4
महापरभु आउर किरिस्त जीसु, जोन जीवतमन आउर मोरलोमन चो नियाव करु आय, हुनके साकी बनाउन आउर हुनचो फेर एतोके आउर राज के सूरता कराउन मय तुके हुकुम देयंसे,
2 कि बचन सुनातोने तुय किदलीदांय होओ तियार रा, आउर हुनमन के पतेयातो लाईक आउर दागा देउन उकसाव आउर अमदेया धीरजा ले सिखाते रा।
3 कसनबलले असन समया एयदे, जेबे लोगमन चोखा सिखिया के सुनुक मन नी करदे, मानतर आपन के जसन सुनुक भायसे उसने सिखातो गुरुमन आपलाहान काजे डगरादे,
4 आउर सत के नी सुनुन कहनी-कटावमन के मन लगाउन सुनदे।
5 मानतर तुय सपाय गोटमन ले बाचुन रा, तकलीस उठाव, नंगत खबर के बिगराव आउर तुके सोपलो सेवा के पुरा कर।
6 एदांय मय चेगावा असन बेदी पुरे उलदी होयंसे, आउर मोचो मोरतो बेरा लगे अमरलीसे।
7 मय नंगत लड़ई लड़लेसे, मोचो परातोर मय सारलेसे आउर बिसवास चो रखेया करलेसे।
8 धारनिक चो मुकुट मोके मिरेदे, जेके धरमी आउर नियाव करु परभु मोके हुन दिने* देयदे, आउर मोकेई चे नाई, मानतर हुन सपाय के बले देयदे, जोन हुनचो फेर एतो बाट के मया ले दखसोत।
तीमुथियुस काजे खबर
9 मोचो लगे तूरते एतो बिचार कर।
10 कसनबलले देमास, ए संवसार चो लालच ने पड़ुन मोके छांडुन थिसलुनीके ने गेलो, आउर करेसकेंस, गलाती ने आउर तीतुस, दलमतिया ने गेलोसे।
11 एकलाय लूका मोचो संगे आसे। तुचो संगे मरकुस के धरुन आव; कसनबलले मोचो सेवा करतोने हुन खुबे साहरा करेदे।
12 तुखिकुस के मय इफिसुस ने पठालेसे।
13 तुय एतोदांय तरोआस ने करपुस चो घरे मय छांडलो कोट* के आउर कितापमन के आउर जुगे करुन चामड़ी ने लिखलो किताप के बले धरुन आव।
14 सिकंदर घड़वा मोके खुबे तकलीस करलोसे, परभु हुनके हुनचो बुता हिसाब ले पलटा देयदे।
15 तुय बले हुनचो ले बाचुन रा, कसनबलले हुन आमचो सुनालो सिखियामन चो खुबे बिरुद करलोसे।
16 पईल हार मोचो नियाव होतो बेरा कोनी मोचो साका नी होला, मानतर सपाय मोके छांडला। महापरभु एचो पलटा नी धरले नंगत होती!
17 मानतर परभु मोके सकत देउन साका होलो कि मोचो बाटले नंगत खबर खुबे बिगरो, आउर सपाय बिजातीमन बले सुनोत। एईकाजे मोके बीजापुलिया-बाग चो टोंड ले बचालो।
18 आउर परभु मोके सपाय अडरा बुतामन ले बचायदे, आउर आपलो सरग राज ने नंगत ले अमरायदे। हुनचो मयमा जुग-जुग होते रओ। आमीन।
सरासरी जुहार
19 पिरस्किला, अकविला आउर उनेसिफुरुस चो घर लोग के जुहार।
20 इरासतुस, कुरिंथुस ने ठेबलो, आउर तुरफिमुस के बियाद आसे गुने मिलेतुस ने छांडले।
21 सीतकार चो आगे निकरुन एतो बिचार कर। जूबुलुस, पुदेंस, लिनुस आउर कलोदिया, आउर जमाय भाईमन बाटले तुके जुहार।
22 परभु तुचो आत्मा संगे रओ आउर तुमचो उपरे दया करते रओ।