तीमुथियुस काजे पउलुस चो सला
4
एदांय पवितर आत्मा सरसरा बलेसे, सरासरी दिनमन ने खुबे लोग फंदी आत्मामन आउर देव-भूत चो सिखियामन के मानुन बिसवास के छांडदे।
2 ए हुन फंदी मनुकमन चो कपट किरता होयदे, जोनमन चो मन-चेतन रग-रगा तपालो लोहा ने दागलो असन आसे,
3 हुनमन बिया नी करतो आउर कोनी-कोनी जिनीसमन के नी खातो सिखिया देदे; जोन जिनीसमन के महापरभु एईकाजे बनालोसे कि सत के चितातो बिसवासीमन धन-धन करुन खाओत।
4 महापरभु चो बनालोर सपाय जिनीस नंगत आय, आउर धन-धन करुन धरले कोनी जिनीस नाई बलतो लाईक नोआय।
5 कसनबलले महापरभु चो बचन आउर पारथना ले सपाय सुद होयसे।
6 भाईमन के ए नंगत गोटमन के सूरता कराते रलीस जाले, तुय किरिस्त जीसु चो नंगत सेवक होसे; एई बिसवास आउर नंगत सिखिया ले तुचो पाला-पोसा होयसे।
7 भक्ति ने मन लगाव आउर डोकरीमन चो भक्ति नोहलो घड़लो कहनीमन ले लापी रा।
8 कसनबलले देहें चो कसरत* ले खिंडिक नफा होयसे, मानतर महापरभु चो भक्ति* करलोने सपाय गोट ने नफा होयसे, एबे चो जीवना आउर एतो समया चो जीवना काजे एई बायदा होलीसे।
9 ए गोट सत आउर सपाय बरन ले मानतो लाईक आय।
10 आमचो आसा जीवता महापरभु उपरे आसे, जोन सपाय मनुकमन के मुक्ति देउआय, जुगे करुन बिसवासीमन के, एईकाजे आमी खुबे मसागत करुन दखुंसे आउर दुख उठाउंसे।
11 ए सपाय गोटमन चो हुकुम देस आउर सिखाते रा।
12 कोनी तुचो समो के हेला नी समजोत; मानतर तुय बिसवासीमन काजे बचन, चलनी-बुलनी, मया, बिसवास आउर पवितर जीवन ने गवई बन।
13 मोचो एओतले लोग पुरे बचन पढ़ुन सुनाते, महापरभु चो गोट समजाते आउर सिखाते रा
14 तुके मिरलो बर चो बारे ने तुय फिकिर नोहलो नी रा, जोन बर तुके अगमगोट बाटले धरम-सियानमन चो हाथ थापलोके मिरलीसे।
15 हुन गोटमन के धियान देउन उसनेची करते रा आउर हुताय चमकट रा कि तुचो बाड़ती सपाय लोग के दखा देओ।
16 आपलो चलनी-बुलनी के आउर आपलो सिखिया के बले खुबे लेक कर, एई गोटमन ने चमकट रा, कसनबलले तुय असन करते रलीस जाले आपने के आउर तुचो बचन सुनतो लोग के बले मुक्ति करुक सकसे।