पापी मनुक बललोने, नास चो बेटा
2
ए भाईमन, आमचो परभु जीसु किरिस्त चो एतोर आउर हुनचो लगे आमचो जुहा होतो चो बारे ने आमी तुमके गुहारुंसे।
2 कसनबलले परभु चो दिन लगे अमरलीसे बलुन, कोनी आत्मा नोहले बचन नोहले चिटी के आमचो बाटले आय बिचारुन, तुमी आपलो मन के उधापड़े छीची-बीची नी करा आउर नी डरा।
3 काई नीती ले कोचई ले धोका नी खाहा, कसनबलले जिदलदांय ले लोगमन महापरभु चो पुरे एड़जा नी होदे आउर ओधरमी मनुक बललोने बिपती चो बेटा दखा नी देये, हुदलदांय ले हुन दिन नी एये।
4 हुन सपाय के बिरुद करुन आपने के सबुले बड़े देव आंय बलेदे आउर महापरभु चो मंदिर ने बसुन आपने के महापरभु बलाय होयदे।
5 काय तुमके सूरता नीआय, मय तुमचो संगे रलो बेरा ए गोटमन के सांगते रले।
6 तुमी जानेसाहास, हुनके आपलो समया ने ची एतो काजे एबे काय ठेबायसे।
7 कसनबलले ओधरम चो भेद एबे बले आपलो बुता करते रयसे, एबे गोटोक ठेबाउ बीता आसे, जिदलदांय हुन ठेबाउ बीता गुचेदे, हुदलदांय
8 हुन ओधरमी दखा देयदे; हुनके परभु जीसु टोंड ले फूकुन मोरते मारेदे आउर आपलो फेर एतो मयमा-उजर ले हुनके लाकड़ी उलटायदे।
9 हुन ओधरमी चो एतोर, सयतान चो बुता हिसाब ले सबु बरन चो फंदी सकत, चीना आउर अचरित बुता संगे होयदे,
10 आउर नास होतो लोगमन, हुन ओधरमी चो सबु बरन चो धोका ले ची नास होदे। कसनबलले हुनमन सत के मया नी करला, जेचोले हुनमन चो मुक्ति होती।
11 एईकाजे महापरभु हुनमन चो उपरे गोटोक भरमातो बिती सकत के पठायदे कि हुनमन फंद के पतेयाओत,
12 तेबे जितरो लोग सत के नी पतेयाओत मानतर ओधरम ले हरिक होयसोत, हुनमन सपाय डंड पावदे।
बिसवास ने चमकट राहा
13 ए भाईमन, परभु मया करतो लोगमन, आमके तुमचो काजे परभु के अमदेया धन-धन करतोर आय, कसनबलले महापरभु तुमके संवसार चो मूर ले बाछलो कि तुमी पवितर आत्मा बाटले पवितर होउन सत के पतेयाउन मुक्ति पाहा,
14 आउर आमचो नंगत खबर सांगतो बाटले तुमके हागदिलो कि तुमी आमचो परभु जीसु किरिस्त चो मयमा पाहा।
15 एईकाजे भाईमन, बिसवास ने चमकट राहा आउर जोन-जोन गोट, बचन आउर चिटी बाटले आमचो ले सीखलासाहास हुनके मानते राहा।
16 आमचो परभु जीसु किरिस्त खुदे आउर आमचो बुआ महापरभु जोन आमके मया आउर आपलो दया ले अमदेया चो अस्तिर आउर नंगत आसा दिलोसे,
17 हुन तुमचो मन के अस्तिर करो आउर तुमके सपाय नंगत बुता आउर बचन ने चमकट बनाओ।