आराधना करतो नीती
2
एदांय सबुले आगे, मय मन करेंसे कि तुमी, सपाय लोगमन काजे गुहार, पारथना, सुमरना आउर धन-धन करा,
2 राजामन आउर हक संगातो सपाय लोगमन काजे बले पारथना करा, तेबे आमी अस्तिर ले भक्ति चो नंगत जीवना जीउक सकवां।
3 ए पारथना आमचो मुक्ति देउ महापरभु के नंगत लागुआय आउर भाउ बले आय,
4 हुन असन मन करेसे कि सपाय लोगमन चो मुक्ति होओ आउर हुनमन सत के पक्का जानोत।
5 कसनबलले महापरभु गोटकी ची आय, आउर महापरभु आउर मनुक चो मंजी गोटकी चे आसे, बललोने जीसु किरिस्त, जोन मनुक बनलो।
6 हुन सबु चो छंडावा काजे आपने के मोल हिसाब ने दिलो, एचो गवई महापरभु नंगत समया ने दिलो।
7 एईकाजे बिजातीमन के बिसवास आउर सत सिखातो काजे महापरभु मोके बचन सुनातो बीता आउर पठालो-बीता बनाउन बाछलोसे। मय सत सांगेंसे, फंद नी गोटेयायें।
8 मय मन करेंसे सपाय जगा ने मनुकमन, रीस आउर झगड़ा नोहलोर पवितर हाथमन के उठाउन पारथना करोत।
9 उसनेची बायलेमन बले मन-मंडाउन सादा फटई ले आपने के छुकनाय सजारोत, बरन-बरन चो बेनी पाड़ुन, सोन आउर मोती आउर महांग फटई पींदुन सजारी नी होओत।
10 कसनबलले महापरभु चो भक्ति करतो बायलेमन, भलई बुतामन ले सजारी होतोर नंगत आय।
11 बायलेमन काईके होओ चिमनाय ले धियान देउन सीखोत।
12 मय हुकुम देयंसे कि कोनी बायले, कोनी मनुक के नी सिखाओत आउर हुकुम नी चलाओत मानतर ओगाय रओत।
13 कसनबलले महापरभु आदम के आगे आउर पाछे हव्वा के बनालो।
14 आउर आदम के नाई, मानतर बायले के सयतान फुसियालो गुने पाप ने पड़ली।
15 तेबले बले बायले मन-मंडाउन बिसवास, मया आउर पवितर ने चमकट रली जाले पिलामन जनमाउन मुक्ति पायदे।