मंडलीमन चो मुखिया
3
ए गोट सत आय कि जोन मंडलीमन चो मुखिया होउक मन करेसे, हुन खुबे नंगत बुता करुक मन करेसे।
2 मंडली मुखिया: दोख नोहलोर, गोटकी बायले बीता, सुसार बेबार बीता, मन-मंडाउ, इजित पावतो बीता, सगा-मान करतो बीता, आउर पक्का सिखातो बीता होतोर आय।
3 मुखिया: मतवार, मारा-पेटा करतो बीता, झगड़ाहा आउर धन चो लालची नी होतोर आय। मानतर सोज होतोर आय।
4 हुन, आपलो घर चो नंगत दखा-राखा करतो बीता आउर आपलो पिला-झीलामन के मान संगे हक ने संगातो बीता होतोर आय।
5 जेबे कोनी मनुक आपलेई घर चो दखा-राखा करुक नी सके, फेर हुन कसन करुन महापरभु चो मंडली चो दखा-राखा करुक सकेदे?
6 मुखिया, नवा बिसवासी नी होओ, नोहले हुन सयतान असन गुमान करुक सके आउर डंड पायदे।
7 हुन गांव-पारा ने नंगत नाव कमालो बीता होतोर आय नोहले बदी पाउन सयतान चो फांदा ने फसेदे।
मंडली ने सेवक
8 उसनेची मंडली-सेवकमन बले सुसार बेबार बीता होतोर आय। हुन दुय ठेठेया, मतवार आउर लंद-फंद ले धन कमातो बीता नी होतोर आय;
9 मानतर बिसवास चो भेद के सुद मन-चेतन ले जगारित करु बीता होतोर आय।
10 हुनमन चो चलनी-बुलनी के आगे परखोत, आउर काई दोख नी पावलोने, हुनमन मंडली ने सेवा बुता करोत।
11 उसनेची सेवकमन चो बायलेमन बले सुसार बेबार बीती होतोर आय; दुसर के दोख देतो बीती नाई मानतर मन-मंडाउ, सपाय गोट ने पतेयातो-लाईक होतोर आय।
12 मंडली सेवक गोटकी बायले चो मनुक आउर आपलो पिला-झीलामन आउर घर-दुआर चो नंगत दखा-राखा करु बीता होतोर आय।
13 कसनबलले जोन सेवकमन नंगत ले आपलो बुता करुक सकोत, हुनमन आपलो काजे बड़े पन आउर किरिस्त जीसु चो बिसवास ने ढाढ़ुस पायसोत।
बड़े भेद चो गोट
14 मोके आसा आसे, मय तुचो लगे झटके एयंदे, तेबले बले ए गोटमन तुके एईकाजे लिखेंसे,
15 मय गमले तुय जानुन रा कि महापरभु चो घरे कसन चलनी-बुलनी होतोर आय, कसनबलले जीवत महापरभु चो मंडली सत चो पाया आउर खमा आय।
16 आउर एथा काई दुक-पुछ नीआय कि भक्ति चो भेद कितलो बड़े-भारी आय, बललोने
किरिस्त देहें-रूप धरलो,
पवितर आत्मा हुनके धरमकारी दखालो,
आउर हुन सरगदूतमन के दखा दिलो,
हुनचो नंगत खबर बिजातीमन चो मंजिगता सुनाला।
संवसार चो लोगमन हुनके सतपतेयाला,
आउर हुनके महापरभु मयमा संगे सरग ने नीलो।