तीतुस
काजे पठालो-बीता पउलुस चो चिटी
जुहार
1
मय पउलुस, जोन महापरभु चो कमेया आउर जीसु किरिस्त चो पठालो-बीता आंय, महापरभु चो बाछलो लोगमन के बिसवास आउर धरम चो सत सिखियामन ने बाड़तो काजे उकसायंसे।
2 तेबे हुनमन जुग-जुग जीवना चो आसा ने रदे, जेचो बायदा महापरभु मूर ने करु रये। महापरभु केबई फंद नी गोटेयाये!
3 एईकाजे महापरभु, नंगत समया ने आपलो बचन के नंगत खबर सुनातो बाटले दखालो, जेके आमचो मुक्ति देउ महापरभु चो हुकुम हिसाब ले सुनातो काजे मोके सोपलोसे।
4 बिसवास करतोने मोचो सत बेटा, तीतुस के: बुआ महापरभु आउर आमके मुक्ति देउ किरिस्त जीसु बाटले दया आउर अस्तिर मिरो।
धरम-सियान चो गुनमन
5 मय तुके एईकाजे करेते* ने छांडुन ईलेसे कि तुय बाचलो बुतामन के पुरा कर आउर मोचो सांगलो असन सहर-सहर चो मंडलीमन ने लोगमन के बाछुन धरम-सियानमन बनाव।
6 धरम-सियान दोख नोहलो आउर गोटकी बायले चो मनुक होतोर आय। हुनचो बेटा-बेटीमन परभु के पतेयातो लोग होतोर आय, एड़जा आउर निलजाहा नी होतोर आय।
7 कसनबलले मंडली चो मुखिया, महापरभु चो भंडारी होतो किरता दोख नोहलोर होतोर आय। हुन आगर होतो बीता नोहले रीसाहा नोहले मंदाहा नोहले झगड़ाहा आउर झीका-खाउ नी होतोर आय।
8 मानतर हुन सगा-मान करु बीता, भलई करु बीता, मन-मंडाउ बीता, नंगत नियाव करु बीता, पवितर आउर धीरजा बीता होतोर आय,
9 जोन सत धरम-सिखिया हुनके सिखाउ रओत, हुनचेई ने चमकट रओ। तेबे हुन सत सिखिया के पक्का ले सिखाउन लोग के उकसाउक सकेदे, आउर गोट उलटाउमन के ओगाय करुक सकेदे।
फंदी धरम-गुरुमन ले बाचुन राहा
10 कसनबलले खुबे लोग एड़जा, टाबरी आउर ठगतोमन आत। एमन ले जुगे करुन जहूदीमन आत बललोने, खतना करलो लोग।
11 एमन के ओगाय करतोर आय। एमन ठगा-फारसी करुन, आपलो कमई काजे फंद गोट सिखाउन घर-घर के सत्यानास करसोत।
12 हुनी करेतेयामन ले गोटोक झन, जोन हुनमन चो अगमजानी आय, हुन बललोसे, “करेतेयामन सपाय फंदीमन, दुसट पसुमन आउर ठगरा-खावरामन आत।”
13 ए गवई सत आय। एईकाजे तुय, हुनमन के दागा देउन चेतानी देस कि हुनमन बिसवास ने पक्का होओत,
14 आउर जहूदीमन चो कहनी-कटावमन आउर हुन मनुकमन चो हुकुममन ने मन नी लगाओत, जोनमन सत के मुरे नी मानोत।
15 सुद लोगमन काजे सपाय बानी सुद आय, मानतर असुद आउर नी पतेयातो लोगमन काजे काई बले सुद नोआय, हुनमन चो बुद आउर मन-चेतन, दुनो असुद आय।
16 हुनमन बलसोत, आमी महापरभु के जानु, मानतर हुनमन चो बुता ले जानुक होयसे कि महापरभु के नी जानोत, कसनबलले हुनमन घिन-घिना आउर हुकुम नी मानतो लोगमन आत। हुनमन काई नंगत बुता करतो लाईक नोआत।