किरिस्त चो नंगत पाईक
2
एईकाजे ए मोचो बेटा, तुय किरिस्त जीसु चो दया ने बरसक हो,
2 आउर खुबे गवामन चो पुरे तुय मोचो ले सुनलो गोटमन के, पतेयातो लाईक आउर सिखाउक जानतो लोगमन के सोपुन देस।
3 किरिस्त जीसु चो नंगत पाईक* असन मोचो संगे डंड पाव।
4 जिदलदांय कोनी पाईक जुद ने जायसे, हुन आपने के पाईक-काम ने लगालो मालिक के हरिक करतो काजे जायसे, आउर हुन आपने के संवसार चो काई बुतामन ने नी पाड़े।
5 खेल-भाटा ने खेलतो बीता नीती-नियम ले नी खेललोने इनाम नी पाए।
6 मसागत करतो खेतीयार के आपलो उबज चो बाटा आगे ची मिरो।
7 मोचो सांगतो गोट के लेक कर, तेबे परभु तुके सपाय गोट के समजतो बुद देयदे।
8 दाउद चो थर ने जनमलो आउर मोरलोमन ले जीव उठलो जीसु किरिस्त के सूरता कर, हुनचेई नंगत खबर मय सुनायंसे।
9 एई नंगत खबर सुनालो किरता मय अडरा बुता करतो लोग असन खुबे डंड पायंसे, आउर मोके ओधरमी असन सिकरा ने बांदलासे, मानतर महापरभु चो बचन के कोनी बांदुक नी सकोत।
10 एईकाजे मय महापरभु चो बाछलो लोगमन काजे डंड पायंसे कि हुनमन बले किरिस्त जीसु ने मिरतो मुक्ति के जुग-जुग चो मयमा संगे पावोत।
11 ए गोट सत आय कि
आमी हुनचो संगे मोरलुसे जाले,
हुनचो संगे जीव बले पड़वां;
12 आमी धीरजा ले सहते रलोने
हुनचो संगे राज बले करवां,
आउर आमी हुनके छांडलोने
हुन बले आमके छांडेदे,
13 आमी पतेयातो लाईक नी रले बले,
हुन पतेयातो लाईक रयसे,
कसनबलले हुन आपलो गुन के* छांडुक नी सके।
नंगत कारिगिर
14 एई गोटमन हुनमन के सूरता कराव आउर महापरभु के गवा करुन हुनमन के तिकार कि गोटमन चो काट-छाट नी करोत, एचोले काई नफा नीआय मानतर हुनचो ले सुनतो लोगमन नसुआत।
15 तुय, महापरभु चो पतेयातो लाईक नंगत कारिगिर असन बुता कर आउर सत बचन के नंगत बरन ले सुनाव, तेबे लाज पड़ुक नी होए।
16 फोकाहा चो बला-बली गोटमन ले बाचुन रा, कसनबलले असन लोगमन महापरभु चो भक्ति ले लापी होते जादे।
17 आउर हुनमन चो गोट कुउलो घाव फसरलो असन बिगरेदे। हुमिनयुस आउर फिलेतुस उसने लोग आत,
18 एमन किरिस्तीमन चो जीव उठतोर सरली बलुन सत के भुलकलासोत, आउर कोनी-कोनी लोगमन चो बिसवास के भुलकायसोत।
19 तेबले बले महापरभु बनालो पाया, चमकट रउआय, आउर हुन पाया ने ए चीना दिलोसे, “परभु आपलो लोग के चिताउआय”† आउर “जोन बले परभु चो नाव धरेसे, हुन ओधरम ले बाचुन रओ”।
20 बड़े घरे सोजे सोन-रूप चे नाई मानतर रूक आउर माटी चो बले हांडी-कुंडरी रयसे, कोनी-कोनी मान काजे आउर कोनी-कोनी घिन-घिना बुता काजे।
21 कोनी आपने के पाप बुतामन ले सुद करलोने, हुन आपलो मालिक काजे मान, पवितर आउर सपाय भलई बुतामन काजे काम पड़तो असन हांडी-कुंडरी होयदे।
22 जुवान-समो बेरा चो अडरा लालचमन के छांड, आउर सुद मन ले परभु चो नाव के धरतो लोगमन संगे धरम, बिसवास, मया आउर अस्तिर ले मिलुन-मिसुन रा।
23 बुद नोहलो असन फोकाहा बला-बली ने नी रा, कसनबलले तुय जानीस एचोले झगड़ा उबजुआय।
24 परभु चो कमेया के झगड़ाहा नी होतोर आय, मानतर हुन सपाय संगे सोज, नंगत सिखातो बीता आउर धीरजा धरतो बीता होतोर आय।
25 हुन आपलो बयरीमन के सोज मन ले समजाओ। कोन जाने महापरभु हुनमन के मन बोहड़ातो मोहका देओ कि हुनमन बले सत के जानोत,
26 तेबे सयतान चो फांदा ले बाचदे आउर महापरभु चो मन-इछा के पुरा करतो काजे चेत ने रदे।