तीमुथियुस
काजे पठालो-बीता पउलुस चो पईल चिटी
मूर चो गोट
1
आमके मुक्ति देउ महापरभु आउर आमचो आसा, किरिस्त जीसु चो हुकुम ले, किरिस्त जीसु चो पठालो-बीता पउलुस बाटले,
2 बिसवास ने मोचो सत बेटा तीमुथियुस काजे चिटी:
बुआ महापरभु आउर आमचो परभु किरिस्त जीसु, तुके जीव दुखोत आउर दया आउर अस्तिर करते रओत।
फंदी गुरुमन ले बाचुन राहा
3 जसन मय मकिदुनिया राज ने जातोदांय तुके गुहारु रले, तुय इफिसुस ने रउन हुता चो लोग के हुकुम देस कि दुसर सिखियामन के नी सिखाओत
4 आउर घड़लो कहनीमन आउर नी सरतो थरमन चो गोटमन के धियान नी देओत, जेचोले बला-बली ची होउक होयसे: आउर महापरभु चो उआट के पुरा होउक नी देयसे जोन बिसवास बाटले आय।
5 ए हुकुम चो रस एई आय कि तुमके सुद-मन आउर नंगत मन-चेतन आउर कपट नोहलोर बिसवास ले मया उबजो।
6 ए सिखिया के छांडुन खुबे लोगमन फोकाहा बला-बली होउन-होउन आसोत।
7 आउर हुनमन नियम-कानुन चो गुरुजी होउक मन करसोत, मानतर आपलो नंगत ले बललो गोट के बले आपने समजुक नी सकसोत।
8 आमी जानुसे, कोनी मनुक नियम-कानुन हिसाब ले नंगत चललोने, हुनचो काजे नियम-कानुन नंगत चे आय।
9 आमी ए बले जानुसे, नियम-कानुन धरमकारी काजे नोआंय मानतर ओधरमीमन, उड़गाड़ीमन, महापरभु के नी मानतो लोगमन, पापीमन, असुद आउर भक्ति नी करतो लोगमन, माय-बाप के मोरते मारतो लोगमन, माने-मारामन
10 बेबिचारीमन, मनुक के मनुक राकतो लोगमन, मनुक के बिकतो लोगमन, फंदीमन, फंद किरिया खातो लोगमन, आउर असने ची जोन नंगत सिखिया चो बयरीमन आत।
11 ए सिखिया सबुले बड़े धन-धन महापरभु चो मयमा पावतो नंगत खबर हिसाब ले आय, जेके मोके सोपलोसे।
महापरभु चो दया काजे धन-धन
12 मय आमचो परभु किरिस्त जीसु के धन-धन करेंसे, जोन मोके बुता करतो सकत दिलोसे आउर मोके सतपतेयालो गुने आपलो सेवा-बुता सोपलोसे।
13 मय आगे बदी देतो बीता, डाटा-टेवा करतो बीता आउर इजित धरतो बीता रले, तेबले बले महापरभु मोचो उपरे दया करलो, कसनबलले मय बिसवास नी करते रले गुने नी जानुन ए अडरा बुतामन करते रले।
14 आमचो परभु चो दया मोके खुबे मिरली आउर हुन बिसवास आउर मया बले जोन किरिस्त जीसु ने आसे।
15 ए गोट सत आउर सपाय बरन ले मानतो लाईक आय कि किरिस्त जीसु पापीमन के मुक्ति देतो काजे संवसार ने ईलो, जोनमन ले सबुले बड़े पापी मय आंय।
16 मानतर महापरभु मोके एईकाजे दया करलो कि मोचो असन खुबे अडरा पापी ने जीसु किरिस्त आपलो अमदेया धीरजा धरतो गुन दखाउक सको, कसनबलले जोन लोग जुग-जुग चो जीवना पावतो काजे परभु के सतपतेयादे, हुनमन काजे मय गोटोक बाट-दखाउ होयंदे।
17 जुग-जुग जीव रतो राजा, दखा नी देतो आउर गोटकी चे महापरभु, हुनचो मान आउर मयमा जुग-जुग होते रओ। आमीन।
18 ए बेटा तीमुथियुस, तुचो बारे ने सांगुन रलो अगमगोट हिसाब ले मय तुके एई हुकुम के सोपेंसे कि तुय फंद सिखिया चो बिरुद लड़ते रा।
19 तुय बिसवास आउर नंगत बुद* के थामुन रा, जेके छांडलो किरता खुबे लोग आपलो बिसवास के बुड़ाला।
20 हुनीमन ले हुमिनयुस आउर सिकंदर बले आत, जोनमन के डंड पावतो काजे मय सयतान के सोपुन दिले कि हुनमन महापरभु के निंदरुक नी सीखोत।