सरासरी दिनमन चो चेतानी
3
मानतर तुय ए गोट के सूरता करु रा कि सरासरी दिनमन ने खुबे डंड-तकलीस होयदे।
2 कसनबलले आपलेई देहें चो लालच करुमन, धन चो लालचीमन, ढोंगाहामन, गुमानीमन, महापरभु के बदी देउमन, आया-बुआ चो गोट नी धरुमन, खाउ निंदरुमन, असुदमन,
3 मया नी करुमन, खेमा नी करुमन, दोख देउमन, धीरजा नी धरुमन, उबढंगरीमन, भलई बुता के बईर करुमन,
4 निमकधुसा, झकाड़ीमन, ठगा-खायामन होदे आउर महापरभु के मया करतो लोग नाई मानतर संवसार चो सुख-भोग के मन करतो लोग होदे।
5 हुनमन भगत चो भेंस धरदे, मानतर भक्ति चो सकत के नी मानदे; असन लोगमन ले लापी रा।
6 ए हुनीमन आत जोनमन छन-छन मन-मन होतो आउर बरन-बरन चो पाप ने पड़लो निमल बायलेमन चो घरे खुसनाय ओलुन फुसियायसोत आउर हुन बायलेमन के आपलो हक ने करसोत।
7 ए बायलेमन सीखते ची रयसोत, मानतर सत गियान के केबई नी चिताओत।
8 जसन जन्नेस आउर जमबरेस*, मोसा चो बिरुद करला, उसनेची एमन बले सत चो बिरुद करसोत, एमन चो बुद गुपलीसे आउर बिसवास के छांडलासोत।
9 मानतर हुनमन चो ए नाट खुबे दिन नी चले, कसनबलले जसन जन्नेस आउर जमबरेस चो पाप बुतामन सपाय जानला, उसनेची एमन चो पाप बुतामन के बले जानदे।
तीमुथियुस काजे चोखा सिखिया
10 मानतर तुय, मोचो सिखिया देतो के, चलनी-बुलनी के, मन-इछा के, बिसवास के, धीरजा धरतो के, मया करतो के, डाटा-टेवा कटलातो के जानलीसीस।
11 अंताकिया, इकुनियुम आउर लुसतरा ने मोचो उपरे पड़लो डाटा-टेवा आउर दुख-डंड के तुय जानीस, मानतर परभु हुन सपाय दुख-डंड ले मोके बचालो।
12 जोन बले किरिस्त जीसु चो भक्ति करुन जीउक मन करसोत, हुन जमाय के डाटा-टेवा होयदे ची, ए गोट सत आय।
13 मानतर दुसट लोग आउर भरमातो लोग, दुसर के जटुन आउर दुसर ले धोका खाउन आउर खुबे अडरा होते जादे।
14 मानतर तुय जोन गोटमन के सीखलीसीस आउर पतेयालीसीस, हुन गोटमन ने चमकट रा, तुय जानीस कि हुन सिखियामन कोचो ले सीखलीसीस,
15 आउर तुय पिलादांय ले पवितर सास्तर के जानसीस, जेचोले तुय, जीसु किरिस्त के पतेयाउन मुक्ति पावतो बुद पावसे।
16 पवितर सास्तर, महापरभु चो उकसालो किरता लिखला आउर ए सिखातो काजे, समजातो काजे, सुदरातो काजे आउर लोगमन के धारनिक बाट दखातो काजे नफा आय।
17 एचोले महापरभु चो लोग सिद होओत आउर सपाय भलई बुता करतोने पुरे रओत।