तीमुथियुस
काजे पठालो-बीता पउलुस चो दुसर चिटी
मूर चो गोट
1
महापरभु चो मन-इछा ले, किरिस्त जीसु चो पठालो-बीता, मय, पउलुस: किरिस्त जीसु ने बिसवास करुन जीवन पावतो बायदा के सांगतो काजे मोके पठालोसे।
2 मोचो लाडरा बेटा तीमुथियुस के चिटी: तुके बुआ महापरभु आउर आमचो परभु जीसु किरिस्त बाटले बर, दया आउर अस्तिर मिरते रओ।
पतेयातो लाईक बनतो काजे उकसातोर
3 मय रात-मंजन पारथना करतो बेरा तुके सूरता करुन महापरभु के धन-धन करेंसे, जेचो सेवा मय आपलो बाप-दादीमन चो नीती ले सुद मन-चेतन ले करेंसे।
4 मोचो जातोदांय तुय आंसू फुटालो गोट के सूरता करुन मय रात-मंजन तुके दखतो काजे जीव उखड़ायंसे कि तुके दखुन खुबे हरिक होयंदे।
5 मोके तुचो हुन, कपट नोहलो बिसवास चो बले सूरता पड़ेसे, जोन आगे तुचो दीदी लोईस आउर तुचो आया जूनीके ने रली, आउर मय पक्का जानेंसे कि हुनी बिसवास तुचोने बले आसे।
6 एईकाजे मय तुके सूरता करायंसे कि महापरभु चो हुन बर, जोन मोचो हाथ थापलोके तुके मिरलीसे, हुन बर के आउर नंगत ले बाहार।
7 कसनबलले महापरभु आमके डरतो आत्मा नाई, मानतर सकत, मया आउर मन-मंडाउ चो आत्मा दिलोसे।
8 एईकाजे तुय आमचो परभु आउर मय जोन हुनचो काजे कयदी होलेसे, तुय आमचो गवई देतो काजे लाज नी हो, मानतर महापरभु तुके दिलो सकत हिसाब ले नंगत खबर बिगरातो काजे मोचो संगे तकलीस पाव।
9 महापरभु आमके मुक्ति दिलो आउर आमके हुनचो पवितर लोग होतो काजे हागदिलो, आउर ए आमचो करलो बुता बाटले नाई; मानतर हुनचो उआट आउर दया बाटले आय, जोन किरिस्त जीसु ने आमके जुग चो मूर ले आगे मिरलीसे,
10 एदांय आमचो मुक्ति देउ किरिस्त जीसु मंजपुर ने एउन मोरना के नास करलो आउर जीवन आउर केबई नी नसतो जीव के नंगत खबर बाटले दखालो।
11 एई नंगत खबर के बिगरातो काजे मोके बचन सुनातो बीता, पठालो-बीता आउर सिखातो बीता बनालोसे।
12 एईकाजे मय डंड पावले बले लाज नी होएं, कसनबलले हुनके मय जाने, जेके मय पतेयाउ आंय, आउर मय पक्का जानें कि जोन बरमन मोके सोपलोसे, हुनके सरासरी दिन अमरतले राखा करुक सके।
13 जोन चोखा गोटमन तुय मोचो ले सुनलिसीस, हुनके किरिस्त जीसु ने रतो बिसवास आउर मया ले आपलो बाट दखाउ बनाव।
14 आउर आमचो भीतरे रतो पवितर आत्मा चो सकत ले तुके सोपलो हुन सत चो राखा कर।
15 तुय तो जानीस, आसिया चो सबु लोग मोके छांडला आउर हुनमन ने फूगिलुस आउर हिरमुगिनेस बले आत।
16 उनेसिफुरुस खुबे हार सेवा-सुस्तारा करुन मोचो जीव के अस्तिर करलो आउर मोके जयल घरे ढाकलो के बले लाज नी होलो, परभु हुनचो घर चो लोग के दया करो।
17 मानतर जिदलदांय हुन रोम सहर ने ईलो, तेबे खुबे डगराउन भाति मोके भेटलो।
18 मोचो जितरो सेवा-सुस्तारा हुन इफिसुस ने करलोसे हुनके तुय पक्का ले जानीस, नियाव चो दिने परभु चो दया हुनचो उपरे होओ।