किरिस्तीमन चो चलनी-बुलनी
3
लोगमन के सूरता कराव कि हुनमन राज करतो बीतामन आउर हक संगातो बीतामन चो हक ने रओत, हुनमन चो हुकुम मानोत आउर सपाय नंगत बुता करतो काजे तियार रओत।
2 हुनमन कोकई बदी नी देओत आउर झगड़ा नी करोत, मानतर सोज होउन सपाय लोगमन संगे मिलुन-मिसुन रओत।
3 कसनबलले आगे आमी बले बुद नोहलो, हुकुम नी मानतो, भकवा आउर सबु बरन चो लालच आउर सुख-भोग चो आकुस ने रलु। आमी ईरका आउर कुचराहा जीवना जीवते रलु। आमी हिनस्ता रलु आउर गोटोक-दुसर चो बयरी रलु।
4 जिदलदांय आमचो मुक्ति देउ महापरभु चो दया आउर लोगमन काजे हुनचो मया के जानलु,
5 हुदलदांय हुन आमके मुक्ति दिलो। ए आमचो करलो धरम-बुतामन ले नाई, मानतर आपलो दया ले आय आउर हुन आमके पवितर आत्मा बाटले धोउन नवा जनम आउर नवा जीव दिलो।
6 महापरभु आमचो मुक्ति देउ जीसु किरिस्त बाटले पवितर आत्मा के फोकाहा ने दिलो,
7 जेचोले आमी हुनचो दया ले धरमकारी होउन जुग-जुग जीवना चो आसा चो हकदार होउं।
8 ए गोट पतेयातो लाईक आय आउर मय मन करेंसे कि तुय ए गोटमन के पक्का ले सांग, कसनबलले जोनमन महापरभु के पतेयालासे हुनमन भलई बुता करतो काजे धियान देओत। ए गोटमन खुबे नंगत आउर लोगमन काजे नफा चो आय।
9 मानतर आपलो थर चो ढोंग दखाउमन, नियम-कानुन चो बारे ने बला-बली होउमन, झगड़ा करुमन, आउर फोकाहा लड़ा-जुजा करुमन ले बाचुन रा, कसनबलले ए सपाय ले काई नफा नीआय आउर ए सबु फोकाहा गोट आय।
10 लड़ा-जुजा करु बीता के गोटोक-दुय हार चेतानी देस, नी होले हुनचो ले अलगे रा।
11 एके जानुन कि असन मनुक गुपलोसे, आउर पाप करुन खुदे दोसी होयसे।
खिंडिक सला आउर सरासरी जुहार
12 मय तुचो लगे अरतिमास नोहले तुखिकुस के पठायंदे। जेबे हुन तुचो लगे एयदे तेबे तुय नीकुपुलिस ने मोके भेटतो काजे एउन दख, कसनबलले सीतकार सरतले मय हुताय रतो काजे पक्का बिचार करलेसे।
13 उकील जेनास आउर अपुलोस के बाट-भाता देउन पठाउन दियास कि हुनमन के बाट ने काई तीज चो उना नी होओ।
14 आमचो लोगमन बले भलई बुता ने पुरे रउक सीखोत कि कोचई उना के पुरा करतोने साका होउक सकदे, तेबे हुनमन चो जीवना फोकाहा नी होए।
15 मोचो संग चो सपाय लोग तुके जुहार बलसोत। आमचो बिसवास किरता आमके मया करतो लोगमन के आमचो बाटले जुहार बलुन देस।
तुमी सपाय के महापरभु दया करो।