खुबे नंगत मानदे।
11 कसनबलले महापरभु चो दया सपाय लोगमन चो मुक्ति काजे दखा दिली।
12 हुन आमके सिखायसे कि ओधरम आउर संवसार चो लालच के छांडुन, ए जुग ने मन-मंडाउ, धारनिक आउर भक्ति चो जीवना जीउं।
13 आमी आमचो बड़े महापरभु आउर मुक्ति देउ जीसु किरिस्त के मयमा ले एतो बाट खुबे आसा ले दखते रउंसे।
14 हुन आमके जमाय ओधरम ले छंडाउन सुद करतो काजे आपलो जीव दिलो कि आमके आपलो काजे गोटोक रयत बनाओ, जोन भलई बुता करतो काजे पुरे रओत।
15 ए गोटमन के तुय जमाय हक संगे सिखाव, लोगमन के उकसाव आउर दागा देस। तेबे कोनी तुके हेला नी समजदे।